СТАВМУВЫВСА УДЖАЛЫСЬЯСЛӦН ӦТУВТЧАН ЛУН

Комын витӧд во нин рабочӧйяс став му вылас Май 1-й лунӧ дугдӧны уджалӧмысь, чукӧртчӧны, петӧны ывла вылӧ, корӧны аслыныс олӧм кокньӧдӧм. Комын нёль во нин капиталистъяслӧн медалӧм пӧлича Май 1-й лунӧ лыйлывліс рабочӧйясӧс, арестуйтавліс, тюрмаясӧ сюявліс тайӧ лунсӧ празднуйтӧмысь.

Вичкоӧн да озыръясӧн лӧсьӧдӧм праздникъяс ылӧдлӧны уджалысьясӧс, пемдӧдӧны вежӧрнысӧ мӧдаръюгыдӧн да винаӧн. Рабочӧй лӧсьӧдӧм праздникъяс ӧтувтӧны найӧс, сетӧны вын, босьтчӧны тышкасьны озыръяскӧд. Сійӧн озыръяс оз радейтны рабочӧйяслысь праздникъяссӧ, оз лэдзны сійӧ лунъясӧ чукӧртчыны, ӧтувтчыны. Сійӧн жӧ гӧгӧрвоысь уджалысьяс дугӧдчӧны вичко праздникъяс празднуйтӧмысь, ассьыныс праздникнысӧ босьтчӧдӧны (таво весиг миян Сыктывдінкарын уджалісны Ыджыдлунтӧ, сы весьт шуисны празднуйтны май 2-ӧд лун).

1918 восянь ми Сӧвет Республикаясын тайӧ лунсӧ празднуйтам некодысь повтӧг. Тайӧ лунӧ огӧ нин повзьӧдӧ капиталистъясӧс (бырӧдім найӧс). Ми ӧні ӧтувтчам удж лӧсьӧдӧм вылӧ, ас ногӧн олӧм лӧсьӧдӧм вылӧ. Мукӧд государствоын власьт век на озыръяс киын, век на найӧ уджалысьясӧс нартитӧны. Мукӧдлаын правительство век на оз лэдз рабочӧйясӧс тайӧ лунсӧ празднуйтны. Тайӧ газетас водзӧ гижӧма, кыдзи повзьӧдлӧны рабочӧйясӧс Австрияын, Германияын Май 1-й лун празднуйтӧмысь. Повзьӧдлӧны социалистъяс (буржуйяслысь кок пыдӧснысӧ нюлысьяс).

Оз повзьыны наысь коммунист партияяс, кужасны ӧтувтны рабочӧйясӧс, петкӧдасны найӧс ывла вылӧ, мыччӧдласны ассьыныс выннысӧ капиталистъяслы да «социалистъяслы». Мед аддзаласны капиталистъяс, кыдзи рабочӧйяслӧн выныс воысь воӧ содӧ, кыдзи воысь воӧ капиталистъяслӧн помныс матысмӧ.

Мед жӧ олас ставмувывса уджалысьяслӧн ӧтувтчан лун!