ПАРЧӦГСА ТОМ ЙӦЗЛӦН ОЛӦМ

Парчӧгын йӧзыд зэв на пемыдӧсь. Омӧля на гӧгӧрвоӧны — мый омӧльыс, мый бурыс. Том йӧз эськӧ окотитӧны югыд туйлань петны, да абу найӧс югдӧдысьыс, югыд туйлань петкӧдысьыс. Эм эськӧ миян Парчӧгын школа, да абу прамӧй уджалысьыс. Том йӧз кывлывлӧны — мукӧд сиктъясӧ пӧ волывлӧны югдӧдныс карсянь (шеф), а Парчӧгсӧ, буракӧ, вунӧдӧмаӧсь. Волывлӧны зэв шоча. Ыджыд аттьӧ Совпартшколалы, найӧ кӧть дзикӧдзсӧ эз вунӧдлыны. Сійӧ ещӧ миянӧс кыпӧдыштіс. Водзджыксӧ эськӧ вӧлі этша кыпӧдчӧны жӧ, да омӧля вӧлі мунӧ водзӧ.

Школаӧн заведующӧй т. Серкова омӧля вӧлі тӧждысьӧ йӧзсӧ югдӧдӧм кузяыс, ёнджыка ас пондаыс. Ӧти собранньӧ вылын крестьяна вӧлі кӧсйӧны восьтыны лыддьысянін, — сэки тов. Серкова найӧс кыпӧдӧм пыдди ёна ӧлӧдіс: сылы жаль сетны лыддьысянінлы школасьыс ӧти вежӧстӧ, кӧть сылы овнысӧ вӧлі кольӧ ещӧ кык вежӧс. Мӧд велӧдысьыс, буракӧ, гӧгӧрвоӧджык: отсаліс крестьяналы лыддьысянінсӧ восьтыны.

Собранньӧ бӧрын мужикъяс том йӧзкӧд чукӧртчывлісны рыт нёль-ӧ-вит, да сэсся дӧзмисны, шуӧны: «Нинӧм тані кернысӧ, волам лыддьысьны да сёрнитны, а ӧти газет ни нига огӧ аддзылӧ». Збыльысь сідзи и вӧлӧма: тӧв. Серкова газетъястӧ лыддьӧм пыдди видзӧ вӧлӧм ас коланінас, лёк бумагаӧс моз вӧдитӧ (мыйсюрӧ вӧлӧм быдмавлӧ нывбабаяскӧд вежласигӧн), книгаыс эськӧ абу и уна, да сійӧ оз вӧлӧм петкӧдлы. Сідзнад уджтӧ нуӧдігӧн крестьяналӧн регыд бӧр быри лыддьысяніныд.

Тӧв. Серкова омӧля тӧждысьӧ и аслас велӧдчысьяс вӧснаыс: школаын коридорас эм ва пельса, кытысь школьникъяс юӧны кӧдзыд ва. Сэні, пельса пытшкас, пыдӧсас сӧдзӧма няйтыс вершӧк судта. Сэн жӧ пельса вылас няйт ветьӧкыс, кӧзаыслысь куйӧдсӧ весавны.

Парчӧгса Союз Ленинцевын 15 морт. Союзӧ пырлісны кыкнан велӧдысьыс, сӧмын тӧв. Серкова бӧр петіс, эз кӧсйы югдӧдны пемыд йӧзтӧ.

Ӧні Парчӧгса том войтыр нуӧдісны Комсомольскӧй Паска, ветлісны Зеленечӧдз. Том йӧз нуӧдлісны школаысь ӧтик велӧдысьсӧ. Серкова бара жӧ эз мун.

Колӧ ещӧ висьтавны вот мый: ӧні Парчӧгын том йӧз вылӧ ёна лӧгалӧны юрбитысь йӧз. Ӧтик ворсысьӧс локтігас тӧкӧтьӧ ваӧ абу сюйӧмаӧсь: ӧтнас веськалӧма мунны гортас да. Мӧдӧс бать-мамыс кӧсйӧны вӧлӧм черӧн керавны. Тайӧ ставыс ыджыд лунлань паныд спектак сувтӧдӧмысь. Со кутшӧм миян олӧм-вылӧм.

Парчӧгса том йӧз.