КЫТЫСЬ БОСЬТЧИС ЫДЖЫД ЛУН (ПАСКА)?

Аскиа лун лыддьыссьӧ ыджыд лунӧн (паска). Веруйтысьяс шуӧны, тайӧ лунӧ пӧ кулӧм бӧрын ловзьылӧма коркӧ Кристос.

История серти йӧз тӧдмалӧмаӧсь, Кристосыс пӧ некор абу вӧвлӧма му вылас. Кристоссӧ лӧсьӧдӧмаӧсь нин ёна бӧрын, уна во мысти сійӧ кадсяньыс, кор шуӧны сылысь чужӧмсӧ, ловзьӧмсӧ.

Дерт, прамӧя кӧ думыштан, Кристослӧн ловзьӧм некор абу вӧлӧма, эз вермы лоны. Тайӧ праздниксӧ зэв нин важӧн, Кристосысь ёна на войдӧр, празднуйтлӧмаӧсь язычникъяс. Грецияын вӧлі лыддьӧны «господьлысь» ловзьӧм. «Господьыс» налӧн вӧлӧма Адонис нима. Мукӧд пӧлӧс йӧз бара жӧ асланыс енлысь ловзьӧм казьтывлӧмаӧсь: Египетын — Озирис, Индияын — Кришна. Бӧрын нин сэсся лӧсьӧдісны Исус Кристос нима енмӧс.

Кристос кӧ ловзьыліс коркӧ, ловзьыліс кутшӧмкӧ ӧти лунӧ, ӧти кадӧ. Мыйлакӧ со оз ӧти кадӧ празднуйтны. Колян воӧ ыджыд луныд вӧлі апрель 7-ӧд лунӧ, таво 27-ӧд лунӧ нин. Кызь лун костас! Ӧти воын кызь лун сёрӧнджык Кристослысь ловзян лун казьтылӧны! Та серти бара позьӧ гӧгӧрвоны: Кристосӧс лӧсьӧдӧмаӧсь (выдумайтлӧмаӧсь) йӧз — попъяс, аркирейяс, патриархъяс озыръяскӧд, сэсся кыдз окота и вежлалӧны сылысь «ловзьӧмсӧ».

Кор йӧзыд ёна велӧдчас, дерт, оз кут веритны татшӧм сӧрӧмад.

Миян, Россияса уджалысь йӧзлӧн, эм ӧтик ыджыд лун — Октябр, кор ми мездысим став лёксьыс, озыръяс кипод улысь.

Тайӧ ыджыд лунсӧ оз ков вунӧдны миянлы! Тайӧ миянӧс мездіс, эз некутшӧм Кристос.