ГОРТӦ ПЕТЫСЬ КРАСНОАРМЕЕЧЛЫ

Ёрт! Тэ неважӧн на мунлін гортсьыд, аслад коми сиктысь. Тэ тӧдан, кутшӧм пемыдӧн кольлін бать-мамтӧ, гӧтыртӧ, вокъястӧ, став сиктса йӧзтӧ. Тэ тӧдан — найӧ олӧны важ ногӧн, оз на тӧдны, кыдзи лӧсьӧдӧ выль ногӧн олӧм Сӧвет власьт, кыдзи сійӧ быд ногӧн зільӧ кокньӧдны, кокньӧдӧ уджалысь йӧзлысь олӧм. Тэ ачыд Краснӧй армияӧ мунігӧн унатор эн гӧгӧрволы. Краснӧй Армия тэнӧ велӧдіс, Краснӧй Армияын тэ содтін ассьыд вежӧртас, сэні тэныд индісны туй кокни, долыд олӧмлань мунны. Тэнад ӧні кежлӧ эштіс служитӧм — винтовкаӧн дорйыны буржуйясысь уджалысь йӧзӧс. Тэ ӧні петан гортӧ. Эн вунӧд, мый тэныд висьтавлісны Краснӧй Армияын, ну ассьыд велӧдчӧмтӧ йӧз пытшкӧ, водзӧ велӧдны, отсав Сӧветскӧй власьтлы сиктъясын удж нуӧдны. Помтӧм удж тэныд лоӧ аслад сиктын, аслад грездын.

Гортӧ петысь красноармееч! Коми крестьянин кыссьӧ югыдлань, тэсянь виччысьӧ отсӧг; ӧтвыв коммунист партиякӧд отсав сылы! Тэ вылӧ ыджыд надея Сӧвет власьтлӧн.

Гортад олігӧн эн вунӧд: миян гӧгӧр эмӧсь на озыр йӧз, тшыг кӧинъяс моз гусьӧн пиньсӧ йирӧны миян вылӧ. Налысь Сӧвет власьт синнысӧ сёйӧ, аддзӧны — регыд воас налы пом; дерт на, коркӧ, медбӧръяысь уськӧдчыласны найӧ миян вылӧ. Сэки тэ локтан бӧр Гӧрд Армияӧ, чорыда чабыртан киад винтовкатӧ; доръян ассьыд власьт. Озыр йӧзӧс путкыльтан ӧтвылысь став уджалысьяскӧд.