ЫДЖЫД ЛУН УЛЫС ВОЧЫН

Енмӧс пыдди пуктытӧм войтыр вӧчисны Вочын ас ногӧн «Ыджыд лун». Кӧсйисны эськӧ спектак пуктыны, да ворсан кӧлуйыс эз вӧв. Вой шӧр кадын чукӧртчӧмаӧсь гражданаяс школаӧ, ставыс чукӧрмӧма вӧлі морт ветымын кымын — кызыс том йӧз. Пӧрысь йӧз воліс этша. Лыддьысьӧм бӧрын ӧти ветлысь-мунысь морт висьталіс йӧзлы «Ыджыд лун» праздничайтӧм йылысь. Сы бӧрын заводитісны гудӧкасьны, ворсны. Нёль час мысти праздник помасис Интернационал сьылӧмӧн. Уна том йӧз каитчӧмаӧсь аскинас волытӧмысь.

Мӧд сикаса празднуйтӧм вӧлӧма со кутшӧм: вой шӧр кадын жӧ пӧрысь пемыд йӧз мӧдӧдчӧмаӧсь вичкоӧ. Копрасьӧмаӧсь час куимӧдз. Школа дорті мунігӧн зэв ёна ёрччӧмаӧсь, сьӧласьӧмаӧсь. «Сӧтанаяс пӧ чукӧртчӧмаӧсь». Вичкоын сьывсьӧм бӧрын «Ыджыд луныд» кузя юӧмаӧсь тырыс самӧкур. Самӧкур бӧрын кутчысьӧмаӧсь косясьны, вирныс пузьӧма. Дугӧдны кось кӧсйӧма милиционер, да абу вермӧма, асьсӧ нӧйтӧмаӧсь; муртса удитӧма ӧшиньӧд чеччыштны. Исполкомса председатель локтӧм бӧрын косьыс ньӧжйӧник дугдӧма. Госторгса приказчиклысь плешсӧ поткӧдӧмаӧсь. Сідз и колӧ, эн ю! Со кыдзи мунӧма праздникыд пемыд йӧзлӧн.

В. С.