БОСЬТЧЫЛАМӦЙ ГИЖНЫ!

Куим во нин лоӧ май витӧд лунӧ Коми автономиялы. Куим во нин лыддьыссям ми коми йӧзӧн, лӧсьӧдам ассьыным коми кыв.

Мукӧд шуӧны, коми кывйыд пӧ мисьтӧм, абу пӧ коми кывъяд художествоыс. Сійӧ пӧ сӧмын шогмӧ видчыны-ёрччыны, мӧда-мӧдкӧд пинясьны.

Ме ог тӧд, мыйла сэтшӧм мисьтӧм кажитчӧ коми кывйыс. Меным мӧдарӧ кажитчӧ — коми кыв зэв художественнӧй. Збыль. Сӧмын ӧтитор ёна тшыкӧдӧ: коми кывсӧ бура тӧдысьыс абу, омӧля тӧдам. Важсӧ вунӧдім роч саръяс да роч начальство понда, выльсӧ эгӧ на вермӧ вӧчны.

Коми нигаяс этша на, коми журналъяс абуӧсь — огӧ кӧ лыддьӧй кык номер «Парма ёль» (петӧ кык во пытшкын ӧтчыд). Ӧти «Югыд туй» и новлӧдлӧ висьтъяссӧ коми йӧз пӧвстас.

Колян воӧ, август тӧлысьын, коми гижысьяслӧн медводдза ӧтчукӧртчылӧм (конференция) шуис быд тӧлысьын лэдзны «Парма ёль», сӧмын сійӧ шуӧмыс шуӧмӧн и коли, эгӧ вермӧ збыльӧ пӧртны шуӧмнымӧс сьӧмтӧмла да мукӧдтор понда.

Ме думайта, «Югыд туйын» (кор петӧ комиӧн) сюрӧ ичӧтик пельӧс коми висьтъяслы (рассказъяслы). Миян ӧд некор некутшӧм коми висьт оз овлы сэні, гижны нӧ зэв унатор позьӧ коми олӧмысь.

Вайӧ нӧ босьтчамӧй висьтъяс тшӧтш гижны, сійӧ ӧд оз тшыкӧд газеттӧ, сӧмын ёнджыка бурмӧдас!