КЫТЧӦ КЫСКӦ МАКДОНАЛЬД

Лондонын вӧлі ӧні съезд Англияса рабочӧй партиялӧн. Макдональд (правительствоын юралысь) шуис: «Англияса рабочӧй правительство сувтіс чорыд туй вылӧ. Ӧнӧдз, зэв на регыдикӧн, ми вермим вӧчны бура унатор. Сӧвет власьтӧс пыдди (ӧткодя) кутім лыддьыны, Сингапурын (морскӧй крепӧсьт Тикӧй океан бердын) дугдім стрӧитчыны. Ми тшӧтш корам посни буржуйясӧс ӧтвылысь рабочӧй правительствокӧд уджавны. Мырсям рабочӧйясӧс миритны озыр кӧзяинъяскӧд (предприниматели), медым эськӧ этшаджык вӧлі забастовкаяс. Медся ёна ми тӧждысям со мый вӧсна: медым эськӧ ставмувывса йӧзыс казялісны — рабочӧй правительство миян вермӧ овмӧдчыны. Социалистическӧйӧн миянлысь правительство лыддьӧм меным оз кажитчы — бурджык, шуӧны кӧ рабочӧйӧн: сійӧ быттьӧ матынджык йӧзыслы».

Тайӧ бӧръя кывъяс сертиыс позьӧ аддзыны: Макдональд бокӧ кежӧ рабочӧйяс туйысь. Рабочӧйяс нэмсӧ вермасьӧны социализм понда. Макдональд кӧсйӧ рабочӧйясӧс торйӧдны социализмысь. Тайӧ некыдз оз позь. Сы вӧсна ёна серавлӧны сылысь кывъяссӧ весиг прӧтивникъясыс.