СУТУГА КУЗЯ ВЕТЛЫСЬ БИ
(Электрификация)
Кад миянлы, коми войтырлы, кутчысьны чорыда став оланінъяснымӧс воысь воӧ тыртны тайӧ вынӧн, тайӧ югыдӧн. Сэки кокняммас, югдас миян коми олӧм. Кольӧ уна соттӧгыс сартас, пес, карасин, сись, кольӧ уна вӧв, морт вын мукӧд уджъяс вылӧ.
Ӧтпырйӧн кӧ вӧчны сутуга кузя ветлысь би — быд керка вылӧ ковмас видзны 55 чӧлкӧвӧй гӧгӧр. Став 40 сюрс керка вылӧ ковмас 2 миллион 200 сюрс чӧлкӧвӧй. 10 воӧн кӧ ставсӧ вӧчны: быд во ковмас видзны 220 сюрс, морт юрӧ 1 чӧлкӧвӧйӧн.
Изанінъяс, гӧрӧм, вӧв пыдди ветлӧм — мыйсӧ оз позь тайӧ выннас вӧчны.
Пондыны кӧ Сыктывдінкарсянь став матысса оланінъяскӧд — чорыда позьӧ медӧдйӧ, войдӧр сувтӧдны татчӧ. Станция (абу бур, ковмас выльдӧдны) Сыктывкарын эм нин. Во-мӧд сетӧ югыдсӧ. Сиктъяслӧн, грездъяслӧн кад асланыс босьтчыны водзмӧстчыны — видзӧдлыны миян Сӧвет сикас биыс югдӧдысь вына вылӧ. Олам зэв озыринын — пыр на гӧльӧсь сьӧмӧн асланым этша тӧдӧм вӧсна, омӧля кужӧм вӧсна, выль ногӧн олӧмысь полӧм вӧсна.
Кад збыльысь видлыны выль олӧмсӧ, морт ногӧн олӧмсӧ. Важӧн нин кад Выльгорт, Чит, Кӧтшпом ӧтлаавны Сыктывкаркӧд Сӧвет сикас биӧн-югыдӧн. Колӧ босьтчыны. Топыдджыка чукӧрӧн олігӧн йӧзлы ӧдйӧджык позьӧ сюсьмыны, унаторйӧ велӧдчыны, кужны; кокньыдджыка, выль ногӧн овны: доддявны вӧвъяс пыдди, морт пыдди машинаяс, ӧдйӧнджык, бурджыка ставсӧ вӧчны.
Кутшӧмкӧ машинаяс, тӧдӧмысь, Коми му кузя эмӧсь нин: вартан, ытшкан, куртан машинаяс. Вынныс налӧн пыр на вӧв вылын, морт вылын. Колӧ вынсӧ вештыны сутуга кузя ветлысь би вылӧ. Та йылысь миянлы, коми йӧзлы, медчорыда колӧ мӧвпыштны (вывті на сьӧкыда, важ ногӧн уджалам, надзӧ, омӧля на ассьыным уджнымӧс вермам кокньӧдны).
Ме кӧсъя аддзӧдны: витӧд во кежлӧ миян Коми автономиялы медэтшаыс кызь вӧлӧсьт пондас югъявны сутуга кузя ветлысь биӧн, уджавны-овны сійӧ выннас.
Босьтчыламӧй ставӧн ёнджыка, чукӧрӧн, ӧдйӧнджык выль коми сиктъяс, грездъяс вӧчавны. Петкӧдлам ассьыным кужӧмнымӧс, кӧсйӧмнымӧс, водзмӧстчӧмнымӧс. Кадыс воис, бур кад, дорны выль коми олӧм, выль ногӧн, ӧтлаасьӧмӧн, гырысь чукӧръясӧн. Мед олас коми автономияным, миянлы кокньӧд вылӧ, сюсьлун вылӧ, мед быдмӧ, паськалӧ — воысь воӧ югдӧдӧ, личӧдӧ лёк уджысь, кокньӧдӧ! Мед югъялас уджалысь йӧз пиын во гӧгӧр шонді югӧр, луннас-войнас!
Ошкам ёна тӧдӧм, бура кужӧм, чорыда босьтчӧм миян коми йӧзлысь, водзлань тувччалӧм Ленин ногӧн, Маркс ногӧн.
