АНГЛИЯ КОММУНИСТ ПАРТИЯЛӦН СЪЕЗД

Лондон. Англияса коммунист партиялӧн Центральнӧй Комитет шуис чукӧртны партийнӧй конгресс (съезд) май 17-ӧд лунӧ Манчестер карын. Бӧрйыны пӧ позяс сӧмын сэтшӧмъясӧс, кодъяс партияӧ пырӧмаӧсь во дорысь важӧнджык. Компартиялӧн Комитет асланыс газетын печатайтӧма манифест став рабочӧйяслы, тшӧктӧ найӧс сувтны воча рабочӧй партияын нуӧдысьяслы, рабочӧй правительстволы. Рабочӧй правительство пӧ петкӧдліс ассьыс сямтӧмлунсӧ, буржуйяслы казакалӧмсӧ. Ӧтвылысь колӧ тшӧктыны рабочӧй правительствоӧс, мед сійӧ вӧчас ассьыс воддза кӧсйӧмсӧ. Манифестӧ гижӧма, мый колӧ корны: уджалӧм дон содтӧд ӧти пунт стерлинг (9 шайт 60 ур) вежонысь; уджавны вежон чӧжӧн нелямын кык час; ёна отсавны уджтӧмъяслы (безработнӧйяслы); дугӧдны уджтӧмъясӧс патераяссьыныс коллялӧмысь; государство киӧ рудникъяс босьтны; тыр политика права сетны салдатъяслы, матросъяслы; тыр свобода ас ногныс овны Индияса, Египетса рабочӧйяслы да крестьяналы; дугӧдчыны Сӧвет Россиялысь уджйӧзъяс корӧмысь; Мӧскуаӧ посолӧ пуктыны рабочӧйӧс; вӧчны договор Сӧвет Россиялы отсалӧм понда удждысьӧм йылысь.