КЫДЗИ ЫДЖЫД ЛУН ВЕЖОН КОЛЛЯЛІСНЫ КӦРТКЕРӦСЫН

Кӧрткерӧсын гажа вӧлі комсомольскӧй паска. Кӧть Нардомсӧ ывла вывсянь эз вӧв гажӧдӧма (пӧнаръяссӧ вӧчны кабалаыс эз вӧв), да том йӧз волісны унаӧн. Чукӧртчисны кӧкъямыс чассянь. Дас ӧти часын Казаков В. заводитчис вӧчны доклад, кыдзи лои паска, кыдзи веруйтлісны да празднуйтлісны важӧн.

Доклад бӧрын вӧлі спектак. Пионеръяс ворсісны «Чӧрт да Карпӧ» (гижӧма пионер Попов). Спектак бӧрын сьылісны уна сьыланкывъяс, сэсся ворсісны, йӧктісны.

Май 1-й лунӧ 11 часын чукӧртчисны Нардомӧ, сэсся сэсянь революция сьыланкывъяс сьылігтырйи гӧрд флагъясӧн мунісны Исполком дінӧ. Сэні РКСМ-лӧн секретар Изъюрова висьтавліс Майса праздник йылысь; сы бӧрын висьтавліс РКП-лӧн секретар Казаков. Йӧз ёна кывзісны висьтавлӧмъяссӧ. Эштӧм мысти бара мунісны Нардомӧ, сэсянь разӧдчисны.

Рытнас вӧлі Октябрины: выль ног пыртісны коммунистлысь, Казаков Ӧльӧксейлысь, писӧ; нимсӧ пуктісны Маркс. Выль коммунистӧс пыртӧм вылӧ видзӧдны йӧз чукӧртчис дзик Нардом тыр. Войдӧр занавес восьтігӧн сьылісны Интернационал. Сэсся женотделсянь да РКСМ ячейкасянь Изъюрова висьталіс, кутшӧм омӧль вайӧ вичкоын кагаӧс пыртӧм. Висьталӧм мысти Маркслы сетіс еджыд дӧрӧм. Сы бӧрын висьталіс Казаков, мыйла кагалы нимсӧ пуктісны Маркс, кыдзи Карл Марксыс овлӧма, мыйӧ велӧдӧма. Казаков сетіс кык гӧрд дӧрӧм, висьталіс, мыйла сетӧ гӧрдӧс дӧрӧмъяссӧ.

Октябрины бӧрын лои спектак. Ворсісны «Гӧльлун абу омӧльтор». Чукӧрмӧм сьӧмсӧ шуисны сетны батьтӧм-мамтӧм челядьлы.

Мукӧд рытъясас вӧліны РКСМ ячейкалӧн собранньӧяс. Волывлісны уна том йӧз. Первой рытнас Изъюрова висьтавліс, кыдзи колӧ му уджавны; мӧд рытнас — кыдзи колӧ пуктас пуктыны. Коймӧд рытас вӧлі доклад Казакова Кл.-лӧн гражданскӧй война йылысь.

Май 5-ӧд лунӧ висьтавлісны Изъюров — Коми обласьт йылысь, Заболоцкӧй — Карл Маркс йылысь, Казаков — газет «Правда» йылысь. Докладъяс бӧрын вӧлі спектак. Пионеръяс ворсісны «Гӧрдъяс улын». Сы бӧрын вӧлі Коми рыт.

Тадзи коллялісны ыджыд лунся вежон Кӧрткерӧсса том войтыр.

Казакова К.