НЫВБАБА-КРЕСТЬЯНКА!

Воис тулыс. Воас гожӧм. Удж крестьяналӧн юр выв тырыс лоас, медся нин уна тэнад, крестьянка. Му вылад уджалан-уджалан, йӧрад уджалан — гортад локтан, сыысь уна удж: мӧстӧ корсь да лысьты, тасьті-паньтӧ мыськы, джоджтӧ чышкы, пу, пӧжав, песлась... челядьыд бӧрдӧны-равзӧны: коді сёйны корӧ, кодӧс посни видзысьясыд луннас дойдӧмаӧсь, коді мыйкӧ воштӧма либӧ жугӧдӧма. Гожся удж, кыа петӧмсянь мӧд кыа петтӧдз, оз лэдз мамъяслы овны челядькӧд. Олӧны найӧ ас кежаныс.

Тэд, нывбаба-крестьянка, удж вылӧ мунігӧн лунтыр кежлӧ ассьыд кагатӧ лоӧ кольны кага кодь жӧ видзысь ки вылӧ либӧ пӧрысь, синтӧмкодь выжыв пӧчлы. Ныв кӧ видзысьыс, ещӧ, гашкӧ, сьӧлӧмыд местаын, детина кӧ — лунтыр майшасян. Посни челядь да ёна пӧрысь морт, тӧдӧмысь, бура видзны кагаӧс оз вермыны. Сы вӧсна — гожӧмъясын кулӧ зэв уна челядь.

Ас вӧля вылӧ кольӧм посни челядь сёйӧны быдсяма пежсӧ, няйтсӧ, усьласьӧны, доймалӧны, вӧв кок улӧ сюрлӧны, телега увті мунӧны да м. т. Деревняад ар кык-куима челядьыд ёна нин ас кежаныс котралӧны уличаӧдыд, гылалӧны ва гуранъясӧ, канаваясӧ — пӧдӧны. Гортас ворсігӧн паччӧрсянь, пӧлатьсянь, ӧшиньӧд усявлӧны, ныр‐вомсӧ жуглӧны, лыяссӧ чегъялӧны, нэмыс кежлӧ дзоньвидзалунсӧ ассьыныс воштӧны. Кыдзи сэтшӧм омӧльыскӧд вермасьны? кыдзи мездысьны?

Татшӧм ыджыд пикысь да омӧльысь верман мездысьны сӧмын посни челядьӧс видзанін восьталӧмӧн (детские ясли). Челядь видзанін восьтыны удж кад кежлӧ — страдна кежлӧ. Сэки быд мам удж вылӧ петтӧдз вайӧдас кагасӧ сэтчӧ, гырысь, бур видзысьяс бердӧ. Уджалігӧн сылы оз нин ков сэтшӧма повны кага вӧсна, сійӧ бур местаын. Вой кежлас мам босьтлӧ челядьсӧ гортас.

Татшӧм челядь видзанінъясыс колӧны эськӧ быд сиктын, быд грездын. Государство ас тшӧт вылас восьтыны оз на вермы. Сьӧмыс сылӧн мукӧд коланторъясджык вылӧ мунӧ.

Нывбаба-крестьянка! тэд тайӧ уджыс медматын, медколантор, медъёна тэнад доймӧ сьӧлӧмыд посни челядь понда. Тӧждысь жӧ тэ ачыд восьтыны аслад сиктын челядь видзанін гожӧм кежлӧ. Чукӧртчӧй ті, мамъяс, тӧлкуйтӧй, сёрнитӧй, корӧй отсӧг Волисполкомлысь, пикӧ воӧмъяслы отсасьысь комиссиялысь, Еполысь да мукӧд удж нуӧданінъясысь. Надейтчам, кыласны тэнсьыд чуксасьӧмтӧ. Дзоньвидза, бур йӧзыд оз сӧмын тэныд, мамлы, ковны, но став йӧзыслы. Висьлӧс, зыньгысь челядьысь бур уджалысь оз вермы лоны.

Дорйы жӧ ассьыд челядьтӧ, нывбаба-крестьянка, челядь видзанін восьталӧмӧн кокньӧд асьтӧ сьӧкыд уджысь, видз челядьыдлысь дзоньвидзалунсӧ! Тэд ӧд медсьӧкыд лоӧ видзӧдны висьысь, доймӧм кагаыд вылӧ. Тэнад нэм чӧжыд доймас сьӧлӧмыд сы вӧсна.

Ӧтувтчӧмӧн зільӧй, крестьянкаяс, восьтавны страдна кежлӧ ӧтув челядь видзанінъяс! Зэв ыджыд бур сыысь.