КОЛӦ СЁРНИТНЫ, ГИЖНЫ КОМИӦН

Ме кывзыла бокисянь да, коми кывтӧ миянлысь зэв ёна омӧльтӧны, сералӧны — дерт, ёнджыка рочьяс, унаысь кывлывлан и комияссянь. Шуӧны: «Кутшӧм пӧ тайӧ кыв, сӧмын пӧ гудралӧны, сӧрӧны, таысь мисьтӧм кывйыд пӧ сэсся му вылас абу.» Мед эськӧ сӧмын кӧ рочьяс шуӧны, налы тӧдтӧгыд, кужтӧгыд, дерт, кажитчӧ мисьтӧмӧн, лӧсьыдтӧмӧн. Дивӧыд кутас, зэв унаӧн сідз шуасьӧны комиясыс да, асьныс эськӧ бурджыка оз кужны сёрнитны рочӧн ни комиӧн, серавны зэв кужӧны.

Кӧть деревняын, кӧть карын пыран учрежденньӧясӧ, зэв шоча кывлывлан комиӧн сёрнитӧм, быдлаын сёрнитӧны рочӧн. Мыйла нӧ сідз? Быдӧн жӧ ӧд тӧдӧны: Сӧвет власьт тшӧктӧма ӧні непӧштӧ комиӧн сёрнитны, весиг став гижӧм уджсӧ комиӧн нуӧдны.

Кӧн нӧ миян Коми Обласьтса коми удж нуӧдан комиссияыс, узьӧ али кулӧма? Оз тай нинӧм уджав-а. Гашкӧ, уджыс сылӧн помасьӧма нин да, ставыс нин артмӧма да? Ошкыны сійӧс омӧля уджалӧмсьыд оз позь.

Эм тай эськӧ Обласьтса карад Коми нига лэдзанін да, сэні кесъясьысьясыд зэв зіля тільсьӧны, уджалӧны да. Видзӧдтӧ, мыйта нин коми нига лэдзисны! Вӧлі кӧ эськӧ тырмымӧн сьӧм, нӧшта не сы мында на лэдзисны! Сэсся этша на налы отсасьысьясыс.

Эм карад газет лэдзанін (редакция). Тшӧктӧны газеттӧ лэдзны коми кывйӧн (коми газет), унджыкысь на петӧ роч кывйӧн. Бара жӧ абу коми отсасьысьясыс.

Ме шуа гӧгӧрвоысь, синма-пеля коми йӧзлы: мӧвпыштӧй, ті ӧд зэв тӧданныд, кутшӧм омӧль олӧмыд коми пемыд йӧзыдлӧн, гашкӧ, тшӧтш асланыд бать-мамлӧн, чой-воклӧн. Ставыс сійӧ дзик сы вӧсна, мый быдсяматорйӧн на вылын ыджыдалӧны тӧдтӧм кывйӧн (рочӧн). Роч кывйыд ӧд некытчӧ оз пышйы. Войдӧр мед быдӧн гӧгӧрвоасны, кыдзи колӧ лӧсьӧдны аслыныс бурджык, кокниджык, долыдджык олӧм, сы бӧрын сэсся кӧть кутшӧм кывйӧн сёрнит, ов, некод оз кут. Тӧдтӧм кывнад олӧмыд некодӧс водзӧ оз нуӧд. Тайӧ, коми йӧз, энӧ вунӧдӧй!

Н. Ч.