3 ВО КОМИ АВТОНОМИЯЛЫ
Талун тыри 3 во Коми Автономия йылысь декрет кырымалӧмлы. Куим во нин ми асьным лӧсьӧдам ассьыным олӧм. Ӧні позьӧ видзӧдлыны, мый миянлы сетіс Автономия куим воӧн, мый нин ми вермим вӧчны?
Медъёна тӧдчана бурыс со мый: важӧн, сар дырйи, крестьянаӧс ёна дзескӧдлісны вӧрысь, ӧні вӧр сетӧны крестьяналы зэв ичӧтик дон вылӧ, сэсся регыд сетасны крестьянскӧй вӧр кык десятинаӧн сёйысь вылӧ, сэки нинӧм оз ковмы мынтыны.
Налогъяс воысь воӧ чинӧны, таво налогъяс вылӧ норасьӧм весиг нин эз вӧв.
Босьтчӧдӧны крестьянаӧс выль ног видз-му уджавны. Машинаяс унаӧс ваялісны. Артельяс лӧсьӧдалісны. Уналаын нин быдса вӧлӧсьтъяс уджалӧны выль ногӧн.
Мырсьӧны йӧзӧс быд ногӧн велӧдны. Учрежденньӧясӧс комиӧ пӧртӧны, медым коми уджалысь йӧзлы ставыс вӧлі гӧгӧрвоана, мед роч кыв тӧдтӧм коми йӧз вермисны уджавны учрежденньӧясын.
Удж нуӧдысьясӧс кыпӧдӧны коми йӧз пӧвстысь; сар дырйи чиновникъяс вӧліны бокысь локтӧм йӧз, коми йӧзӧс мустӧмтысь йӧз; ӧні ставыс ас йӧз, коми крестьяна пытшкысь петӧм йӧз.
Водзӧ вылӧ уджалысьясӧс лӧсьӧдӧны коми том йӧз пӧвстысь. Университетъясын велӧдчӧны 300 дорысь унджык морт (инженеръясӧ, велӧдысьясӧ, агрономъясӧ, докторъясӧ, сідз водзӧ).
Ас кыв вылын велӧдӧны школаясын, лӧсьӧдӧны литература (нигаяс), ас кывйӧн лэдзӧны газет.
Вель уна нин вӧчӧма. Сыысь унасӧ вӧлі оз на позь: гӧльӧсь на ми, эз на вермы ёна босьтчыны война бӧрын.
Воысь воӧ олӧм миян пондас босьтчыны. Колӧ ӧні ӧтувтчыны став коми йӧзлӧн (зыраналӧн пермякъяскӧд), ӧтвылысь чорыдджыка босьтчыны Коми му кыпӧдӧм вылӧ. Ковмас кузяӧн лӧсьӧдны Коми му кузя кӧрт туй, восьтавны пабрик-заводъяс. Сэк кежлӧ ковмас уна коми велӧдчӧм морт. Сійӧн ӧнісянь жӧ колӧ унаӧс велӧдны босьтчыны.
Коми йӧзлысь олӧм босьтчӧдны лэдзӧ-отсалӧ сӧмын уджалысь йӧзлӧн власьт, Сӧвет власьт. Капиталистъяслӧн власьт уджалысьясӧс, медся ёна мукӧд сёрниаясӧс, векыс дзескӧдліс, ӧні дзескӧдӧ (мукӧд государствоын), водзӧ дзескӧдас (кытчӧдз олас).
Эз кӧ вермы Россияын Сӧвет власьт — эськӧ эз босьтчы Коми му, эз кокняв коми йӧзлӧн олӧм. Кымын ёнмӧ Сӧвет власьт, сымын уджалысь йӧзлӧн олӧм кокняммӧ, сымын ӧдйӧ босьтчӧ Коми му.
Мед жӧ олас Коми автономия!
Мед ёнмас воысь воӧ, паськалас став му пасьта Сӧвет власьт!
