***
Коми Обласьтувса Исполнительнӧй Комитет Президиумлӧн шуӧм восьтавны Обласьтувса, Каръясувса, Вӧлӧсьтувса Видласян-Тӧдмӧдалан Комиссияяс (
Сы вӧсна: 1) медым тайӧ 1924ʼ воӧ ыджыда коставлытӧг пыр ӧтмоза тӧдмӧдавны турун-нянь быдмӧм йылысь лым улысь петӧмсянь йӧртӧдӧ да зорӧдъясӧ воштытӧдз, тӧдмӧдавны арся сю кӧдза йылысь лым улӧ сюртӧдз, артавны вогӧгӧрся быдтас-пуктас воӧм йылысь, 2) ӧтувтавны, чукӧртавны став тӧдмалӧм, арталӧмсӧ уна пӧлӧс йӧзӧн да 3) кыйӧдны сы туйӧд лючки удж нуӧдӧм сэтшӧм удж нуӧданін тшӧктӧм индалӧм серти, Коми Обласьтувса Исполнительнӧй Комитет Ц. С. У. индалӧм-туйдалӧмъяс серти — 1924 во март 28-ӧд лунӧ, № 3650 д. тшӧктӧ:
1. Сӧмын Обласьтувса Статбюроӧс лыддьыны турун-нянь, пуктас быдмӧм, чукӧртӧм йылысь тӧдмалысь, арталысь удж нуӧданінӧн. Мукӧд удж нуӧданінъясын татшӧм удж оз ков нуӧдны: лёк кындзи бурсӧ немтор сійӧ оз сет.
2. Обласьтувса Статбюролы да сійӧ карувса, вӧлӧсьтувса юкӧд уджалысьяслы ёна колӧ кыйӧдны, медым бокӧвӧй удж нуӧданінсянь некутшӧм тӧдмалӧм, арталӧм нянь-турун, пуктас быдмӧм, чукӧртӧм эз вӧв. Казялан кӧ, колӧ вужнас нетшыштны сійӧс, бырӧдны ныр сюйӧм йӧз уджӧ; мӧдысь кежлӧ мед оз торкны йӧзлысь удж не сідз удж нуӧдӧмӧн.
3. Кодлыкӧ кӧ колӧ тӧдмавны нянь-турун, пуктас быдмӧм, воӧм Коми обласьтын, мед йитчас, гижӧдчас Обстатбюрокӧд, пырас сійӧ уджалысьяс пиӧ.
4. Бокысь пырӧм уджалысьяслысь уджсӧ, удж нуӧдӧм сертиыс либӧ удж нуӧданін тшӧктӧм вӧснаыс, бӧрыннас позьӧ торйӧдны Статбюро уджсьыс, вӧчны, быттьӧ торъя удж.
5. Сы вӧсна, медым нянь, турун, пуктас быдмӧм, воӧм тӧдмалӧм муніс ӧти ногӧн, ӧти туйӧд, ӧтилаын, быд Волисполком бердӧ, карувса Исполком бердӧ, Сыктывдінкарын Обисполком бердӧ восьтавны Видласян-Тӧдмӧдалан Комиссияяс.
6. Комиссияӧ пырӧны:
а) Вӧлӧсьтувса комиссияӧ: 1) Волисполкомын юралысь, 2) агроном пиысь кодкӧ, 3) финагент, 4) страхӧвӧй агент, 5) кооперациясянь бӧрйӧм морт да 6) волстатистик либӧ сы пыдди уджалысь морт.
СОДТӦД: Вӧлӧсьтувса Видласяна-Тӧдмӧдалана Комиссияын юралысьнас колӧ лоны Волисполкомса юралысьлы; гижысьнас — волстатистиклы либӧ сы пыдди уджалысьыслы.
б) Карувса Комиссияӧ: 1) Уисполкомын юралысь, 2) карса видз-му удж уджнуӧданінысь кодкӧ, 3) фининспектор, 4) страхӧвӧй агент, 5) сельскокӧзяйственнӧй кооперацияысь кодкӧ да 6) Обстатбюросянь уджалысь морт.
в) Обласьтувса Комиссияӧ: 1) ӧти мортӧн Обисполкомсянь, Обфинотделсянь, Обземуправленньӧсянь, Обстрахсянь, Р. К. У.-сянь, Сельскокӧзяйственнӧй Кооперациясянь да Обстатбюросянь.
7. Комиссия аслас сёрнитігъясас, тӧлкуйтігъясас вермас корны тӧдысь йӧзӧс.
8. Колӧ, медым Комиссияын уджалысьяс удж помасьтӧдзыс оз вежласьны; медым ӧти пӧлӧс йӧз уджсӧ нуӧдасны помӧдзыс.
9. Волстатистикъяс да Обстатбюросянь карса уполномоченнӧйяс вермасны комиссиякӧд не лӧсьӧдчыны.
10. Комиссияӧн шуӧм-вӧчӧмъяс гижны Обстатбюроӧн ыстӧм лӧсьӧдӧм ног.
11. Комиссиялы став уджсӧ нуӧдны, кыйӧдны уджалӧмсӧ Обстатбюро тшӧктӧм серти.
12. Став Уисполкомлы да Волисполкомлы Обласьтын регыдджык восьтавны Видласян-Тӧдмӧдалан Комиссияяс, отсасьны сійӧ Комиссияыслы уджалігчӧжыс мыйӧн верман. Удж тайӧ зэв ыджыд да зэв колан.
13. Тайӧ шуӧмлысь вӧчӧмсӧ медым кыйӧдас Обстатбюро.
Коми Обласьтувса Исполкомын юралысьыс пыдди: Юркин В.
Гижысьыс: Нахлупин.
