ВӦВЛЫТӦМ ГАЖ
Вӧлӧсьтъясын, грездъясын, сиктъясын сура (храм) праздниктӧ быдлаын зэв лӧсьыдтӧма коллялӧны, медся том йӧз: самӧкур, кода сур (сакарӧн сулӧдӧма) юӧны сэтшӧмӧдз — мореыд сэк кажитчӧ пидзӧсӧдзыд. Сэсся тышкасьӧны, ёрччӧны лёкногӧн, ывлавыв пасьтала равзӧны. Дзик жӧ сідз праздникъястӧ коллялӧны и Выльгортын. Та йылысь унаысь нин вӧлі гижлӧма «Югыд туяд». Ӧні эськӧ ме сы йылысь эг нин кӧсйы гижны да, лои на тай, со мый понда: кольӧм праздник — Степан лун, 9 майын, муніс неуна лӧсьыдджыка. Бурджыка праздник коллялӧмыд меным зэв сьӧлӧм вылӧ воӧ, дай, ме чайта, быдӧнлы воас.
Веськыда шуны: гажа (юыштӧм) йӧзыд эськӧ вӧліны жӧ да, омӧльторйыд, гырысь косьясыд да морт виӧмыд эз вӧв. Буракӧ, ӧтитор пыкис сэтшӧм уджсьыд. Со сійӧ мый вӧлі: рытнас карсянь воисны том йӧз чукӧр, вайисны духӧвӧй музыка.
Сэсся музыканад тай пондісны кыдз гремитны, пырысь-пыр жӧ чукӧртчисны ворсанінад, школа керка дінӧ, зэв уна йӧз: поснияс, ныв-зон, гырысьяс — гашкӧ сюрс морт. Музыка гремитӧ вылын, балкон вылын, видзӧдны, кывзыны зэв лӧсьыд. Том ныв-зон ёна йӧктісны, пӧрысьджыкъяс йӧктісны «камаринскӧйӧс» музыка серти. Сэсся сэн жӧ, балкон вылас, сьылысь чукӧр сьылісны коми сьыланкывъяс. Ӧтпыр шуны: вӧлі «вӧвлытӧм гаж». Сідзнад гажӧдчисны вель дыр. Том йӧзыд быдӧн ылӧдчисны сійӧ гажнад, сы вӧсна и эз вермы лоны омӧльторъясыд.
Музыкаӧн ворсысьяслы ыджыд «Коми пасибӧ».
Да, ӧні ме думайта да: татшӧм гажъясыд кӧ эськӧ быдлаын, быд праздник вылын вӧлі, уна жӧ эськӧ бур вермис лоны, ёна жӧ эськӧ бур вылӧ велалісны том йӧзыд. Абу! Дыр на лоӧ овны сэтшӧм гажъясӧдзыд, а кор-нибудь да лоас. Олӧмаяс, дерт нин, оз лӧсьӧдны, оз рӧскодтӧ вӧчны; том йӧз пондасны быдтор гӧгӧрвоны, пондасны яндысьны бать-мам, пӧль-пӧч мисьтӧма олӧм вылас, пондасны лӧсьӧдавны уна пӧлӧс бур гажъяс. Вывті юӧмъясыд, зык-косьыд, лёк уджъясыд сэки бырӧны. Миян рабочӧй-крестьянскӧй власьт сы йылысь ёна тӧждысьӧ, сӧмын вӧчны быдтор оз на вермы: сьӧмыс оз тырмы. Кор овмӧдчас, сьӧмаджык лоас, сэки дзик вӧчас.
Том йӧз! Тшӧтш отсалӧй регыдджык сэтшӧм бур гажъяссӧ вӧчавны. Чукӧрталӧй сы вылӧ сьӧмтӧ: ворсӧмӧн, спектакӧн, ӧктысьӧмӧн, чукӧрӧн удж уджалӧмӧн дон вылӧ. Став сьӧмтӧ мыйсюрӧ, кытчӧсюрӧ видзӧм пыдди пуктӧй сэтчӧ. Ӧд томдырйиыд жӧ, дзордзаліг дырйиыд гажӧдчыныд, дай тшӧтш эськӧ мукӧдсӧ пӧрысьджыкъяссӧ, поснияссӧ гажӧданныд. Вот эськӧ сэки любӧыд лоӧ быдӧнлы!
Выльгортса.
