КОМИ ОБЛАСЬТУВСА ИСПОЛНИТЕЛЬНӦЙ КОМИТЕТЛӦН ТШӦКТӦМ

Междуведомственнӧй Метрическӧй Комиссия тшӧктӧм серти пабрик-заводъясын, тӧргуйтанінъясын метрическӧй мурталанъясӧн (мераясӧн) муртасьӧмъяс йылысь (торгово-промышленная газета № 12 от 15 января 1924 года), Коми Обласьтувса Исполнительнӧй Комитет тшӧктӧ:

1) Быд государственнӧй, кооперативнӧй и ас вылысь тӧргуйтысьяслы Коми Обласьтын октябр 1-й лунсянь тайӧ 1924 воӧ дугдыны муртасьны важ ногӧн; сійӧ лунсянь заводитны муртасьны выль метрическӧй мурталанъяс ногӧн: кузьта, пасьта, судта, сьӧкта мурталігъясӧн, быдсяма тӧвар да сёян-юан ньӧбигъясӧн, вузалігъясӧн — уна кӧть этша вузассьӧ ли, ньӧбсьӧ ли.

СОДТӦД: кодъяс кӧсйӧны выль ногӧн муртасьны срок вотӧдз, позьӧ вуджны кӧть кор мырдӧн тшӧктытӧг.

2) Муяс да мукӧд пӧлӧс местаяс сійӧ сроксянь муртавны сідзжӧ метрическӧй мурталанъясӧн.

3) Тайӧ тшӧктӧм оз касайтчы пызьӧн да няньӧн базаръяс вылын, ярмангаяс вылын тӧргуйтысьясӧдз, кодъяс вузасьӧны лавкатӧг: додьясысь, мешӧкъясысь да мукӧдторъясысь, кытчӧдз оз ло та йылысь выльысь тшӧктӧм.

4) Крестьянскӧй кӧзяйствоын лишаланторъяс (сырье) позьӧ ньӧбны да вузавны важ мурталан ногӧн юнь 1-й лунӧдз 1925 воын.

5) Медым эськӧ кокньыдджыка лоӧ выль ногӧн муртасьӧмӧ вуджӧмыс, удж нуӧданінъясын тшӧт-лыд нигаясын позьӧ нуӧдны октябр 1 лунӧдз тайӧ воын важ ногӧн и выль ногӧн, мед эськӧ срок вотӧдзыс лоӧ лючки лӧсьӧдӧма тшӧт нуӧдан уджыс.

6) Срок вотӧдз быдӧнлы, кодлы тайӧ тшӧктӧмыс инмӧ, колӧ лӧсьӧдны выль метрическӧй мурталанъяс да вескияс.

7) Кутшӧм тӧваръяс, сёян-юанъяс, мукӧдпӧлӧсторъяс чукӧртӧмӧн бура кӧртавлӧма да вес лыдсӧ важ ногӧн мурталӧмӧн пасйӧма — позьӧ вузавны важ мурталӧм ногӧн.

8) Тайӧ тшӧктӧм кывзытӧмъяс пондасны кыскысьны суд улӧ 107, 108, 141 ст. Уголовнӧй Закон чукӧр серти.

9) Мед тайӧ тшӧктӧм серти уджсӧ пондасны нуӧдны — колӧ видзӧдны Административнӧй отделлы да милициялы.

Обисполкомса Председатель пыдди Юркин.

Секретар Нахлупин.

Май 19 лун 1924 во

3779 №

Сыктывдінкар.