МЕД КРЕСТЬЯНАЛӦН ЭМБУР СОДӦ

Сӧвет власьт лэдзӧма крестьянскӧй заём. Мый жӧ сійӧ заёмыс вайӧ бурсӧ? Ӧти ногӧн кӧ, заёмыс вузассьӧ 85 копеекысь, а арнас, кор кутасны чукӧртны налогъяс, сэк государство пондас бӧр босьтны чӧлкӧвӧйӧн. Мӧд ног кӧ, сійӧ заёмыс шусьӧ выигрышнӧйӧн. Выигрышнӧйнас шусьӧ со мыйла: сы вылӧ позьӧ воны уна деньга. Быд куимсё заём вылӧ лӧсьӧдӧма ӧти выигрыш — 5 чӧлкӧвӧйсянь 10 сюрсӧдз. Коймӧд-кӧ, сійӧ заёмыс вайӧ прӧчент — вонас быд чӧлкӧвӧй вылӧ 5 кӧпейка.

Кутам кӧ прамӧя думайтны, тайӧ заёмыд зэв буртор. Зэв ёна вермас крестьяналысь олӧмсӧ кыпӧдны, сӧмын крестьянаыслы аслыныс колӧ кужны овнысӧ. Колӧ быд крестьянинлы, код кыдз вермӧ, ньӧбны унджык заём. Заёмыс абу дона — чӧлкӧвӧя, куима да вита. Чӧлкӧвӧяас ӧти выигрышнӧй номер, куимаас — куим, витаас — вит. Удайтчас кӧ, вит чӧлкӧвӧяыс вермас воны вит выигрыш, куимаыс — куимӧс.

Мукӧд йӧз, гашкӧ, шуасны: мыйла нӧ государствоыс аслыс убыткасӧ вӧчӧ? Он кӧ прамӧйджыка юр вемтӧ вӧрзьӧдлы, кажитчӧ убытка; видзӧдлан кӧ, шуан мӧдарӧ: тайӧ заёмыс бурсӧ вӧчӧ и государстволы. Государство чукӧртас уна деньга, сэсся сы вылӧ справитас ассьыс став нуждасӧ выль деньга содтӧд лэдзтӧг. Выль деньга содтӧдъяссӧ кӧ оз кутны лэдзавны, сэки и деньга дон оз усь. Сэсся заёмыс лэдзсьӧ кык во кежлӧ. Кык вонас сы мында деньганас унатор позьӧ бурӧс вӧчны.

Коми йӧз, ньӧбӧй, код верманныд, ассьыныд крестьянскӧй заёмтӧ! Кыпӧдӧй ассьыныд олӧмтӧ! Юасьӧ асланыд Исполкомлысь, кытысь да кыдзи позьӧ ньӧбны тайӧ заёмсӧ.

Торлопов М.