ТУЙ ВЫЛЫН ЮРАЛЫСЬЯС, УЗЯННЫД АЛИ КУЛӦМАӦСЬ?

Выльгорт кузя, Выльгортсянь карӧдз, кар вывті вӧлӧн мунны оз позь: сибдан няйтас, петны он вермы. Оз ӧмӧй нӧ позь кыдзкӧ вӧчыштны, лӧсьӧдыштны, сэтчӧ ӧд зэв уна сьӧм оз нин мун. Либӧ видзӧдлӧй пристань дорӧ, мый сэні вӧчсьӧ! Колӧ кӧть лыскӧн вольсавны сибдаланінъяссӧ, гӧгӧрыс канавасӧ весавны. Онӧ ӧмӧй тӧдӧй, кымын вӧв сибдылӧ, доймалӧ, мучитчӧ, дзоньвидзалунсӧ воштӧ; кӧзяинъясыс мыйта ёрччӧны, сӧт-мать лэдзӧны, ёрӧны тіянӧс — «мед пӧ проклятӧйясӧс чӧрт нуас, мыйта пӧ жалӧванньӧ босьтӧны, туй вывті мунны оз позь».

Колӧ жӧ гырысь юралысьяслы ёнджыка видзӧдлыны татшӧмтор вылас да тшӧктыны кодлы колӧ, мед регыдджык лӧсьӧдасны сибдаланінъяссӧ.

Сэсся туй вылын быдлаын, веськыда муас, уттӧг, туплясьӧ пос кер, сісьмӧ весьшӧрӧ, ветланінсӧ тупкӧ, канаваяссӧ тыртӧ. Веськыда кӧ шуны, мыжаыс сэн кер примитысьыс, сылы ӧд примиттӧдзыс войдӧр колі тшӧктыны мичаа чукӧрӧ, ут вылӧ, тэчны туй бокас, сэки эськӧ эз сісьмы керйыд, — мыйлакӧ некодӧс оз мыждыны? Сідзнад ӧд олӧмыд оз ладмы.

Туй видлалысьӧс (дорожнӧй смотрительӧс), эм кӧ сійӧ — эг нин аддзылӧй тулысбыдӧн; колӧ тшӧктыны: служитны кӧ, мед служитас лючки, оз кӧ — мед весасяс, сэтшӧм кесъясьысьыд мӧд сюрас!

Крестьянин.