ТЁТЯ МОТЯ

ВОРСЫСЬЯС:

ДЯДЯ КОЛЯ — профессор.

ТЁТЯ МОТЯ — сылӧн ылысса рӧдня.

РЕНА — профессорлӧн ныв, помалӧма 9-ӧд класс.

ИВАН — Мотялӧн пи, школьник.

Гожся каникулъяс. Дачнӧй керкалӧн кильчӧ пом. Иван велӧдӧ физика учебникысь закон: «Количество работы, эквивалентное единице количества теплоты, называется механическим эквивалентом теплоты». Повторяйтігмозыс унаысь ылавлӧ мукӧдторъясӧн.

Керкаысь петӧ Рена. Сійӧ моднӧя пасьтасьӧма, киас мича редикюль.

РЕНА (ласкӧва чукӧстӧ Иванӧс). «Эквивалент!» (Иван оз кыв. Рена аслыс.) Кыдз талы оз дышӧд! Коймӧд во нин быд гожся каникулъяс дырйи ӧтитор зубритӧ. (Чукӧстӧ.) Ваньӧ! (Иван оз кыв. Рена гораа.) «Механическӧй эквивалент!»

ИВАН. А, Реночка!.. Вот занимайтча, мед не лӧгӧдны мамӧӧс. Сы водзын сетлі кыв сдайтны арся экзаменъяс «отлично» вылӧ.

РЕНА (пудритчӧ). Кольӧм во, буракӧ, кӧсйысьлін жӧ.

ИВАН (яндысьӧ). Ме сэки томджык на вӧлі.

РЕНА. О, таво тэ тырвыйӧ мужчина нин! Тӧрыт ме ёна и клопайті тэныд.

ИВАН (радпырысь). Стадион вылын?

РЕНА. Ага.

ИВАН. Волін жӧ?

РЕНА. Кыдз тай чужъян мачас!..

ИВАН. Он ылӧдчы?

РЕНА. Ой! А плешкыд оз и доймы, кор тэ сійӧн этадзи, кӧза моз, жбуткеран?

ИВАН. Первойсӧ кольмӧдыштлӧ вӧлі. А ӧні весиг юрлы кокньыдджык лолӧ, кор прамӧйджыка удайтчас пасуйтны. Дай синъясыд прамӧя кодь югдыштлӧны.

РЕНА (сералӧ). Бикиньясысь, навернӧ!

ИВАН. Тэ эн серав. Бурджык лоӧ, видлы менсьым мускулъясӧс. Видлы, видлы.

РЕНА (видлалӧ Иванлысь ки да кок мускулъяс). Збыль тай! Изйысь муртса и небыдджыкӧсь. Татшӧм мускулъяснад любӧй удж абу страшнӧ.

ИВАН. Тӧдан мый меным гижӧ ёртӧй? Сійӧ бур футболист жӧ. Дас кык во сайын ми сыкӧд первой классын ӧти парта сайын пукавлім. Десятилетка бӧрас мӧд во нин заводын уджалӧ... Дак сійӧ гижӧ: пӧлучиті пӧ квалификация, ставӧн уважайтӧны, сетісны дзонь квартира, думайта пӧ... но, кыдзи тэныд висьтавны... семья ли мый ли лӧсьӧдны...

РЕНА (яндысьӧ). Ме том на гӧтрасьӧмъяс йывсьыд гӧгӧрвоны.

ИВАН. Том тай! Ӧти классын велӧдчам.

РЕНА. Вот тайӧ збыль! Усъяса нин, а век на ӧкмысӧд классын тӧкаритан. (Иван дӧзмӧ, кӧсйӧ пырны гортас.) Сулав. Ме эг кӧсйы тэнӧ дӧзмӧдны. Кылан?.. Ме тожӧ пӧлучиті аслам пӧдругасянь письмӧ. Ок, и гижӧ! (Пуксьӧ кильчӧ пос вылӧ.)

ИВАН (бергӧдчӧ). Колхозсянь?

РЕНА. А тэ пуксьы. Со татчӧ, орччӧн.

ИВАН (пуксьӧ). Но, и мый сійӧ гижӧ?

РЕНА. Воим пӧ колхозӧ. Сетісны кык керка. Ӧтисӧ детинкаяслы, мӧдсӧ нывкаяслы. Ужнайтім пӧ, узим. Аскинас удж вылӧ: коді турун куртны, коді прополка вылӧ, коді градвыв пуктас быдтыны. Орччӧн пӧ визувтӧ паськыд ю.

ИВАН. Купайтчыны позьӧ?

РЕНА. Весиг вӧйны позьӧ... А видзьяс вылас пӧ сы мында дзоридз, сы мында дзоридз! Ой, кыдз сӧмын усьӧ тӧдвылӧ: «Пахнет сеном над лугами. Песней душу веселя...» — сідзи-й окота бӧрддзыны тані олӧмла. Каникулъяс чӧж тадзи ковмас шоммыны.

ИВАН. А коді тэнӧ кутіс? Мед мунін дай.

РЕНА (мудеритӧ). Тэ быттьӧ он тӧд, мый вӧсна ме кольччи.

ИВАН. Тӧдтӧг ог ов. Став школаным тӧдӧ.

РЕНА. Ме правильнӧ вӧчи. (Краситӧ пар доръяссӧ.) Абу быд мортлӧн батьыс профессор. Профессоръяслы колӧ ыджыдджык дӧзьӧритӧм. Сійӧ ӧні тӧдан мый гижӧ? Вайлы пельтӧ. (Гораа шӧпкӧдӧ.) Психология кузя учебник! Тэ тайӧс гӧгӧрвоан, эквивалент?

ИВАН (сувтӧ). Сійӧ тэтӧг вермас гижны. Ӧні тіянын олӧ менам мам и сійӧ вермас...

РЕНА (торкӧ). Тэ эн лӧгась, а тётя Мотялӧн оз тырмы ни культура, ни авлун, мед кӧть сійӧ и папалӧн рӧдня. Тэ кӧ вӧлін сюсьджык, ачыд вермин аддзыны, кыдзи мамтӧ ме ыстывла могъясӧн кытчӧкӧ ылӧджык, кор папа дінӧ волӧны коллегаясыс.

ИВАН (торкӧ жӧ). Эн лӧгась, ме кӧ висьтала, мый тэ йылысь сёрнитӧны школаад.

РЕНА. Тайӧ зэв интереснӧ.

ИВАН. Ог висьтав.

РЕНА. Висьталан.

ИВАН. Ог радейт суклясьны.

РЕНА (настойчивӧя). Быть ковмас висьтавны.

ИВАН (нарошнӧ ветлӧдлӧ шутьлялігмоз). Эз ло окота висьтавны.

РЕНА. Тэ абу честнӧй морт.

ИВАН. Мый-мый? Ме абу честнӧй? Ме?

РЕНА. Да. Тэ.

ИВАН. Менӧ любӧй футбольнӧй команда радпырысь босьтас — менам честность вӧсна. Меным быд учитель эскӧ, шуа кӧ, мый урокъяс велӧді, но омӧля гӧгӧрвои.

РЕНА (лӧга сералӧ). Ме кӧ эськӧ татшӧмторъяснад эг кут ошйысьны.

ИВАН (лӧгпырысь жӧ). А ме кӧ яндыси ылӧдлыны дзоньнас школанымӧс. Кывзы, висьтала инӧсь: профессорлӧн пӧ нылыс...

РЕНА (тупкӧ пельяссӧ). Ог кывзы. Ог кӧсйы тӧдны, ог кӧсйы. (Котӧрӧн пырӧ керкаӧ.)

ИВАН (ӧдзӧслань). Мудер ручӧн нимтӧны, вот кыдзи! Школьникъяскӧд колхозӧ мунӧмысь аслад учёнӧй бать сайӧ дзебсин. А сэтчӧ жӧ: «Пахнет сеном...», «эквивалент». (Дӧзмӧ ас вылас.) Эк! Дышӧдіс мем овны мамӧ грӧшъяс вылӧ. Окота сувтны станок сайӧ, пуксьыны трактор вылӧ, лоны сварщикӧн, экскаваторщикӧн, этайӧ киясӧн стрӧитны и стрӧитны!.. (Аддзӧ ыджыд рос, босьтӧ сійӧс, заводитӧ чышкыны ӧшинюв.) Вот тадзи, этадзи! Тадзи, этадзи.

Кильчӧ вылӧ ӧдйӧ петӧ тётя Мотя. Сойяссӧ пуджӧма, передника. Шемӧсмӧмӧн видзӧдӧ пиыс вылӧ.

МОТЯ (аслыс). Адӧй, адӧй! улич чышкӧ... Дас кык во велӧдчӧм бӧрын улич чышкӧ! Янӧдіс тай пӧрысьӧ-нэмӧ, юр вывті янӧдіс. (Пиыслы.) Ивани, тэ нӧ, муса пиӧй, мый керан?

ИВАН. Ме, мамӧ, ӧти-кӧ, абу Ивани, а Иван, Ваня. Мӧд-кӧ, мамӧ, уличнымӧс чышка, тэныд отсала.

МОТЯ (малалӧ писӧ юрӧдыс). Сё зӧлӧта тэ менам. Няньӧн вердысьӧй! Да ёна жӧ нин тэ радейтан ассьыд коньӧрушка мамтӧ, ёна жӧ нин пыдди пуктан. Да ӧд кыдзи, шу, он радейт: быдті ме тэнӧ дӧва шог вылын, велӧді курыд синвасор, эг убӧлитлы чорыдджыка пӧльыштны тэ вылӧ — непӧштӧ уджӧдны! Ставсӧ ме ачым, ставсӧ ачым кери да вӧчи, мед сӧмын тэ красуйтчин: лоин велӧдчӧм мортӧн, кутін кокньыдика сины да прӧкаживайтчыны ручки-бручки.

ИВАН. Меным, мамӧ, буретш сэтшӧм олӧмыс и оз кажитчы. Киӧй удж корӧ.

МОТЯ (повзьӧ). Удж? Кутшӧм удж, муса пиӧй? Мый тэ, бласлӧвейсь! А велӧдчынысӧ коді мӧдас?

ИВАН. Да ӧд, мамӧ, сы вылӧ и велӧдчӧны, мед сэсся уджавны.

МОТЯ. А мый тэ кужан вӧчны дас кык во велӧдчӧм бӧрад? Улич чышкыны? (Гораа.) Ме тэныд кымынысь висьтавлі: кытчӧдз дядя Коля моз профессорӧдз он во, эн и думайт мӧдтор йылысь!

Керкаысь петӧ дядя Коля. Сійӧ кытчӧкӧ мӧдӧдчӧма.

ДЯДЯ КОЛЯ (первой аслыс). Нинӧм ог гӧгӧрво: нылӧй пырис бӧрдӧмӧн, тані горзӧны... Мый нӧ лоис, тётя Мотя?

МОТЯ. Пурттӧг виис пиӧй, дядя Коля, пурттӧг виис. Нэм чӧж ме сы вӧсна и олі, кӧсйи мортӧдз воштыны. Таво тулыс пидзи кок вылын нин кевмыси школаса директор водзын, мед менсьым Ваниӧс кольӧдісны арся экзаментъяс вылӧ...

ДЯДЯ КОЛЯ. Хм. Пидзи кок вылын?

МОТЯ. Царь водзын моз... Ме сылы аслыс синмас тадзи и шуи, мися, ӧні абу царскӧй прижим — ӧтдортны дӧвалысь писӧ.

ДЯДЯ КОЛЯ. Ай-ай-ай!

МОТЯ (пиыслы). Но мый тэныд оз тырмы, мый? Кад? Али кутшӧмкӧ удж мешайтӧ? Кӧть нин дядя Колясьыд яндысин! Тӧдан сійӧ кыдзи велӧдчыліс: асывнас чеччас петук чуксасьӧм шыӧ, сёӧдас вӧв, ваяс ва, школаас мунтӧдз даслаӧ котӧртлас. Воас школасьыс, пестӧ пыртас, гумла дорӧ идзасла ветлас, урокъястӧ велӧдыштас...

ДЯДЯ КОЛЯ (Иванлы). Кывзы, другӧй, кывзы, кутшӧмӧн менам вӧвсьӧма...

ИВАН. Ме тэныд завидьта, дядя Коля...

МОТЯ. А кодыр мӧдін вылӧджык велӧдчыны, помнитан, дядя Коля, луннас ачыд велӧдчан, а рытнас йӧзӧс велӧдан. Каникулъяс дырйиыд ӧти лун прӧста эн овлы: то му-видз вылын мырсян, то вӧрӧ кыйсьыны ветлан, то пристаньын грузитчан. И со кутшӧм мортӧдз воин — профессорӧдз!

ДЯДЯ КОЛЯ (лапкӧдыштӧ Мотя пельпомӧ). Та йылысь ми бӧрынджык тӧлкуйтыштам. А ӧні ме тэнӧ кӧсъя сьӧрысь босьтлыны, эштан кӧ.

МОТЯ. Кыдзи нӧ ог эшты. Эшта, эшта. Ылӧдз ветлынысӧ?

ДЯДЯ КОЛЯ. Магазинӧдз.

МОТЯ (тэрмасьӧ). Ме дзик пыр. Ӧбед пуны удитам воны?

ДЯДЯ КОЛЯ. Висьтав Реночкалы, мед пуас.

МОТЯ (оз гӧгӧрво). Мый-мый?

ДЯДЯ КОЛЯ. Мися, том йӧз мед пусясны.

МОТЯ (оз эскы). Ӧбед? Миянлы? Том йӧз? (Заводитӧ ёна серавны. Индӧ пиыс вылӧ.) Этайӧяс? Ренаыдкӧд? Ха-ха-ха. Ой, господи, господи... Ачыд тай нӧ тӧлка морт, а нинӧмабусӧ сёрнитан. Ха-ха-ха! Миянлы ӧбед?.. Ой, кочӧг быдӧн босьтіс. Ой, ог вермы сэсся.

ИВАН. Энлы, мамӧ... Ӧбедтӧ пуны, абу на задачаяс решайтны. Тэ сӧмын инды, мыйысь гӧтӧвитны. Серавны ли бӧрдны бӧрыннас кутам...

ДЯДЯ КОЛЯ. Правильнӧ, правильнӧ.

МОТЯ. Тайӧ ті збыльысь? Шутиттӧг?

ИВАН (мамсӧ босьтӧ киӧдыс). Мунам. Инды ставсӧ, кӧні мый эм и кыдзи мый вӧчны. (Эня-пиа пырӧны.)

ДЯДЯ КОЛЯ (аслыс). Мда-а-а... Збыльысь тешкодь артмӧ. Иван быттьӧкӧ и тӧлка, и кывзысьысь, и, кыв шутӧг, честнӧй детинка..: Ме сы вылӧ сэтшӧма надейтчи. А кольччӧ велӧдчӧмас, кольччӧ. Загадка кутшӧмкӧ. Дзонь проблема. Да, да: ыджыд проблема!

Петкӧдчӧ Рена. Тӧдчӧ мыйыськӧ тӧждысьӧ.

РЕНА. Тайӧ нӧ збыль, папа, мый меным ковмас пуны ӧбед?

ДЯДЯ КОЛЯ. Иванкӧд кыкӧн.

РЕНА. А ме, папочка, кӧсйи тэкӧд тшӧтш ветлыны.

ДЯДЯ КОЛЯ (окалӧ Реналысь юрсӧ). Висьтав, нылук, мый тэныд колӧ. Ме ставсӧ ньӧба. Ме ӧмӧй коркӧ мыйынкӧ ӧткажитлі тэныд?

РЕНА (леститчӧ). Тэ сэтшӧм бур, папуля, мый ме весиг вӧтӧн вӧтала тэ йылысь.

ДЯДЯ КОЛЯ. Вӧтӧн? Хм. Интереснӧ. Энлы, сідзкӧ, энлы. (Перйӧ блокнот.) Вывті интереснӧй вопрос! Мый жӧ вӧталӧ девятиклассница аслас радейтана бать йылысь? Кывза, нылук, кывза... Сӧмын тэ висьтав кыдз позьӧ стӧчджыка. Наука требуйтӧ точность.

РЕНА (мудеритӧ). Вот, папочка... Ме быттьӧ... Чӧвлы, абу тадз. Тэ быттьӧ помалін нин ассьыд научнӧй трудтӧ да выступайтан джуджыд-джуджыд трибуна вывсянь. Тэнӧ кывзӧны министръяс, ученӧйяс. Аплодируйтӧны! Овация...

ДЯДЯ КОЛЯ (торкӧ). Нда, Реночка... Тэ заводитлін менам лышкыдлун йылысь.

РЕНА (дивитӧмӧн). Папочка, тэнад оз тырмы терпениеыд.

ДЯДЯ КОЛЯ. Чӧв-чӧв!.. Збыльысь? (Дурыштӧмӧн.) Аттӧ, кутшӧм критикан лоӧма менам кӧзюкӧй! Лоа, лоа терпеливӧйӧн. Кута кывзыны.

РЕНА. Вот, значит, овация!.. Ставӧн сувтӧны. Поздравляйтӧны. Тэ пӧ вӧвлытӧма озырмӧдін педагогическӧй наука. Выль поколениеӧс воспитайтӧм кузя сетін учительяслы донъявны позьтӧм индӧдъяс. (Профессор кӧсйӧ ланьтӧдны нывсӧ, но Рена сійӧс торкӧ.) И ме быттьӧ сэні жӧ. Тожӧ аплодируйта. Тэ меным ласкӧва-ласкӧва нюмъялан... Сэсся ми локтім гортӧ. Тэ пӧрччысин, пуксин креслӧӧ дай шуан меным (малалӧ батьыслысь юрсӧ): «Менам ичӧтик кӧзюкӧй! Ыджыд аттьӧ тэныд сыысь, мый некор эн сетлы жугыльмыны аслад ӧтка батьлы, век кыпӧдін сылысь настроениесӧ да тайӧн отсалін помавны удж, коді прославитас менӧ нэмъяс кежлӧ...» Энлы, энлы, папа. Ме регыд помала... Водзӧ тэ быттьӧ шуан: «Ми ӧні тэкӧд частӧ кутам бергавны учёнӧйяс мирын да, тӧдӧмысь, тэныд оз кут лӧсявны ни сэтшӧм-татшӧм паськӧм, ни донтӧминик украшениеяс. Мыйджык эськӧ тэ кӧсъян, менам ӧтка нылукӧй?»

ДЯДЯ КОЛЯ (пасйӧ блокнотас). Сідз, сідз... Заводита чувствуйтны логика. Да, да. Кыв шутӧг, тӧдчӧ логика. Водзӧ, Реночка, водзӧ висьтав.

РЕНА. Ме, дерт, пыр жӧ гӧгӧрвои, кутшӧмджыкӧн колӧ лоны меным, дай шуа: «Бур эськӧ вӧлі, папочка, ньӧбны первой делӧ бальнӧй платье. Тӧдан кутшӧмӧс? Газӧвӧйӧс! Сылӧн шӧвкыс вӧсни-вӧсни, кокни-кокни, югыдсьыс югыд! Кор сійӧс вурӧма уна отйысь, ок кутшӧма бовъялӧ, быттьӧ еджыд пухысь».

ДЯДЯ КОЛЯ (ӧдйӧ гижӧ). Так, так. Водзӧ висьтав, водзӧ.

РЕНА. Эз эськӧ мешайт лӧсьӧдны ӧти сайысь мӧд платье — панбархатысь. Сійӧ ӧні зэв модаын. Сӧмын вурнысӧ ковмас сетны бурджык мастерлы.

ДЯДЯ КОЛЯ (механическӧя). Ещӧ мый вӧталін?

РЕНА. Тӧрыт ме пыралі магазинӧ. Ой, папуля! Тэ кӧ эськӧ аддзылін, кутшӧм моднӧй шляпаяс вайӧмаӧсь. Шӧрыс чурвидзыштӧ, доръясас буклияс, бӧрланяс сутшкӧма пӧтка перӧяс — дзонь чукӧр. А сеткаыс — сэтшӧм сук, сэтшӧм лӧсьыд... Тшӧтш пыравлі ювелирнӧй отделӧ.

ДЯДЯ КОЛЯ (быттьӧ садьмӧ). Кытчӧ?

РЕНА (леститчӧ). Папочка! Донаӧй! Менам ӧд регыд чужан лун.

ДЯДЯ КОЛЯ. Э-э, кытчӧдз вайӧдін!.. А тэ думайтан ме вунӧді ӧтка нывлӧн чужан лун йылысь?..

РЕНА. Папочка, тэ сӧмын ёна эн рӧскодуйтчы. Миянлы ӧд ковмас на сьӧмыд.

ДЯДЯ КОЛЯ (чуймыштӧ). Мый вылӧ?

РЕНА. Кыдзи нӧ мый вылӧ. Локтан тулысӧ ме помала дасӧд класс. Тэ менӧ устроитан медся бур университетас. Сідзкӧ, университет серти ковмас и паськӧм. Дерт, первой сорт вылӧ ог ышты.

ДЯДЯ КОЛЯ. Тэ мый йылысь тайӧ?

РЕНА. Ур ку доха йылысь. Первой сортыс сулалӧ сизим тысяча, а мӧд сортыс — сӧмын вит.

ДЯДЯ КОЛЯ (вӧчлӧ недӧвӧльнӧй чужӧм). Ыхм. Значит, мӧд сорт... а первойсӧ кӧ ӧти сайысь?

РЕНА. Мый тэ, папочка, мый тэ. Сійӧс бурджык ньӧбны бӧрынджык. Ме нин ставсӧ арталі. Экономитӧм сьӧм вылад ми босьтам часі.

ДЯДЯ КОЛЯ. Но ӧд часіыд тэнад эм.

РЕНА. Ме тай ог и шу — абу. Но ювелирнӧй отделын эмӧсь ичӧтик-ичӧтик часіяс, зӧлӧтӧйӧсь. Буретш кык тысяча и сулалӧ.

ДЯДЯ КОЛЯ (пыркнитчӧ кӧдзыдысь моз). Позьӧ шуны — пӧшти дарӧм.

РЕНА. Тэныд кӧдзыд, папочка?

ДЯДЯ КОЛЯ. Кынтыштӧ, буракӧ. Бррр!.. Логика серти кӧ, колӧ лоны пӧсь, а менӧ кынтӧ.

РЕНА. Эн кӧть висьмы. Гажтӧм лоӧ менам чужан лунӧй.

Петкӧдчӧны тётя Мотя да Иван.

МОТЯ. Ме дась, дядя Коля. Ставсӧ висьталі. Сӧмын колис включитны мясорубка, личкыштны кнопка, мед пестыны электропач.

ДЯДЯ КОЛЯ. Мый? Кнопка? Ах, да, кнопка. Кнопочка-выручалочка. (Мыйкӧ думайтӧ, шуалӧ аслыс) Вернӧ, чорт побери, вернӧ! Быд профессиялӧн эм аслас мера, код отсӧгӧн донъявсьӧ качество. Воспитаниеын тайӧ меранас лоӧ труд, сьӧкыдлунъяс венны кужӧм. Ми вӧчам сідзи, мед та отсӧгӧн прӧверитны миян продукциялысь качество.

МОТЯ (аслыс). О, господьӧй, сійӧ талун дзик абу ас кодьыс. Дядя Коля, мый тэкӧд лоис?

ДЯДЯ КОЛЯ. Мекӧд?.. Ставыс бур. Заводитӧны воссьыны синъяс. Лӧжнӧй радейтӧмӧн тускассьылӧм синъяс... Ті виччысьыштлӧй тӧкӧтьӧ. Ме регыд локта. (Ӧдйӧ пырӧ керкаӧ.)

МОТЯ. Ті аддзылінныд? Весиг аслыс сёрнитӧ.

РЕНА. Ой. Збыльысь, тыдалӧ, висьмӧма. Кынтіг шуӧ дрӧжжитмӧныс.

ИВАН (тӧждысьӧмӧн). Гашкӧ, врачӧс колӧ корлыны? Ме инӧсь котӧртла.

МОТЯ. Да чӧвлы тэ... Ковмас кӧ, ме ачым ветла.

ИВАН. Бара ачыд...

РЕНА. Ваня, волы татчӧ.

Рена да Ваня вашкӧдчӧны. Керкаысь петӧ дядя Коля. Сійӧ возбуждённӧя жестикулируйтӧмӧн сёрнитӧ аслыс. Мотя повзьӧмӧн видзӧдӧ сы вылӧ.

ДЯДЯ КОЛЯ (аслыс). Панбархат ковмӧма, ур ку доха, зарни часі... Видзӧдлам, выдержитанныд-ӧ экзаменсӧ. Эксперимент! Вӧчламӧй эксперимент! (Аддзӧ Мотяӧс.) Мӧдӧдчимӧй, тётя Мотя.

МОТЯ (нежнӧя). Миколаюшко, дитяӧй. Тэ талун некытчӧ эн мун. Тэныд талун, гашкӧ, оз позь муннысӧ.

ДЯДЯ КОЛЯ (оз гӧгӧрво). Ме тэнӧ ог дыр мӧд кутны.

МОТЯ (висьысьлы моз). Чӧв ола, батюшко, чӧв ола... А ті, челядь, эн доймӧй ни эн сотчӧй.

ИВАН. Эн тӧждысь, мамӧ. Ми сэтшӧм ӧбед пуам.

РЕНА. Кывъястӧ ньылыштанныд!

ДЯДЯ КОЛЯ. А ми та пыдди тіянлы ньӧбам медся коланаторъяссӧ.

Дядя Коля да тётя Мотя мунӧны.

ИВАН. Значит, мый миян эм? (Лыддьӧдлӧ чуньяс вылас.) Яй, вый, кольк, нӧк, капуста, салат, помидор, морковь, лук, картупель, укроп, перец, лаврӧвӧй лист... Энлы, мыйкӧ оз тырмы. Мамӧ висьталӧм серти менам артмыліс дас нёль названье. (Лыддьӧ выль пӧв.) Оз, оз тырмы.

РЕНА. Кутшӧм буква вылӧ? (Иван оз гӧгӧрво.) Мися, кывйыслӧн кутшӧм первойя букваыс?

ИВАН. Первойяыс?.. Энлы: куим прӧдукталӧн заводитчӧ «К»-сянь — кольк, капуста, картупель. И кык прӧдукталӧн «С» буквасянь. Ӧтиыс — салат. Мӧдсӧ вунӧді.

РЕНА. «С» вылӧ, сідзкӧ? Тайӧс ми пыр жӧ тӧдмалам. (Котӧрӧн пырӧ керкаӧ.)

ИВАН (аслыс). Сукар, сакар, самӧвар... Фу-ты: самӧварыд абу прӧдукта.

РЕНА (котӧрӧн петӧ). Видзӧдлам словарысь. Ме кута чуньӧн нуӧдны столбик кузя, а тэ лыддьы.

ИВАН (лыддьӧ). Са, сабля, сабри...

РЕНА (сералӧ). Сабриыс ӧмӧй прӧдукта?

ИВАН. Тэ ӧд ачыд тшӧктін лыддьыны.

РЕНА. Лыддьы сӧмын прӧдуктаяс.

ИВАН. Сакар, салат...

РЕНА. Ура, сюрис: «сакар!»

ИВАН. Сакарыд меным словартӧг тӧдвылӧ усьліс. (Лыддьӧ водзӧ.) Сиг, силос...

РЕНА. Силосыд — кӧрым.

ИВАН. Сир, сирӧд, собрание, сов... Аддзи! Сов! Дас нёльӧдыс вӧлі сов!

РЕНА (нимкодя). Вот и ставыс. Ме пыр тадзи вӧча. Ог кӧ тӧд мыйкӧ, видзӧдла словарысь, справочникъясысь, энциклопедияысь. Мыйла нӧ аслыд думайтны, кор тэ пыдди кодкӧ думайтлӧма нин. Гортса сочинениеястӧ ме унджыкысьсӧ босьта книгаясысь. Ӧшибкатӧг кӧ перепишитан, пятёркаыд сэні и эм!

ИВАН. Тадзитӧ абу честнӧ.

РЕНА. Ме и ачым тӧда — абу честнӧ, но ӧд кокньыдджык.

ИВАН. Давай ог кутӧй вензьыны. Миянлы колӧ тэрмасьны. Кутшӧмджык сёян ошкывлӧ батьыд?

РЕНА. Сійӧ некутшӧмӧс оз ошкыв. Сёяс, и — ставыс.

ИВАН. Э-э! Тэ омӧля тӧдан батьтӧ. Кор сійӧ дӧвӧлен сёяннас, чеччӧм бӧрас со этадз кынӧмсӧ малыштлӧ. (Кыкнанныс сералӧны.)

РЕНА. Сідзкӧ, видзӧдлам, кутас оз малавны талун.

ИВАН (гыжъялӧ юрсӧ). Сӧмын вот ме вунӧді юавны мамӧлысь: шыдсӧ пуигӧн яйсӧ али васӧ первой пуктӧны? Тэ ӧд нывбаба рӧд, тӧдан.

РЕНА (храбритчӧ). Тӧдтӧг ог ов. Пусьынытӧ — нывбабалӧн делӧ. (Пудритчӧ, краситчӧ, ӧдйӧ шуалӧ.) Тэ мун дасьты яй, жугӧд кольк, кольк пиас пукты перец, перецсӧ солышт да сідз водзӧ да сідз водзӧ. Гӧгӧрвоин? А ме пыр локта. Эн сулав. Тэрмась. (Иван пырӧ.) Кутшӧм ӧд мудер. Думайтӧ — йӧрма. Он на йӧрт! Папа библиотекаын эм дзонь книга, кыдзи дасьтыны сёян. (Ӧдйӧ пыравлӧ, сэсся листалӧ книга.) Водзкывсяньыс и заводитам тӧдмасьны. «Питание является одним из основных условий существования человека, а проблема питания — одной из основных проблем человеческой культуры». Сӧгласен. Но ставсӧ, пӧжалуй, ог удит лыддьыны. (Листалӧ водзӧ.) Вот и академик Павлов гижӧ: «Нормальная и полезная еда есть еда с аппетитом, еда с испытываемым удовольствием». А миян тётя Мотя сӧмын прӧдуктасӧ тшыкӧдӧ. Некутшӧм аппетит ни удовольствие он и тӧдлы — пӧтӧмысь кындзи. Видзӧдлӧй жӧ, видзӧдлӧй! Картинкаыс мыйта! Кутшӧм мичаӧсь! Ок, и чӧскыдӧсь, тыдалӧ, блюдоясыс. Весиг дулльӧй кутіс петны. Навернӧ, тайӧ и шусьӧ аппетитнас да удовольствиенас. А кымын кӧдзыд закускаыс! Кызь кӧкъямыс пӧлӧс салат, дас сайӧ чери закуска, ӧкмыс — яй закуска, та мында жӧ — овощнӧй. А бульоныс да супыс кымын пӧлӧс! Сёысь не этшаджык. А второе пыддиыс — ой-ой-ой! А соусъясыс!

Петкӧдчӧ Иван. Рена ӧдйӧ дзебӧ книгасӧ.

ИВАН (тӧждысьӧмӧн). Сэсся мый колӧ вӧчны?

РЕНА (Иванлань бергӧдчытӧг). Мясорубкасӧ включитін?

ИВАН. Эг на.

РЕНА. Кнопкасӧ личкыштін?

ИВАН. Но ӧд миян...

РЕНА (торкӧ). Меным ӧткодь. Сійӧ тэнад делӧ.

ИВАН (неокотапырысь). Сюйны штепсель да личкыштны кнопка абу сьӧкыд. Ми тайӧс вермам. (Мунӧ.)

РЕНА (ӧдйӧ листайтӧ книга, шуалӧ тэрыба). Салатъясысь ми бӧръям мый? Помидор да огурец? Фу, абу интереснӧ. Тайӧс и тётя Мотя кужӧ вӧчны. Крабысь гӧтӧвитам, крабысь. Сэсся суп. Али бульон? Ӧтувтам кыкнансӧ. Кодыскӧ артмас жӧ. И шуам сійӧс борщебульонӧн. А кымын сикас блюдо позьӧ вӧчны яйысь да чериысь! Вӧчам ӧтиӧс. Яй столбикысь босьтам шашлык, а чери столбикысь — белуга. Артмас шашлычнӧй белуга! Сладкӧй блюдо ӧтувтам жӧ...

Котӧрӧн локтӧ Иван. Повзьӧма.

ИВАН. Мый нӧ кутам керны? Электроэнергияыд абу.

РЕНА (спокойнӧя). Тайӧ делӧ мужичӧйлӧн. А соседъясыдлӧн эм?

ИВАН. Час котӧртла, тӧдмала. (Мунӧ.)

РЕНА. Мед эськӧ дырджык оз сетны энергиясӧ. А то ме нинӧм ог удит тӧдмавны. Ой, мый бара лоӧ! (Видзӧдӧ заголовок вылӧ.) Нелямын ӧкмысӧд страница. (Лыддьӧ пропускайтӧмӧн.) «Салат из крабов. Подготовленные овощи... так, так, так... отдельными «букетами»... так-так-так... в центре кусочки крабов... из масла и уксуса... так-так-так... соусом майонез... да сідз водзӧ. Видзӧдлам борщебульон...

Котӧрӧн бӧр локтӧ Иван.

ИВАН. Соседъяслӧн энергия эм.

РЕНА. Сідзкӧ, пробкасӧ колӧ видлыны.

ИВАН. Кутшӧм пробка?

РЕНА. Он кӧ тӧд, видзӧдлы шкапысь. Бутылкаяс дінын мыйта колӧ пробкаыд.

ИВАН. А, помнита: кор миян кусліс биным, волісны монтёръяс пробкасӧ вежны — сотчӧма пӧ важыс. Час ме звӧнитла налы, мед бара волӧны. (Котӧрӧн мунӧ.)

РЕНА. Значит, борщебульон. (Корсьӧ книгаысь.) Борщебульон... Борщебульон... Абу да. Вот яндысьтӧмъясыд. Мый колӧ, сійӧ и абу.

Бӧр локтӧ Иван.

ИВАН. Телефонным оз уджав.

РЕНА. Да мый тэныд монтёръяссьыс? Этатшӧм шкетъяссьыд? Помнитан, шег кодьӧсь и вӧліны. А тэ, чурки буди, со кутшӧм! Ачыд верман вежыштны.

ИВАН (неокотапырысь). Пробуйтлыны, дерт, позьӧ... Кӧні, шуан, бутылкаясыс?

РЕНА. Шкапын тай, мися.

ИВАН. Мыйкӧ ме ог надейтчы ас вылӧ. (Мунӧ.)

РЕНА (радлӧ). Тайӧ и бур, он кӧ надейтчы. Дырджык кутан жӧйявны. Сэк кості удитасны локны папа да тётя Мотя. Папалӧн ставыс артмас. А тётя пусьыштас. (Флакон пробкаӧн дукиӧсьтӧ морӧссӧ, юрсисӧ, ныр йывсӧ.) Да, ме и вунӧді видзӧдлынысӧ, коді лэдзӧма тайӧ книгасӧ. (Лыддьӧ.) «Пищепромиздат. Москва». Безобразие! Лоас гижны жалӧба.

ИВАН (петкӧдчӧ, киас бутылочнӧй пробкаяс). Кодӧс бӧръям тайӧяс пӧвстысь?

РЕНА. Первой ветлы бумагала да карандашла.

ИВАН (сетӧ пробкаяс). Тайӧясӧс кутыштлы, сідзкӧ. (Мунӧ.)

РЕНА (видлалӧ пробкаяс). Медся ёныс, ме думысь, тайӧ. Но лӧсялас-ӧ татшӧмыд, вот кӧні вопросыс! Колӧма жӧ видзӧдлыны детинкаясыслысь, ыджыдӧс-ӧ найӧ пуктылісны. А друг да сотчӧм пробкаыс абу пробкаысь? Друг да сійӧ резинаысь. Ой, весиг юрӧй кутіс бергӧдчыны. Дай горш сэтшӧма косьмӧ. Ваньӧ! Ва вайышт ӧти сайысь. (Кылӧ гӧлӧс: «Мый шуан?») Ва колӧ, ва. (Сувтӧ, ветлӧдлӧ, видзӧдчӧ зеркалаӧ.) Полӧмыд петӧ, кор думыштан, мый верӧсыд вермас сюрны миян Иван кодь путьтӧм-проктӧм.

ИВАН (петкӧдчӧ). Со тэныд бумага да карандаш. А ва абу.

РЕНА. Кытчӧ лоис ваыс?

ИВАН (скӧрысьмоз). Шыр юӧма.

РЕНА. А тэ нин лӧгасин, мый тшӧкті ва вайны. Подумаешь! Ме и ачым верма ветлыны. (Мунӧ.)

ИВАН (пуксьӧ кильчӧ пос вылӧ, жугыль). Э-эх! Оз везит меным... Аслам нэмӧн ӧтиысь и кӧсйи петкӧдлыны ассьым сямлунӧс дай сэн эз удайтчы. А ещӧ: профессорӧн пӧ ло! Лоан тадзитӧ, кыдзи он, кор тэнад жӧ мамыд тасмаӧн тэ бӧрся вӧтлысьӧ, думыштан кӧ сылы отсыштны.

РЕНА (локтӧ бӧр). Но и мед абу кӧ кранас ваыд. Тайӧ овлӧ. Мамыд воас — ватӧ аддзас. Юкмӧсысь судзӧдас.

ИВАН. Юкмӧсысь?

РЕНА. Но да. Миян жӧ юкмӧс эм.

ИВАН. Збыль ӧд! Ме ещӧ сэтчӧ изъяс шыблавлі. Но ваыд — этша. Колӧ ещӧ электроэнергия.

РЕНА. Мый нӧ сыысь. Мамыд и сытӧг пусьывлӧ да пӧжасьлӧ. Миян эм плита пач.

ИВАН. Ура-а-а! Вот спасибӧ тэныд, Реночка, мый казьтыштін! Ӧбедтӧ пуам ас кадӧ. Кодсӧ первой колӧ вӧчны — васӧ вайны али пачсӧ ломтыны.

РЕНА. Первой пачсӧ ломтышт. Сэсся вала ветлы. Босьт ведра да гез.

ИВАН. Ура-а-а-а! (Котӧрӧн пырӧ керкаӧ.)

РЕНА. Вот йӧйыд — висьталі. Ӧні быть ковмас заводитны пусьыны. А мый ме кужа пуны, кор весиг книгаас абу гижӧма сійӧторсӧ, мый меным окота вӧлі лӧсьӧдны. (Заводитӧ чышкыштавны синдоръяссӧ.) Ме ӧд абу слуга, абу домработница.

Петкӧдчӧ Иван. Киас ведра да гез. Синулас усьӧ аслас мачыс.

ИВАН (мачсӧ чужъялігмоз). Пачтӧ ломті. Дзик пыр лоас ва. Дасьтысь, Реночка! (Котӧртӧ вала.)

РЕНА (ӧтнас). «Дасьтысь», «Дасьтысь»... Тэныд лӧсьыд тадзитӧ шуны. А ме... (Видзӧдӧ кияс вылас да бӧрддзӧ.) Кыдзи ме татшӧм кияснас кута мыськыны картупельсӧ, кыдзи кута луасьны фарш пытшкын, вӧдитчыны пӧсь скӧвӧрӧдаӧн? Найӧ ставнас сьӧдасясны, вермасны сотчыны. Ы-ы-ы... Кык тӧлысь чӧж нарошнӧ эг тшӧтшӧдлы гыжъясӧс. Найӧ быдмисны со мый кузьтаӧдз. Ме найӧс лакируйті, краситі. Любӧ видзӧдлыны. А-а-а... Мый лоас менам гыжъяскӧд. (Аддзӧ Иванӧс, дугдӧ бӧрдӧмысь.)

ИВАН (ньӧжйӧ восьлалӧ Реналань, киас куш гез да мач). Ведратӧ ме... вӧйті.

РЕНА (бара бӧрддзӧ). Ы-ы-ы... Ая-я-а-а!..

ИВАН (уськӧдчӧ бурӧдны). Эн бӧрд, Реночка, эн бӧрд. Ведратӧ ме судзӧда. Юкмӧсас лэччыла гез кузя. Джуджыд кӧ ваыс, суныштла ваас.

РЕНА (бӧрдӧ чилзӧмӧн). Ой, эн лэччы юкмӧсас — вӧян. Ой, эн пырав ва пытшкас!..

ИВАН (малалӧ Ренаӧс юрӧдыс). Ог, сідзкӧ, лэччыв, ог. Тэ сӧмын эн бӧрд, эн бӧрд. А то и ме тшӧтш... тэ моз жӧ...

Сцена сайын Мотялӧн гӧлӧс: «О, господи! Пӧжар, тыдалӧ, пӧжар. Ӧшиньӧд сьӧд тшын петӧ». Иван уськӧдчӧ керкаӧ. Рена шӧйӧвошӧ: редикюльсьыс зеркалӧ корсигӧн механически шыблалӧ пудра, губнӧй помада, духи флакон, видзӧдлӧ зеркалаӧ да чилзӧмӧн жӧ уськӧдчӧ керкаӧ. Котӧрӧн локтӧ тётя Мотя. Сійӧ киясын бумагаӧ тубралӧм ньӧбӧмторъяс.

МОТЯ (повзьӧмӧн). Ой, сотчим! Ой, сотчим!.. (Тубрасъяссӧ шыблалӧ кияссьыс, чӧвтӧ пернапас, смела пырӧ керкаӧ.)

Здук мысти локтӧ дядя Коля. Сійӧ, тыдалӧ, тшынсӧ абу аддзылӧма. Сувтӧ кильчӧ помӧ, видзӧдӧ шыблалӧмторъяс вылӧ.

ДЯДЯ КОЛЯ (нимкодьпырысь зыралӧ кисӧ). Эксперимент артмӧ шензьымӧн стӧча! Буретш сідзи, кыдзи чайті. Весьӧпӧрмӧн логичнӧ! Мда, да!.. Заводитлам выясняйтны. Значит, медся первой на водзӧ сувтӧ вопрос: мый пуны да дасьтыны, мед ми, тётя Мотякӧд, «кывъясӧс ньылыштім». Н-н-но! Некутшӧм опыт налӧн абу. (Пос вылысь босьтӧ книга.) Меню составляйтсьӧ книга серти. Сэсся налы ковмӧ включитны мясорубка. Выясняйтсьӧ — электроэнергия абу. Так, так... Заводитӧны корсьны мыйын делӧыс. Школаын теоретически найӧ коркӧ тӧдмавлісны — эм пӧ кутшӧмкӧ пробка. «Эз-ӧ сотчы сійӧ?» (Копыртчӧ пробкала.) Вот, пӧжалуйста, аддзӧмаӧсь пробкаяс... Та бӧрын найӧ тӧдмалӧны: кранысь ва оз пет. Но ӧд ме нарошнӧ кольлі кран улас гайка ключ, мед найӧ вермисны бӧр восьтыны крансӧ. Прӧстӧй чайтӧм. Трудӧвӧй навыкъяслӧн подкоркӧвӧй центр узьӧ, чӧртыс мед тэнӧ люкыштас! Тайӧ — трутеньяслӧн признак. (Лэптыштлӧ гез.) Правда, инициативаыс эм на. Найӧ котӧртлӧны вала. Ведрасӧ, дерт, вӧйтӧны. (Друг ёна скӧрмӧ.) Позор! мирӧвӧй скандал! ассьыным школаясӧс ми преступнӧя торйӧдім трудӧвӧй процессысь, пӧртім найӧс «чистӧй» наукаяс велӧдан пансионъясӧ. (Лэптыштлӧ вывланьӧ чуньсӧ.) Ми вунӧдім великӧй йӧзлысь кывъяс, кодъясӧс вӧлі шулӧма пыр кежлӧ: «Сӧмын труд вермис обезьянаысь вӧчны мортӧс!»

Керкаысь петӧ Мотя. Тшын пиын олӧмысь сійӧс кызӧдӧ.

МОТЯ. Успокоитчы, дядя Коля, успокоитчы. Слабог, абу пӧжар вӧлӧма. Ломтӧмаӧсь плита пач, а трубасӧ восьтыны вунӧдӧмаӧсь.

ДЯДЯ КОЛЯ. Тэ тожӧ мыжа.

МОТЯ. Ме тай ог и соссьы. Вывті мыжа: вунӧді восьтыны трубасӧ.

ДЯДЯ КОЛЯ. Тэ весиг думыштны он сяммы, кутшӧм лёктор вӧчан аслад пилы.

МОТЯ. Мый нӧ сэн думайтнысӧ? Коньӧрлы колӧ гӧтӧвитчыны экзаменъяс кежлӧ, а ме сійӧс ӧбед пуӧмӧн мучита.

ДЯДЯ КОЛЯ (ӧтарӧ ёнджыка скӧрмӧ). Тэ сійӧс тӧдан, мый... Тэ сійӧс калечитан!..

МОТЯ. Господьӧй да енмӧй! Мыйла нӧ водзджыксӧ эн висьтав та йылысь.

ДЯДЯ КОЛЯ (ӧвтыштӧ кинас). Эх, он гӧгӧрво тэ...

МОТЯ. Мыйла нӧ ог гӧгӧрво. Лючки кӧ висьталан, ставсӧ верма гӧгӧрвоны.

ДЯДЯ КОЛЯ (аддзӧ Ренаӧн шыблалӧмторъяс). Волы татчӧ, тётя Мотя.

Кильчӧ ӧдзӧсӧд гусьӧн видзӧдӧны Иван да Рена.

МОТЯ (полігтырйи). Вола. Мыйла нӧ ог волы.

ДЯДЯ КОЛЯ (индӧ пудра доз вылӧ). Тайӧ мый сэтшӧмыс?

МОТЯ (босьтӧ). Тайӧ? Пудра. (Лыддьӧ.) Кы-ар-мен. «Кармен» пудра тайӧ, дядя Коля, «Кармен» пудра.

ДЯДЯ КОЛЯ (индӧ духи флакон да помада вылӧ). А тайӧяс?

МОТЯ (гусьӧн видзӧдлӧ ӧдзӧслань, аддзӧ Реналысь жестикулируйтӧмсӧ.) Мый тайӧяс, шуан, дядя Коля? Ӧтиыс тай пинь лекарство-а. Мӧдыс, тыдалӧ, рисуйтчан карандаш. Миян челядьным уськӧдӧмаӧсь ворсіганыс.

ДЯДЯ КОЛЯ (скӧрысь). Вай найӧс татчӧ. Да сэсся некор нин эн пӧръясь. Ог радейт пӧръясьӧмъястӧ.

МОТЯ (повтӧг). Тэ ме вылӧ эн горзы. Рӧд эн горзы! Ӧти деревняын быдмывлім. Ӧти рӧдвужысь петавлім. Абу господин. (Му вылысь лэптӧ редикюль.) Гашкӧ, та йылысь ещӧ юалан, мый тайӧ сэтшӧмыс? Ог куж висьтавны. Кывйӧй оз бертлась. Ачыд ньӧблін. Ме юала: мый пуктыны ньӧблін? Нянь кӧрыш? Али кило картупель?.. Ен на видзліс, мед миян Реночка коркӧ ӧчередьӧ сувтліс...

ДЯДЯ КОЛЯ (ланьтӧдӧ). Но ладнӧ, ладнӧ...

МОТЯ. Рӧд абу ладнӧ. Сьӧмыд уна лоис, профессор. Воштынысӧ некытчӧ. Вот и коян кытчӧсюрӧ. Челядьыдлы нӧ мый: ӧти преник сетан — спасибо шуасны, уна сетан — вай пӧ унджык! Бать-мам зептад сьӧмыд, ой, донтӧм. Кужасны, небось, рӧскодуйтны — муссӧ оз зырт ни кияссӧ оз гаддьӧсьт!

ДЯДЯ КОЛЯ. Эновт, сэсся, эновт. Абу лӧсьыд, кыласны кӧ миянлысь видчӧмтӧ челядьным. (Иван да Рена ӧдйӧ сайӧдчӧны.) Ветлы, кор найӧс татчӧ.

МОТЯ (мунӧ). Ивани, Реночка, донаяс! Кӧнӧсь ті?

ДЯДЯ КОЛЯ (ӧтнас, кутчысьӧ юрас). Осёл ме, пӧрысь осёл. Ыстыся школа вылӧ, пиняла малограмотнӧй нывбабаӧс, кодлы томдырся батрачитӧмыс нэм кежлас кольӧма удж дінӧ зывӧктана чувство, и тайӧн сійӧ тшыкӧдӧ ассьыс писӧ. Но Мотя прав менам ныв кузя. Ме ачым вельмӧді Ренаӧс, отсалі сылы лоны моральнӧй урӧдӧн! (Кылӧ Мотялӧн гӧлӧс: «Ньӧбис, Реночка, унатор ньӧбис!» Дядя Коля аслыс.) Но, профессор, кутчысь. Тэнад планыд бур. Сӧмын колӧ лоны чорыдӧн. Гашкӧ, абу на вывті сёр веськӧдны ассьыд ӧшибкатӧ.

Петкӧдчӧны Мотя, Иван, Рена. Том йӧз чувствуйтӧны асьнысӧ лӧсьыдтӧма.

Но вот, позьӧ шуны, чукӧртчимӧй ставӧн. Пуксьӧй, пӧжалуйста. Ті пуксьӧй, пуксьӧй. Шойччыштӧй. Велавтӧгыд ӧд и ӧбедтӧ пуны абу кокнитор.

МОТЯ. Ёна ещӧ сьӧкыд.

РЕНА (несмела). Ми, папочка, эг на мудзӧй. Сулалыштам.

ДЯДЯ КОЛЯ (малыштӧ кынӧмсӧ, Иван да Рена видзӧдлӧны ӧта-мӧд вылас). Ок, и сюмаліс кынӧмӧй. Талун менам сёйсяс вӧвлытӧм аппетитӧн!

ИВАН (матыстчӧ дядя Коля дінӧ, видзӧдӧ мулань). Ми, дядя Коля, ӧбедтӧ пуны эг сяммӧй.

РЕНА (сюсьмӧ). Тэ, Ваньӧ, эн став нимсяньыс.

ИВАН. Прӧстит, Реночка. Мыжаыс ме. Тэ составляйтін меню, а ме сӧмын котралі.

РЕНА (тэрыба). Дасьтіс прӧдуктаяс, а электроэнергияыс абу вӧлӧма. Коліс пуктыны выль пробка, а сійӧ оз куж. Ломтіс плита пач, а трубасӧ абу восьтӧма. Котӧртліс юкмӧсӧ вала, да ведрасӧ вӧйтӧма.

МОТЯ. Ведра?.. Кутшӧмӧс нӧ?

РЕНА. Эг видзӧдлы. Ачыс бурджыка висьталас.

ДЯДЯ КОЛЯ (аслыс). Позор меным, позор, татшӧм ныв вӧсна!

ИВАН (копыртӧм юрӧн). Ручкаа ведратӧ, мамӧ...

МОТЯ (писӧ дорйӧм могысь). Да мыйла нӧ тэ ручкаасӧ босьтін? Сійӧ весиг менам киысь сідзи и нетшкысьӧ пыр усьны.

РЕНА. Тайӧ мый на! Ачыс муртса эз пыр юкмӧсас ведрасӧ судзӧдны.

МОТЯ (уськӧдчӧ пиыс дінӧ, чорыда сійӧс кутӧ). Аминь, аминь! Йӧймин али мый, муса пиӧй. Йӧймин али мый!

РЕНА. Лоис ырзӧмӧн бӧрдны, мед эз пыр юкмӧсас.

МОТЯ (уськӧдчӧ Ренаӧс кутлыны). Спасибо жӧ нин тэныд, Реночка, сё спасибо!

ДЯДЯ КОЛЯ (аслыс). Молодец, Иван! Тэысь петас настӧящӧй морт. Сӧмын колӧ отсыштны тэныд. (Ставлы.) Кад помавны миянлысь комедиянымӧс. Заводитчӧ трагическӧй момент. Рена!

РЕНА. Мый, папочка?

ДЯДЯ КОЛЯ. Босьт со тайӧ тубрассӧ да разь.

РЕНА (радлӧ). Ой, папуля, тайӧ ставыс меным? Тані, навернӧ, и панбархат, и газ, и доха... Но ме, папочка, ог сяммы разьнысӧ.

ИВАН. Дядя Коля, позяс отсавны?

ДЯДЯ КОЛЯ. Оз позь. Мед ачыс трудитчыштас.

РЕНА (разьӧ кужтӧма, ёна мешайтӧны кузь гыжъясыс, ӧти на пӧвстысь чегӧ). Ай!.. Медся кузь гыжйӧй чегис...

МОТЯ (уськӧдчӧ отсавны). Да мый ті нывка вылас тешитчанныд?

ДЯДЯ КОЛЯ. Тётя Мотя!..

МОТЯ. Ланьт, дядя Коля, ланьт. Сылӧн киясыс пузчужӧм кагалӧн кодьӧсь. (Ӧдйӧ разьӧ тубрас, паськӧдӧ фуфайка, шаровары, керзӧвӧй сапӧг гоз.)

РЕНА (шемӧсын). К-к-кодлы тайӧяс?

ДЯДЯ КОЛЯ. Тэныд, ӧтка нылӧй, тэныд.

РЕНА. Т-тэ, па-папочка, навернӧ ӧшибитчин. Менам, навернӧ, этайӧ тубрасыс.

ДЯДЯ КОЛЯ. Гашкӧ, и вежӧн артмис. Видлам и мӧдсӧ. Иван, разь сійӧс. (Иван чуш-чашкерӧ кӧртӧдсӧ, паськӧдӧ фуфайка жӧ, мужскӧй гач, сапӧг гоз.) Абу ылавсьӧма, менам кӧзюкӧй. Сійӧ тэнад.

РЕНА. А мый ме кута вӧчны тайӧн?

ДЯДЯ КОЛЯ. Тайӧс тэ пасьталан, кӧмалан да аски асыв мӧдӧдчан колхозӧ аслад пӧдругаяс дінӧ. (Реналӧн заводитӧ дурмыны юрыс, синъясыс вочасӧн кылалӧны.) Тётя Мотя, кутышт, мед оз усь. (Рена нарошнӧ лэдзчысьӧ Мотя кияс вылӧ. Мотя повзьӧмӧн видзӧдӧ дядя Коля вылӧ.) Абу страшнӧ. Ну вольпась вылӧ да гыжъяссӧ тшӧтшӧд. (Рена дзебӧ кияссӧ, заводитӧ чирзыны. Мотя сійӧс нуӧ.) Но, а тайӧс, Ванюша, тэныд пӧдарита.

ИВАН (оз эскы). Меным? Пыр кежлӧ? (Заводитлӧ босьтны, но бӧр дугдӧ.) А колхозас ыстанныд?

ДЯДЯ КОЛЯ (оз гӧгӧрво). Хм... Мда... Сложнӧй вопрос... Тэнад экзаменъяс...

ИВАН (оз жӧ гӧгӧрво). Сідзкӧ, ме ог босьт найӧс. (Дӧзмӧмӧн.) Ме, гашкӧ, сы вӧсна и омӧля велӧдча, мый ті менӧ ӧлӧданныд лоны уджалысь мортӧн. Ме и тіянтӧг муна. Пышъя!

ДЯДЯ КОЛЯ. Кытчӧ пышъян?

ИВАН. Асланым школаса ёртъяс дінӧ.

ДЯДЯ КОЛЯ (радлыштӧ). Колхозӧ? Да ӧд ме та вылӧ и ньӧби тэныд паськӧмсӧ!

ИВАН (вывті рад, кучкалӧ морӧсас). Дядя Коля, тайӧ збыль? Тайӧ збыль, дядя Коля? (Уськӧдчӧ кутлыны сійӧс.)

ДЯДЯ КОЛЯ (муртса оз усь кок йывсьыс). Да, тэ... Да, ме... Иванище!.. Ой, пӧдтін старикӧс, пӧдтін...

ИВАН (ӧдйӧ пасьтасьӧ, кӧмасьӧ, тэрыба сёрнитӧ). Лунъяснас кута уджавны ёртъяскӧд ӧтув. Рытъяснас дасьтысьны экзаменъяс кежлӧ. Корсюрӧ ветлыны муяс вылӧ, вӧрӧ — тэ моз жӧ. Видзӧдлыны, кыдзи быдмӧ нянь, кыдзи мазіяс чукӧртӧны ма, кыдзи лэбалӧны вӧлявыв пӧткаяс!.. Эх, дядя Коля! Тэ кӧ эськӧ тӧдін, дядя Коля, тэ кӧ тӧдін, кутшӧм окота тӧдны ставсӧ, видлыны аслам киясӧн, видзӧдлыны синъясӧн, лоны думайтысь мортӧн!.. (Сувтӧ, заводитӧ йӧктыны, йӧктӧдӧ дядя Коляӧс. Аддзӧ мамыслысь воӧмсӧ.) Мамӧ, ме мӧдӧдча уджавны колхозӧ!

МОТЯ (ӧдйӧ кутчысьӧ морӧс дінас, заводитӧ шатласьны). Ой!..

ДЯДЯ КОЛЯ (Иванлы). Кутышт, зон, мамтӧ: пос дорышас вермас доймыны.

ИВАН. Мамӧ, мый тэкӧд лоис?

МОТЯ (горзӧмӧн). Ог лэдз! Некытчӧ ог лэдз! Деревняад быд ӧшинь улын юкмӧс. Быд скӧтнӧй дворын сюра ӧшъяс. Ог лэдз. Профессорӧдз велӧдчы, сэки и мун. Кытчӧ колӧ мун. И гӧтрасьны сэки верман. (Бӧрддзӧ.) А ме, коньӧрушка мортӧй, ог кут мешайтны тіянлы, ог кут. Первойя луннас жӧ и муна сиктӧ.

ИВАН. Ми, сідзкӧ, кыкӧн мӧдӧдчам тэкӧд. Со тадзи босьта моздорӧ, и мӧдӧдчам. Аддзан, ме кутшӧм ён нин! Шагом марш трудитчыны, сосъяс пуджӧмӧн!

Профессор вӧтчӧ эня-пиа бӧрся сосъяссӧ пуджигмоз.

Занавес