ШУДТӦМ ЧЕЛЯДЬЛЫ ОТСАЛӦЙ!
Бӧръя сьӧкыд вояснад, войнаяснад, революциянад уна челядь колины бать-мамтӧмӧсь. Мукӧдыслӧн эм батьныс, да мамныс абу, сэтшӧм челядьыс вежӧртӧм ичиньяс водзьясад веськалӧмаӧсь да, оз жӧ красуйтчыны: разалӧмась кытчӧсюрӧ, лёк ногӧн олӧны. Мукӧд бать-мамлысь асланыс гӧльлуннаныс да пемыдлуннаныс оз вермыны быдтыны, мӧдӧдӧны корны, шатлавны, гусясьны. Сідзитӧ быдмигад найӧ дзикӧдз тшыкасны. Вывті уна шудтӧм челядь эм миян Коми муын. Найӧ ньӧтчыд оз кывлыны бур, мелі кыв, оз аддзывны, тӧдлыны дӧзьӧр, отсӧг, некутшӧм бур. Быдмӧны найӧ мустӧм, ковтӧмторъяс. Сідзитӧ быдмигад, тӧдӧмысь, наысь бур йӧз оз лоны, налӧн сьӧлӧм лёкмас, чорзяс, лёк мывкыдаӧсь лоӧны. Найӧ быдмасны да обществолысь, йӧзлысь кутасны водзӧс босьтны лёка быдтӧмсьыд. Наысь лоӧны эновтӧмнад вывті омӧль йӧз. Колӧ обществолы, быд вежӧра мортлы та йылысь пыр думайтны. Колӧ налы отсавны быд ног: кӧмӧдны, пасьтӧдны, вердны, юктавны, бурӧн, меліӧн сьӧлӧмнысӧ шонтыны, кок йыланыс дзикӧдз сувтӧдны, мед быдмасны да зэв бур йӧз, отсӧгъяс лоӧны обществолы. Сэки найӧ мынтасны водзӧстӧ уна пӧлӧс бурӧн.
Быд сиктын, быд вӧлӧсьтын эм уна гӧль, тшыг, пасьтӧм челядь. Вай жӧ, коми бать-мам, чой-вокъяс, талунсянь кутамӧ радейтны, дӧзьӧритны найӧс! Быд бать-мам думыштамӧй: «Он ӧд тӧд нинӧм, быдӧнӧс вермас приччаыд суны, быдӧнлӧн вермасны челядьыд ортсӧ кольны. Талун дзоньвидзаӧсь, аски висьмам, кулам». Лӧсялас оз отсӧгыд, дӧзьӧрыд сэки? Вывті лӧсялас! Кор шудтӧм челядьяслы отсаланныд, пыр думайтӧ асланыд челядьяс йылысь, сэки сьӧлӧмныд небзяс и йӧз челядьлы.
Ӧні татшӧм челядьяслы отсалӧм кузя воссялісны «Челядь дӧзьӧритан Обществояс». Сэтчӧ колӧ пырны быдӧнлы, кодлӧн сьӧлӧм абу на измӧма да муса аслас челядьыс.
Каръясын эновтӧм челядьлы эмӧсь оланінъяс, керкаяс, найӧс эмӧсь видзысьяс, дӧзьӧритысьяс, велӧдысьяс, медуна челядь чукӧртӧма Кылтово (важ Сереговса манастырӧ). Сӧмын сэтчӧ вывті на этша челядь веськалӧны, унджыкыс, гашкӧ, ортсын на. Сэсся и сэні ӧд колӧ ёна отсасьны, Общество отсӧгтӧг сэтчӧ нинӧм жӧ ачыс оз артмы, сэні сэтшӧмӧсь жӧ пасьтӧмӧсь, кӧмтӧмӧсь. Быдӧнлы колӧ ёна челядьӧс дӧзьӧритны, небыд сьӧлӧмӧн накӧд овны, быд ног кокньӧдны, гажӧдны. Ньӧтчыд оз ков чорыд сьӧлӧмӧн мунны, весиг матысмыны челядь дінӧ.
Уна эм челядьтӧм гозъяяс. Найӧ вермасны, налы колӧ ёна отсавны эновтӧм челядьлы.
Мам.
