ИД КӦЙДЫС ВЕСАЛӦМ

Выльгортын йӧзыд тавоӧдз зэв на омӧля весавлісны кӧйдысъястӧ, пыр на важ моз кӧдзлісны зыр йылысь тӧлӧдӧм кӧйдысӧн. Зыр йывсьыд тӧлӧдӧмыд видзӧдны эськӧ зэв мича, да уна пӧлӧс ёг на сэтчӧ кольӧ: тӧрича, нявда, ситурун, мукӧдтор. Зӧрйыд на уна кольӧ, оз тӧвзьы, сэсся идйыд регыдӧн и зӧрйӧссяс.

Тыдалӧ, йӧзыд пондісны казявны — бур кӧйдыссьыд няньыд бурджык, мичаджык артмӧ.

Таво поводнӧй унаӧн нин весалісны ид кӧйдыстӧ «Триер» машина вылын. Машинаыд нёль пельӧ весалӧ (сортуйтӧ). Нырыс петӧ мича, гырысь тыра тусьясыс — сійӧ ӧд, дерт, бур кӧйдыс лоӧ. Мӧд сортыс бара на туйӧ кӧйдыс вылӧ, мукӧд кык сортыс кӧйдыс вылад оз нин туй, позьӧ сёйны либӧ скӧтлы вердны. Весалігад мукӧд идсьыс пӧшти джынйыс усьӧ туйтӧмӧ, войдӧр быдӧн сійӧ весьшӧрӧ вошліс му вылад. Арталан кӧ, уна жӧ нянь вошліс асланым йӧйлунла да гӧгӧрвотӧмла!

«Триер» машинаыд тай эськӧ зэв бур машина, да оз жӧ вермы став зӧрсӧ весавны. Висьталӧй, агрономъяс: мый вӧсна оз весав став зӧрсӧ? Гашкӧ, машинаыс торксьӧма кыткӧ? Гашкӧ, весавнысӧ огӧ на кужӧй?

Н. Ч.