ВЫЛЬГОРТЫН

Комсомольскӧй паска

Таво паска — ыджыд лун — том йӧз нуӧдісны выль ногӧн. Войдӧр ыджыд лунланьыс паныд быдӧн вӧлі мунӧны вичкоӧ «вой сулавны», быттьӧнӧсь кевмыны (дерт эськӧ, дурӧм кындзи да кутчысьлӧм кындзи ныв-зонлӧн кевмӧмыс эз жӧ вӧв да). Таво пӧшти став том йӧзыс — нывулов, зонулов, — поснияс, нӧшта и арлыдаяс, 9 час кежлӧ паскалань паныд чукӧртчисны школа керкаӧ. Вӧлі водзвыв висьтавлӧма: пондасны пӧ лыддьыны комиӧн докладъяс, сэсся пӧ лоӧ спектак, кутасны ворсны «Райын». Залаыс, кӧні вӧчавлӧны спектакъяс, йӧзнас вӧлі тырӧма, он тӧр бергӧдчыны.

Час дасын пондісны лыддьыны докладъяс «морт лоӧм йылысь, религия йылысь». Сійӧ докладъяссӧ сэсся пыр помӧдз водзӧ нуӧдісны быд дугдывлӧм костын спектак дырйи. Дас ӧтиӧд часын пондісны ворсны. Сійӧ жӧ кадӧ пондісны вичкоын бувгыны асъяӧ. Ворсӧм эштіс 2 час асылын. Ворсісны быдӧн ас йӧз, ставныс крестьяна пытшкысь. Видзӧдысьяслы, тыдалӧ, ворсӧмыд зэв сьӧлӧм вылас воис, кывзісны бура. Ёна и серамъяс петлісны, тешкодь да. Зэв кужисны ворсны: Сюзь Кузьмаӧс — т. Тренёв, Марпаӧс — Н. Чеусова, дай ставныс, нем шуны, лӧсьыда ворсісны.

Ме чайта, татшӧм ворсӧмъясыд кӧ сиктъясад лоас унджыкысь, дерт, йӧзыд ёнджыка пондасны волывны спектакъяс вылад. Сӧмын миян дай уналаын эм судзсьытӧмтор: ворсан керкаясыс ичӧтӧсь, этша тӧрӧ йӧзыс. Колӧ эськӧ кутшӧмкӧ ногӧн гырысьмӧдны, сьӧм сы вылӧ жалитны оз ков.

Кодкӧ.