ПӦРТМАСЬӦ ВОЙВЫВ

УЧАСТВУЙТӦНЫ:

1. СЕМЕНОВ ЯКОВ ПЕТРОВИЧ — строительствоса начальник, 50 арӧса.

2. КВИТКО ВЛАДИМИР ВАСИЛЬЕВИЧ — горнӧй инженер, ЦК-лӧн парторг, 35 арӧса.

3. ОРДЫМОВ ФЕДОР ИГНАТЬЕВИЧ — геолог, 25 арӧса.

4. ПЕТРОВ АЛЕКСЕЙ НИКИТИЧ — шахтаса инженер, 35 арӧса.

5. ПЕТРОВА ЗИНАИДА ПАВЛОВНА — агроном, Петровлӧн гӧтыр, 30 арӧса.

6. ПЕРМИНОВ ПАРАМОН ДЕМИДОВИЧ — первой — коллектор, сэсся — шахтаын участокса начальник да шахтаса начальник, 40 арӧса.

7. АХМИРОВ МИША — изшом мастер, 25 арӧса.

8. ЛАМБЕЙ ПАВЕЛ КАЛИСТРАТОВИЧ — кӧр пастух-колхозник, 50 арӧса.

9. ЛАМБЕЙ АНДРЕЙ ПАВЛОВИЧ — Павеллӧн пи, первой — сиктса зон, сэсся — знатнӧй шахтёр, 20 арӧса.

10. СМОЛЕНСКАЯ НАДЕЖДА СТЕПАНОВНА — медсестра, комсомольскӧй комитет бюроса член, 20 арӧса.

11. ТЕРЕНТЬЕВ ИВАН ЕГОРОВИЧ — рабочӧй, 40 арӧса.

12. ФИЛИППОВ ЕФИМ ИВАНОВИЧ — учитель, сиктса парторганизациялӧн секретарь, 55 арӧса.

13. КЫНЕВА МАРИЯ ИЛЬИНИЧНА — колхозница, 50 арӧса.

14. КЫНЕВА ЕЛИЗАВЕТА МОДЕСТОВНА — Ильиничналӧн ныв, 18 арӧса.

15. БЛИНОВ ТИХОН ТИХОНОВИЧ — первой — начхоз, сэсся — радӧвӧй шахтёр, 40 арӧса.

Рабочӧйяс, шахтёръяс, колхозникъяс, доктор да мукӧд.

ПЕРВОЙ ДЕЙСТВИЕ

Первой картина

Юргӧ суровӧй, но величественнӧй природа йылысь музыкалӧн мелодия. Полярнӧй вой. Небесаын ыпъялӧ севернӧй сияние. Сияние югӧр улын Ламбейлӧн керка. Сійӧ сулалӧ паськыд ю кыр йылын. Кильчӧпомас скамья. Керкалы воча — клуб. Быдмӧ карликовӧй кыдз, кодлӧн корйыс джынвыйӧ усьтӧм. Сувтлӧма нин йи, но шондӧдӧма, и ю воссьӧма бӧр.

Юланьсянь петкӧдчӧ Петрова — кокньыдик пальтоа, берета, киас ва тыра ведраа. Петрова сувтӧ, шензьӧмӧн видзӧдӧ севернӧй сияние вылӧ. Керкасянь петӧ Ламбей, пасьтасьӧма маличаӧн.

ЛАМБЕЙ (нимкодьысь). Ме тэныд шулі, мада, мися, тӧвлы пуксьыны водз на: пуяс вылысь джын корйыс усьтӧм... Вот и бӧр воссис юным.

ПЕТРОВА. Тэ первой эстчӧ видзӧдлы, Павел Калистратович, небеса вылас!

ЛАМБЕЙ. Небесаыдтӧ?.. Полярнӧй войчӧжнад сійӧ миян быдногыс удитлӧ пӧртмасьыштны и турӧбӧн ворсыштны.

Кылӧ пароходлӧн тревожнӧя тутсӧм.

ПЕТРОВА (тӧждысьӧмӧн). Тыдалӧ, бара топӧдісны йиясыс. Вермас жугӧдны пароходсӧ и баржасӧ.

Пырӧ Ильинична, ижемскӧй паськӧма, кывзыштӧ сёрнисӧ.

ЛАМБЕЙ. Таысь шогсьыны оз ков, Зинаида Павловна. Мунісны кӧ миян том йӧз, муніс кӧ ачыс учитель Ефим Иванович, — ставыс лоӧ лючки-ладнӧ.

ПЕТРОВА. Зэв дружнӧй йӧз тіян.

ИЛЬИНИЧНА. Прӧстӧй йӧзыд, бобӧанӧй, век татшӧмӧсь овлӧны: ыджыдӧ оз пуксьыны дай дзонь караб оз требуйтны, а кужӧмӧн шыасян на дінӧ — из гӧра путкыльтасны!..

Вочасӧн югдӧ, сияние вошӧ.

ЛАМБЕЙ (Петровалы). Тайӧ и эм сьылысь-бӧрдӧдчысь суседкаыд менам, Ильиничнаыд.

ПЕТРОВА. Быдса гожӧм локта Москвасянь, Ильинична... Архангельскын муртса верми пуксьыны пароход вылӧ. Баренцово море вылын тайкӧ эг кув — сэтшӧма качайтіс. Нарьян-Марын лоис пуксьыны сьӧкыд баржа кыскысь пароход вылӧ, кайны-весьтасьны юяс кузя да, медбӧрын, со кынмыны татчӧ. (Тутсӧ пароход.) Тыдалӧ, збыльысь мездісны... Вот кӧні шудыс! Колӧ, сідзкӧ, дасьтысьны. (Пырӧ керкаӧ.)

ИЛЬИНИЧНА (Петрова йылысь). Кутшӧмкӧ докторша али мый?

ЛАМБЕЙ. Прӧстӧй гӧтыр... Верӧс дінас аддзысьны локтӧ. (Серӧктӧ.) Гажтӧмыс, тыдалӧ, самӧй мускӧдзыс йиджӧма!.. Куим сутки чӧжӧн помся казьтыліс верӧс йылысь... Инженер пӧ верӧсыс, Алексей Никитич Петров. Изшом дінын уджалӧ... А сідзсӧ авъя нывбабаыс. И ватӧ ваяс, и самӧвартӧ пуктас... (Гусьӧнмоз.) Ӧтитор эз кажитчы: некӧн оз уджав ни оз служит, енма-муа костӧ вошӧм морт кодь.

ИЛЬИНИЧНА (ышловзьӧ). Мый керан, сусед, мый керан: весьтӧ овны и школатӧг велалан.

ЛАМБЕЙ. Эм ещӧ ӧти нывбаба. Пароход дінас муніс... Сідзсӧ томиник, а он шу — абу салдат! Локтан луннас жӧ и — клубӧ. Нывъясӧс чукӧртіс, выль песняяс велӧдіс...

ИЛЬИНИЧНА. Сы йылысь мем нылӧй висьталіс. Фельдшерица ли мый ли пӧ.

ЛАМБЕЙ. Буретш сійӧ, буретш.

ИЛЬИНИЧНА (кӧсйӧ мунны). Аддзылан кӧ менсьым Лизукӧс, висьтав сылы: куканьяс дінӧ муні. Да ещӧ висьтав: скӧтницаясыс юасисны — кытчӧ пӧ талун лоис миян зав. (Мунӧ.)

Пароход мезданінсянь локтӧны Филиппов, Ордымов да Перминов.

ОРДЫМОВ. Вот и водзӧ ми вермам мӧдӧдчыны, Павел Калистратович.

ЛАМБЕЙ. Тайӧ зэв ладнӧ, Фёдор Игнатьевич. Туйын не ас вӧляысь шойччӧм, висьталӧны, пес кералӧмысь сьӧкыдджык.

ПЕРМИНОВ. Уф!.. Но и лои ноксьыштны... Пуксям, шойччыштам, Ефим Иванович. (Пуксьӧ беседка вылӧ.)

ФИЛИППОВ. Аттьӧ, Парамон Демидович! Ме первой гортӧ ветла... А юясным миян нэмсӧ татшӧмӧсь: вонад ӧкмыс тӧлысь чӧж — йи улынӧсь; куимсӧ — либӧ вывті паськыдӧсь, либӧ вывті ляпкыдӧсь.

ПЕРМИНОВ. Миян Уралын быдторйыс жӧ овлӧ. (Заводитӧ куритчыны.) Выль местаяс освоитігӧн быд сьӧкыдлуныс сюрлӧ.

ЛАМБЕЙ. А том йӧзыс кӧнӧсь, Ефим Иванович?

ФИЛИППОВ. Найӧ пароходнас кайӧны. (Мӧдӧдчӧ.) Ми аддзысьлам на, Фёдор Игнатьевич.

ОРДЫМОВ. Ыджыд аттьӧ, Ефим Иванович, и йӧзсӧ котыртӧмысь, и тӧлка уджсьыд!

ФИЛИППОВ. Нинӧмысь. Ас вылӧ уджалім. (Мунӧ.)

ОРДЫМОВ. И тэныд, Павел Калистратович, зэв ыджыд спасибӧ! Олім гӧстьяс моз.

ЛАМБЕЙ. Ветліг-мунігад ме и ачым радейта лоны гӧстьтуйын. Вокӧ, Изьватасын — зять, Печора кузя — кум, ненечьяс ордын — пӧльяссянь рӧдня... Кӧр пастухъяслӧн быд чумын мем шыд пуӧма. А Из сайын и сыысь ёна пыдди пуктӧны.

ОРДЫМОВ. Вывті жаль, мый пароходӧн ноксьӧм вӧсна этша лоис тэкӧд сёрниыс.

ЛАМБЕЙ. Эг эськӧ ӧткажит ученӧй мортлы. Тундра йылысь книгаыс со этані, менам юрын.

ПЕРМИНОВ. Гашкӧ, и татчӧс изшом аддзӧм йылысь историясӧ тӧдан?

ЛАМБЕЙ. Тӧда, дерт.

ОРДЫМОВ. Тайӧ ёна интереснӧ, Павел Калистратович.

Матын тутсӧ пароход, кылӧ сувтӧ берегӧ.

ЛАМБЕЙ. Миян коми морт аддзылӧма. Изьваса Виктор Попов. Дас ӧкмысӧд воын. (Пуксьӧ жӧ.) Вокӧ, сійӧ аддзас изшомтӧ и пыр жӧ мӧдӧдас Москваӧ. Ӧтияс шуӧны — ученӧй йӧзлы, мӧдъяс — веськыда Ленинлы! Споруйтӧмӧдз воліс делӧыс миян колхоз правлениеын: бумагаыс ли мый ли пӧ вошлӧма. Но спорсӧ ладмӧдіс миян Ильинична. «Ті, бобӧяс, эн споруйтӧ, — висьталіс сійӧ. — Бумагаторйыд пань ваысь вермас ньӧдздыны да бырны, а правдаыд и сирӧд песка биын оз вермы сотчыны, и паськыд мореӧ оз вермы вӧйны. Ті, шуас, юалӧй асланыд вежӧр-мывкыдлысь. Сійӧ регыдджык висьталас, кодлы вӧлі ыстылӧма посылкасӧ Виктор Поповӧн». Но и Ефим Иванович тоже висьталіс Ленин пӧ шыӧдчылӧма став йӧз дінӧ: корсьны быдлаысь мупытшса озырлунъяс да юӧртавны сылы.

Кылыштӧ пароход вывсянь локтысь том йӧзлӧн сьылӧм. Ламбей мыйкӧ думайтыштӧ и водзӧ висьталӧ ещӧ на проникновеннӧя.

Да-а, вокӧ!.. Лениныд корас ас дінас медся мудрӧй да медся вернӧй ёртсӧ ассьыс и шуас сылы: «Мем воис кад прӧщайтчыны белӧй светкӧд... Уна вӧлі думыштлӧма, унатор пӧртӧма олӧмӧ, а ковмас думайтны да вӧчны ещӧ на унджык.

Найӧ ды-ы-р беседуйтасны кыкӧн. И, ме думысь, тайӧ сотчысь из йывсьыд тоже вӧлі сёрнитӧма. Регыд мысти миян тундраӧ мӧдісны волыны тэ кодь жӧ геологъяс, Фёдор Игнатьевич. А сэсся, со, и уджъясӧн паськӧдчыны мӧдісны.

ОРДЫМОВ. Уджъясыд сӧмын на заводитчӧны. Найӧ паськаласны неуна бӧрынджык.

Петкӧдчӧны ныв-зон, уджалан паськӧмаӧсь. На пӧвстын Надя, Ӧндрей, Лиза. Надя да Лиза медся водзынӧсь, ӧта-мӧдсӧ крукыштӧмаӧсь сойяснас. Сьылӧны шуточнӧй песня, кодӧс, тыдалӧ, составитӧмаӧсь асьныс. Куплетъяслысь первойя кык строчкасӧ Лиза сьылӧ ӧтнас. Мӧд кыксӧ сьылӧны ставӧн.

Тундра весьтын нэмъяс чӧж

Ыджыдаліс чизыр тӧв.

Ыджыдаліс чизыр тӧв

Тундра весьтын нэмъяс чӧж.

«Дугды, швичкун, дурны весь» —

Шуис миян Павел дядь.

Шуис миян Павел дядь:

«Дугды, швичкун, дурны весь».

Ышмис войтӧв сы ни садь,

Скӧрмис миян Павел дядь.

Скӧрмис миян Павел дядь,

Ышмис войтӧв сы ни садь.

Чизыр тӧвкӧд панны кось

Пуджӧ сосъяс Павел дядь.

Пуджӧ сосъяс Павел дядь

Чизыр тӧвкӧд панны кось.

ЛАМБЕЙ (первойсӧ чуймӧ, сэсся ышмӧ, бӧръя куплетсӧ сьылігӧн збыльысь пуджӧ сосъяссӧ, уськӧдчӧ сьылысьяс вылӧ). Ӧк, ті, ёрӧм аканьяс!.. Коді тайӧс лӧсьӧдіс ме йылысь?.. А?..

Нывъяс размунӧны. Ламбейкӧд воча лоӧ Надя.

НАДЯ. Ме, тыдалӧ, Павел Калистратович...

ЛАМБЕЙ (сьӧлӧмсяньыс). Да, мыйла тэ татшӧм?.. Локтан тӧдтӧминӧ, юр сюяніныд на абу, а быттьӧ гортын!

НАДЯ. Сӧветскӧй му вылын — сідзкӧ, гортын, Павел Калистратович! Тэ кодь бур йӧзнас тыр миян муным. А сёрнитны кӧ юр сюянін йылысь, то мед сӧмын юрыд вӧлі — оланін сюрӧ. Ми сійӧс асьным вӧчам.

ЛАМБЕЙ (ошкӧмӧн). Тайӧ збыль. Вына морт вермас овмӧдчыны плавайтысь йи вылын. А миян тундраным, вокӧ, белӧй светсьыс муртса и векньыдджык! Мӧдан радейтны сійӧс — и сійӧ тэнӧ оз ӧбӧдит. О-о-оз, оз ӧбӧдит!

ӦНДРЕЙ (Ордымовлы). Капитан тіянлы тшӧктіс лоны дасьӧн.

ОРДЫМОВ. Ми пыр лоам дасьӧсь.

НАДЯ. Парамон Демидович, босьтӧй и менсьым чемоданӧс.

ПЕРМИНОВ. Босьтамӧй, Надежда Степановна.

Ордымов да Перминов пырӧны керкаӧ.

ЛАМБЕЙ. Тэныд, пиӧ, письмӧ эм пызан йӧрын.

ӦНДРЕЙ (чуймыштӧ). Письмӧ?.. (Ӧдйӧ пырӧ.)

ЛАМБЕЙ (шмонитӧмӧн). А тэ, Лизук, ме дінӧ волы. Пеляд мыйкӧ вашнита.

ЛИЗА. Йӧз дырйиыс ӧд он жӧ мӧд вашкӧдчыны, Павел дядь! (Сералӧны.)

ЛАМБЕЙ. Висьталӧны тэд — волы матӧджык!.. Ог кӧ ачым во сьӧлӧм вылад, менам ӧд и пи эм — жӧник! Ме, гашкӧ, сы могысь и вои гортӧ, кӧраяс дінысь — аслым ичмоньпу корсьны.

ПЕРВОЙ ЗОН. Он кӧ ылӧдчы, Павел дядь?..

ПЕРВОЙ НЫВ. Йӧзыс гусьӧнджык корасьлӧны.

ЛАМБЕЙ. Дзебны мем тайӧс некодысь. Вот гӧтралышта пиӧс — и став семьяӧн кӧраяс дінӧ. Кӧр табун содтыны. Вокӧ, сэк аддзыланныд, мый вӧчас пӧрысь колхозникыс. Район пасьта первойя премия босьтас! Став республика пасьта нималас!

ЛИЗА (шутитӧмӧн жӧ). Сідзкӧ тай, ковмас матыстлыны пельӧс.

ЛАМБЕЙ (гораа вашкӧдӧ пеляс). Мамыд тшӧктіс висьтавны, ме пӧ муна куканьяс дінӧ. (Сералӧны.) И ещӧ тшӧктіс висьтавны, тэнӧ пӧ юасьӧмаӧсь скӧтницаясыд. (Сералӧны.)

Петӧ Ӧндрей. Сылӧн эм мыйкӧ висьтавны батьыслы, но оз решитчы сійӧс висьтавны.

ӦНДРЕЙ. Ефим Иванович гортас муніс?

ПЕРВОЙ ЗОН. Давай лучше мӧдтор йылысь.

ПЕРВОЙ НЫВ. Тані гырысьджык вопросъяс решайтчӧны.

Ӧндрей тайӧс быттьӧ оз кыв, ӧдйӧ мунӧ Филиппов дінӧ.

НАДЯ. Павел Калистратович, тэ кӧть эськӧ ас йывсьыд мыйкӧ висьталыштін.

ЛИЗА. Аслад том кад йывсьыд.

ПЕРВОЙ НЫВ. Сійӧ ӧд томдырйиыс зэв пӧ сюсь вӧвлӧма. Тайӧс дедӧ мем пыр висьтавлӧ.

ЛАМБЕЙ (ышловзьӧ). Том кад йылысь, шуанныд, висьтавны?.. Ог соссьы: сюсь и ён вӧвлі. Лызьяс вылын эг ӧтчыд суӧдлы кӧинӧс. Аслам важиник пищальысь уськӧдлывлі ӧткӧн лэбысь уткаӧс Паличӧн кыскасигъясӧн эг сетчыв силачьяслы... А мый пӧльзаыс?.. Вир юысь Петыр Максьӧлы сӧмын вӧлі пӧльзаыс менам сюсьлунысь да вынйӧрысь. Вокӧ, томлунӧй менам прӧйдитіс енэжысь чуктӧм кодзув моз: эг аддзыв лючки, кытысь сійӧ сӧрвитчис и кӧні кусіс.

Сёрнитӧмӧн петӧны керкаысь Ордымов, Петрова, Перминов.

ОРДЫМОВ (Петровалы). Комияслӧн рочьяскӧд йитӧд заводитчӧ ёна важысянь. Дас нёльӧд нэмсянь нин комияс заимствуйтны рочьяслысь культура, подражайтӧны найӧ бытлы.

ПЕТРОВА. А ме локта и шензя: кытысь тані роч архитектура, древнерусскӧй сарапанъяс... Правда, кыдзи рочын, тайӧ сарапанъяссӧ том нывбабаяс, тыдалӧ, озджык нин новлыны. Да и шуны кӧ татчӧс йӧз йылысь — найӧ кыпӧдчӧмаӧсь, сӧвмӧмаӧсь.

ОРДЫМОВ (пуктӧ кӧлуйсӧ). Кад нин, Зинаида Павловна, заводитам пӧртны олӧмӧ коймӧд пятилетка. (Йӧзлы.) А кӧні Ӧндрейыс?

ПЕРВОЙ ЗОН. Филиппов дінӧ, буракӧ, муніс.

ПЕРМИНОВ. Сійӧ жӧ кӧсйӧ мӧдӧдчыны миянкӧд.

ПЕРВОЙ ЗОН. Кыдзи тіянкӧд?

ПЕРВОЙ НЫВ. Ӧшибка, навернӧ.

МӦД ЗОН. Мыйкӧ эськӧ вӧлі виччысьӧ райкоммолсянь да.

ОРДЫМОВ. Эз ӧмӧй висьтав?

ЛАМБЕЙ (сувтӧ). Код йылысь сёрниыс?

ПЕРВОЙ ЗОН. Ӧндрейыд пӧ кӧсйӧ мӧдӧдчыны.

ЛАМБЕЙ. Кытчӧ?.. Тэ, тыдалӧ, вӧтасян...

ПЕРМИНОВ. Лыддис кутшӧмкӧ письмӧ и друг быттьӧкӧ вежсис.

ЛАМБЕЙ (чуймӧмӧн). Письмӧ?..

МӦД ЗОН. Ме шуи тіянлы...

ЛАМБЕЙ. Ланьт!.. (Ӧдйӧ мунӧ писӧ корсьны.)

ПЕРВОЙ ЗОН. Вот, зон, дивӧыс.

ПЕРВОЙ НЫВ. Лиза, да, кыдзи нӧ тайӧ?..

ЛИЗА (тӧждысьӧмӧн). Менсьым нӧ мый юасян.

МӦД НЫВ. Ӧд сёрниыс эз вӧв.

МӦД ЗОН. Тайӧ тіянлы эз вӧв... Ӧндрей важӧн нин думайтӧ лоны горнякӧн.

Пароход сетӧ свисток мӧдӧдчыны.

ПЕТРОВА. Мед кӧть эз коль миянӧс.

ПЕРМИНОВ. Миянтӧг оз мун.

Тэрмасьӧмӧн локтӧны Ӧндрей, Филиппов, Ламбей.

ӦНДРЕЙ (батьсӧ убеждайтӧмӧн). Мем сӧвесть колӧ тӧдны!.. Миянлысь край кыпӧдӧны рочьяс, украинечьяс, белоруссъяс; воӧмаӧсь строительяс да горнякъяс страналӧн быд пельӧсысь — Сибирысь, Уралысь, Дальньӧй Востокысь, лунвылысь и войвылысь. А ме, видзӧдтӧ, паччӧр вывсянь кань моз видзӧда, кыдзи кывтӧны-катӧны грузъясӧн тыр пароходъяс...

ЛАМБЕЙ (решительнӧя). Ог лэдз — и ставыс!..

ӦНДРЕЙ (быттьӧ оз кыв). Сӧветскӧй власть миянлы сетіс морт нога олӧм, грамота, шуис миянӧс став сӧветскӧй народъяслӧн равнӧй вокӧн.

ЛАМБЕЙ. Том на велӧдны пӧрысь мортӧс!.. Пӧрысь йӧзыд эз ӧтиысь вуджлыны кӧръясӧн йидора ва, эз ӧтиысь турӧбкӧд воча волыны, — ставсӧ вежӧртӧны.

ӦНДРЕЙ (том йӧзлы). Ёртъяс, ме талун пӧлучиті райкоммолсянь комсомольскӧй путёвка мӧдӧдчыны Воркутаӧ уджавны.

ЙӦЗ (ошкӧмӧн).

— Правильнӧ, Ӧндрей!

— Воис кӧ путёвка — дерт!

— Ыджыд честь.

ӦНДРЕЙ. Ог, ог вермы кольччыны тайӧ пароходысь. Вермас лоны — медбӧръя нин таво кежлӧ. Мӧдӧдча.

ФИЛИППОВ. Павел Калистратович, тэ менӧ тӧдан: ме некор эг кӧсйыв йӧзлы омӧльтор...

ЛАМБЕЙ (торкӧ Филипповӧс). Некор эз на вӧвлы сэтшӧмыс, мед прамӧй кӧр пастухлӧн пи мӧдӧдчис не бать туйӧд.

Ӧндрей пырӧ керкаӧ. Ламбей заводитлӧ пырны жӧ.

ФИЛИППОВ. Оз ков босьтны важсӧ пример пыдди, Павел Калистратович. Важ олӧм дырйиыс тэ вӧлін батракӧн, а ӧні — знатнӧй кӧр пастух!

ЛАМБЕЙ (убеждённӧя). Пиыс менам ӧти, Ефим Иванович. Быдті ачым. Мамыс кольліс сійӧс этапнӧйӧн. Велӧді сизим во школаын. Кад нин батьлы отсӧг сетны. Тысячаӧн джынйӧн кӧр куш миян бригадалӧн. Код вылӧ эновта тайӧ озырлунсӧ? Коді мӧдас юктавны ваӧн пӧрысь мортӧс, кор ог кут вермыны чеччывны ачым?.. Чӧв олан? Правдаыс пӧимӧн синмад койыштіс?.. (Бара мӧдӧдчылӧ пырны.)

ФИЛИППОВ. Но, эм ыджыдджык правда!..

ЛАМБЕЙ (бергӧдчӧ). Правдасӧ ме тӧда ӧтиӧс, Ефим Иванович: ме пӧрысьми — колӧ меным вежысь.

Пароход сетӧ мӧд свисток.

ОРДЫМОВ (аслас ёртъяслы). Ті мунӧй пароход вылас. Висьталӧй капитаныслы, мед виччысьыштас.

Надя кутлӧ нывъясӧс да мунӧ Петровакӧд. Тэрмасьӧмӧн петӧ Ӧндрей. Сійӧ выходнӧй пинжака, морӧсас комсомольскӧй значок, киясас пальто да чемодан. Аддзӧ шемӧсӧн сулалысь батьсӧ, дрӧгмунӧ.

ӦНДРЕЙ. Батьӧ... Прӧстит менӧ татшӧм ӧдйӧ мӧдӧдчӧмысь... Но ме ог вермы вӧчны мӧд ногӧн... Бать... верит меным. Ме ӧд тайӧс бур вылӧ. И эн думайт, мый эновта тэнӧ... (Кӧсйӧ кутлыны батьсӧ.)

ЛАМБЕЙ (решительнӧя). Эн лысьт кутлыны менӧ... Ме тэныд абу бать и тэ меным абу пи!..

ӦНДРЕЙ (первой оз тӧд, мый вӧчны, сэсся сувтӧ пидзӧс вылӧ бать водзас). Вӧч кӧть мый, а мунны менӧ эн кут.

ЛАМБЕЙ (шӧйӧвошлӧ, сэсся решительнӧя). Ог благословит! Татӧг он лысьт мунны! Татӧг ӧти воськов он лысьт воськовтны! (Ӧдйӧ пырӧ гортас.)

ӦНДРЕЙ (аслыс). Муна, батьӧ!.. (Сувтӧ.) Мӧдӧдчимӧй, ёртъяс! (Заводитӧны мунны. Ӧндрей аддзӧ бокын сулалысь Лизаӧс, кежӧ сы дінӧ.) Прӧщай, Лиза!

ЛИЗА (сетӧ кисӧ, дыр видзӧдӧ Ӧндрей вылӧ). Миянӧс эн жӧ вунӧд дзикӧдз, Ӧндрей...

ӦНДРЕЙ (мыйкӧ гӧгӧрвоӧ Лиза выражениеын, но сулавны некор нин). Бурӧдӧй батьӧс. Мед ме вылӧ ёнасӧ оз лӧгав... (Ӧдйӧ мунӧ пароходлань.)

Лиза ӧтнас. Музыкалӧн лирическӧй мелодия чужтӧ радейтысь ныв пытшкын шогсьӧм да муса зон вылӧ ӧбида, мыйла тайӧ зонмыс ӧнӧдз на эз гӧгӧрво сьӧлӧмсӧ нывлысь.

ЛИЗА (сьылӧ).

Уна байдӧг лэбӧ весьтӧд —

Ставыс еджыдӧсь.

Уна зонмыс миян сиктын —

Ставыс удалӧсь.

Мыйла сідзик, менам сьӧлӧм,

Йӧрмин татшӧма?

Мыйла виччысьтӧма горшӧ

Тадзи сатшӧма?

Эг тай удит муса зонлы

Пеляс вашнитны.

Эг на лысьт тай еджыд сьылі

Сылысь кутыштны.

Лэдза гӧлубӧс сы бӧрся

Татшӧм юӧрӧн:

Ёнтӧ тэнад вӧсна, милӧй,

Менам сьӧлӧмӧй.

Керкаысь петӧ Ламбей да аддзӧ тыртӧм ӧшинюв. Дрӧгнитӧ пӧрысь бать, усьӧ шемӧсӧ и шогӧ. Сійӧ аддзӧ Лизаӧс да, чӧв мӧдӧдчӧ сы дінӧ. Но Лиза котӧртӧ гортас. Рӧмдӧ. Пароход сетӧ коймӧд свисток. Ламбей сулалӧ ӧтнас. Заводитӧ усьны лым.

Занавес.

Мӧд картина

Гожся тундра. Шондіа вой. Шонді югӧрысь ӧзйӧ гӧраяслӧн гряда. Неыджыд ю сайын тыдалӧ ичӧтик шахтёрскӧй посёлок. Сцена пытшкӧсланьын геолог-разведчикъяслӧн палатка. Кӧнкӧ матын бруткӧ-уджалӧ буритчан агрегатлӧн локомобиль. Пусян бипур дорын пукалӧ Ордымов, сійӧ киын полевӧй журнал. Бурӧвӧйысь локтӧ Перминов.

ПЕРМИНОВ. Кын му помасис скважинаын, Фёдор Игнатьевич.

ОРДЫМОВ. Вот и бур.

ПЕРМИНОВ (заводитӧ куритны). А кыдзи старик?

ОРДЫМОВ. Старик ассьыс делӧ тӧдӧ: пиыстӧг оз кӧсйы мунны.

ПЕРМИНОВ. Кӧні ачыс?

ОРДЫМОВ. Сійӧ характерӧн сьӧкыд пукавны ӧти местаын.

Локтӧ рабочӧй, мешӧкын вайӧ изшом.

РАБОЧӦЙ. Ӧндрейыс эз на лок кыйсянінсьыс?

ПЕРМИНОВ. Мунісны кӧ Ахмировкӧд, ыджыд ноптӧг найӧ оз воны.

РАБОЧӦЙ (ректӧ мешӧксӧ). Фёдор Игнатьевич, татчӧ кӧсйӧ волыны Яков Петрович.

ОРДЫМОВ. Ӧтнас?

РАБОЧӦЙ. Ог тӧд. Сы дінын кодкӧ тӧдтӧм морт вӧлі. Ӧчкиа, кучик тужуркаа. Шахта дінысь аддзылі.

ПЕРМИНОВ. Ме бӧр мӧдӧдчи бурӧвӧйӧ. (Мунӧ.)

РАБОЧӦЙ. И ме ӧти сайысь ещӧ ветла изшомла. (Мунӧ.)

Локтӧ Ламбей, чӧв пуксьӧ бипур дорӧ.

ОРДЫМОВ (босьтӧ изшом кусӧк да сетӧ Ламбейлы). Вот тэныд и изшом, Павел Калистратович! Ю сайысь ваялам. Сэні шахта эм. Первойя шахта тэнад тундраын! Но регыд и тась, миян кок улысь, мӧдам перйыны. А ещӧ неуна сёрӧнджык тані лоас кар! Лоасны уна судта керкаяс, ӧзъясны югыд бияс, и тэ локтан миян ордӧ гӧститны.

ЛАМБЕЙ (изшомсӧ видлалӧ ыджыд интересӧн, мыйкӧ казьтылӧ аслыс). Да... Збыльысь сотчысь из!.. Позьӧ пусьыны, позьӧ шонтысьны!.. А ме, вокӧ, эг тӧд та йылысь сэки, скӧнь эг тӧд...

ОРДЫМОВ. Тэ аддзылін изшом?.. Гашкӧ, выльлаысь?..

ЛАМБЕЙ (сувтӧ, волнуйтчӧ). Аттӧ, сё морӧ, быдӧн пӧсьӧ шыбитіс.

ОРДЫМОВ (ёна заинтересуйтчӧ). Мыйла эн юӧрт некодлы?

ЛАМБЕЙ (пӧся). Тэ скӧнь на том, Фёдор Игнатьевич. Сэки ӧмӧй ме тӧді, мый тайӧ сотчысь изйыс зэв колантор?

ОРДЫМОВ. А бӧрыннас?

ЛАМБЕЙ. Эн мучит. Думыштны эг сяммы. Ме ӧд ӧні первойысь тӧді, мый изшомыс татшӧм.

ОРДЫМОВ. Кыдзи вӧлі делӧыс?

ЛАМБЕЙ (пӧся). Менам гӧтрасян воясӧ тайӧ вӧлі. Карскӧй море дорсянь кӧр табунӧн воигӧн. Поводдяыс — зэр, шлякыш. Видзӧдам — шор берегын тӧщӧ. Ваялім сэтчӧ лякбадь, сьӧд изъясысь ме вӧчи бипур места, пестім би и унмовсим. А кор садьмим, ставыс нин сотчӧма. Тэ гӧгӧрвоан? Весиг изъясыс...

ОРДЫМОВ (оз вермы терпитны). Сідз, сідз... Сотчисны изъяс...

ЛАМБЕЙ. Тэ первой кывзы... Ме и юала ёртъяслысь: «Босьтлінныд изъяссӧ?» «Эг, шуӧны, узим садьмывтӧг». А юрси аслам, кыла, сідзи и кыпӧдчӧ, мышкуӧ койыштіс кӧдзыд ваӧн. «Пышйыны колӧ, — медводз югнитіс юрам. — Оланіныс некрещенӧйяслӧн. Весиг изсӧ пышйӧдӧмаӧсь, мед сійӧ оз донав биын. А, гашкӧ, — пышйигӧн нин уси дум вылӧ, — гашкӧ, асьныс, тундраса мутиясыс, вӧлі пӧртсьӧмаӧсь изъясас?.. Вот кӧні бедаыс! Локтан войясӧ, сідзи тӧд, водзӧс мынтыны воласны — кӧинъясӧн уськӧдчыласны либӧ висьӧм кутшӧмӧскӧ лэдзасны кӧр стадаӧ». (Сералӧ.)

ОРДЫМОВ. Местасӧ стӧч тӧдан?

ЛАМБЕЙ (серьёзнӧя). Мем первой аслым колӧ ветлыны сэтчӧ... Комын вит во колис сэксянь. Скӧнь вунӧді...

Петкӧдчӧны Петрова гозъя да Надя. Кокньыдик гожся паськӧмаӧсь. Петрова киын тундравывса цветъяс. Надялӧн бокас ӧшалӧ аптечка сумка.

ОРДЫМОВ (аддзӧ воысьясӧс, кыпыда). О-о!.. Талун миян лоӧ ыджыд праздник! (Киасьӧ.) Надежда Степановна!

НАДЯ. Здоровӧсь?.. Локті лечитны.

ОРДЫМОВ. Кӧръяс кодь здоровӧсь!.. Вот и Зинаида Павловна локтіс видлыны миянӧс! (Киасьӧ.) Зэв рад!

ПЕТРОВА. Ті, Фёдор Игнатьевич, первой цветъяссӧ видлӧй. Найӧ дзикӧдз запахтӧмӧсь!

ОРДЫМОВ (видлӧ). Тайӧ вернӧ. Тундравывса цветъясысь пӧшти оз кыв запах... Чолӧм, Алексей Никитич!

НАДЯ (аддзӧ Ламбейӧс). Зинаида Павловна, видзӧдлӧй таланьӧ!..

ПЕТРОВА. Энлӧй жӧ, энлӧй... Да, тайӧ ӧд Павел Калистратович!..

ЛАМБЕЙ (нимкодьысь). Ме, висьталӧны, Зинаида Павловна, ме. Ачым!

НАДЯ (мыйлакӧ сдержаннӧя). Видза оланныд, Павел Калистратович!

ЛАМБЕЙ. Видза, бур нылӧ, видза!

ПЕТРОВА. Алексей Никитич, тэ помнитан менсьым висьталӧмӧс, кыдзи кольӧм ар ми гӧститім Павел Калистратович ордын?

ПЕТРОВ (быттьӧ оз кыв). А кӧнӧсь начальство, Фёдор Игнатьевич? Мем висьталісны татчӧ воӧмӧн.

ОРДЫМОВ. Семеновӧс виччысям.

ПЕТРОВ. Интересуйтӧ выльӧн воысьыс. Он тӧд овсӧ?

ОРДЫМОВ. Эг кывлы, Алексей Никитич.

ПЕТРОВА. Зэв ёна кора, Павел Калистратович, волыны миянӧ гӧститны.

ЛАМБЕЙ. Спасибӧ, мада. Ладмас кӧ делӧыс, тшук вола. (Мыйкӧ уськӧдӧ тӧдвылас.) Сідзкӧ, энлӧ жӧ... муртса кежлӧ пыж дінӧ ветла. Бур гӧснеч менам эм тіянлы. (Ӧдйӧ мунӧ.)

ПЕТРОВ. Найӧ, гашкӧ, бурӧвӧй дінасӧсь нин?

ОРДЫМОВ. Ветлам, видзӧдлам. (Мунӧны.)

Надя кылӧ кодъяслыськӧ воӧм, гусьӧникӧн мичӧдчыштӧ. Петкӧдчӧны Ӧндрей да Ахмиров. Найӧ ружьеаӧсь, вайӧны сьӧрсьыс уткаяс да байдӧгъяс.

АХМИРОВ (аддзӧ Надяӧс). Хо! Ме тэд висьталі, Ӧндрей! Посёлокӧ мунны оз ков. Посёлоксянь асьныс воасны... Вот и решайтӧй! Привет, Надежда Степановна! (Киасьӧны.)

НАДЯ. Мый йылысь сёрниыс, Ахмиров?.. Чолӧм, Ӧндрей! (Киасьӧны, тӧдчӧ — ӧта-мӧд дінас абу равнодушнӧйӧсь.)

АХМИРОВ. Сёрниыс ыджыд. Шахтаӧ кора Ӧндрейӧс. Напарникӧн кӧсъя босьтны аслым. Тэ комсомольскӧй комитет бюроса член. Отсӧг корам. Сёрнитлы Ордымовкӧд. А то сійӧ вермас не лэдзны.

НАДЯ. Буритчан уджъяс ӧні кежлӧ главнӧйӧсь тані. Вот мӧдасны стрӧитны выль шахта...

АХМИРОВ (торкӧ). Э-э!.. Первой кывсянь тӧдчӧ: он отсав... Абу лӧсьыд, Ӧндрей, мыйла чӧв олан?.. Мыйла кутан вомад ва?

ӦНДРЕЙ. Надя та йылысь тӧдӧ нин...

АХМИРОВ. Тӧдӧ?.. Ачым заводитла... Кӧні Ордымовыс? Ветла бурӧвӧйӧ. (Пуктӧ ружьесӧ, пӧткасӧ, мунӧ.)

Надя да Ӧндрей радейтӧны ӧта-мӧдсӧ, и кыкӧн кольӧм вӧсна оз тӧдны, мый йылысь сёрнитны.

НАДЯ (видлалӧ уткаясӧс). Тайӧ айяс али эньяс, Ӧндрей?

ӦНДРЕЙ. Айяс. Эньясыс ӧні быдтысьӧны. Найӧс ог лыйлӧ.

НАДЯ (косталӧм бӧрын). Да. Ме и вунӧді... Ме мыйкӧ тӧда и ог висьтав.

ӦНДРЕЙ. Секрет, сідзкӧ... Гашкӧ, век на сійӧ, мый кӧсйин висьтавны комсомольскӧй собрание вывсяньыд разӧдчигӧн?

НАДЯ (яндысьӧмӧн). Тэ помнитан на?.. Но тайӧ абу сы йылысь. Тайӧ мӧдтор йылысь.

ӦНДРЕЙ. Навернӧ, тӧда.

НАДЯ. Вот и он тӧд...

ӦНДРЕЙ (босьтӧ Надяӧс киӧдыс). Вот и тӧда.

НАДЯ. Вот и он тӧд...(Аддзӧ Ламбейлысь воӧмсӧ, ӧдйӧ мынтӧдчӧ Ӧндрей киысь.) Ме кӧсйи висьтавны батьыд йылысь. Со сійӧ!

ӦНДРЕЙ. Батьӧ?..

Петкӧдчӧ Ламбей. Киас дзодзӧг. Аддзӧ писӧ. Дзодзӧгсӧ пуктӧ бокӧ. Сувтӧ и видзӧдӧ пиыс вылӧ.

ЛАМБЕЙ (аслыс). Час, видзӧдлам, мый шуас.

ӦНДРЕЙ. Батьӧ, тэ нӧ кысянь мый?.. Али эн тӧд менӧ?

ЛАМБЕЙ (стрӧгпырысь). Код тӧдас, пиӧ... Гашкӧ, и мӧдас коркӧ юлӧн ва визувтны гӧралы паныд. Сӧмын не миян олігъясӧ, не миян нэмӧ...

Бурӧвӧйсянь локтӧны Ахмиров да Ордымов.

АХМИРОВ (пӧся). Мортыслысь колӧ гӧгӧрвоны душасӧ, Фёдор Игнатьевич... Ог ас вӧсна тӧждысь — напарник мем сюрас. Ме сы вӧсна тӧждыся. (Локтӧ Ӧндрей дінӧ, Ламбей йылысь.) Бать?.. (Ламбейлы.) Кывлі тіян йылысь. Пиыд висьтавліс. Чолӧм! Ахмировӧн шуӧны. Пиыдлӧн друг. Ошкыны мӧда питӧ. Джигит! Ме ӧтчыд лыя — сійӧ кыкысь, куимысь. (Торйӧдӧ ассьыс пӧтка, мед сійӧс кольны.) Сы дінын ме — коймӧд пай кыйсьысь.

ӦНДРЕЙ. Миша, эн коль. Сійӧ тэнад.

АХМИРОВ. Батьыдлы гӧснеч пыдди сетан... Нолтӧсь, Фёдор Игнатьевич, уна-ӧ кадыс?

ОРДЫМОВ (видзӧдлӧ часіыс вылӧ). Вой шӧр бӧрын кызь минута.

АХМИРОВ. О! Мем регыд шахтаӧ. Мӧдӧдча. Видза колянныд! (Мунігас нин.) Эн вунӧд, Ӧндрей: субботаӧ рытсяньыс.

ЛАМБЕЙ (пи йывсьыс аслыс). Правильнӧ шуис том мортыс: мортыдлӧн сямлуныс, вокӧ, кыйсян ноп серти тӧдчӧ. Ӧндрей вӧсна бур йӧз водзын янавны оз ковмы. Скӧнь ме кодь... (Аддзӧ Ӧндрейлысь да Ордымовлысь вашкӧдчӧм, скӧрмӧ.) Волы татчӧ, зимӧгор!.. (Ӧндрей матыстчӧ.) Висьтав: коді эновтіс ассьыс батьсӧ? Кодлӧн батьыс прӧста лотайтӧ кад ассьыс асныра писӧ корсьӧм вылӧ? Тэ тӧдан, кӧні мем колӧ лоны? Кӧраяс дінын.

ӦНДРЕЙ. Батьӧ, олӧм вылас тэ видзӧдан сӧмын кӧр сюръяс пыр.

ЛАМБЕЙ. Сідзкӧ, шуа: кӧръястӧгыд тундраын кынӧмыд тыртӧм, вывкуыд гӧнтӧм дай, висьталӧны, воськолыд бордтӧм.

Петкӧдчӧны Петров гозъя.

ПЕТРОВА. Вот и Ӧндрей локтӧма.

ЛАМБЕЙ (тэрмасьӧмӧн пиыслы). Ветлам бокӧджык. Сёрни эм.

Ламбей ая-пиа мунӧны сцена сайӧ.

НАДЯ (Ордымовлы). Мый накӧд?

ОРДЫМОВ. Батьыс локтӧма Ӧндрейысла.

НАДЯ (повзьӧ). Ӧндрейысла?.. Ог лэдзӧй. Мӧдам вензьыны сійӧ батькӧд!..

ПЕТРОВ. Митӧ?.. Ми, дерт. А сійӧ — рӧднӧй бать!

НАДЯ. Батьыс Ӧндрейлӧн кӧсйӧ, мед сылӧн пиыс ассьыс морт нэмсӧ вуджис кӧр дадьяс вылын жӧ. А ми шуам: «Да. Кӧръяс вылын позьӧ мунны ӧдйӧ, но не ӧдйӧджык сылӧн пӧльяс дорысь».

ПЕТРОВ. Мем тайӧ веськодь.

ПЕТРОВА (дӧзмӧмӧн). Лёша, ме тэныд кымынысь шулі...

ПЕТРОВ (аддзӧ воысьясӧс, горӧдӧ). Квитко?!. Владимир Васильевич Квитко?!. (Ӧдйӧ мӧдӧдчӧ паныд.)

Петкӧдчӧны Семенов, Квитко, Блинов.

КВИТКО (локтігмозыс, кыпыда). Специальностьным миян сэтшӧм, Алексей Никитич, специальностьным: сюрӧдчыны геологъяслӧн пӧсь бипур вылӧ, ӧзтавны найӧ кок туйясӧ стройка бияс, бырӧдавны миян страналӧн карта вылысь сідз шусяна «белӧй пятнояс». А вот татчӧ воны тэ панйӧмыд менӧ!

СЕМЕНОВ (Ордымовлы). Тӧдмасьӧй: Владимир Васильевич Квитко, горнӧй инженер, локтіс татчӧ ЦК направление серти уджавны.

ОРДЫМОВ (киасьӧ). Ордымов, геолог.

ПЕТРОВА. Прамӧй мужчинаяс киасьны заводитлӧны нывбабаяссянь.

КВИТКО (нимкодьпырысь). Зиночка! Донаӧй!.. Москваын на кывлі татчӧ тэнад воӧм йылысь. Восхищайтча! (Киасьӧ Надякӧд.)

НАДЯ. Смоленская, медсестра.

КВИТКО (гажаа). Зэв рад аддзыны скӧр войвылысь татшӧм нежнӧй создание.

НАДЯ. Первой кывсянь тӧдчӧ — ті онӧ лоӧ гажтӧм мортӧн.

БЛИНОВ (кӧсйӧ шутитны). Владимир Васильевич прав. Надялы местаыс — Кавказ, Крым! Тулысъясын мичмӧдны пальмовӧй аллеяяс, а бархатнӧй сезонын пукавны виноградӧн тыр пызан сайын да гажӧдны том йӧзӧс.

НАДЯ. А ме, Тихон Тихонович, ӧнӧдз на думайтлі, мый ті сӧмын хозяйственник!

БЛИНОВ. Кыдзи колӧ гӧгӧрвоны тайӧс?

НАДЯ. Тіян поэтическӧй натура!(Сералӧны.)

БЛИНОВ (серьёзнӧя). Сыын и делӧыс... Мортыд, тӧданныд кӧ, сложнӧй штука: быдтор вермӧ усвоитны. Ӧд збыльысь кӧ шуны, коді ме вӧвлі коркӧ?..

НАДЯ (торкӧ Блиновӧс, мед сійӧ оз баквалит лишнӧй). Блинов ёрт ті лучше ас гӧгӧрсьыд видзӧдлӧй.

БЛИНОВ (оз гӧгӧрво). Мыйсӧ?

Бӧр локтӧны ая-пиа. Кывзӧны сёрнисӧ.

НАДЯ (Квитколы). Овлӧ ӧмӧй татшӧм шондіа войыс Крымын, Кавказын! Эм ӧмӧй кӧнкӧ мӧдлаын татшӧм жӧ енэж, татшӧм воздух! А гӧраясыс! Кымын рӧмӧн найӧ ӧзйӧны! Кымын пӧлӧс краскаӧн мавтыштӧма тундралысь помтӧм эрдъяссӧ!

БЛИНОВ. Тайӧ збыль, Владимир Васильевич! Пыр окота лоны поэтӧн. Сӧмын вот некор.

СЕМЕНОВ. Некор, Тихон Тихонович, сӧвсем некор... Фёдор Игнатьевич, локтім отсӧгла. Став уджъяс сувтӧдіс транспорт.

ОРДЫМОВ. Сэтшӧма косьмис ю?

КВИТКО. Косьтъясӧд кокыд оз кӧтась.

Вочасӧн чукӧрмӧны рабочӧйяс, локтӧ Перминов.

СЕМЕНОВ. Срывайтчӧ строительстволӧн план. Шуим мобилизуйтны транспортнӧй уджъяс вылӧ йӧз вын.

ПЕТРОВ (шензьӧмӧн). Вайны морт пельпом вылын строительнӧй груз сё километр сайысь?.. Самӧй пристаньсянь?

СЕМЕНОВ. Мыйла нӧ став туйсӧ пельпом вылын? Миян эмӧсь специальнӧй пыжъяс.

ПЕТРОВ. Пристаньсянь ӧкмысдас квайт косьт.

СЕМЕНОВ. Сьӧкыд лоӧ, Алексей Никитич. Косьтъяс вомӧн, гашкӧ, ковмас вуджӧдчыны пельпомъяс вылын.

ПЕТРОВ. Куш фантазия.

СЕМЕНОВ (спокойнӧя). Мый нӧ предлагайтанныд? (Петров чӧв олӧ.) Кыдзи нӧ ті, шахта стрӧитысь инженер, кӧсъянныд уджавны водзӧ, оз кӧ ло вайӧма шахталы колана оборудование, крепёжнӧй да строительнӧй вӧр? Стройматериалтӧг миян вообще сувтас строительство. (Ставлы.) Сӧветуйта не вунӧдны: ми тіянкӧд заводитім уджавны сэтшӧм местаын, кӧні абу ни сосед-кар, кодӧс эськӧ позис чукӧстлыны отсӧг вылӧ, ни сосед-завод, кодлы позис сетны талун заказ, а аски пӧлучитны гӧтӧвӧй продукция. На дінысь ми торъялӧмаӧсь уна тысяча километр сайӧ, Большеземельскӧй тундралӧн ӧти сэтшӧм пельӧсӧ, кытчӧ куш воны колӧны тӧлысьяс да и сэн сӧмын дженьыдик гожӧмын, восьса ва кузя.

ОРДЫМОВ. Надейтчыны кодкӧ вылӧ, асланым коллективысь кындзи, миянлы оз позь.

Заводитӧны кусны гӧраяс. Кӧнкӧ ылын кылыштӧ матыстчысь непогодалӧн музыка шы.

ЛАМБЕЙ (пиыслы). Кӧдздӧдны кӧсйӧ. Миянлы колӧ мӧдӧдчыны.

ӦНДРЕЙ. Ме тэд висьталі нин...

ЛАМБЕЙ. Эн дур... (Аслыс.) И характерыс ме кодь...

КВИТКО. Ёртъяс, центрын мем тшӧктісны висьтавны тіянлы привет (оживление) да юӧртны сы йылысь, мый татчӧс уджъяс мӧдасны ёна паськавны. Такӧд йитӧдын лоас разрешитӧма и транспортнӧй проблема: миянлысь стройка, ставнас тайӧ крайсӧ лоӧ йитӧма странакӧд кӧрт туй магистральӧн. (Общӧй оживление.)

ЙӦЗ:

— Ме шулі тіянлы!

— Ошкам!

— Тайӧ миян ног!..

СЕМЕНОВ (Ордымовлы). Владимир Васильевич вайис сьӧрсьыс индӧдъяс — ӧддзӧдны и геологоразведочнӧй уджъяс. Ковмас котыртны выль бурӧвӧй партияяс. Но ті пыр жӧ сетанныд меным вопрос: кытысь босьтны выль бурӧвӧйяслы буритчан станокъяс, оборудование, горючӧй?

ОРДЫМОВ (серӧктӧ). Пристаньысь, Яков Петрович.

СЕМЕНОВ (серӧктӧ жӧ). Радейта сэтшӧмъясӧс, кодъяс сёрни гӧгӧрвоӧны кывджынсянь... (Серьёзнӧя.) Морт ветымын кора. Но условие: ни ӧти бурӧвӧйын удж та вӧсна не должен сувтны.

ОРДЫМОВ. Гӧгӧрвоана, Яков Петрович.

ПЕРМИНОВ. Не татшӧм сьӧкыдторъяс нин вӧлі венӧма миян сӧветскӧй йӧзӧн. Не татшӧм крепостьяс штурмуйтлӧма. Колӧ стрӧитны.

СЕМЕНОВ. Дерт жӧ, колӧ стрӧитны, Алексей Никитич. (Надялы.) А комсомол вылӧ особӧй надея.

НАДЯ. Корсянь заводитанныд транспортнӧй уджъяс?

СЕМЕНОВ. Аскисянь. (Видзӧдлӧ часіыс вылӧ.) Бурджык шуны: талун рытсянь.

НАДЯ. Асывсяньыс чукӧртам комсомольскӧй бюро.

СЕМЕНОВ. Личнӧ тэд тшӧкта котыртны медицинскӧй обслуживание.

НАДЯ. Лоас вӧчӧма, Яков Петрович.

Ывла пемдӧ, непогодалӧн матыстчӧм кылӧ ёнджыка.

ПЕТРОВА. Лёша, мем заводитӧ лоны ыркыд.

ПЕТРОВ. Коліс пасьтасьны бурджыка.

ПЕТРОВА. Но, ӧд вӧлі сэтшӧм шоныд... (Квитко сетӧ сылы ассьыс тужуркасӧ.) Аттьӧ, Владимир Васильевич.

ЛАМБЕЙ (пиыслы). Лоас ыджыд непогода. Пыж дінӧ лэччыла, домала сійӧс... А тэ дасьтысь. (Мунӧ.)

ӦНДРЕЙ (аслыс). Мем некытчӧ дасьтысьны.

СЕМЕНОВ (Квитколы). Ті, буракӧ, важъя тӧдсаяс?

КВИТКО. Алексей Никитичкӧд помавлім ӧти институт. Ӧтилаын уджавлім. Воштылім ӧта-мӧдӧс и, со, кӧні бара ковмас уджавны ӧтилаын.

СЕМЕНОВ. Алексей Никитич сетіс шыӧдчӧм мунны тась.

ПЕТРОВ. Менам помасьӧ договорнӧй срок.

СЕМЕНОВ. Но срокӧдзыс ылын на.

ПЕТРОВ. Ті кӧсъянныд, мед ме эновтчи сёр арӧдз да коли татчӧ ещӧ ӧти полярнӧй тӧв кежлӧ? Аттьӧ, Яков Петрович! Желание абу. Медасьлі не пыр кежлӧ.

КВИТКО (иронияӧн). Дерт, мортыс кӧ медасьлӧма, волӧма татчӧ «кузь шайтла», то кутны сійӧс — ыджыд грек.

ПЕТРОВ. Ме уджалі честнӧ.

СЕМЕНОВ. Тайӧ вернӧ. И век жӧ договорнӧй срокысь водзджык лэдзны тіянӧс ме ог вермы.

ПЕТРОВ (оз вермы кутны асьсӧ). Ме мӧда требуйтны. Оз кӧ отсав тайӧ, аддза мӧд пӧлӧс туй!..

ПЕТРОВА (повзьӧ). Лёша, тэ йӧймин... тадзи сёрнитны!..

ПЕТРОВ. Тэнӧ оз юасьны.

КВИТКО. Кӧсъянныд дезертируйтны? Стройка вылысь? Сӧветскӧй инженер!..

ПЕТРОВ (дыр видзӧдӧ то ӧти вылӧ, то мӧд вылӧ). Ме?.. Дезертируйтны? Ті — мый: бурджык кывйыс оз сюр?

КВИТКО. Быдторлӧн эм аслас ним, Алексей Никитич.

Лӧсьыдтӧм пауза. Рабочӧйяс мунӧны бурӧвӧйлань. Петрова переживайтӧ.

СЕМЕНОВ (Ордымовлы). Но, мый нӧ... Давай, петкӧдлӧй ассьыныд агрегаттӧ.

ОРДЫМОВ. Ветлам, видзӧдлам. (Мунӧны.)

Кольччӧны Петров гозъя, Ӧндрей да Надя. Ещӧ на ёнджыка пемдӧ. Непогодалӧн музыка вынсялӧ.

ПЕТРОВ (аслыс). Лоны дезертирӧн?.. Мед тэнӧ быд морт мӧдіс оскорбляйтны?..

ПЕТРОВА (скӧрысь). Тэ, Лёша, кутан асьтӧ скӧр детинка моз.

ПЕТРОВ (резкӧя). А тэнад юрлы и сійӧс сьӧкыд гӧгӧрвоны, мый ме тӧждыся тэ вӧсна.

ПЕТРОВА. Ме вӧсна?.. Тэ лӧсьӧдлан!.. Ме эг на лэдзчысь обывательӧдз.

ПЕТРОВ. Сідзкӧ, ставыс: ме тась ог мӧдӧдчы и арнас.

ПЕТРОВА. Видзӧдлам!.. (Ӧдйӧ мунӧ бурӧвӧйлань. Петров вӧтчӧ.)

НАДЯ (Ӧндрейлы). Тайӧ збыль, мый батьыд воӧма тэла?

ӦНДРЕЙ. Збыль.

НАДЯ. А тэ аддзан, кутшӧм дзескыд тані йӧзысь?

ӦНДРЕЙ. Аддза, Надя. (Шатовтчӧ тӧлӧн кучкӧмысь.)

НАДЯ. О-о! Мыйыджта вын!.. Кутшӧм адскӧй энергия тӧвлӧн, кодӧс колӧ на пӧкӧритны.

Тӧв гымалӧ, шутьлялӧ. Музыка вынсялӧ.

ӦНДРЕЙ (гораа, мед венны бушковсӧ). Вӧлі кад, кодыр ми, тундраын олысьяс, вӧлім ӧтнаным. Сэки тані ыджыдалісны войтӧв и пемыд! Лоис кад, кодыр миянлы отсӧг вылӧ локтісны миян ыджыдджык вокъяс да чойяс! И не миянлы ӧні копыртны юръяс этайӧ непогода водзын! (Шыасьӧ природа дінӧ.) Ми лоам вынаӧн сё пӧв! Ми тэныд вӧчам вызов: коді кодӧс!

НАДЯ (восхищайтчӧ). Ӧндрей! Тэ ӧні вӧвлытӧм на мича и вына! Ӧндрей!

ӦНДРЕЙ. Надя!.. Тэ ӧні мем вӧвлытӧм на муса и дона!

Кӧсйӧны кутлыны ӧта-мӧдсӧ, но оз удитны — петкӧдчӧ Ламбей.

ЛАМБЕЙ (скӧрысь). А!.. Вот мыйла он кӧсйы мӧдӧдчыны мекӧд!.. Вот мый вӧсна он кывзысь рӧднӧй батьтӧ!.. Мича нывъяс вылӧ сійӧс вежӧмыд?.. Пасьтась! Мӧдӧдчам! (Ӧндрей кӧсйӧ мыйкӧ шуны.) Эн лысьт шуны кыв!.. Вӧтчы ме бӧрся! (Вошӧ турӧб пиӧ.)

ӦНДРЕЙ (кепкасӧ шыбитӧ му бердӧ). Эх!..

НАДЯ. Ӧндрей, эн мун! Кылан? Ӧндрей!..

ӦНДРЕЙ. Бать, сулав!.. (Уськӧдчӧ батьыс бӧрся.) Батьӧ! Ба-а-ать!

Волнуйтчӧмлӧн музыка. Надя сулалӧ бушков пиын, вензьӧ бушковкӧд, морӧс бердас топӧдӧма Ӧндрейлысь шапкасӧ. Быттьӧ код морт, Ӧндрей локтӧ бӧр.

Занавес.

МӦД ДЕЙСТВИЕ

Коймӧд картина

Семеновлӧн кабинет — культурнӧя да стрӧга обставитӧма. Пызан вылас селектор да телефон. Ӧшиньяс гыӧраӧсь. Ывла вылын омлялӧ турӧб. Кабинетын Семенов, Квитко, Блинов, доктор. Ставӧн чукӧрмӧмаӧсь селектор дінӧ, мыйкӧ вӧсна тӧждысьӧны.

СЕМЕНОВ (сёрнитӧ селекторӧ). Западнӧй сектор. Западнӧй сектор. Сёрнитӧ посёлок. Сёрнитӧ посёлок. Внимание! Пурга заводитчытӧдз чарӧм кузя мунісны тіян секторӧ кык медицинскӧй работник — Смоленская да Иванова. Юӧртӧй миянлы, волісны эз сэтчӧ кутшӧмкӧ бурӧвӧй дінӧ. Юӧртӧй, волісны эз кутшӧмкӧ бурӧвӧй дінӧ. Западнӧй сектор. Западнӧй сектор. Юӧртӧй, волісны эз сэтчӧ кык медицинскӧй работник. Внимание! Внимание! Переключайта кывзыны. Переключайта кывзыны.

Воча гӧлӧс кылӧ орласьӧмӧн, не яснӧя.

КВИТКО. Миянӧс, тыдалӧ, кылӧны.

СЕМЕНОВ. Ме чайта, кылӧны сідз жӧ, кыдз и ми найӧс.

ДОКТОР. Но мыйла тадз артмӧ?

СЕМЕНОВ. Тайӧ овлӧ, доктор. Заводитіс бушуйтны не сӧмын турӧб — ӧти сайысь кыпӧдчис магнитнӧй буря. Радиоаппаратура ӧтказывайтчӧ кывзысьны. Ковмас виччысьыштлыны. Но ме надейтча — миян нывъяс сяммасны не воштыны юръяссӧ, сюрисны кӧ турӧб улӧ. (Пауза. Сёрнитӧ микрофонӧ.) Диспетчер, аппарат дінысь энӧй мунӧ, кыйӧдӧй момент, кор магнитнӧй буря лӧньыштас.

ДИСПЕТЧЕРЛӦН ГӦЛӦС. Ме лоа аппарат дінын, Яков Петрович.

КВИТКО. Кутшӧм помкаяс вӧсна татшӧм водз мӧдіс паськавны цынга, доктор?

ДОКТОР. Эм кык помка. Ӧтиыс: таво зэв водз и кузь кад чӧж тані, кыдзи тӧдса, вӧлісны шондіа лунъяс. Заполярьеын шонді уна выделяйтӧ ультрафиолетовӧй лучьяс, кодъяс вызывайтӧны морт организмын С витаминлысь ыджыд расход. Мӧд причина: свежӧй продукта да, торъя нин, овощи тырмытӧм.

Квитко стрӧга видзӧдлӧ Блинов вылӧ. Тӧдчӧ — Блинов мыжа, кутӧ асьсӧ подавленнӧя.

СЕМЕНОВ (докторлы). Тіян практическӧй предложениеяс?

ДОКТОР. Медикаментъяс явӧ оз обеспечитны, Яков Петрович. Миянлы ӧні важнӧ профилактика. Вермас ёна отсавны хвойнӧй отвар. Но свежӧй лыс уна дас километр сайын. Гӧтӧвитны хвойнӧй отвар куш медицинскӧй персонал вынӧн и думайтны нинӧм.

Звӧнитӧ телефон.

СЕМЕНОВ (босьтӧ трубка). Семенов кывзӧ. Да. Тані... Владимир Васильевич, тіянӧс.

КВИТКО (сёрнитӧ телефон пыр). Кывза. Чолӧм! Турӧб вӧсна? Висьтав сылы: полӧ кӧ вошны кык керка костӧ, мед локтас гез кузя. Да, да. А техучёба оз отменяйтчы. Зачётъяс мӧдам принимайтны водзӧ.

Пырӧ секретарь.

СЕКРЕТАРЬ. Локтіс Петрова, Яков Петрович.

СЕМЕНОВ. Мед пырӧ.

Секретарь петӧ.

КВИТКО. А кыдзи видзӧданныд сэтшӧмтор вылӧ, доктор: быдтыны овощи тані?

ДОКТОР (шензьӧмӧн). Некор сывлытӧм му вылын?..

БЛИНОВ. Кӧні весиг карликовӧй козъяс оз вермыны овмӧдчыны?..

Пырӧ Петрова.

СЕМЕНОВ (мунӧ Петровалы паныд, киасьӧ). Извинитӧй, Зинаида Павловна, тіянӧс беспокоитӧмысь.

ПЕТРОВА (киасьӧ Квиткокӧд). Тайӧ, дерт нин, Владимир Васильевич удтӧма менӧ.

КВИТКО. Тӧдінныд, Зинаида Павловна.

ПЕТРОВА (киасьӧ докторкӧд). Кывлі — докторлӧн заводитчӧ страдна.

СЕМЕНОВ. Доктор шуӧ, мый цынга абу страшнӧй, сыкӧд тыш вылӧ кӧ петасны агрономъяс.

ПЕТРОВА. Сідзкӧ, менӧ татчӧ корӧма, кыдз агрономӧс... Но вермас ӧмӧй мыйкӧ вӧчны кын му вылын агроном? Да ещӧ сійӧ кадӧ, кор ывла вылын турӧбалӧ?..

ДОКТОР. Вот именнӧ!..

ПЕТРОВА (шензьӧмӧн видзӧдлӧ доктор вылӧ). А, мӧд-кӧ, Владимир Васильевич тӧдӧ, мый ме абу практик: институт помалӧм бӧрын сідзи и эз удайтчы уджавны.

КВИТКО. Но мем тӧдса и мӧдтор: студентка Зиналӧн идеалъяс — пӧкӧритны природа, тшӧктыны сійӧс служитны народлы.

ПЕТРОВА (ышловзьӧ). Да... Идеалъяс...

Звӧнитӧ телефон.

СЕМЕНОВ (босьтӧ трубка). Корлім, Алексей Никитич. Матын? Вот и бур. Верманныд кӧ, пыр жӧ. Виччысям.

ПЕТРОВА (гусьӧн Квитколы). Алексей Никитич?.. Ок и, дипломат тэ, Володя?

КВИТКО (нюммунӧ). Мыйла нӧ дипломат... Сійӧс корис Яков Петрович. Кӧсйӧ вӧзйыны удж выль шахтаын. Тэ тӧдан кутшӧм шахта ми стрӧитам? Гигант!

СЕМЕНОВ. Цынга не должен паськавны. Сійӧ не должен лоны миян пӧвстын вообще. Весиг сы йылысь понятиеыс. Сӧвсем. Пыр кежлӧ. (Блиновлы.) Талун рыт кежлӧ дасьтӧй продуктаяс йылысь точнӧй сведениеяс.

БЛИНОВ (портфеля, локтӧ пызан дорӧ). Ме жӧ ог соссьы, Яков Петрович... Весиг босьта ас юр вылӧ и сійӧ мыжсӧ, кодын абу мыжа.

СЕМЕНОВ. Тайӧ миянлы оз ков.

БЛИНОВ. Правда, арсяньыс вӧлі вель уна лук и чеснок. Капуста тоже вӧлі тырмымӧн. А вот лоис сідзи, мый колисны куш актъяс. (Корсьӧ портфельысь актъяс.)

КВИТКО. Актъясыд оз отсавны, Тихон Тихонович.

БЛИНОВ (сетӧ актъяс Семеновлы). Ас местаын и актъяс коланаӧсь.

СЕМЕНОВ (актъяс пуктӧ бокӧ). На йылысь миян тэкӧд лоас на сёрни. Тэнад колӧ лоны мыйтакӧ лук, чеснок.

БЛИНОВ (торкӧ Семеновӧс). Ті гӧгӧрвоӧй, Яков Петрович... Колӧ артавны гӧгӧрбок...

СЕМЕНОВ. Эн мудерит.

БЛИНОВ (паськӧдлӧ кияссӧ). Ас вӧсна ме ог тӧждысь. Ме — морт ичӧтик.

КВИТКО. Тӧдчӧ, Блинов ёрт, тэнад положение бедняцкӧй.

БЛИНОВ (пуксьӧ). Ме и ачым тайӧс гӧгӧрвоа.

Серам. Блиновӧн ставыс недоволенӧсь. Пырӧ Петров.

СЕМЕНОВ (киасьӧ Петровкӧд, индӧ сылы пуксьыны. Петровалы). Менам вопрос агрономлы. (Аддзӧ Петровлысь шензьӧм.) Алексей Никитич, тыдалӧ, оз эскы, мый сылӧн гӧтырыс агроном... Позяс оз, Зинаида Павловна, волӧн тайӧ кадӧ быдтыны тані зелень, шуам, лук, редиска, салат? (Петрова оз на куж, мый шуны.)

КВИТКО. Миянлы оз ков вунӧдны сы йылысь, мый ми локтім татчӧ не сӧмын кыдзи строительяс, но и кыдзи татчӧс природасӧ пӧкӧритысьяс, кыдзи революционеръяс, кодъяслӧн могыс лоӧ тшӧтш и сыын, медым вежны тайӧ тундра йылысь важъя понятиеяссӧ... Да, да, Зинаида Павловна! Вежны сэтшӧм смыслын, мый быттьӧкӧ Заполярьеын оз вермы быдмыны нинӧмтор. Честь да слава сэтшӧм йӧзлы, кодъяс повтӧг босьтчӧны тайӧ уджӧ да петасны победительясӧн!

ПЕТРОВ (шуткаӧнмоз). Менам гӧтыр распоряжениеын эм чипан поз ыджда кухня, и сэні збыльысь позяс...

ПЕТРОВА (торкӧ верӧссӧ). Алексей Никитич... Тані сёрнитӧны серьёзнӧйтор йылысь. (Сувтӧ.) Зелень быдтӧм вылӧ колӧ некымын условие. На пиысь медся водз: тырмымӧн шоныд, колана мында свет да бур му. Лунъюгыд тані лоис уна нин. Бур му позяс аддзыны. А шоныд позяс вӧчны искусственнӧйӧс.

СЕМЕНОВ. Тӧдвылад кутанныд теплица?

ПЕТРОВА. Лоас кӧ стрӧитӧма теплица, пуктӧма колана старание, зелень позяс быдтыны зэв ӧдйӧ.

СЕМЕНОВ. Позяс-ӧ теплицаяс стрӧитігкості быдтыны ичӧтджык местаын зеленьлысь рассада?

ПЕТРОВА (явӧ заинтересуйтчӧ). Позяс быдтыны. А кыдзи кӧйдысӧн?

КВИТКО. Кӧйдыс лоас.

СЕМЕНОВ (сувтӧ). Эмӧсь татшӧм практическӧй предложениеяс, дерт, ӧні кежлӧ. Первой: паськыда котыртны хвойнӧй отвар вӧчӧм; свежӧй лыс лоас вайӧма тырмымӧн. Мӧд: аски мӧдӧдам матыса колхозъясӧ агентъясӧс ньӧбны яй вылӧ кӧръяс. Коймӧд: колӧны теплицаяс; найӧс стрӧитӧм объявитны внеочереднӧйӧн. (Петровалы.) Ми надейтчам, агроном ёрт, тіян отсӧг вылӧ.

ПЕТРОВ. Кутшӧм формаын?.. Мем абу гӧгӧрвоана.

СЕМЕНОВ. Поручайта Владимир Васильевичлы ӧтув Зинаида Павловнакӧд чертитны теплицаяслысь схема, составитны стройматериалъяс вылӧ заявка, оборудование вылӧ список. Блиновлы: передайтны агроном Петрова киясӧ огороднӧй культуралысь кӧйдыс да на пӧвстысь луклысь да чесноклысь став запассӧ.

БЛИНОВ. Ӧтитӧг?..

СЕМЕНОВ. Ӧти лук верман кольны аслыд. (Серам. Семенов примитӧ решение.) И ещӧ, Тихон Тихонович: дасьтысь сдайтны ассьыд хозяйствотӧ.

БЛИНОВ (повзьӧ). Хозяйствоӧс?

СЕМЕНОВ. Ставнас. Пыр кежлӧ.

БЛИНОВ (дыр оз вермы нинӧм шуны). Татшӧм ӧдйӧ решитінныд?

СЕМЕНОВ. Тайӧ тадзи кажитчӧ сӧмын тэныд. Унаысь индылім лёка уджалӧмыд вылӧ, ещӧ унаысь отсавлім... Колӧ и честь тӧдны?..

ДОКТОР (сувтӧ). Позяс мунны, Яков Петрович?

СЕМЕНОВ. Позяс, доктор. (Сетӧ кисӧ.) Цынгакӧд — неммиритчытӧм тыш!

ДОКТОР. Став линия кузя! (Петӧ.)

ДИСПЕТЧЕРЛӦН ГӦЛӦС. Яков Петрович, селектор кузя заводитӧ кывны бурджыка.

СЕМЕНОВ (включитӧ передача). Западнӧй сектор. Западнӧй сектор. Сёрнитӧ посёлок. Внимание! Сёрнитӧ посёлок. Пурга заводитчытӧдз мунісны тіян секторӧ кык медицинскӧй работник — Смоленская да Иванова. Юӧртӧй миянлы, волісны эз сэтчӧ, волісны эз кутшӧмкӧ бурӧвӧй дінӧ. Западнӧй сектор. Западнӧй сектор. Волісны эз сэтчӧ кык медицинскӧй работник. Внимание! Переключайта кывзӧм вылӧ. Переключайта кывзӧм вылӧ.

ГӦЛӦС. Ме, западнӧй сектор. Ме зап... (Водзӧ кылӧ орласьӧмӧн и не яснӧя.)

ПЕТРОВА (тӧждысьӧмӧн). Боже мой! Татшӧм турӧб дырйи найӧ вермасны вошны...

Звӧнитӧ телефон.

СЕМЕНОВ (босьтӧ трубка). Кывза. Чолӧм!.. Ті сёрнитінныд главнӧй инженеркӧд?.. Тырвыйӧ эска. Сёрнитла главнӧй инженеркӧд. Звӧнитлӧй меным дас минута мысти. (Пуктӧ трубка. Сёрнитӧ микрофонӧ.) Диспетчер, мӧда виччысьны бурджыка кылӧм.

ДИСПЕТЧЕРЛӦН ГӦЛӦС. Лоас юӧртӧма, Яков Петрович.

СЕМЕНОВ (мӧдӧдчӧ петны). Извинитӧй, ме регыд. (Блиновлы.) Пыравлан бӧрынджык.

Блинов петӧ Семенов бӧрся сьӧкыд походкаӧн.

КВИТКО. Мый абу гӧгӧрвоана тэныд, Алексей Никитич?

ПЕТРОВА. Алексей Никитич кӧсйӧ, мед сылӧн гӧтырыс нэмсӧ лоис сӧмын домохозяйкаӧн.

ПЕТРОВ (ӧзйыштӧмӧн). А Зинаида Павловна кӧсйӧ, мед сылӧн верӧсыс вӧлі сэтшӧм мортӧн, кодлысь позис не юасьны, не кывзысьны.

ПЕТРОВА. Мыжыс менам буретш не таын.

ПЕТРОВ. Окота тӧдны.

ПЕТРОВА. Ме лишнӧй ёна велавлі овны верӧс кӧсйӧмъяс серти и дзикӧдз вунӧді ачымӧс.

ПЕТРОВ. Вот кыдзи!.. (Скӧралӧ.) Ме требуйта босьтны ассьыд кывъястӧ бӧр.

ПЕТРОВА (ӧзйыштӧ). Требуйтан?.. Ті кылад, Владимир Васильевич? Сійӧ требуйтӧ! (Пауза.) Институт помалӧм бӧрын тэ менӧ весиг практика вылӧ эн лэдз мунны.

ПЕТРОВ. Тэ сэки лӧсьӧдчин лоны мамӧн.

ПЕТРОВА. Тайӧ вӧлі тэныд помкаӧн. Тэд сэки коліс ас дінад том гӧтыр да семейнӧй уют, мед тайӧн щӧгӧляйтны тэнад мещанскӧй средаын.

ПЕТРОВ. Зина...

ПЕТРОВА. Мем вӧлі яндзим волывлыны аслам рабочӧй бать-мам ордӧ: дас вит во школаясын велӧдчӧм бӧрын налӧн нылыс лоис иждивенкаӧн. Ме лои сыӧн, мыйӧн кӧсйин тэ.

ПЕТРОВ (кевмысьӧмӧн). Зинаида Павловна...

ПЕТРОВА. Татчӧ воӧмӧн ме матысяньджык мӧді аддзыны олӧмсӧ, йӧзсӧ, кодъяс уджалӧны да побеждайтӧны. Ме мӧді донъявны и тэнӧ не тэнад денежнӧй переводъяс серти... Владимир Васильевич, висьтав сылы, кутшӧм ыджыд удж сійӧ вӧчӧма тані!.. Тайӧ ӧд правда?

КВИТКО. Правда, Зина... Алексей Никитич, а ӧд сійӧ прав. Мыйла нӧ тэ кӧсъян, мед тэнад гӧтырыд вӧлі бокын тайӧ созидательнӧй уджсьыс? Мыйла думайтан, мый сылы медся донаӧсь домашньӧй халат да меховӧй туфлияс? (Матыстчӧ Петров дінӧ, пуктӧ сійӧ пельпомъяс вылӧ кисӧ.) Правдаыс ещӧ сыын, менам друг Алёша, мый Яков Петрович лыддьӧ тэнӧ бур кандидатӧн выль шахтаӧ главнӧй инженерӧ.

Петровалы тайӧ юӧрыс виччысьтӧм. Сійӧ вель дыр видзӧдӧ Квитко вылӧ. Сыын тӧдчӧ благодарность чувство, кодӧс ӧні оз вермы шуны кывъясӧн да мунӧ ӧшинь дорӧ. Пырӧны Ахмиров да Ӧндрей. Найӧ выходнӧй паськӧмаӧсь.

АХМИРОВ. Позяс, Владимир Васильевич?

КВИТКО (киасьӧ). Ыджыд чолӧм изшом мастерлы! Привет, Ламбей ёрт! (Ахмировлы.) Дӧвӧлен абу напарникӧн?

АХМИРОВ (Ӧндрей йылысь). Ученикӧн дӧвӧлен. Но пола ӧтиторйысь: велӧдысьсӧ вермас кольны!

КВИТКО. Збыль тайӧ, Андрей Павлович?

ӦНДРЕЙ. Миша Ахмиров неуна содтыштіс.

КВИТКО. Тэ нӧ мый: полан панйыны Мишаӧс?

ӦНДРЕЙ. Тайӧтӧ — мӧд делӧ...

АХМИРОВ. Кылінныд, Владимир Васильевич? Менам сьӧлӧм прӧста оз пов! (Дружескӧй сералӧм.)

Пырӧ Семенов.

СЕМЕНОВ (киасьӧ выльӧн воысьяскӧд). Кори тіянӧс, том йӧз, кори. Пуксьӧй, пӧжалуйста. Сёрни миян тіянкӧд лоас ыджыд. Алексей Никитич, кыдз думайтад: эз ло дзескыдӧн тіян ичӧтик шахтаыд тайӧ йӧзыслы?

ПЕТРОВ (гӧгӧрвоӧмӧн). Но сэтшӧм йӧзтӧг, Яков Петрович, кыдзи Миша Ахмиров да сылӧн напарник Андрей Ламбей, лоас тӧдчымӧнъя тыртӧмӧн ачыс шахтаыс.

СЕМЕНОВ. А кыдзи ті асьныдтӧ лыддяд?

ПЕТРОВ. Ме велалі миян первойя шахта дінӧ лаборатория дінӧ моз.

СЕМЕНОВ. Правильнӧ. Но лаборатория — сійӧ лаборатория. Миянлы колӧ создайтны татчӧ дзонь угольнӧй бассейн — Сӧветскӧй Союзлӧн европейскӧй северлы топливнӧй база.

КВИТКО. Алексей Никитичлы ме висьталі нин тіянлысь мнение, Яков Петрович.

СЕМЕНОВ. Вот и бур. (Ставлы.) Стрӧитчысь выль шахта оз мӧд уступайтны аслас мощностьӧн страналӧн любӧй бассейнын медся гырысь шахтаяслы. Сійӧс лоӧ оборудуйтӧма да оснаститӧма мирын медся передӧвӧй горнӧй техникаӧн. Уджавны тайӧ шахтаын ыджыд честь. Думыштлӧй, Алексей Никитич. Аски висьталанныд.

ПЕТРОВ. Думыштла, Яков Петрович.

ПЕТРОВА. Корсянь заводитны уджавны?

КВИТКО. Талун рытсянь.

СЕМЕНОВ. Талун жӧ, Зинаида Павловна, лоас управление кузя приказ тіянӧс агрономӧн назначитӧм йылысь.

ПЕТРОВА. Миянлы позьӧ мунны?.. Мӧдӧдчим, Алексей Никитич, мӧдӧдчим.

Петрова гозъя петӧны.

СЕМЕНОВ. А тіянкӧд, том йӧз, решитам ӧні. Тіянӧс вуджӧдам выль шахтаӧ. (Мишалы да Ӧндрейлы нимкодь.) Но тайӧ — абу на ставыс. Миян водзӧ сувтӧны вӧвлытӧм на гырысь могъяс: не сӧмын содтыны горнякъяслысь лыд, но и вӧчны найӧс технически грамотнӧй йӧзӧн. Миянлы ковмас велӧдчыны аслыным да велӧдчигмозным велӧдны и мукӧдъясӧс. Дасьӧсь-ӧ та вылӧ ті?

АХМИРОВ да ӦНДРЕЙ (решительнӧя). Тырвыйӧ дасьӧсь, Яков Петрович!

СЕМЕНОВ. Владимир Васильевичкӧд ми лыддям, мый изшом перйӧмын ӧтка рекордъяс, кодъясӧс ті сетанныд, сійӧ этша. Делӧсӧ решайтӧ масса. Эм татшӧм предложение: Миша Ахмировӧс выдвинитны участокса начальникӧн, Андрей Ламбейлы сетны бригада.

АХМИРОВ. Тадз виччысьтӧг?

ӦНДРЕЙ. Татшӧм ӧдйӧ?

ДИСПЕТЧЕРЛӦН ГӦЛӦС. Яков Петрович, Западнӧй сектор мӧдіс кывны бурджыка. Включитӧй кывзыны.

СЕМЕНОВ (уськӧдчӧ микрофон дорӧ). Давай, давай...

МИКРОФОНЫН ГӦЛӦС (кылӧ орласьӧмӧн, но разберитны позьӧ). Ме западнӧй... ме сектор... Внимание... Смоленская да ...ова вӧліны... турӧбӧдз... Мунісны... гортӧ... вермисны сюрны... (Водзӧ разберитны оз позь.)

ӦНДРЕЙ (ёна волнуйтчӧ). Надя Смоленская куш тундра вылын? Татшӧм турӧб дырйи?

АХМИРОВ. Колӧ мӧдӧдчыны корсьны.

ӦНДРЕЙ. Пыр жӧ мӧдӧдчам... Яков Петрович, кыті колӧ мунны?

СЕМЕНОВ. Паникатӧг, том йӧз. Ковмас — мунам корсьны ставӧн. А ӧні водз на. Да и вит воськов сайысь нинӧм оз тыдав.

ӦНДРЕЙ (кӧсйӧ петны). Ставлы оз ков мунны. Ме ӧтнам аддза.

АХМИРОВ. Сулав, Ӧндрей. Мыйла ӧтнад? Мыйла не мекӧд?

КВИТКО. Энлӧй, ёртъяс. Тадзи оз позь.

Ӧдйӧ пырӧ Надя. Сійӧ полушубока, гӧгӧр лымйӧсь. Сылӧн пырӧмыс сэтшӧм виччысьтӧм, мый некод нинӧм эз куж шуны.

НАДЯ. Извинитӧй, ме, буракӧ, торки тіянӧс. Но мем висьталісны, мый ті тӧждысянныд ме вӧсна.

СЕМЕНОВ. Докладывайтӧй, Смоленская ёрт.

НАДЯ. Иванова ёрткӧд ми волім вит бурӧвӧй партия дінӧ. Ещӧ кыкӧ эг вермӧ волыны турӧб заводитчӧм вӧсна. Буровикъяс пӧвстысь, кодъясӧс ми видлалім, нёльӧн явӧ цынготникъяс. Некымын мортлӧн слабӧй начальнӧй признакъяс.

СЕМЕНОВ. А ӧні вочавидзӧй, пӧжалуйста, татшӧм вопрос вылӧ: мыйла тадз рискуйтанныд асланыд олӧмӧн?

НАДЯ. Ог гӧгӧрво.

КВИТКО. Вопросыс яснӧй. Татшӧм турӧб дырйи миян посёлок сэтшӧм жӧ тӧдчытӧм, кыдзи овлӧ тӧдчытӧм штормовӧй океан шӧрын ичӧтик ді... Кытысь эськӧ мӧдім корсьны тіянӧс, вошинныд кӧ тундра эрдъяс вылӧ?

НАДЯ. Турӧб заводитчигас вӧлі тыдалӧ на ӧти бурӧвӧй вышка. Ми кӧсйим сюрӧдчыны сэтчӧ. Но воштім сійӧс. Сэсся недыр куйлыштім лым вылын. Миянӧс пыр жӧ босьтіс йирмӧг. И ми мӧдӧдчим.

СЕМЕНОВ. Веськыда сыланьӧ, кодарӧ синмыд видзӧдӧ?..

НАДЯ. Мӧдӧдчим тӧлыслы паныд.

КВИТКО. Мыйла тӧлыслы?

НАДЯ. Тӧлыс пӧльтіс миян юланьсянь.

СЕМЕНОВ (ошкӧмӧн). Вернӧ! А ю кузя посёлокӧдз!..

КВИТКО (том йӧзлы). Ті кылінныд?..

АХМИРОВ и ӦНДРЕЙ. Кылім!

НАДЯ (матыстчӧ том йӧз дінӧ). Ті, гашкӧ, повзьылінныд жӧ миян вӧсна?

АХМИРОВ и ӦНДРЕЙ. Эг и думыштлӧй весиг...

СЕМЕНОВ. Весиг пельнас эз вӧрӧдыштны.

АХМИРОВ. А локтім татчӧ тӧдан, мый кузя... Ӧндрей, мыйла тэ ачыд он висьтав?..

НАДЯ (мыйыськӧ яндысьыштӧ). Ӧндрей... Эз жӧ ков та йылысь йӧзлы висьтавны...

ӦНДРЕЙ (яндысьӧ). Ме, Надя... но... кыдзи тэд висьтавны...

КВИТКО (гусьӧн синмалыштӧ Семеновлы). А мыйын делӧыс, том йӧз?

АХМИРОВ (индӧ Ӧндрей да Надя вылӧ). Ме ногӧн делӧыс гӧгӧрвоана...

КВИТКО. Хм...

СЕМЕНОВ Да-а... Мыйӧн верма отсавны?

ӦНДРЕЙ (яндысьӧмӧн). Видзӧдтӧ, Яков Петрович...

СЕМЕНОВ. А тэ смелджыка. Гӧтрасигӧн тоже колӧ упорство!

АХМИРОВ. Вопросыс жилплощадь сайын.

СЕМЕНОВ (нюмъялӧ). Тіянлы нӧ дзик пыр ковмас жилплошадьыс?

ӦНДРЕЙ. Ми, дерт, вермам виччысьыштлыны.

СЕМЕНОВ (Квитколы). Кыдзи думайтӧ парторг? Делӧыс кӧ оз ёна тэрмӧдлы, колӧ проектируйтны бурджык квартира. Сӧгласенӧсь?

ӦНДРЕЙ. Тырвыйӧ.

АХМИРОВ (гыжйыштӧ балябӧжсӧ). Задача ті сетінныд, Владимир Васильевич. (Сералӧны.)

КВИТКО. Дыр мӧдан нюжмасьны — дьӧбӧ колян!

НАДЯ. Ыджыд аттьӧ, Яков Петрович!

Том йӧз мӧдӧдчӧны петны.

ӦНДРЕЙ. Но ті эн жӧ чайтӧй, мый ставыс жилплощадь сайын. Сы вӧсна делӧ оз сувт.

Семенов да Квитко дружнӧя сералӧны.

Занавес.

Нёльӧд картина

Первойя картиналӧн сцена, но ар пыдди гожӧм, шондіа лун, воскресение. Юланьын кылыштӧ ныв-зонлӧн гажӧдчӧм. Керкаводзса скамья вылын пукалӧны Павел Ламбей да Ильинична. Старик висьӧдчӧ, омӧльтчӧма.

ИЛЬИНИЧНА. Тэ, шуан, эз ло муса белӧй светыс? Кыткӧ-мыйкӧ орис?.. Йитны колӧ орӧминсӧ, вот мый ме шуа тэныд. Юӧрт пиыдлы, мед гортад волас. Гӧтрав сійӧс.

ЛАМБЕЙ. Ог тӧд, мада, скӧнь ог тӧд... Ми вок, тыдалӧ, некодлы нин ковтӧмӧсь лоим.

ИЛЬИНИЧНА. Эн шу тадзи, сусед. Пӧрысь дзодзӧг новлӧдлӧ томъясӧс куим-куима море сайӧ!

ЛАМБЕЙ. «Томъясӧс». (Качайтӧ юрнас.) Тэ омӧля тӧдан менсьым пиӧс.

ИЛЬИНИЧНА (быттьӧ гусятор йылысь). Ставсӧ вежӧрта, сусед, ставсӧ аддза... Воӧ кӧ тулыс, и сизим потшка потшӧс вомӧн чеччыштас. Дай не сылӧн содӧ вежӧр да мывкыд, коді аслас мускӧн паччӧр сэрӧг личкӧ. Мед муніс кӧ пиыд бур йӧз дінӧ: уна йӧзӧн юждӧм туй тупикӧ оз вайӧд! Ме и ачым эськӧ эг мӧд кутны ассьым челядьӧс: кӧрталӧм бордъяса пӧтка — абу лэбач. Тӧждыся мӧдтор йылысь: мед эськӧ выльлаӧ бура вужъясьтӧдзыс найӧ мӧдісны на кывны ай-мамыслысь шоныд бордувсӧ.

ЛАМБЕЙ. Тэ думайтан, ме дзикӧдз нин выжывми... Олӧмыс быдлаті выльмӧ да мичаммӧ, чуксалӧ овны да уджавны... А вот кусны мӧді. Сьӧлӧмӧй абу местаын... Эх, Ӧндрей, Ӧндрей!.. Пӧрччӧд эськӧ тэнсьыд гачтӧ да пывсьӧд петшӧрӧн!

ИЛЬИНИЧНА (керка ӧшиньӧ). Лизук, тэнад нӧ эштіс эз на джодж мыськалӧмыд?

ЛИЗАЛӦН ГӦЛӦС. Эштіс нин, мамӧ. Дзик пыр пета.

ИЛЬИНИЧНА. Видлы ещӧ трубасӧ. Ог помнит, пӧдлавлі, эг.

Юланьын кылӧ мотор шы. Сійӧ вочасӧн матысмӧ да ланьтӧ.

ЛАМБЕЙ. Пасибӧ тэныд, Ильинична, менӧ дӧзьӧритӧмысь.

ИЛЬИНИЧНА. Да, мый тэ, мый тэ, Калистратович... Ачыс колхозса председатель тшӧктіс отсасьыштны тэд.

Керкаысь петӧ Лиза.

ЛАМБЕЙ. И тэныд, Лизук, пасибӧ!.. Мамыдлы отсӧгысь, миянӧ локылӧмысь. Страсть радейта асъя шонді да том йӧзӧс! На вылӧ видзӧдігӧн, висьталӧны, пӧрысьяс томмылӧны.

ЛИЗА. Павел дядьлӧн пыр дась мыйкӧ лӧсьыдтор шуны!

Котӧрӧн локтӧны нывъяс.

ПЕРВОЙ НЫВ. Тэнӧ, Лиза, век эн эштӧдчы? Абу ӧмӧй воскресение талун?

МӦД НЫВ. Тэла воим. Выль песня велӧдам, да тэтӧг абу окота. Мӧдӧдчам.

ЛИЗА. Татшӧм паськӧмнас али мый муна?

ПЕРВОЙ НЫВ. Сідзкӧ, котӧртам, пасьтасян.

Нывъяс мунӧны. Кольччысьяс аддзӧны кодъяслыськӧ воӧм.

ИЛЬИНИЧНА. Но... Московскӧй барушняыд, тай, век на тані вӧлӧма. Тыдалӧ, гортас бӧр мӧдӧдчӧма.

Петкӧдчӧны Петрова да Терентьев. Чемоданаӧсь.

ПЕТРОВА. Вот и бара ме, Павел Калистратович!

ЛАМБЕЙ (сувтӧ). Тайӧ, буди бур гӧстя воис миянӧ... чолӧм, Зинаида Павловна! (Киасьӧны.) Гашкӧ, сэтысянь? Пи дінсянь?

ПЕТРОВА. Тӧдін, Павел Калистратович. Ыджыд привет вайи Ӧндрейыдсянь. Да ещӧ... Иван Егорович, восьтыв чемодантӧ... Видза оланныд, Ильинична!

ИЛЬИНИЧНА. Видза оланныд!.. Тыдалӧ, бӧр мӧдӧдчӧмныд гортланьныд?

ПЕТРОВА. Татчӧдз воим, Ильинична. Сӧветуйтчыны тіянкӧд.

ТЕРЕНТЬЕВ (сетӧ тубрас). Босьтӧй, Зинаида Павловна.

ПЕТРОВА (Ламбейлы). Андрей Павлович тшӧктіс сетны тайӧс тэныд.

ЛАМБЕЙ (босьтӧ). Пасибӧ, мада, ыджыд пасибӧ! Сідзкӧ тай абу на вунӧдӧма ассьыс батьсӧ. Сідзкӧ тай казьтылӧма на. (Разьӧ тубрас.)

ИЛЬИНИЧНА (Терентьевлы). Мыйкӧ тай быттьӧ тӧдсакодь мортыс-а...

ТЕРЕНТЬЕВ. Печора вылысь ме, Митрӧпан Егорлӧн пи.

ИЛЬИНИЧНА. Терентьевыслӧн? Иваныс?..

ЛАМБЕЙ. Тэ татчӧ видзӧдлы, суседка, татчӧ!

ИЛЬИНИЧНА. Адӧй, адӧй!.. Ставыс тэд?

ЛАМБЕЙ. Ставыс, висьталӧны... Чурки-буди... тьфу, тьфу, тьфу?.. И гач, и дӧрӧм, и пинджак, и сапӧг... у-у!..

ИЛЬИНИЧНА. Дзик выльӧсь, дзик новлытӧмӧсь... Ай, молодеч, Ӧндрей! Ай, бур пи!

ЛАМБЕЙ. Кыдзи нӧ... Рӧдыс менам! Прӧста юр оз новлӧдлы. Тӧдӧ, мый вӧчӧ!.. Пыравлам керкаӧ, пасьтавлам, кӧмавлам!.. (Пырӧ.)

Локтӧ Лиза аслас пӧдругаяскӧд, праздничнӧй паськӧма жӧ.

ИЛЬИНИЧНА (Ламбей йылысь). Со жӧ мый вӧчӧ мортыдкӧд бур юӧрыд! Веськыда ловзис. (Петровалы.) Ӧд тулысбыд на висьӧдчӧ. Кӧраяс дінысь муртса ловъяӧс вайисны. (Гусьӧнмоз сылы жӧ.) Письыс тадзи гажтӧмчӧ... Бобӧанӧй, абу кӧ местаын сьӧлӧмыд да тӧждысьӧ кӧ мыйкӧ вӧсна, он бурӧд сійӧс ни тувсовъя песняӧн, ни чӧскыд сёянӧн, ни, весиг, брильянтъясӧн баситӧм паськӧмӧн... Час, ме пыравла жӧ. (Сувтыштлӧ Терентьев дінӧ, Петрова йылысь.) Мый йылысь нӧ кӧсйӧ сӧветуйтчыны миянкӧд?

ТЕРЕНТЬЕВ. Тайӧ миян агроном.

ИЛЬИНИЧНА (шензьыштӧ). Агроном?!. А мем сэки прӧстӧй гӧтырӧн висьтавліс сусед.

ПЕРВОЙ НЫВ. Агроном пӧ воӧма.

МӦД НЫВ. Лиза, сійӧ тай агроном вӧлӧма.

ЛИЗА (мамыслы). Ой, мамӧ? Тӧдан мый?.. Ефим Ивановичыд... Вайлы пельтӧ — вашнита. (Вашкӧдыштӧ.)

ИЛЬИНИЧНА. Тэ вот мый, нылук: лёк юӧр няйтӧ тальышт, а бур юӧр зарни тасьті вылын йӧзлы сет. (Ставлы.) Бур юӧрыд, бобӧяс, парча козинысь дона, шуны сійӧс мортлы — пань ма сылы сетны, а аслыд — кыкӧс паньыштны! Висьтав, нылӧй, эн яндысь. (Пырӧ керкаӧ.)

ЛИЗА (Петровалы). Миян Ефим Иванович, сідзкӧ, тіян йылысь и сёрнитӧ: Воркутаын пӧ бур агроном эм. Кӧсйӧ вӧлі нарошнӧ кайлыны тіян дінӧ... Энлӧй, ме сійӧс корла татчӧ. (Мунӧ.)

ТЕРЕНТЬЕВ (Петровалы). Стариклы ми, тыдалӧ, збыльысь ыджыд нимкодь вайим. А корджык висьтавны пиыслӧн свадьба йылысь?

ПЕТРОВА. Та йылысь бӧрынджык. Мед первой ӧтинас нимкодясяс.

ПЕРВОЙ НЫВ (мӧдыслы). Тэ кылін?

МӦД НЫВ. Абу пельтӧм.

ПЕРВОЙ НЫВ. Но, инӧсь: Ӧндрей гӧтрасьӧ...

Тэрмасьӧмӧн петӧ Ламбей, выль паськӧма. Сы борся — Ильинична.

ЛАМБЕЙ. Лӧсьыд али абу, вокӧ? Бур али абу менам пиыс?

НЫВЪЯС. Ёна жӧ нин лӧсьыд! Кавалер кодь лоин, Павел дядь!

ЛАМБЕЙ. Ӧні, ме чайта, ёнджыка мӧданныд ме дінті шаркъявны!

ИЛЬИНИЧНА. Вот и пи, вот и бур пи!

Локтӧны Филиппов да Лиза.

ФИЛИППОВ (Петровалы). Сідзкӧ, со код йылысь паськалӧ славаыс. Чолӧм, Зинаида Павловна!

ПЕТРОВА (киасигмозыс). Висьталӧй, Ефим Иванович: кыдзи тіян мунӧны школабердса град йӧрад опытъясыд?

ТЕРЕНТЬЕВ (киасьӧ Филипповкӧд). Иван Терентьев.

ФИЛИППОВ. Филиппов, учитель. (Сёрнитӧ Петровакӧд.) Капризнӧй делӧ. Менам дасьтӧма тіянлы сё вопрос.

ПЕТРОВА. Со кыдзи!.. А ме тіянлысь кӧсъя юасьны. Ми сэні йӧршитчим теплицаясӧ и зэв на не смела петам вӧля вылӧ.

ФИЛИППОВ. Ог тӧд, нинӧм ог тӧд. Кывлі сӧмын, мый кутшӧмкӧ пӧ агроном Петрова спаситӧма цынгаысь уна сё мортӧс.

ТЕРЕНТЬЕВ. Тайӧ збыль! Ас пример вылын верма висьтавны. Ачым страдайті цынгаӧн. Витамин спаситіс — лук турун, редиска, салат... Но, кӧнешнӧ, и хвойнӧй отварӧн лечитісны и свежӧй кӧр яйӧн вердісны... Делӧыс абу таын. (Пафосӧн.) Делӧыс, видзӧдтӧ, учитель ёрт, сыын, мый миян стройка ӧдйӧ паськалӧ и сылы колӧ материальнӧй база. А раз колӧ тайӧ базаыс, сійӧс колӧ лӧсьӧдны? Вот ми и воим татчӧ зэв ыджыд государственнӧй могӧн — корсьны тась бурджык му-видз места, мед котыртлы сэтчӧ совхоз. (Общӧй оживление.)

ПЕТРОВА (Ламбейлы). Ёна надейтчам Павел Калистратович вылӧ. Совхозлы муяссӧ ковмас аддзыны ю дорысь, и миянлы ёна важнӧ тӧдны уна вояс чӧжся ытва ойдӧмлысь границасӧ.

ЛАМБЕЙ. Гашкӧ, эг на дзикӧдз шоммы. Ветлам, видзӧдлам!

ИЛЬИНИЧНА (шензьыштӧ). Но и шуин жӧ, Калистратович... Кытчӧ нӧ тэ ветлан этатшӧмыс? Ӧд керкаысь он вермы петавлыны.

ЛАМБЕЙ (Петровалы). Тайӧ збыль, ласков мада. Ог вермӧдчы таво. Но тіянкӧд ветла: делӧыс ыджыд пансьӧ!

ИЛЬИНИЧНА. Чӧвусь, сусед, чӧвусь.

ЛАМБЕЙ. Муна! Мем талун зэв ёна кокньӧдіс.

ИЛЬИНИЧНА. Ой, господи! господи! Рӧднӧй ай-мамыд тай, кор найӧ шогсьӧны асланыс пи-ныв вӧсна, и гортъяс водӧм бӧрас век ышлолалӧны на вӧсна. А кор тайӧ жӧ бать-мамлӧн шогсьысь сьӧлӧмъясныс лоасны местаынӧсь, сэки и белӧй светыс налы муса, и челядьыс кажитчӧны шаньӧн да мичаӧн.

ЛАМБЕЙ. Чӧвлы тэ, Ильинична. Ме эг на ставсӧ висьтав. (Петровалы.) Ті ӧд тӧданныд Фёдор Игнатьевич Ордымовӧс... Бур душаа морт, колӧ висьтавны... Сылы менам ыджыд юӧр эм ыстыны. Сотчысь из места йылысь. Пӧшти аддзи ме сійӧс.

ФИЛИППОВ. Сотчысь из местасӧ?

ПЕТРОВА. Выльлаысь?

ТЕРЕНТЬЕВ. Кор?

ЛАМБЕЙ. Первойсӧ аддзылі гӧтрасян воясӧ. Но ме сэки эг тӧд, мый сійӧ — озырлун.

ФИЛИППОВ. Тэ шуан: «пӧшти аддзи». Сідзкӧ, стӧчсӧ он на тӧд?

ЛАМБЕЙ. Стӧч кӧ тӧді, и сотчысь изсӧ эськӧ сьӧрысь вайи. Кольӧм гожӧм нарошнӧ прӧйдиті кӧр табунӧн сійӧ местаясӧд, кытысь чайта. Ёна корси и эг аддзы. Висигчӧж на думайта, мыйла ме сійӧс эг аддзы... Зинаида Павловна, ті вот мый висьталӧй Фёдор Игнатьевичлы: мед волас. Ми сыкӧд кыкӧн ветлам. Веськыда сотчысь из вылас ӧні ме сійӧс нуа.

ПЕТРОВА. Фёдор Игнатьевич ёна рад лоас. Пыр жӧ локтас.

ЛАМБЕЙ. А тіянкӧд любӧй кадӧ мунны дась. Ог кӧ мун, аслам жӧ пи вермас дивитны. (Филипповлы.) Тайӧ паськӧмсӧ ӧд сійӧ мем ыстіс.

ФИЛИППОВ. Сідзкӧ, пыдди пуктӧ ассьыс батьсӧ.

ПЕРВОЙ НЫВ (вашкӧдӧ Лизалы). Тэ эн на кывлы? Ӧндрейыс пӧ гӧтрасьӧ.

ЛИЗА (дрӧгмунӧ). Коді висьталіс?

МӦД НЫВ (индӧ Петрова да Терентьев вылӧ). Ас костас сёрнитісны.

ПЕРВОЙ НЫВ. Свадьба пӧ лоас.

Лиза переживайтӧ. Петрова приметитӧ тайӧс.

ЛАМБЕЙ (нуӧдӧ Петроваӧс бокӧ). Ещӧ ӧти юӧр кӧсъя ыстыны тіян сьӧрысь... Ӧндрей мед волас видлыны батьсӧ. Гажтӧмтчи ёна. Дай сёрни зэв ыджыд эм: бур гӧтырпу ми тані быдтам сылы.

ПЕТРОВА. Гӧтырпу?

ЛАМБЕЙ. Сідзи и висьтав сылы: «Артмӧдчанныд нылыскӧд — батьыд нинӧм оз жалит». Дзонь вежон мӧдам свадьбуйтны. Став песнясӧ — выльсӧ и важсӧ — удитам сьывны. (Довкнитӧ Ильиничналань.) Главнӧй сьылысьыс кипод улын лоӧ. Мусӧ и васӧ сьылӧдас. Вокӧ, асьтӧ вунӧдлан.

Лиза оз вермы терпитны ӧбидасӧ, пышйӧ. Петрова сёрнисӧ бергӧдӧ мӧдтор вылӧ.

ПЕТРОВА. Ме эськӧ радпырысь кывзі сылысь песнясӧ.

ЛАМБЕЙ. Дзик тані?

ПЕТРОВА. Да, позяс кӧ.

ЛАМБЕЙ (йӧзлань). Миян гӧстя окотитӧ кывзыны Ильиничналысь сьылӧм-бӧрдӧдчӧмсӧ.

ЙӦЗ. Сійӧ важӧн нин эз бӧрдӧдчывлы. Окотапырысь кывзам. Ильинична, эн ӧткажит.

ИЛЬИНИЧНА (пыксьӧ). Сьылӧм-бӧрдӧмтӧ, бобӧяс, шог да печаль чужтылӧмаӧсь. Найӧс бӧрдны — аслыд колӧ шогсьыны. Оз артмы ӧні менам тайӧ. Синватӧм лоӧ да и сьӧлӧм дойдтӧм.

ФИЛИППОВ. Марья Ильинична, кор сьӧлӧмыд радлӧ, сэки сьывлӧны?

ИЛЬИНИЧНА. Тайӧ тэ збыль шуан, Ефим Иванович. Сӧмын ӧд песняыс менам гижтӧм. Сійӧ кӧнкӧ лэбалӧ на гажа ывлаас да миян югыд олӧмас.

Ылысянь локтӧ задушевнӧй да кыпыд музыкалӧн мелодия. Ильинична петыштӧ береглань, видзӧдыштӧ ю кывтыд да заводитӧ сьывны.

ИЛЬИНИЧНА.

Видзӧдла кӧ ме Уса ю вылӧ —

Лунся шондіыс ваын купайтчӧ.

Видзӧдла кӧ ме Уса кывтыдӧ —

Лебедь чукӧр сэн талань кыпӧдчӧ.

Чӧвлӧй, абу тай, вӧлӧм, лебедьяс,

Абу лебедьяс ни сера уткаяс.

Пароходъяс сэн ӧти бӧрся мӧд

Шыльыд ва кузя вывлань буткӧны.

ЙӦЗ. Збыль тай! Видзӧдлӧй! Катӧны пароходъяс!

ПЕТРОВА. Поэтесса. Настоящӧй поэтесса!

Заводитӧны кывны радио позывнӧйяс... Первой Филиппов, а сэсся и мукӧдъяс веськӧдӧны та вылӧ внимание.

ИЛЬИНИЧНА.

Ыстӧ миянлы быдся эмбурсӧ

Паськыд полеяс да ытъя ва кузя

И не кодкӧ мӧд, ыстӧ карысь-кар —

Москва-матушка белокаменнӧй!

Пасибӧ жӧ нин да сё пасибӧ

Тэныд, партия, тэныд, Сталин-ай!

Тэнад отсӧгӧн да заботаӧн

Ловзьӧ, кыпӧдчӧ миян ставнас край!

ФИЛИППОВ. Ёртъяс, энлӧй жӧ... Мыйкӧ кӧсйӧны передайтны важнӧйтор.

ДИКТОРЛӦН ГӦЛӦС. Сёрнитӧ Москва! Сёрнитӧ Москва! Кывзӧй правительственнӧй сообщение. Кывзӧй правительственнӧй сообщение. Микрофон дорын СССР-са Народнӧй Комиссаръяс Сӧветса Председательӧс вежысь да Иностраннӧй Делӧяс кузя Народнӧй Комиссар Вячеслав Михайлович Молотов ёрт.

МОЛОТОВЛӦН ГӦЛӦС. «Сӧветскӧй Союзса гражданаяс да гражданкаяс! Сӧветскӧй Правительство да сылӧн глава Сталин ёрт поручитісны меным вӧчны татшӧм заявление:

Талун, нёль час асылын, Сӧветскӧй Союз дінӧ кутшӧмкӧ-либӧ претензияяс предъявиттӧг, война объявиттӧг, германскӧй войска уськӧдчисны миян страна вылӧ, атакуйтісны миянлысь границаяс уна местаті да бомбитісны асланыс самолётъяссянь миянлысь каръяс...»

Занавес.

КОЙМӦД ДЕЙСТВИЕ

Витӧд картина

Шахта пытшкын ожидание камера — бетонируйтӧм вель ыджыд помещение. Стенаясын война кадся лозунгъяс, плакатъяс. Помещение югдӧдчӧ шахтёрскӧй лампочкаӧн. Шахтёръяслӧн группа виччысьӧ кайны выліӧ.

АХМИРОВ (энергичнӧй сёрнитӧ телефон пыр). Тайӧс ме тӧда. Ті висьталӧй мӧдтор: мыйла оз уджав вспомогательнӧй ствол? Час джын пукалам и ог вермӧ кайны на-гора. Ті гӧгӧрвоанныд? Мем колӧ кайны выліӧ!.. (Пуктӧ трубка, звӧнитӧ выльысь.) Подстанция. Главнӧй инженерӧс мем. Тайӧ Алексей Никитич? А кӧні сійӧ?.. Кыдзи шахтаын? Кодкӧд? Кӧні? (Пуктӧ трубка, ёртъяслы.) Шахтаын Квитко... (Звӧнитӧ выльысь.) Диспетчерӧс мем. Диспетчер? Висьталӧй: кутшӧм участокын начальство? Сэні найӧ эз вӧвны. (Звӧнитӧ выльысь.) Мем мӧд участок. Тайӧ коді?.. Начальство сэн? Витӧдын? (Пуктӧ трубка.) Ветлам, аддзӧдлам. (Некымын шахтёркӧд мунӧны.)

ПЕРВОЙ ШАХТЁР. Мый лоӧма Ахмировыскӧд?

МӦД ШАХТЁР. Бара ӧткажитӧмаӧсь мунны фронт вылӧ. Коймӧд шыӧдчӧм вылӧ нин.

Пырӧны Квитко да Петров.

КВИТКО (пыригмозыс). Ковмас велавны, Алексей Никитич. Тайӧ сӧмын на заводитчӧмыс. Страна ӧні мӧдас сетны миянлы кыдз позьӧ этшаджык, а корны миянлысь кыдз позьӧ унджык. (Шахтёръяслы.) Чолӧм, ёртъяс!

ШАХТЁРЪЯС. Чолӧм, Владимир Васильевич! Пукалам — виччысям кайны выліӧ. Тайӧ кадӧ вспомогательнӧй ствол пыр уджавліс.

ПЕТРОВ (шахтёръяслы). Талунсянь, ёртъяс, комбинат кузя электроэнергия расходуйтӧм заводитчӧ выль расписание серти. Миян шахта пай вылӧ электроэнергия мӧдас воны ещӧ на этшаджык.

ШАХТЁРЪЯС (тӧждысьӧмӧн). И сідз нин уджалам ки помысь. Интереснӧ тайӧ.

ПЕРВОЙ ШАХТЁР. Ме тай висьталі тіянлы, мися, оз позь воюйтны и стрӧитны ӧти и сійӧ кадӧ.

КВИТКО. Неправильнӧ сёрнитан. Ми мӧдам воюйтны и стрӧитны. Стрӧитны ӧдйӧджык войнаӧдз дорысь. (Пуксьӧ стул вылӧ, водзӧ сёрнитӧ Петровкӧд.) Оз ков вунӧдны, Алексей Никитич: вельмӧм зверь воштӧ сямлун видзчысьны вынаджыкысь, а накажиттӧм морт — кывкутны аслас преступлениеысь. Гитлер оз мӧд лыддьысьны нинӧмӧн, весиг, аслас поражениеӧн. Сійӧс ышӧдӧ пырны водзӧ миян сӧветскӧй мулӧн озырлун, мукӧд странаясын сыӧн кокниа шедӧдӧм победаяс. Но миянысь сійӧ оз получит ни ӧтисӧ, ни мӧдсӧ.

ПЕТРОВ. Ме тайӧс гӧгӧрвоа. И эска миян победаӧ. Но ме некыдз ог вермы вежӧртны...

КВИТКО (торкӧ). Самӧй сложнӧй машинаяс поступайтны мӧдасны. Омӧльджыка сложнӧйяссӧ мӧдам вӧчны тані. Миянлы ковмас лоны ёнджыка творческӧй йӧзӧн. Тэнад талунъя предложениеыд мем сьӧлӧм вылӧ воис. Каям — висьталам Яков Петровичлы.

ПЕТРОВ (интересӧн). Мастерскӧйяс, думайтанныд, справитчасны?

КВИТКО. Отсалам — справитчасны.

ПЕТРОВ (решительнӧя). Сідзкӧ, пробуйтлам, Владимир Васильевич!

Пырӧны Перминов да Ӧндрей.

ПЕРМИНОВ (локтӧ Квитко дінӧ). Ламбей мем висьталіс: тшӧктӧмныд аддзӧдлыны асьныдтӧ, Владимир Васильевич?

КВИТКО. Ме вӧлі тэнад участокын, начальник ёрт, тӧдмаси шахтёръясыдлӧн уджӧн и колӧ сёрнитыштлыны... Парамон Демидович, мыйын секретыс, мый первой ӧти бригада, а талун дзонь смена тэнад участокын тӧдчымӧнъя перевыполнитісны норма.

ПЕРМИНОВ (думайтыштӧ). Партийнӧй собрание бӧрын Ламбей ёрткӧд ми лэччим шахтаӧ — не кыдз участокса начальник да бригадир, а кыдзи агитаторъяс. Видзӧдам — сьӧкыд положение: шахтёръяс жугыльӧсь. Дерт, гӧгӧрвоана: фронт вылӧ мунны он чеччышт тасянь, и татчӧс уджным быттьӧкӧ нинӧмӧн оз отсав фронтлы — некыдз петкӧдны изшом.

ШАХТЁРЪЯС. Таын став делӧыс. Решайтӧ транспорт.

ПЕРМИНОВ. Сэк сёрни миян кыптіс татшӧм: а сӧмын ӧмӧй миян продукция оз на участвуйт тышын? Но тайӧ жӧ, ёртъяс, резерв! (Кыпыда, быттьӧ агитируйтӧ.) Сӧветъяслӧн страна паськалӧма Мулӧн дзонь квайтӧд юкӧн вылӧ. Сылысь берегъяссӧ мыськалӧ дас кык море, куим океан! Миян странаын олӧ кыксё миллион лыда народ — мирын медся ӧтувъя, тышъясын медся ёна калитчӧм йӧз, кодӧн веськӧдлӧ самӧй революционнӧй, самӧй вежӧра партия свет вылас! (Оживление.) Да, тайӧс ме не тіянлы, — тайӧс ме налы висьталі.

КВИТКО. Ті висьталӧмныд налы самӧй главнӧйсӧ.

ПЕРМИНОВ. Ӧти кывйӧн, Андрей Павлович кольччис уджавны бригадаыскӧд. А смена помас кывлі — Ӧндрей Ламбейлӧн бригада сетӧма изшом куим пӧв унджык кольӧм лунъясӧ дорысь...

КВИТКО. Позьӧ шуны, Ламбей ёрт, мый миян шахтёръяс пӧвстын заводитчис военнӧй кадся сэтшӧм стахановскӧй движение, кодӧс ми вермам шуны фронтовӧйӧн!

ӦНДРЕЙ. Фронтовӧйӧн?..

ПЕРМИНОВ. Тайӧ, пӧжалуй, лӧсялана ним.

ШАХТЁРЪЯС. Правильнӧ, фронтӧвӧй вахта. Фронтӧвӧй бригада.

КВИТКО. Яков Петрович талун чукӧртӧ производственнӧй совещание. Ті, Парамон Демидович, и Андрей Павлович, висьталанныд сэні асланыд опыт йылысь.

Ӧдйӧ пырӧ Ахмиров.

АХМИРОВ (Квитколы). Кывлі — бара ӧткажитӧмныд. Мыйла он ыстӧй фронт вылӧ. Мыйла скӧрмӧданныд честнӧй мортӧс? (Ставыс видзӧдӧны Ахмиров вылӧ.) Тані олӧм — преступление. Тані олӧм — войнаысь дзебсясьӧм.

АХМИРОВКӦД ВОЫСЬЯС. Информбюролӧн сводкаяс оз ланьтӧдны, Владимир Васильевич. Решайтчӧ страналӧн судьба.

АХМИРОВ (страстнӧя). Оз узьсьыны войяс. Киӧ оз пыр удж. Мыйла ме абу фронт вылын? Мыйла видзӧда, кор фашистъяс жуглӧны да сотӧны миянлысь каръяс, сиктъяс, заводъяс, виалӧны чойясӧс, вокъясӧс? Кӧні менам сӧвесть? Кӧні тіян сӧвесть? Шенасям кулакъясӧн ю сайсянь...

КВИТКО (торкӧ). Тэ лыддян, мый ставӧн, тэысь кындзи...

АХМИРОВ (торкӧ). Быдмӧны изшом складъяс, нюжалӧны выль штрекъяс. Кутшӧм пӧльзаыс? Изшом складъяс заводитӧны асьныс ӧзъявны. Выль шахта стрӧитӧм вылӧ прӧста лотайтам кад. Колӧ мунны фронт вылӧ. Колӧ дорйыны Рӧдина. Прӧзевайтам — каитчам.

КВИТКО (лэптыштӧ кисӧ). Тэ, Ахмиров ёрт, висьталін сы мында нин, мый разберитчыны миянлы да, пӧжалуй, и тэныд, ковмас прамӧякодь.

АХМИРОВ (нетерпеливӧя). Мем колӧ мунны фронт вылӧ. Мукӧдтор ог кӧсйы тӧдны.

ПЕТРОВ. Кыдз нӧ сідз, Миша... Ті пыр на вӧлінныд примерӧн.

АХМИРОВ. Примерӧн, да не тіянлы. Тіянлы и войнаыс...

ӦНДРЕЙ (торкӧ Ахмировӧс). Зазнайтчӧмыд, муса друг, зазнайтчӧмыд!.. Алексей Никитич воліс куш тундра вылӧ. Сійӧ медводдза йӧз пиысь ӧти, коді заложитіс да стрӧитіс сэні первойя шахта. Сылы дӧверитісны стрӧитны гигант-шахта.

ПЕТРОВ (Ӧндрейлы). Оз ков дорйыны менӧ. Ахмиров прав. Ме и ачым заводита гӧгӧрвоны ассьым тырмытӧмторъясӧс. (Негодуйтӧмӧн.) Но ме протестуйта менӧ оскорбитӧмысь мӧд кузя, кодӧс Ахмиров эз удит шуны ставнас... Ӧшибайтчан, том морт! Колӧ лоны скромнӧйджыкӧн!.. Менӧ чужтыліс роч мам роч му вылын. Ме быдми сійӧ жӧ нянь помысь, мый и тэ сёйин. Лолалі сійӧ жӧ воздухӧн, мыйӧн и тэ лолалін! Кутшӧм право имеитан, весиг, думайтны тадз ме йылысь?

КВИТКО (спокойнӧя). Мый нӧ артмӧ уважаемӧй Ахмировлӧн? Сылӧн артмӧ, мый Краснӧй Армиялысь тыл ёнмӧдӧм, военнӧй промышленностьлы, фронтлы, транспортлы изшом запасъяс дасьтӧм лоӧ кулакъясӧн ю сайсянь шенасьӧм, мӧд ногӧн кӧ, некодлы ковтӧм, беспомощнӧй грӧзитчӧмӧн. Сійӧ вӧзйӧ миянлы кусӧдны топкаяс, сувтӧдны машинаяс, эновтны шахтаяс, мастерскӧйяс, заводъяс да (чорзьӧдӧ гӧлӧссӧ) уськӧдчыны пӧжар вылӧ моз некодлысь нинӧм кывзысьтӧг, некутшӧм пӧрадок ни дисциплина пыдди пуктытӧг.

АХМИРОВ (торкӧ). Ті мӧдінныд обобщайтны, парторг ёрт...

КВИТКО. Ме ог кӧсйы эскыны сыӧ, мый Миша Ахмиров сознательнӧя выражайтӧ тайӧ паникасӧ да караул горзӧмсӧ. Но, та вылӧ видзӧдтӧг, Ахмиров кывъясын, сылӧн поведениеын петкӧдчӧ событиеяс йылысь невернӧй чайтӧм. Ахмиров полӧ прӧзевайтны. Сійӧ тшӧктӧ водзвыв каитчыны миянлы фронт вылӧ сійӧс дзик пыр ыстытӧмысь.

Пырӧ диспетчер.

ДИСПЕТЧЕР. Владимир Васильевич, тіянӧс корӧ диспетчерскӧйӧ телефон дорӧ Яков Петрович.

КВИТКО. Локта. Алексей Никитич, ветлам тшӧтш.

Квитко, Петров да диспетчер мунӧны.

ӦНДРЕЙ (матыстчӧ Ахмиров дінӧ). Тэ кӧть неуна гӧгӧрвоан он, мый сӧтвӧритін?

АХМИРОВ (лӧг иронияӧн). Кытысь нӧ меным тэ мындасӧ гӧгӧрвоны. Тэд оз позь янсӧдчыны том гӧтыркӧд...

ПЕРМИНОВ (Ахмировлы). Вот мый ме висьтала тэныд, том морт, кодыр син куньӧмӧн веськалан нюрӧ — бурджык лоӧ водзӧ не пырны... Ме ачым аддзылі и кывлі, кыдзи Андрей Ламбей гозъя кевмысисны Семеновлы и Квитколы, медым лэдзасны найӧс фронт вылӧ.

ШАХТЁР. Тайӧ вернӧ. Некымынысь шыасьлісны.

Шахтаӧ сетӧны ток. Слабиника ӧзйӧны лампочкаяс.

ШАХТЁРЪЯС. Вот и ток сетісны. Кылӧ, заводитіс уджавны ствол. Мӧдӧдчимӧй, коді кайысь.

Пырӧны Петров да Квитко.

КВИТКО. Ёртъяс! Яков Петрович мем висьталіс телефон пыр, мый сійӧ получитӧма Обороналӧн Государственнӧй Комитетсянь Приказ миянлысь стройка да кӧрт туй стрӧитӧм ӧддзӧдӧм йылысь.

ШАХТЁРЪЯС (оживлённӧя). Вот тайӧс ми гӧгӧрвоам! Положение тырвыйӧ яснӧй! Артмӧ, Миша, тані олӧм да уджалӧм — абу войнаысь дзебсясьӧм.

КВИТКО (Перминовлы да Ӧндрейлы). Производственнӧй совещание йылысь эн вунӧдӧй!.. Алексей Никитич, мӧдӧдчим.

Квитко, Петров да шахтёръяс мунӧны. Кольӧны Перминов, Ӧндрей да Ахмиров. Пауза.

ПЕРМИНОВ (Ӧндрейлы). Вот тадзитӧ тӧдчымӧнъя кокньыдджык сьӧлӧм вылад... Ӧні ӧд мый требуйтчӧ мортлы? Либӧ фронт либӧ сэтшӧм удж, коді эськӧ пырис война кадся уджъяслӧн номенклатураӧ. Тэ гӧгӧрвоан? Номенклатураӧ? Став удж ӧні веськӧдӧма Рӧдинаӧс дорйӧм вылӧ, вероломнӧй врагӧс пасьвартӧм вылӧ.

ӦНДРЕЙ. Ме тайӧс бура гӧгӧрвоа, Парамон Демидыч.

Шумӧн локтӧны выль йӧз: Сенька, Рита, Терентьев, Блинов.

СЕНЬКА (пыригмозыс). Честное слово, повзьылі! Муртса эг чеччышт клетьсьыс.

РИТА. Кытчӧ нӧ эськӧ чеччыштін, Сенька.

СЕНЬКА. Вот тайӧ и спаситіс менӧ: чеччыштнысӧ вӧлі некытчӧ. Ме кутчыси тэ дінӧ, куни синъясӧс и, мися, мый лоны — ло: пропадита кӧ, Ритакӧд!

ТЕРЕНТЬЕВ. Чолӧм, ёртъяс! Коді тані Перминовыс?

ПЕРМИНОВ. Чолӧм! Ме Перминов.

БЛИНОВ. Извинит, Парамон Демидыч: тайӧ паськӧмнад ме тэнӧ эг и тӧд.

ТЕРЕНТЬЕВ. Тшӧктісны тіян дінӧ шыасьлыны. Ми уджавны лэччам первойысь на.

БЛИНОВ. Локті ме, значит, удж вывсянь гортӧ. Видзӧда: йӧз мӧдӧдчӧмаӧсь шахтаӧ — служащӧйяс, домохозяйкаяс, том йӧз... Вай жӧ, мися, и ме лэччыла. И вот лэччи. Используйтӧй.

ПЕРМИНОВ. Андрей Павлович, нуӧдӧй найӧс миян участокӧдз, сувтӧдӧй удж вылӧ.

ӦНДРЕЙ. Ладнӧ. Мӧдӧдчимӧй, ёртъяс.

ТЕРЕНТЬЕВ. Чолӧм, Ӧндрей!.. Тэнӧ вӧлі гӧтырыд корсьӧ. Мыйкӧ пӧ зэв ёна колан.

СЕНЬКА. Мый нӧ оз ков том гӧтырлы том верӧс!.. (Серам.) Со тай, небось, аддзис! (Петкӧдчӧ Надя.) Тані сійӧ, тані. Сӧмын зэв сьӧд.

Но Надялы абу серамӧдз. Сійӧ ньӧжйӧ локтӧ Ӧндрейлань. Ставыс гӧгӧрвоисны, мый Надялӧн эм висьтавны мыйкӧ важнӧйтор.

ПЕРМИНОВ (выльӧн лэччысьяслы). Зонъяс, мӧдӧдчимӧй мекӧд.

Перминов да выльӧн лэччысьяс мунӧны.

НАДЯ (оз тӧд, кыдзи заводитны). Ӧндрей, ме тэнӧ сэтшӧма корси... Ме первой кӧсйи звӧнитлыны. Но думышті и эг звӧнит... Мися, бурджык сідз висьтавны... Ӧндрей... Менӧ и ещӧ кык медсестраӧс... Ми... мӧдӧдчам фронт вылӧ...

ӦНДРЕЙ. А... А ме?..

НАДЯ. Ӧндрей...

ӦНДРЕЙ (страстнӧя). Лэдзӧны-ӧ менӧ?

Ахмиров оз вермы лоны безучастнӧйӧн. Сійӧ лыддьӧ асьсӧ мыжаӧн и Ӧндрей гозъя водзын да кӧсйӧ тӧдны, ыстӧны-ӧ сылысь другсӧ, резкӧя сувтӧ.

НАДЯ. Миша... Но мыйла ті талун кыкнанныд не аскодьныдӧсь?

АХМИРОВ (пӧшти горӧдӧ). Лэдзӧны оз Ӧндрейӧс?

НАДЯ. Сійӧс... оз на лэдзны...

ӦНДРЕЙ (шӧйӧвошлӧ, сэсся кодкӧ вылӧ скӧрмӧ). Ах, тадзи!.. (Уськӧдчӧ петны.)

АХМИРОВ. Ӧндрей!..

НАДЯ. Андрюша!..

Ӧндрей сувтӧ, бергӧдчӧ. Ахмиров тупкӧ синъяссӧ кияснас и уськӧдчӧ ӧдзӧсӧ.

ӦНДРЕЙ. Надюша, менам сьӧлӧмшӧр!

НАДЯ. Оз ков тадзи шогсьыны, Ӧндрей, оз ков... Ме ӧд регыд ветла. Ми ӧд... Но, кыдзи тэ тайӧс он гӧгӧрво?..

ӦНДРЕЙ. Да. Надюша... Ме тайӧс гӧгӧрвоа... (Кутлӧ Надяӧс.)

Занавес.

Квайтӧд картина

Андрей Ламбейлӧн квартира. Эм радиоприёмник, телефон. Сулалӧ книгаясӧн тыр этажерка. Стенын ӧшалӧ карта. Ӧдзӧсъяс: прихожӧйӧ, спальняӧ. Тӧлыся полярнӧй вой. Корсюрӧ кывлӧны паровозъяслӧн свистокъяс. Ӧндрей гӧтӧвитчӧ семинар кежлӧ. Пызан вылын книгаяс, журналъяс, газетаяс. Звӧнитӧ телефон.

ӦНДРЕЙ (босьтӧ трубка). Ме кывза. (Подтянитчыштӧ.) Чолӧм, Яков Петрович! Да вот пукси семинар кежлӧ гӧтӧвитчыны. Владимир Васильевич весиг оз юась, абу кӧ конспект. Прӧстӧ «кол» пуктӧ!.. Кӧть и материалсӧ тӧдан — всё равно, «кол»... Ладнӧ, локта, локта. Видза колянныд, Яков Петрович! (Бара занимайтчыштӧ и дугдӧ.) Да. Получитӧмаӧсь выль врубовӧй машинаяс. Мӧда корны вуджӧдны менӧ врубовка вылӧ.

Прихожӧйӧ пырӧны Павел Ламбей да Лиза.

ЛАМБЕЙЛӦН ГӦЛӦС. Кодкӧ эм-я, абу-я, а ми пырим.

ӦНДРЕЙ (юрсӧ лэптывтӧг). Пӧжалуйста, татчӧ пырӧй!

Петкӧдчӧны Ламбей да Лиза. Найӧ тӧвся паськӧмаӧсь. Ламбей любопытнӧй видзӧдӧ гӧгӧрбок.

ЛАМБЕЙ (Лизалы). Ми, тыдалӧ, эг сы ордӧ веськалӧ.

ӦНДРЕЙ (ӧдйӧ бергӧдчыштӧ). Батьӧ?!. (Уськӧдчӧ кутлыны.) Кысянь-мый? Кутшӧм ногӧн татшӧм виччысьтӧгыс?..

ЛАМБЕЙ (чышкыштӧ нимкодь синвасӧ). Могӧн, пиӧ, ыджыд могӧн воим.

ӦНДРЕЙ. И Лизук тшӧтш... Чолӧм, Лиза!

ЛИЗА. Чолӧм, Ӧндрей!

ӦНДРЕЙ. Давай, пӧрччысьӧ, шонтысьӧ. (Кӧсйӧ пӧрччӧдны батьсӧ.) Ті кыдзи воинныд? Поездӧн?

ЛАМБЕЙ. Энлы, пиӧ, ме нэм чӧж ачым пасьтасьлі и пӧрччысьлі... (Пӧрччысьӧ.)

ЛИЗА. Кӧръясӧн воим. Оборона фондӧ посылкаяс вайим.

ЛАМБЕЙ (оз тӧд кытчӧ пуктыны маличасӧ). Мед эськӧ некодлы жӧ эз мешайтчы тайӧ.

ӦНДРЕЙ. Любӧй местаӧ пукты, батьӧ. Тэ тані кӧзяин. (Лизалы.) А кӧнӧсь посылкаясыд?

ЛИЗА. Сдайтім нин.

ЛАМБЕЙ. Тӧдан коді примитіс миянлысь пӧсылкаяссӧ?.. Ачыс Зинаида Павловна!

ӦНДРЕЙ. Правильнӧ. Сійӧ миян тані оборона фондӧ принимайтысь председатель. (Аслысмоз). Со ӧд кутшӧм морт сійӧ: Весиг телефон кузя эз юӧрт!..

ЛАМБЕЙ. Зинаида Павловнаыдтӧ? Ачыс кӧсйис волыны верӧсыскӧд.

ӦНДРЕЙ. Ті виччысьыштлӧ. Ме магазинӧ муртса кежлӧ петавла. (Ӧдйӧ пасьтасьӧ и петӧ.)

ЛАМБЕЙ (матыстчӧ пызан дінӧ). Тэ аддзан, Лизук, кымын книгаысь сійӧ ӧтиысьӧн лыддьӧ? Вашкаыс варитӧ али оз? (Аддзӧ Лизалысь газета босьтӧм, повзьӧ.) Да, тэ эн вӧрӧд... Друг кыткӧ-мыйкӧ неладнӧ лоас. Кӧръяс дінын и сэн пӧрадок колӧ!

ЛИЗА (лыддьысьӧ). Энлы, Павел дядь. Статьяыс интереснӧй.

ЛАМБЕЙ. Он ӧд тайӧяслы шу, он шу...

ЛИЗА. Тэ первой кывзы, мый гижӧма. Тэнад пи йылысь.

ЛАМБЕЙ. Пи йылысь? Нолтӧсь, сідзкӧ, лыддьышт.

ЛИЗА (лыддьӧ). Куимсё да унджык прӧчент вылӧ быд сменаӧ изшом сетӧмысь присвоитны бригадир Андрей Павлович Ламбейлы изшом мастерлысь первой категорияа звание.

ЛАМБЕЙ. Самӧй первой?!. Вот тайӧ бур!.. Ме пыр шулі, мися, прӧста юр оз новлӧдлы. Характерыс скӧнь ме кодь!

Пырӧны Петров гозъя.

ПЕТРОВА. Но, кыдзи, Павел Калистратович, аддзин питӧ?

ЛАМБЕЙ. Аддзи, Зинаида Павловна! Со кӧні сійӧ олӧ! И меным шуис, тэ пӧ тані кӧзяин.

ПЕТРОВА. Тайӧ менам верӧс.

ПЕТРОВ (киасьӧ). Павел Калистратовичкӧд ми важӧн тӧдсаӧсь!

ЛАМБЕЙ. Тайӧ збыль: важӧн тӧдсаӧсь!

ПЕТРОВА. А тайӧ сказительница Ильиничналӧн нылыс — Лиза — заведуйщӧй МТФ.

ЛАМБЕЙ. Колӧ вылӧджык босьтны, Зинаида Павловна: Лизавета Модестовна миян ӧні сиктсӧветса председатель.

ПЕТРОВА. Со кыдзи!

ПЕТРОВ (киасьӧ Лизакӧд). Зэв приятнӧ кывны тайӧс!

ЛИЗА. Павел Калистратович дзебны мый-либӧ, — сӧвсем абу мастер.

ЛАМБЕЙ. Ас йӧзысь нинӧм оз таитлыны, Лизук... А ті пуксьӧй, шойччӧй. Ӧндрей локтас дзик пыр!

ПЕТРОВ. Кыдзи кажитчисны миян посёлокъяс, Павел Калистратович?

ЛАМБЕЙ. Эг чайт, вокӧ, скӧнь эг чайт сэки, мый татшӧм делаяс вермасны пансьыны водзӧ.

ПЕТРОВ. Палатка дінад волӧм кад йылысь тэ казьтылан?

ЛАМБЕЙ. Сы йылысь, Алексей Никитич.

ЛИЗА. Локтігӧн, кор миянлы петкӧдчисны посёлокъяс да шахтаяс, мӧдісны югвидзны бияс, Павел Калистратович сувтӧдіс кӧръяссӧ мыльк йылӧ и шуис мем: «Лизук, ёна видзӧд: тайӧ — тундраса бияс!»

ПЕТРОВ. Правильнӧ: тундраса бияс!

ЛАМБЕЙ. Вокӧ, веськыда пӧртмасьӧ миян войвыв! Душатӧ кыпӧдӧ! А ӧд вӧлі... Аски мӧда корсьны коркӧся палатка местатӧ.

ПЕТРОВ. Палатка места? (Аддзӧ фотокарточкаясӧн альбом.) Волы татчӧ. Видзӧдлы тайӧс.

ЛАМБЕЙ. Тӧдса карточкаыс. Татшӧмыс эм жӧ гортын. И палаткаыс сійӧ, и сулалӧны нёльӧн. Нёльӧдыс пилӧн гӧтырыс... сэки ныв на вӧлі. На, видзӧдлы, Лизук.

ЛИЗА. А этайӧ коді?

ЛАМБЕЙ. Сійӧ, вокӧ, ачыс Фёдор Игнатьевич!

ЛИЗА. Ордымовыд? Кодлы изшом местатӧ гожӧмнас петкӧдлін?

ЛАМБЕЙ. Сійӧ и эм.

ПЕТРОВ. Вот мӧд снимок. Тайӧ керкаыс сулалӧ сэкся палатка местаад. А сылӧн эсійӧ ӧшиньяс дорын ӧні сулалам ми.

ЛАМБЕЙ. Ми? Тайӧ керкаын?..

ПЕТРОВ. Сэкся палатка местаын, тайӧ керкаын, вот этайӧ жырйын.

ЛАМБЕЙ. Вот кӧні чудесаыс!.. Удайтчас кӧ аддзывны Фёдор Игнатьевичӧс, пӧрысь тунӧн сійӧс нимта! Сійӧ тӧдӧ, мый лоӧ водзӧ, сэк нин мем висьтавліс: «Тані — лоас кар! Лоасны уна судта керкаяс, ӧзъясны югыд бияс. И тэ локтан миян ордӧ гӧститны.» Вот сійӧ кутшӧм мортыс! Он шу — абу тун!

ПЕТРОВА. А ми сійӧс дзик пыр асьсӧ чукӧстам. (Босьтӧ телефоннӧй трубка.) Ордымовӧс, пӧжалуйста... Фёдор Игнатьевич? Чолӧм! Тіянкӧд кӧсйӧ сёрнитны важъя тӧдсаныд. (Сетӧ телефоннӧй трубкасӧ Ламбейлы.)

ЛАМБЕЙ (пыксьӧ). Мем, буди, оз лӧсяв тайӧ...

ПЕТРОВ. Телефоныс?

ЛАМБЕЙ (несмела босьтӧ трубка, кужтӧма матӧдӧ пель дінас). Кыла!.. Кодкӧ сёрнитӧ... Лючки морт гӧлӧс кылӧ... Шуалӧ менсьым ним... А?.. (Трубкасӧ вом дорысь босьттӧг, Петровалы.) Сэсся нӧ мый колӧ шуны? (Телефонӧ.) А! Кыдзи?.. Скӧнь ог гӧгӧрво... Сейчас, сейчас, пӧльышта. (Пӧлялыштӧ трубкалӧн выліса мембранаас.) Ме кӧсъя сёрнитны Фёдор Игнатьевич Ордымовкӧд и шуны сійӧс тунӧн!. Мый? (Петровалы.) Кодкӧ гажаа и сералӧ...

ЛИЗА (сералӧ жӧ). Ок, и Павел дядь! Дзик жӧ нин пӧрысь кага кодь.

ПЕТРОВА. Сійӧ жӧ первойысь сёрнитӧ телефон пырыс.

ЛАМБЕЙ. Кывза ме, кывза... Тэ и эм? Видза олан, Фёдор Игнатьевич! Воимсӧ?.. Фронтлы отсӧг вайим. Шуам, тасянь кӧрт туй кузя ӧдйӧджык мунас. Ме? Сы ордын... Аслам пи ордын!.. Мый жӧ? Кутшӧм сэтшӧм ыджыд выльтор? Но, хорошо, хорошо... Мӧдам виччысьны. (Ламбей ещӧ кывзӧ, но трубкаын нинӧм нин оз кыв.) Тыдалӧ, бара на урӧсмис. Час пӧльышта. (Пӧльыштӧ, кывзыштӧ, сэсся видлалӧ трубкасӧ.) Интерес. Лючки интерес. Менӧ, весиг, пӧсьӧ шыбитіс. Лоас ыркӧдчыны петавлыны. (Ӧдйӧ петӧ.)

ПЕТРОВ. Интереснӧй старик!

Пырӧ Квитко. Киасьӧ.

КВИТКО. А кӧні Андрей Павлович?

ПЕТРОВА. Регыд локтас.

КВИТКО (ньӧжйӧ). Ме пыри Яков Петрович тшӧктӧм серти... Андрей Павловичӧс суис ыджыд шог... Пӧлучитім извещение...

ПЕТРОВА (повзьӧ). Надяыс?..

КВИТКО. Да храбрӧйяс смертьӧн...

ЛИЗА (искренньӧя). Абу нин ловъя?.. (Бӧрддзӧ.)

ПЕТРОВА. Сійӧ сӧмын на заводитіс овны...

ПЕТРОВ. Сьӧкыд лоӧ Ӧндрейлы...

КВИТКО. Колӧ дасьтыны сійӧс та кежлӧ...

Пауза. Петров локтӧ карта дінӧ. Сэтчӧ жӧ матыстчӧ Петрова. Видзӧдӧны карта вылӧ.

ПЕТРОВА. Извергъяс!.. Найӧ киын пӧшти ставнас Севернӧй Кавказ. Найӧ юӧны Волгалысь ва... (Пауза.)

КВИТКО. Бара лоис сідзи, кыдзи вӧлі дас кӧкъямысӧд воын, Царицын дорйигӧн. (Ыджыд надеяӧн.) Сталинград оз вермы лоны сетӧмаӧн. Сійӧс оз позь сетны вӧрӧг киясӧ ни ӧти лун кежлӧ! Оз позь!

ПЕТРОВ. Войнаӧдз, кор мем лоліс кывлыны сёрнияс русскӧй душа йылысь, роч мортлӧн характер йылысь, то, ог соссьы, эг гӧгӧрволы сылысь смыслсӧ. Ме сійӧс гӧгӧрвои ӧні. (Сьӧкыдпырысь.) Да. Эм русскӧй душа. Эм роч мортлӧн аслас характер.

Кылӧ, кодъяскӧ пырӧны.

КВИТКО. Надя йылысь нинӧм на эн сёрнитӧй...

ЛАМБЕЙЛӦН ГӦЛӦС. Первой колӧ тӧдмавны. Сы бӧрын и нимкодясьны.

Петкӧдчӧны Ламбей да Ордымов.

ОРДЫМОВ (пыригмозыс). Уськӧд тӧдвылад, кыдзи тэ менӧ нулін кӧръяс вылын тундра пыдӧсӧ...

ЛАМБЕЙ (мыйкӧ уськӧдӧ тӧдвылас). Выль местаысь сотчысь из петкӧдлыны?..

ОРДЫМОВ. Тайӧ выль месторождениесӧ ми разведайтім да тыдовтчис, мый изшомыс сэні не сӧмын унджык тані дорысь, но и качествонас ёна бурджык.

ПЕТРОВ. Поздравляйта, Павел Калистратович!

ПЕТРОВА. Поздравляйтам!

ОРДЫМОВ. Но, главнӧйыс абу на таын... Выль месторождение йылысь вӧлі доложитӧма Обороналӧн Государственнӧй Комитетлы, и Сталин ёрт личнӧ юалӧма, коді аддзис первойӧн месторождениесӧ. «Местнӧй пӧрысь колхозник-оленевод Павел Калистратович Ламбей», — вӧлі висьталӧма сылы.

Ламбей дыр оз куж нинӧм шуны. Сы дінӧ матыстчӧ Квитко.

КВИТКО. Сьӧлӧмсянь поздравляйта тэнӧ, бур пилӧн бур бать!

ЛАМБЕЙ (дзикӧдз шӧйӧвошӧ). Лизук, тэ кылан?.. Лизук!... Да, кытчӧ сійӧ вошӧма?

ЛИЗА (петкӧдчӧ спальняысь). Мый лоис, Павел дядь?

ЛАМБЕЙ. Тэ кылін, мый висьталіс Фёдор Игнатьевич?.. (Ордымовлы.) Ещӧ шуа ӧтчыд: тэ збыльысь тун! Помнитан ассьыд кывъястӧ? «Тэ, Павел Калистратович, коркӧ лоан на знатнӧй мортӧн изшом местатӧ петкӧдлӧмысь!» (Лизалы.) Ме йылысь ӧні тӧдӧ личнӧ, тӧдан коді?..

Ӧдйӧ пырӧ Ӧндрей. Киясас кульӧкъяса. Уськӧдчӧ включитны радио.

ӦНДРЕЙ. Ті пельтӧмӧсь... Став мирыс кывзӧ Сталинград йылысь!..

ДИКТОРЛӦН ГӦЛӦС. Миян войска, наступление водзӧ нуӧдӧмӧн, прӧйдитісны Сталинградсянь северо-западнӧй направлениеын 100–120 километр вылӧ да займитісны Чернышевский кар, Перелазовскӧй кар да Погодинскӧй местечко. Сталинградысь лунвылын миян войска вешйисны 150–200 километр вылӧ да займитісны Тундутово кар, Аксай кар.

ОРДЫМОВ. Порядок!..

ПЕТРОВА (чышкыштӧ шуда синва). Господи, мый дыра тайӧс ми виччысим.

ДИКТОРЛӦН ГӦЛӦС. Лун помасигкежлӧ захватитӧма трофейяс: 557 орудие, 2.826 автомашина, 1.200 железнодорожнӧй вагон, 2.625 пулемёт....

КВИТКО. Заводитчӧны событиеяс!..

ДИКТОРЛӦН ГӦЛӦС. Бойяс поле вылын прӧтивник колис салдатъяслысь да офицеръяслысь дас кык тысяча шой.

ЛИЗА. Вот тадзи и колӧ найӧс, фашистскӧй свораӧс!

ПЕТРОВА. Мед ӧні норасясны асланыс йӧймӧм фюрер вылас.

ӦНДРЕЙ. Лоис и миян улича вылын праздник!.. Лиза, батьӧ! Самӧвар пуктыны! Лӧсьӧдны ужин!

ЛАМБЕЙ (мудерамоз). Пиӧ, тэ первой ме вылӧ видзӧдлы.

ӦНДРЕЙ. Ёнмыштӧмыд, батьӧ...

ЛАМБЕЙ. Э-э, вокӧ!.. Кӧть нэмтӧ думайтан, он тӧд. (Ордымовлы.) Тэ, Фёдор Игнатьевич, эн висьтав.

ӦНДРЕЙ. Тіян, зонмӧ, збыльысь мыйкӧ интереснӧйтор эм.

ЛАМБЕЙ. Став Россияыс нимкодясьӧ. А мем куим пӧв нимкодь... Пикӧд аддзыси — ӧти нимкодь! Миян войска наступайтӧ — мӧд нимкодь! И коймӧд нимкодь — самӧй ыджыд!.. (Мыйкӧ уськӧдӧ тӧдвылас.) Оз тырмы сӧмын ещӧ ӧти нимкодь: невесткаӧй эз ло тані. (Ӧндрейлы.) Кольӧм во, фронт вылас мунігӧн, ме сійӧс аддзӧдлі пароход вылысь. Сёрнитім да сёрнитім... Бӧрыннас и письмӧяс частӧ ыстывліс.

ӦНДРЕЙ (аддзӧ Лизалысь нормӧм, дрӧгнитӧ). А ӧні, батьӧ?.. Ӧні пӧлучайтанныд письмӧяссӧ?

ЛАМБЕЙ (тӧждысьӧмӧн). Та йылысь ме тэнсьыд кӧсйи юавны: ыстывлӧ-ӧ тэныд. Наденькасянь ме важӧн эг пӧлучитлы некутшӧм юӧр.

Ордымовлӧн, кыдзи ставлӧн, настроениеыс вежсьӧ. Лиза оз вермы кутчысьны бӧрдӧмысь да уськӧдчӧ спальняӧ.

ӦНДРЕЙ (уськӧдчӧ батьыс дінӧ). Тэ мыйкӧ тӧдан, батьӧ, и он кӧсйы висьтавны...

ЛАМБЕЙ (повзьӧ). Мый тэкӧд, пиӧ?.. Ме нинӧм ог тӧд, ен тэнӧ видз...

ПЕТРОВА (кӧсйӧ мыйкӧ шуны и оз вермы, ӧдӧлитӧ бӧрддзӧм). Андрей Павлович...

ӦНДРЕЙ. Ті ставныд мыйкӧ тӧданныд и он кӧсйӧ меным висьтавны... Владимир Васильевич... Мыйла лыддянныд менӧ не сыӧн, мыйӧн ме эм?

КВИТКО (матыстчӧ Ӧндрей дінӧ). Андрюша! Менам дона ёрт!.. Ми ог вунӧдӧй и ог прӧститӧй вероломнӧй враглы сыӧн вӧчӧм ни ӧти преступление. Асланыс пиян вӧсна мамъяслӧн синва, асланыс батьяс вӧсна челядьлӧн шогсьӧм, муса гозъяяслӧн пыр кежлӧ торъялӧмъяс — ыджыд дойӧн инмӧны став миян народлы.

ӦНДРЕЙ. Сідзкӧ, менам Надя...

ЛАМБЕЙ (повзьӧ). Мый «Надя»?

КВИТКО (батьног кутлӧ Ӧндрейӧс). Но ми вына йӧз, Андрюша! Ми збыльысь сэтшӧмӧсь, кутшӧмӧсь эмӧсь. А быдпӧлӧс испытаниеяс миянӧс вӧчӧны ещӧ на вынаӧн и асланым великӧй делӧлы ещӧ на ёна преданнӧйӧн!

ӦНДРЕЙ. Сідзкӧ, менам Надюша... Ок, менам Надюша... (копыртӧ юрсӧ Квитко морӧс бердӧ, дрӧгйӧдлӧны пельпомъясыс. Друг сійӧ веськӧдчӧ став тушанас, чужӧмыс лоӧ грознӧйӧн, кулакъясыс топыда гӧрддзасьӧны. Ӧндрей пытшкын выль вынӧн ӧзйыштӧ врагъяс вылӧ лӧглун да победитны решимость.)

Занавес.

НЁЛЬӦД ДЕЙСТВИЕ

Сизимӧд картина

Шахта территория вылын площадка. Ӧтарас — шахтоуправлениеӧ пыранін. Мӧдарас — шахтаысь петанін. Веськыда — Сталинлӧн бюст мышкын — горняцкӧй карлӧн панорама. Ылынджык тыдалӧны сійӧ жӧ гӧраясыс, кодъяс вӧліны мӧд картинаын. Помасьӧ арся лун, вочасӧн ӧзйӧны бияс. Картина помас ыпнитӧ содтӧд электрическӧй свет. Севернӧй сияние пыдди Войвыв пӧртмасьӧ промышленнӧй карлӧн унапӧлӧс биясӧн. Картина заводитчӧ занавес водзвылын. Петкӧдчӧны кык шахтёр: первойыс — веськыдвывсянь, мӧдыс — шуйгавывсянь.

ПЕРВОЙ ШАХТЁР (тэрмасьӧ). Кывлін?

МӦД ШАХТЁР. Кывлі. Радио кузя юӧртісны. Кор кайӧны?

ПЕР. ШАХТЁР. Ог тӧд, ме абу найӧ участокысь... А Ленинградскӧй эшелонсӧ?..

МӦД ШАХТЁР. Талун жӧ. Митинг лоӧ ӧти сайысь.

ПЕР. ШАХТЁР. Извинит. Тэрмася ветлыны гортӧ.

Шахтёръяс мунӧны ӧтарӧ-мӧдарӧ. Веськыдвывсянь локтӧны Ахмиров да Ордымов.

АХМИРОВ (пӧся). Ме сылы шуа: «Шойччыштны колӧ, Ӧндрей. Узьыштны колӧ, Ӧндрей». А сійӧ мем: «Ачыд узьышт. Тэнад улын дзонь участок. Ми каям авария ликвидируйтӧм бӧрын».

ОРДЫМОВ. А кыдзи врубовӧй машинаыс?

АХМИРОВ. Дзонь... Машина мездӧм бӧрын Ӧндрей пыр жӧ включитіс сійӧс пробуйтны. А сэсся локтіс шахтаӧ юӧр: «Миян войска массӧвӧя форсируйтӧны Днепр». Сэк Ӧндрей горӧдіс: «Ог кай на-гора вылӧ! Мӧда наступайтны!.. Аддзан, мый керӧ...

Ордымов да Ахмиров саялӧны. На бӧрся петкӧдчӧны Ламбей да Ильинична. Ламбейлӧн костюм морӧсас Трудовӧй Краснӧй знамя орден. Ильинична ижемскӧй сарапана, кокошника.

ЛАМБЕЙ. Тэ збыль шуан, суседка: бать сьӧлӧм радуйтчӧ и шогсьӧ. Удж кузя пиӧй славитчӧ, а семейнӧй олӧмас — веськыд сирӧта. Да, кытчӧ нӧ сійӧ шогмӧ?.. Локтім сы ордӧ, и пырны некытчӧ — куим сутки чӧж пачыс ломтывтӧм.

ИЛЬИНИЧНА. Гашкӧ, и ӧні на оз тӧд, мый сылӧн батьыс тані?

ЛАМБЕЙ. Мем висьталісны — тӧдӧ. Поклон ыстӧма шахтасяньыс. Ог на пӧ эшты кайны... Ок, и скӧнь ме кодь! Ме тай кӧръяс пиасигӧн ог узьлы ни ог сёйлы лючки...

ИЛЬИНИЧНА (видзӧдӧ бӧрвылас). Найӧ нӧ кытчӧ лоисны? Гашкӧ, мӧд туйӧ веськалісны?

ЛАМБЕЙ. На вӧсна эн тӧждысь, оз вошны. (Сойӧдыс крукышта Ильиничнаӧс.) А пиӧс гӧтралӧм кузя веськыда висьтала: ог кӧсйы мӧдысь янавны бур йӧз водзын.

ИЛЬИНИЧНА. Господи... Да, ме ӧмӧй суитчыны тшӧкта! Ми ӧд сӧмын ас костын тэкӧд.

Ламбей да Ильинична саялӧны. На бӧрся петкӧдчӧны Лиза да Филиппов. Лиза костюма, моднӧй туфлияса.

ФИЛИППОВ. Ми ладнӧ вӧчим, мый первой пыравлім Семенов ордӧ.

ЛИЗА. Дельнӧй мужик... Сыын эм мыйкӧ сэтшӧмтор, мый овлӧ тӧлка батьлӧн: бура кывзыны и тырвыйӧ гӧгӧрвоны.

ФИЛИППОВ. Вежӧра морт — тайӧс помнит, Лизук, — век кажитчӧ прӧстӧйӧн да мӧд мортӧс тырвыйӧ гӧгӧрвоысьӧн. Сӧмын ограниченнӧй йӧз пуктӧны асьнысӧ ставсьыс вылӧджык. Налӧн, видзӧдтӧ, абу сы мында вежӧр, мед гӧгӧрвоны ассьыс жӧ гӧль вежӧрсӧ.

ЛИЗА. Ме зэв рад, мый сійӧ кӧсйысис отсавны миянлы.

Филиппов да Лиза саялӧны. Воссьӧ занавес. Сцена вылын рабочӧй сувтӧдӧ неыджыд пызан, вевттьӧ сійӧс гӧрд материеӧн. Локтӧ Перминов.

ПЕРМИНОВ. Мый ещӧ оз тырмы?

РАБОЧӦЙ. Оз тырмы крепыдджык вина да бокалъяс, шахтаса начальник ёрт!

ПЕРМИНОВ. Андрей Ламбей оз ю.

РАБОЧӦЙ. Тайӧ вернӧ, шахтаса начальник ёрт!

Локтӧ Терентьев.

ТЕРЕНТЬЕВ. Парамон Демидыч, юӧртісны шахтасянь: планысь вывті перйӧм изшом сменалӧн содӧ ещӧ 100 тонна вылӧ.

ПЕРМИНОВ. Грузитны, Иван Егорович!

ТЕРЕНТЬЕВ. Но, Ленинградскӧй эшелон пӧшти составитӧма нин.

ПЕРМИНОВ. Маршрутыс тяжеловеснӧй.

Петкӧдчӧны Ахмиров да Ордымов.

АХМИРОВ. Пӧсьнас мӧдӧдӧм изшом ёнджыка мӧрччас враглы.

ПЕРМИНОВ. Грузитны!

ТЕРЕНТЬЕВ. Эм грузитны!

Терентьев да рабочӧй мунӧны. Петкӧдчӧны Ламбей да Ильинична.

ЛАМБЕЙ. Дась воӧмӧн быдлаті лоӧ видлавны!..

ОРДЫМОВ (киасьӧ). Сьӧлӧмсянь поздравляйта тэнӧ, Павел Калистратович, правительственнӧй награда получитӧмӧн!

ЛАМБЕЙ. Вокӧ, некыдз оз эскыссьы: локті мягкӧй вагонын, пӧлучиті орден и ветлӧдла аслам тундравывса карӧд знатнӧй мортӧн! Чудеса али абу тайӧ?

ПЕРМИНОВ (киасьӧ Ламбейкӧд). Заслугаысь сетісны, Павел Калистратович! Выль изшом места тэ индін миянлы вывті бурӧс!

ЛАМБЕЙ. Ставыс ас йӧз тані вӧлӧмаӧсь...

АХМИРОВ. Менӧ помнитан? Пиыдлӧн друг. Ещӧ ӧтчыд ошка питӧ! Но ӧні сійӧ абу нин сӧмын джигит. Ӧні сійӧ первой категорияа изшом мастер! А бӧръя сутки чӧжӧн петкӧдліс врубовӧй машиналысь сэтшӧм выработка, кутшӧмӧс некод на эз петкӧдлы!

ЛАМБЕЙ. Веськыд интерес тайӧ!.. (Киасьӧ выльпӧв.) Тіянӧс поздравляйта жӧ наградаӧн!

ПЕРМИНОВ. Спасибӧ!

ИЛЬИНИЧНА (Ордымовлы). И вуджӧны и вуджӧны Днепр юсӧ. И лыддьӧдлісны радио кузя — кодъяс геройяс и кыдзи найӧ геройство петкӧдлӧмаӧсь. Миян народ заводитӧ лоны орденоноснӧйӧн да героическӧйӧн!..

Автомашиналӧн гудок. Петкӧдчӧны Семенов да Квитко.

ЛАМБЕЙ. Ми танӧсь нин, начальник ёрт.

КВИТКО. Приветствуйта, кодкӧд эг аддзысьлӧй!

СЕМЕНОВ (Ламбейлы). Здук мысти и пиыдкӧд аддзысян. (Перминовлы.) Кайӧны оз на, Парамон Демидыч?

ПЕРМИНОВ. Регыд локтасны, Яков Петрович.

КВИТКО (Перминовлы). Пыравлам тэ ордӧ.

ПЕРМИНОВ. Пыравлам, Владимир Васильевич. Миша, Фёдор Игнатьевич, пыравламӧй.

Квитко, Перминов, Ахмиров да Ордымов пырӧны. Локтӧны Лиза да Филиппов.

СЕМЕНОВ (шуткаӧнмоз). А пиыд, век жӧ, норасьӧ тэ вылӧ, Павел Калистратович.

ЛАМБЕЙ. Ог эскы, Яков Петрович. Рӧднӧй бать вылӧ норасьлӧны сӧмын ичӧтик душаа йӧз. Менам пи абу сэтшӧм.

СЕМЕНОВ (сералӧ). Тайӧ тэ вернӧ висьталан: бур пи не должен норасьны аслас бать вылӧ, торъя нин сэтшӧм вылӧ, кыдзи тэ. Но тэнад пиыд век жӧ прав, кор сійӧ шуӧ, мый сылӧн пӧрысь батьыс ӧнӧдз на оз лок аслас ӧтка пи дінӧ овны.

ЛАМБЕЙ (ас мортлы моз инмӧдчӧ Семеновлы морӧсас). Вернӧ шуан, Яков Петрович. Ёна окота олыштны и пи дінын, и отсыштны сылы, мыйӧн верма. Но, вокӧ, мем лоӧ гажтӧм кӧръясысь. Мучитчыны мӧда натӧг.

СЕМЕНОВ (подражайтӧ Ламбейлы). Ме тэнӧ гӧгӧрвоа, Павел Калистратович. Быд мортлӧн колӧ лоны радейтана удж. Сытӧг сійӧ ты вылын плавайтысь чаг кодь. Но ӧд кӧръясыд и миян эмӧсь — уна тысяча. Гажтӧмчан — позяс ветлыны на дінӧ. Инструктор пыдди мӧдан волыны кӧраяс дінӧ, велӧдны том пастукъясӧс. И пи дінад мӧдан частӧ волывны, и мынтам уджсьыд бура.

ЛИЗА (ӧбидаӧнмоз). Став выгӧдаыс лоӧ, Павел дядь... А колхозыдлы ковмас корсьны тэ местаӧ выль мортӧс, сюрас кӧ сійӧ...

ЛАМБЕЙ (стрӧгапырысь). Тэ, мада, кут тӧдвылад: мортыд абу пӧтка гӧн — кымын дыр олӧ сійӧ ӧти местаын, сымын пыдӧ вужъяссьӧ... Тэ лучше висьтав вот мый: вӧлі эз нин тіян начальник ёрткӧд сёрни колхознымлы электростанция стрӧитӧм йылысь?

СЕМЕНОВ. Тайӧ сёрни миян вӧлі Кынева ёрткӧд. Ыджыд отсӧг кӧсйысим сетны.

ЛАМБЕЙ (тӧждысьӧмӧн). Сійӧ и эм, вокӧ, сійӧ и эм... Ас йӧзлы оз ӧткажитлыны. (Думайтӧмӧн ветлӧдлӧ площадка кузя.)

СЕМЕНОВ. Кыдзи кажитчис кар, Марья Ильинична?

ИЛЬИНИЧНА. Мича песня кодь, Яков Петрович. Сідзи и окота сьывны, да стрӧкаыс оз сюрлы.

СЕМЕНОВ. Мед сӧмын песняыс вӧлі, а сьывны кад сюрас.

ЛАМБЕЙ (матыстчӧ Семенов дінӧ). Ме йылысь вопросыс скӧнь сложнӧй, Яков Петрович... Колӧ сӧветуйтчыны колхоз правлениекӧд да, со, и Ефим Ивановичкӧд колӧ согласуйтны.

СЕМЕНОВ. Вопросыс важнӧй, Павел Калистратович, колӧ артыштны гӧгӧрбок... А ӧні пыравламӧй шахтоуправлениеӧ, видзӧдланныд и сійӧс.

Семенов, Ламбей да Ильинична пырӧны. Филиппов заводитлӧ жӧ пырны, но аддзӧ Лизалысь кольччӧмсӧ и бергӧдчӧ.

ФИЛИППОВ. Тэ нӧ, Лизук, он и кӧсйы пыравлыны?

ЛИЗА (кӧсйӧ лоны веськодьӧн, но тайӧ сылӧн оз артмы). Мыйкӧ тай, абу окота.

ФИЛИППОВ (тӧдмалӧмӧн видзӧдӧ Лиза вылӧ). Ачыд тӧдан, дерт. Морт тэ верстьӧ нин.

Лизаӧс волнуйтӧ Ӧндрей. Но Лиза оз тӧд, кыдзи сылы кутны асьсӧ, кор аддзас Ӧндрейӧс. Сӧвет вермас сетны сӧмын Филиппов.

ЛИЗА. Ефим Иванович... (Филиппов бергӧдчӧ.) Ефим Иванович... Ме яндыся висьтавны... Но мем некодлы висьтавны, тэныд кындзи...

ФИЛИППОВ. Ме кывза, Лизук.

ЛИЗА (взволнованнӧя). Тэ менӧ велӧдін школаын. Тэнад киысь пӧлучитлі пионерскӧй галстук. Тэнад кодьӧн кӧсйысьлі лоны комсомолын вӧлігӧн. Тэнад сӧвет серти лои великӧй партия радъясын. Ме тэныд эска, гашкӧ, аслым дорысь ёнджыка... Эн дивит, кажитчас кӧ тешкодьӧн, мый кӧсъя юавны.

ФИЛИППОВ. Спасибӧ, Лизук, мем тырвыйӧ дӧверитӧмысь.

ЛИЗА. Висьталӧй, Ефим Иванович, овлӧ оз сідзи, мед эськӧ морт уна вояс чӧж радейтіс мӧд мортӧс, весиг тӧдтӧг, радейтӧ-ӧ сійӧс тайӧ мортыс?

ФИЛИППОВ (нюммунӧ аслыс). Тэ кӧсъян шуны, овлӧ-ӧ тадзи нывъяслӧн?

ЛИЗА (яндысьӧмӧн). Да, Ефим Иванович...

ФИЛИППОВ (ласкова). Тэ кӧ кылан татшӧм радейтӧмсӧ, сідзкӧ, овлӧ.

ЛИЗА (аттьӧалӧмӧн видзӧдыштӧ Филиппов вылӧ). Ме сійӧс радейта дас кӧкъямыс арсянь. Унаысь ёрлі ачымӧс сыысь, мый ог вермы вунӧдны сійӧс. Ме, весиг, нимкодяси сы вӧсна, кор кывлі, кутшӧм шудаӧсь найӧ том гозъя, и бӧрді шог синваӧн, кор тӧдлі, мый сылӧн муса гӧтырыс пӧгибнитӧма война вылын... Ме ог тӧд, мый вӧчсьӧ мекӧд.. Но ме тӧда — кутшӧм сьӧкыд сылы и таысь менам потласьӧ сьӧлӧм... Мый вӧчны меным, Ефим Иванович?

ФИЛИППОВ. Ме тэнӧ гӧгӧрвоа, Лизук. А шуны... Мый ме верма шуны татчӧ... Тэнад бур сьӧлӧм и яснӧй вежӧр. Вӧч сідзи, кыдзи тшӧктӧны найӧ.

ЛИЗА (думайтыштӧм бӧрын). Спасибӧ, Ефим Иванович!

Тэрмасьӧмӧн петӧны шахтоуправлениеӧ пыралысьяс да мукӧдъяс.

ПЕРМИНОВ (сцена сайсянь). Оркестрлы лоны дасьӧн!

ЛАМБЕЙ. Видзӧдлам, мыйся сэтшӧм знатнӧй мортӧн сійӧ лоӧма!

ИЛЬИНИЧНА. Видзӧдлам, видзӧдлам... Сӧмын ми бокысяньджык мӧдам видзӧдны.

Йӧз чукӧрмӧ и шахталаньсянь. Унджыкыс шахтёрскӧй паськӧмаӧсь. Кылӧны гӧлӧсъяс:

— Почётыс кутшӧм!

— Эм мыйысь!

Заводитӧ ворсны оркестр. Петкӧдчӧны Ӧндрей, Петров, Блинов, Митя, Сенька, Рита да мукӧдъяс. Шӧйӧвошӧм Ӧндрей дінӧ матыстчӧ Семенов.

СЕМЕНОВ. Поздравляйта тэнӧ, Андрей Павлович, ыджыд производственнӧй победаӧн! Аслад врубовӧй машинаӧн тэ сетін сэтшӧм выработка, кодӧс позьӧ лыддьыны рекорднӧйӧн ӧні кежлӧ! (Кутлӧ.)

ӦНДРЕЙ (гӧрдӧдӧ). Яков Петрович, ме вежсьытӧм! Бусӧссян! (Йӧзлӧн гажа серам.)

СЕМЕНОВ (шуткаӧн). Изшом бус, Андрей Павлович, благороднӧй бус!

Семенов нуӧдӧ Ӧндрейӧс пызан сайӧ, кӧні сулалӧны нин Квитко, Петров, Перминов да мукӧд.

ПЕРМИНОВ. Ёртъяс! Комбинат управление нимсянь кыв сетсьӧ ЦК-лӧн парторг Владимир Васильевич Квитколы.

КВИТКО. Дона ёртъяс — изшом мастеръяс, стахановецъяс, славнӧй транспортникъяс и ставныд ті, кодъяс асланыд самоотверженнӧй уджӧн отсалад миян Рӧдиналы, фронтлы! Тыдалӧ нин сійӧ шуда луныс, кор миян Сӧветскӧй Армия дзикӧдз шыбитас аслас священнӧй му вылысь вероломнӧй врагӧс да мӧдас преследуйтны сійӧс помӧдз! Фронт вылын победаяслы тылса труженикъяс вочавидзӧны ещӧ на гырысьджык производственнӧй успехъясӧн!

Оживление. Ламбей, Ильинична да Филиппов реагируйтӧны быдӧн ас ногыс.

ПЕРМИНОВ. Кыв сетсьӧ шахтаын водзынмунысь участокса начальник Михаил Ахмировлы.

АХМИРОВ (волнуйтчӧмӧн). Йӧз водзын мыж — ёрӧ синъяс. Друг водзын мыж — куйлӧ изйӧн сьӧлӧмкӧд орччӧн. Важӧн кӧсъя висьтавны. Ог вермы не висьтавны... Ӧндрей, прӧстит менӧ коркӧся менам лёк кывъясысь. Помнитан? Шахтаад... гӧтыртӧ колльӧдан лунӧ.

Гӧтырсӧ казьтыштлӧмӧн Ӧндрей дрӧгнитӧ, но босьтӧ асьсӧ киас.

ӦНДРЕЙ. Миша... Вай ме тэнӧ кутла таысь! (Кутлысьӧны.)

АХМИРОВ. Владимир Васильевич, мыйла эн накажитӧй менӧ сэки, кор ме вунӧдлі ачымӧс да чайті, мый прамӧй мортыс сӧмын ме? Менам чужӧм сотчӧ яндзимла, кор воча вола Алексей Никитичкӧд. (Матыстчӧ Петров дінӧ.) Прӧстит и тэ, Алексей Никитич... А мыйысь — тэ ачыд тӧдан.

ПЕТРОВ (растроганнӧй). Ме пыр лыддьылі тэнӧ прамӧй мортӧн. А сэкся кывъясыд... Да, мый сэн сёрнитны! (Кутчысьлӧны. Общӧй оживление.)

ПЕРМИНОВ. Кыв сетсьӧ Андрей Ламбейлы.

ӦНДРЕЙ. Ёртъяс!.. Мем талун сьӧкыд висьтавны ставсӧ, мый вӧчсьӧ ме пытшкын. Верма шуны сӧмын ӧтитор: ме нинӧм эг вӧч сэтшӧмсӧ, кодӧс эськӧ татшӧма позис тӧдчӧдны...

ЛАМБЕЙ (оз вермы кутчысьны). Тайӧ этша пиӧ. Колӧ унджык висьтавны.

ӦНДРЕЙ (сӧмын ӧні аддзӧ батьсӧ). Батьӧ?!. Батьӧ тані. (Уськӧдчӧ кутлыны.)

ЛАМБЕЙ. Энлы, пиӧ, энлы!.. Ми тані абу кыкӧн! Тэ первой ставсӧ висьтав бур йӧзыслы! А висьталантор тэнад уна эм. Али вунӧдін кывъястӧ, кодъясӧн коркӧ велӧдін менӧ?.. Со найӧ йӧзыс — русскӧйяс, украинечьяс, сибирякъяс, уралсаяс, лунвылысь и войвылысь, став миян страна пасьтаысь! Ставыс тэд вокъяс да чойяс!

ӦНДРЕЙ. Тайӧ збыль, батьӧ!

ЛАМБЕЙ. Кутшӧм нэм вӧвлі сэтшӧмыс, мед кӧр пастухлысь писӧ величайтісны музыкаӧн? Мыйла тайӧс он висьтав!

СЕМЕНОВ. Вернӧ, Павел Калистратович! (Аплодисментъяс.)

ЛАМБЕЙ. Кутшӧм пӧльяс дырйи вӧвлі татшӧмыс, мед вӧвлӧм батрак, тэнад пӧрысь батьыд, пиӧ, новліс морӧсас правительственнӧй награда!

КВИТКО. И тайӧ вернӧ, Павел Калистратович!

Аплодисментъяс вынаджыкӧсь. Сценалӧн задник ыпнитӧ югыдджык биясӧн. Кар тыдалӧ паськыдджыка и югыдджыка.

ЛАМБЕЙ. Тэ видзӧдлы гӧгӧрбок! Тайӧ тэнад чужан войвылыд тадзи пӧртмасьӧ! Тайӧ тэнад тундраыд татшӧм югыд биясӧн ломалӧ. Кӧні Ильиничнаыс? Мыйла сійӧ чӧв олӧ?

ИЛЬИНИЧНА. Ме тані, сусед, тані. (Петӧ сцена шӧрӧ.) Ме виччыся нин, кор тэ помалан агитируйтны.

ЛАМБЕЙ. Песняыс тэнад синводзын. Сійӧс колӧ сьывны!

Ворсӧ музыка. Ильиничнаӧс шымыртӧ тайӧ музыкалӧн мелодияыс, сійӧ заводитӧ импровизируйтны.

ИЛЬИНИЧНА.

Лэб тэ, кыпыд, сьылӧмӧй,

Сӧкӧл пӧткаӧн:

Пӧртмасьӧ Вой саридзным

Асъя кыаӧн.

Радлӧ, томмӧ сьӧлӧмӧй

Ыджыд нимкодьысь:

Ӧзйӧ миян тундраным

Шонді биясӧн!

ХОР (ӧтувтчӧ Ильинична дінӧ).

Сявкйӧ югыд шонділӧн

Тайӧ югӧрыс.

Ленин сійӧс дасьтыліс,

Сталин паськӧдіс.

Копыртчылам Ленинлы

Сыла му дінӧдз,

Водзӧ рӧднӧй Сталинкӧд,

Водзӧ!

Коммунизмӧдз!

Занавес