КОМИ КЫВ УЧРЕЖДЕННЬӦЯСӦ СЮЙӦМ ЙЫЛЫСЬ
Ӧні быдсяма пӧлӧс ас сёрниа йӧз миян Сӧвет Республикаын мырсьӧны ас кывйӧн учрежденньӧясын удж нуӧдӧм вӧсна. Миян Коми обласьтын татшӧм уджӧ сідзи жӧ кутчысьӧны. Сыктывдінкарын ӧні лӧсьӧдӧма курс. Велӧдчӧны комиӧн лыддьысьны-гижны коми служащӧйяс. Курс вылӧ волӧны морт 40−50 гӧгӧр. Гижны-лыддьысьны, коді сьӧлӧмсьысджык кутчысьӧма, прамӧя нин велалӧмаӧсь. Комиӧ делопроизводство пӧртан комиссия мырсьӧ канцелярскӧй формаяс лӧсьӧдӧм вылын да инструкцияяс комиӧ вуджӧдӧм (переведитӧм) вылын, медым эськӧ сійӧ формаяс сертиыс кокньыдджык лоӧ кутчысьны вӧлӧсьтъясын служитысьяслы. Роч делопроизводствоад зэв уна кыв нин пырӧма мукӧд пӧлӧс сёрниысь, сэсся эмӧсь сэтшӧм роч кывъяс (терминъяс), кодъясӧс унджык деревняса рочьясыс асьныс оз тӧдны, сӧмын тӧдӧны велӧдчӧмджыкъясыс. Сы понда роч формаястӧ да законъястӧ зэв сьӧкыд коми кывйӧн лӧсьӧднытӧ. Рочьяс моз жӧ миянлы лоӧ, дерт, лӧсьӧдны канцелярскӧй терминъяс.
Первойтӧ эськӧ, дерт, оз ло, гашкӧ, гӧгӧрвоана да, водзӧ кежлас, кор нин пырасны сэтшӧм терминъясыс коми кыв пӧвстас, лоӧ гӧгӧрвоана.
Рочьяс унаысь серавласны: мыйла пӧ ас кывъяныд сюянныд роч кывъяссӧ? Гижӧй пӧ дзик ас кывнаныд. Миян литературнӧй кыв вылын найӧ серавлӧны, оз думыштны сы йылысь — ӧд миян литературнӧй кывйыд сӧмын на тайӧ воясӧ чужны пондіс, эз на весиг удит сӧвъявмыныс. Роч литературнӧй кывйыд пӧрысьмытӧдзыс нин олӧма — весиг унджык роч крестьянаыс оз гӧгӧрвоны, сы мында нин сюялӧмаӧсь ас кыв пӧвстаныс мукӧд пӧлӧс кывъяс. Веськыда кӧ шуны, миян кывъяд роч кывйӧ дорысь этшаджык на пырас мукӧд пӧлӧс кывйыд.
Коми йӧз пӧвстын унаӧн эмӧсь ас кыв лӧсьӧдӧм понда тӧждысьысьяс, сӧмын найӧ оз тӧдны, кыдзи-мый отсавны комиӧ пӧртан комиссиялы. Татшӧм тӧждысьысьяслы колӧ эськӧ ӧні жӧ гижавны сэтшӧм роч терминъяссӧ, кутшӧмъяс унаысьджык паныдасьлӧны найӧ учрежденньӧса гижӧдъясын да лӧсьӧдны ас кыв ногӧн коми терминъяс. Сідзжӧ колӧ эськӧ вуджӧдавны коми кывйӧ инструкцияяс сиктъясын да вӧлӧсьтъясын уджалысьяслы (лесник-коннӧйлы, милиционеръяслы, сельсӧветъяслы, волисполкомъяслы, мӧда-мӧдлы отсасян комиссияяслы). Быдсяма пӧлӧс татшӧм гижӧдъяссӧ ыстыны коми нига лэдзанінӧ.
