ОЗЫРЛУН КЛЮЧЬЯС
ВОРСӦНЫ:
Кынев, Василий Петрович — коми крестьянин.
Марья Сидоровна — Кыневлӧн гӧтыр.
Семён Васильевич — Кыневлӧн пи.
Иванов, Николай Антонович — инженер, роч.
Татьяна Николаевна — Ивановлӧн ныв.
Ёкышов, Тимофей Савич — коми купеч-промышленник.
Матрена Тимофеевна — Ёкышовлӧн ныв.
Пеликов, Иван Ильич — Сенялӧн друг.
Анна Димитриевна — первойсӧ ныв, сэсся Сенялӧн гӧтыр.
Чижов, Прокоп Прокопыч — аферист.
Краузе, Шульц Карлович — министерствоса чиновник.
Гавриков, Пётр Гаврилович — Краузелӧн отсасьысь.
Массӧвӧй сценаясын участвуйтӧны содтӧд йӧз.
I ДЕЙСТВИЕ
Первойя картина
Кырйыв ласта. Веськыдвылас — Кыневлӧн керка; керкалы воча — жытник, веськыда — ю мӧдлапӧвса вӧр. Гожся рыт. Жытник пельӧсын Васька лӧсалӧ куран пу. Иван петӧма рытйысьны, сюся видзӧдӧ юлань.
ИВАН. Ох-о! Куим вӧлӧн пыжсӧ кыскӧны! Да, тэ, Васька дядь, видзӧдлы жӧ, видзӧдлы!
ВАСЬКА (уджалӧ). Мед и кыскӧны, кодлы колӧ.
ИВАН. Пыж шӧрас господскӧй чом. Чом водзас бипур пестӧма.
ВАСЬКА Бара, сідзкӧ, выль компанье либӧ выль фирма катӧ.
ИВАН. А пыж бӧжас — бӧж кыссьӧ. Этійӧ, мый нин, сы мында, тыдалӧ, ном-гебйыс вӧтчӧ на бӧрся.
ВАСЬКА (видзӧдӧ юлань). Оз тай, майбыр, повны ном-гебсьыд. Быттьӧ сюрӧн мӧдіс кыскыны найӧс миян вӧр-ваыд.
Рытйысян паськӧма жӧ, керкаысь петӧ Сеня, матыстчӧ керъяс дінӧ.
СЕНЯ. Мый нӧ сэні сэтшӧмыс, батьӧ ?
ВАСЬКА. Выль «гӧстьяс» катӧны.
СЕНЯ. Кутшӧм выль гӧстьяс?
ИВАН. Тӧдӧмысь, кортӧмъяс.
Тэрмасьӧмӧн петкӧдчӧ Чижов, сьӧд паськӧма, цилиндр шляпаа, кыр йылӧ сувтӧ торйӧн, зільӧ тӧдмавны воысьясӧс. Кылӧ пӧлянъясӧн ворсӧм шы.
ЧИЖОВ (нимкодьысь аслыс). Дерт жӧ найӧ! Весиг ачыс воӧ!.. (Зыралӧ воча ки ) Эг виччысь татшӧм водз найӧс, эг виччысь. Лоас, тыдалӧ, тэрмасьыштны! (Ӧдйӧ мунӧ бӧр.)
ИВАН (Чижовлань). Тайӧ нӧ, сьӧд ракаыс, мый сідз ёсьмӧма талун?
ВАСЬКА (чукӧртӧ уджалан кӧлуй). Код тӧдас найӧс, озырлун корсьысьясӧс. Налӧн делӧяс войсяӧсь.
СЕНЯ. Талӧн ещӧ зэв лунсяӧсь делӧясыс. Сава Тимаысь оз и петавлы. Свадьба виччысям.
ВАСЬКА. Гашкӧ и гӧтрасяс... купеч овмӧс вылас. Сьӧм мешӧкыд, шуӧны, сьӧм мешӧккӧд лӧсялӧ.
Пӧлянъяслӧн шы матыстчӧ. Васька пырӧ керкаас.
ИВАН (Сенялы). Аддзан?.. Кодкӧыд тай тшӧтш петӧма.
СЕЙЯ. Тэ, Иван, мукӧддырйи лишнӧй уна тӧдан.
ИВАН. Аддза ӧд. Тэ водзын сійӧ сідзи и сылӧ, сідзи и сылӧ, быттьӧ вый гӧгыль пачвом дорын.
СЕНЯ. Он-ӧ нин вежӧкты?
ИВАН. А мый зон огыс.
Петкӧдчӧны ныв-зон. На пӧвстын Анна, Таня. Татчӧс нывъяс дінысь, кодъяс пасьтасьӧмаӧсь ижемкаяс ног, Таняӧс торйӧдӧ сылӧн паськӧмыс. Пӧлянъясӧн ворсӧм шыӧ Анна йӧктӧ да сьылӧ частушкаяс:
Ми гуляйтам лун и вой,
Гортӧ локтам дзар югыд,
Мамӧлӧн пачыс ваймӧм,
Пӧсь пирӧгыс петӧма,
Рыська шаньга пӧзьӧма.
Сьылігкості Таня воӧ зонъяслы воча, киасьӧ. Иван гусьӧник синмалӧ Сенялы. Анна век сьылӧ:
Ой, милӧйӧй, милӧйӧй,
Сьӧлӧм косьтысь, орӧдысь,
Ай-мам дінысь янсӧдысь,
Ныв-зон водзын янӧдысь...
Керка сайсянь петкӧдчӧны Краузе да Гавриков. Краузе накомарника да плащ-палаткаа, Гавриков юрсӧ вевттьӧма чышъянӧн, киас ыджыд чемодан. Здук кежлӧ сувтовкерӧны.
ИВАН (друг аддзӧ сулалысьясӧс). Видзӧдлӧй! Этійӧ, мый нин... видзӧдлӧй! Попъяс!
Ставыс ыз-серӧктӧны. Воысьяслы тайӧ виччысьтӧм, шӧйӧвошлӧны.
АННА. Со ӧд мортъястӧ мыйӧдз воштӧма ном-гебйыс!
ИВАН. Бӧбмытӧдзыс!
Выльысь ӧтувъя серам. Но Гавриков босьтӧ юрсьыс чышъянсӧ, отсалӧ пӧрччысьны Краузелы. И Краузе сувтӧ йӧз водзӧ ыджыд чиновник паськӧма — гордӧй да надменнӧй. Сералысьяс ланьтӧны. Повзьӧмысла ӧтияс саялӧны, мӧдъяс — Сеня, Анна да Таня — сувтӧны жытник бокӧ.
КРАУЗЕ (Гавриковлы). Высшӧй чиновниклӧн паськӧмыс миян великӧй роч империяын тшӧктӧ прамӧй йӧзӧс копыртчывны сійӧс новлысьяслы, а татшӧм дикаръясӧс садь быртӧдзыс повзьӧдӧ!
ГАВРИКОВ. Да, ваше превосходительство! Тайӧ закон. Цивилизация пыртӧ йӧз пӧвстӧ поведениелысь нормаяс, а бӧрӧ кольӧм йӧзъясӧн веськӧдлӧ ассьыныс олӧмсӧ доръяна животнӧй инстинкт. Ме тӧда ӧти колонистӧс, кыдзи сійӧ вӧвлытӧм кокнилунӧн пӧльзуйтчис африканскӧй дикаръяслӧн татшӧм инстинктнас.
Петкӧдчӧны Чижов да Матрен. Матрен шӧвк да бархат пиын.
ЧИЖОВ (нюжӧдӧ кисӧ). А ме тіянӧс, ваше превосходительство, виччыси тӧлысь бӧрын на.
КРАУЗЕ (ньӧжйӧ сетӧ еджыд перчаткиа кисӧ). Прӧститӧй... Тіянӧс ыдждӧдлыны?
ЧИЖОВ. Чижов, Прокоп Прокопыч. Гашкӧ, помнитанныд: Петербург, гостиница, промышленникъяслӧн собрание, саридзсайса винаясӧн тыр пызан...
КРАУЗЕ. О-о! да, да, да! Прокоп Прокопыч! Ми ещӧ Тіянкӧд пукалім воча, и Ті кӧсйинныд козьнавны менӧ татчӧс местаясса медся озыр му участокӧн. Кора прӧститны! Ме сы дыра нин воа тайӧ варварскӧй пельӧсас, менам юрын сы мында быдсикас гырысь думъяс да кывкутана уджъяс, мый ставыс сорласис, гартчис...
ГАВРИКОВ (мездысьӧ ном-гебйысь). Дай сэтчӧ жӧ со ном-гебйыс оз сет овны.
КРАУЗЕ. И найӧ дӧзмӧдчӧны. (Чижовлы.) Тӧдмасьӧй: менам покорнӧй слуга да отсасьысь — Гавриков. Пётр Гаврилович!
ЧИЖОВ. Нимкодьпырысь тӧдмася. (Индӧ Матрен вылӧ.) Кора тӧдмасьны: Матрена Тимофеевна — татчӧс купеч Ёкышев Тимофей Савичлӧн ӧтка ныв!
КРАУЗЕ (галантнӧя). Министерствоса чиновник Краузе. (Окыштӧ Матренлысь кисӧ)
Жытник бокын гусьӧн серӧктӧны Матренлысь ки окыштӧм вылӧ.
ЧИЖОВ. Матрена Тимофеевналӧн эмӧсь гувернанткаяс, и Ті энӧй шензьӧ, аддзанныд кӧ тайӧ вӧръясысь не сӧмын лунвыв дзоридз кодь нылӧс, кодлӧн мичлуныс вензьӧ шондікӧд, но и образованнӧй мортӧс.
МАТРЕН. Ті, Прокоп Прокопыч, менӧ янӧданныд.
КРАУЗЕ. О-о! Ме эськӧ аттьӧалі енмӧс, тайӧ жӧ кывъясӧн кӧ «янӧдісны» менӧ!
ЧИЖОВ (окалӧ кисӧ Матреналысь). Ті кыланныд, шӧвк бордъя гулюӧй менам?!
Жытник дорын гораджык серам. Ставыс видзӧдлӧны сэтчӧ. Ныв-зон ӧтортчӧны.
КРАУЗЕ. Коді сэтшӧм сьӧд паськӧмаыс ?
ЧИЖОВ (гусьӧнмоз). Неблагонадежнӧйлӧн ныв.
КРАУЗЕ. Кодлӧн?
ЧИЖОВ. Политвысланнӧй Ивановлӧн ныв. Батьыс дінӧ воӧма.
КРАУЗЕ (официальнӧй тонӧн). Мыйла буретш тайӧ местаясын Иванов?
ЧИЖОВ. Прӧститӧй, ваше превосходительство, ог тӧд. Ме морт деловӧй, политикаӧн ог занимайтчы. Но чайта, мый ссылкаӧ мӧдӧдӧм вылӧ таысь ылынджык да туйястӧмджык пельӧс миян великӧй империяын корсьны сьӧкыд.
КРАУЗЕ. Ті кӧсъянныд шуны — тадзи вӧвліс ӧнъя кадӧдз?
ЧИЖОВ. Стӧч тадзи кӧсйи шуны, ваше превосходительство!
КРАУЗЕ (быттьӧ лыддьӧ). Войвывса озырлунъясӧн интересуйтчӧ государственнӧй эмбуръяс кузя министерство. Кӧть и эз на помась мирӧвӧй война, иностраннӧй фирмаяс вӧзйӧны нин торъя му участокъяс вылӧ миллионъяс. Петербургскӧй делӧвӧй йӧз кӧсйӧны конкурируйтны ухтинскӧй нефтьӧн кавказскӧй нефтепромышленникъяскӧд. Ставыс тайӧ, ӧнӧдз на займиттӧм да пустуйтысь муыс и ваыс, лоӧ юклӧма собственникъяс костын. Вӧрын ни ӧти биа руч, тундраын ни ӧти дона кынь, юясын янтарь рӧма ни ӧти сьӧмга оз ло кӧзяинтӧм. Лоӧны шогмана туйяс, озырлун перъян промыслъяс и про-ле-та-рий-яс. Ті гӧгӧрвоанныд, мый сэтшӧм пролетарийыс миян нэмӧ?
ЧИЖОВ. Пролетарий — сійӧ бунтовщик, стачкаяс котыртысь, ваше превосходительство.
КРАУЗЕ (тӧдчӧдӧмӧн). Вот мыйла тані абу местаынӧсь политически не бла-го-на-дёжнӧйясыс.
МАТРЕН. Прокоп Прокопыч, гӧстьяссӧ ми сёрни-басниӧн мӧдім пӧттшуйтны.
ЧИЖОВ. Ті правӧсь, Матрена Тимофеевна. (Краузелы) Кора мӧдӧдчыны ме ордӧ. Надейтча, ваше превосходительство, тані мӧданныд овны вель дыр, и ми удитам сёрнитны унатор йылысь.
КРАУЗЕ. Ме мӧда овны тані стӧч сы дыра, мыйта ковмас государственнӧй служба кузя могъяс олӧмӧ пӧртӧм вылӧ. Мый касайтчӧ частнӧй вопросъясын кузя, ми Тіянкӧд артмӧдчам зэв регыд.
ЧИЖОВ. Эскӧй, ваше превосходительство, Ті лоанныд шудаӧсь! Ме бӧрйи Тіянлы личнӧ сэтшӧм участок, мый не сӧмын Ті асьныд, но и Тіян челядьныд мӧдасны казьтывны Прокоп Прокопыч Чижовӧс бур кывйӧн!
КРАУЗЕ (нимкодьысь). Мед лоас тадзи! (Мунӧны.)
Кильчӧ сайсянь петкӧдчӧны Сеня, Таня да Анна. Найӧ век сералӧны.
СЕНЯ (нерӧ Чижовӧс). «Шӧвк бордъя гулюӧй менам!»
ТАНЯ. Чуть-чуть абу тадзи. Колӧ вот тадзи. (Петкӧдлӧ.)
Виччысьӧмӧн петкӧдчӧ Иван. Сы бӧрся вочасӧн бӧр воалӧны ныв-зон.
ИВАН. Мунісны?.. А менам, зонъяс, муртса лолӧй эз пет. Этійӧ, мый нин, сьӧлӧмӧй ӧні на чеччалӧ кӧчлӧн моз.
АННА. Тэ, Иван, вомтӧ векньӧдышт.
ИВАН (гусьӧн). А мый, Анна? Кыласны, думайтан?
СЕНЯ. Таня, позьӧ петкӧдлыны ещӧ?
ТАНЯ (серӧктӧ). Тайӧс? Оз ков. Тайӧ абу уджалысьяслӧн культураыс. Тіянлы колӧ мӧдтор — велӧдчыны, тӧдны уна-уна бур... Кӧсъянныд?
ИВАН. Ме первойя морт. Сьӧлӧм сылань кыскӧ.
АННА. Тэ эськӧ, Иван, ланьт. Мыйыськӧ повзян да нимтӧ ассьыд вунӧдан.
Ставыс сералӧны. Таня босьтӧ киӧдыс Иванӧс, нуӧдӧ жытник дінӧ. Ставыс пуксьӧны кывзыны Таняӧс.
ТАНЯ. Лун муысь ме аддзылі со мый: джуджыд-джуджыд гӧраяс; гӧраяс йылас во чӧж лым; а костъясас кымӧръяс шойччӧны. И вӧлі ӧти гӧра вылын вына бордъяса орёллӧн поз.
СЕНЯ. Миян ног кӧ, кутшлӧн поз.
ТАНЯ. Да, Сеня, кутшлӧн поз. А позъяс — кутшлӧн пиян. Вот найӧ бордъясисны, мӧдісны лэбавны. Оз лысьт лэбны сӧмын ӧти кутшпи, полӧ усьӧмысь гӧраяс костас. И друг кыпӧдчас ыджыд-ыджыд тӧвныр, дай позсӧ, кӧні вӧлі кутшлӧн пиыс, лэптас тӧвйылӧ... Кыдзи чайтанныд, мый лоис кутшпиыскӧд?
ИВАН. Тӧдӧмысь, кутшпиыс став познас усис гӧраяс костас да вийсис.
УНАӦН. Дерт жӧ.
ТАНЯ. Кутшпиыс паськӧдіс бордъяссӧ да лэбзис.
ИВАН. Ок, зонмӧ. Абу тай ме ног.
ТАНЯ. Сідзкӧ, кутшпиыс веніс ассьыс полӧмсӧ. Тадзи и йӧзлы колӧ — венны ассьыныс полӧмсӧ. Мортлӧн ӧд выныс ыджыд. Сійӧ сы вылӧ и чужӧ, мед ставсӧ, мый сувтас сійӧ туй вылӧ, венны.
ИВАН. Сеня, тайӧс гаровт пель гӧгӧрыд. (Сеня гусьӧн грӧзитӧ.)
АННА. А тэ, Таня, збыльысь вӧлін Лун муас?
ТАНЯ. Збыльысь, Анна. Ме быдлаын вӧвлі. Эг ӧтнам, — батьӧкӧд. Сійӧ ӧд миян уна кӧзяинлы медасьліс — корсьны му пытшкысь озырлун. Но та йылысь тіянлы висьтала мӧдысьджык. А ӧні роч песняястӧ заводитам сьывны.
Сьылӧны «То не ветер ветку клонит».
Ю дорын петкӧдчӧ Иванов. Сійӧ ружьеа, вӧнь костас лыйӧм пӧтка.
АННА. А со и ачыс батьыд локтӧ.
ТАНЯ (уськӧдчӧ паныд). Батьӧ!
ИВАНОВ. Чолӧм, менам кӧзюк! Бур рыт, войтыр и нывъяс!
УНАӦН. Бур рыт, Николай Антонович!
ИВАНОВ (Сенялы). Батьыд гортад?
Тайӧ кадӧ воссьӧ ӧшинь, мыччысьӧ Кынев Васька.
СЕНЯ. Со тай сійӧ.
ИВАНОВ. Василий Петровичлы — чолӧм! (Киасьӧны ӧшинь пыр.)
ВАСЬКА. Олан-вылан, Николай Антонович! Тэ век кыйсян.
ИВАНОВ. Не сійӧн ошйысьны кӧсъя.
ВАСЬКА. Мый нӧ сэтшӧмыс?
ИВАНОВ. Вӧвлі ме сэтшӧм муясын, кӧні оз тӧдны, мый сійӧ лымйыс; волі сэтчӧ, кӧні гожӧм шӧрын колӧ тӧвся паськӧм; му пытшкысь аддзылі быдсикас озырлун — зарни и эзысь, кӧрт и ломтас, дона изъяс и жемчуг. Но быдлаысь ӧтиӧн-ӧтиӧн. А тані (зепсьыс перъялӧ ёкмыльяс), природаыс татчӧ дзебӧма сы мында озырлун, мый тэ кӧ, Василий Петрович, сяммин тайӧс донъявны, — тэнад весиг войясыс дугдісны узьсьыны...
ВАСЬКА (видлалӧ ёкмыльяс). Из кутшӧмкӧ... Гӧрд сёй... А тайӧс му сирӧн ми шуам. Дзонь гӧптъяс тыр мукӧдлаӧ петӧма да кынмӧма. Бара из... али пӧрӧда кутшӧмкӧ?
ИВАНОВ. Зэв шоч да дона минерал тайӧ, Василий Петрович! Зэв дона минерал!
ВАСЬКА (бӧр сетӧ). Сідз, сідз... мыйя-й, шу, сійӧ минералыс лоӧ. Пемыдӧсь ми, Николай Антонович, велӧдчытӧмӧсь, тайӧ сьӧд вӧр кодьысӧсь. Сылы тай со, вӧрыслы быттьӧ, му да ва кӧ эм, — рӧдитчӧ и быдмӧ. Сідзи и мивокыд: олыштан дай пӧран, пуыс моз, нинӧм тӧдлытӧг. (Аддзӧ Чижовлысь воӧм). Со, господин Чижов воӧ. Сылы колӧ петкӧдлыны тайӧясӧс. Сійӧ, гашкӧ, и тӧдас мыйкӧ. (Пӧдлалӧ ӧшиньсӧ.)
ИВАНОВ (чуймӧмӧн бергӧдчӧ). Чижов?..
ЧИЖОВ (ставлы). Зэв унаӧн чукӧртчӧмныд. (Ставныс чӧв олӧны. Иванов ордысь Чижов аддзӧ минералъяс.) Нолтӧсь, петкӧдлы.
ИВАНОВ. Профессиональнӧй привычка, господин Чижов: чукӧрта гербарий.
ЧИЖОВ. Видзӧдлам. Ставсӧ, ставсӧ. (Видлалӧ нимкодь) Да-с... Хм... Сідз-сідз... Ме тайӧс босьта (ставсӧ сюялӧ зептас).
ИВАНОВ. Господин Чижов, тайӧс сетны ме ог вермы. Сэн эмӧсь шоча сюрлысьторъяс.
ЧИЖОВ. Аттьӧалӧй политиканскӧй енъястӧ, мый ме абу стражник. Сэк эськӧ тӧдлінныд, кыдзи колӧ ті вокыслы ружьенас ветлыны. Менам ставыс, верманныд мунны!
Иванов муртса вермӧ кутны асьсӧ. Таня босьтӧ сійӧ: киӧдыс да нуӧдӧ. Ныв-зон заводитӧны разӧдчыны, ас костаныс гусьӧн пинялӧны Чижовӧс.
ИВАН. Вот понйыс!
СЕНЯ Ме муртса кута ачымӧс.
ЧИЖОВ. Эй, ті, том йӧз, сулавлӧй! Кыланныд? Уджавны медала. Удж срочнӧй эм.
ИВАН (саялігмозыс). Ми ог на эштӧ, господин Чижов. Этійӧ, мый нин, рытйысьны мунамӧ.
ЧИЖОВ (гораа). Ыджыд дон сета! Кыланныд? Кык мында, куим мында!
Кылӧ вочасӧн ылысмысь пӧлянъяслӧн шы. Чижов кӧсйӧ пырны керкаӧ. Но кильчӧ игана, йиркӧдчыштӧ. Оз восьтыны. Локтӧ купеч Ёкышев. Сійӧ олӧма морт нин, тшӧг, самоувереннӧй.
ЁКЫШОВ. Оз восьт?
ЧИЖОВ. Узьӧны нин, буракӧ, Тимофей Савич.
ЁКЬІШОВ. Юрлӧсъясныс узьӧны. Тэ найӧс он тӧд. Мудеритӧны. Эн кевмысь. Мед найӧ кевмысьӧны миянлы.
ЧИЖОВ (лэччӧ кильчӧ вылысь, гусьӧнмоз). Мукӧддырйи кӧ, дерт, Тимофей Савич. Но ӧні — ачыд тӧдан...
ЁКЫШОВ. Мися асьныс воасны. Войшӧр бӧр кежлӧ лоас тырмымӧн рабочӧй. Сьӧмъясныс зепъясас оз на ёна зилькӧдчыны. (Мунӧны.)
Петкӧдчӧны Сеня да Таня. Таня киын книга.
СЕНЯ. Но вот... ми бара кыкӧн.
ТАНЯ. Да. Бара кыкӧн... (Пуксьӧны жытник водзӧ.) Тешкодь весиг. Романын моз жӧ миян артмӧ. О-о! Тэ кӧ эськӧ тӧдін, кыдзи сэні радейтчӧны! Кыдзи гажтӧмтчӧны ӧта-мӧдсьыс...
СЕНЯ. Тайӧс ме и книгатӧгыд тӧда... ас серти.
ТАНЯ Гӧгӧрвоа... И мем кажитчӧ, мый ми тӧдмасим сэтчӧдз нин, кор сэсся позяс кӧсйысьны радейтны ӧта-мӧднымӧс кувтӧдз.
СЕНЯ. Ме дась кӧсйысьны. Но кыдзи тайӧс колӧ висьтавны?
ТАНЯ Кӧсъян — велӧда?
СЕНЯ. Велӧд.
ТАНЯ. Вот, шуам, тадзи: менам сьӧлӧм косьтысь, Татьяна Николаевна! Сійӧ кадсянь, кор ме первойысь на аддзи тіянӧс аслам синъясӧн, эскӧй мем, помасис менам тӧждысьтӧм олӧм! Но и сідз водзӧ. А бӧрынас — клятва: тэ и ме кӧсйысям радейтны сӧмын ӧта-мӧдӧс — пӧрысьмытӧдз, кувтӧдз. Нолтӧсь заводитлы сувт пидзӧсъяс вылад.
СЕНЯ (пидзикокасьӧ). Вот, шуам, тадзи...
ТАНЯ (серӧктӧ). Тешкодь тэ.
Петкӧдчӧ Иван, сувтовкерӧ.
ИВАН (аслыс). Тайӧ нӧ Сеняыс мый сэні кикимеритчӧ?
СЕНЯ. Менам сьӧлӧм косьтысь, Татьяна Николаевна! (Друг аддзӧ Иванӧс, копыртчӧ мулань, быттьӧ мыйкӧ корсьӧ.)
ИВАН (матыстчӧ). Мый нӧ вошис?
СЕНЯ. Дӧрӧм кизь...
ИВАН. А ме чайті — немторыд вошӧма.
Сеня гусьӧн грӧзитӧ Иванлы.
Занавес
МӦД КАРТИНА
Черӧн сӧтлытӧм гырысь вӧр. На пӧвстын торъялӧ куим сывтыръя пожӧм. Жар лун. Лӧддзӧсь. Кынев Васька да Иван эштӧдӧны гыркса столб сувтӧдӧм. Найӧ шабураӧсь, номдӧрааӧсь. Сэн жӧ Ёкышов.
ЁКЫШОВ. Струбасӧ важмӧдыштны колӧ. Свежӧй чагъяссӧ идравны.
ВАСЬКА. Позьӧ и тайӧс вӧчны... Нолтӧсь, Иван, мунас зыркнитам да нитшнас чышкыштам. (Уджалӧны.)
ЁКЬІШОВ (видзӧдлӧ часі вылӧ). Тэрмасьӧй, регыд воасны. (Ки вывсьыс виӧ лӧддзӧс.) Ак, пеж ловъяс... Пӧттӧм горшъяс...
ВАСЬКА. Тэ нӧ, Тимофей Савич, лӧдзьяссӧ сэтшӧма ыждӧдлан?
ЁКЫШОВ. Мутиясыс найӧс сы мында лэдзӧмаӧсь талун. Воробей гырсяӧсь.
ВАСЬКА. Сійӧтӧ мед нин эськӧ, да ӧд и найӧ со мортыдлысь вирсӧ юӧны.
ИВАН. Мортыдлӧн вирыд, тыдалӧ, мед на чӧскыд.
ЁКЫШОВ. Тэ, Иван, котӧрт Сенялы паныд. Сибдіс кытчӧкӧ. Висьтав, шу видӧны, ставыс тэ сайын.
Иван мунӧ.
ВАСЬКА (помалӧ сьӧдӧдны столбсӧ). Олас, буди. Али нӧ ещӧ сьӧдджыка?
ЁКЫШОВ. Олас. Вай пуксям, шойччыштам, сэтчӧ жӧ сёрни эм зэв ыджыд. Важӧн нин кӧсъя тӧлкуйтны тэкӧд, да стрӧкаыс некыдз оз сюр вӧлі.
ВАСЬКА. Ыркнитчыштны татшӧм жар лунӧ оз мешайт. (Пуксьӧны.)
ЁКЫШОВ. Тэ ӧд меным рӧдняпом лоан.
ВАСЬКА. Вӧвлі, нинӧм шуны.
ЁКЫШОВ. Ме кӧсъя ыджыд бур тэд вӧчны. И не сӧмын тэныд, — пияныдлы, внукъясыдлы. Тэ кӧсъян озырмыны?
ВАСЬКА (чуймӧ). Хм! Тешкодь тэнад юалӧмыд! Коді нӧ озырмыны оз кӧсйы. Нэм чӧж сы вӧсна мырсям. Чеччам и водам — сы йылысь думайтам.
ЁКЫШОВ. Прӧста мырсьӧмыд гӧрб сӧмын чужтӧ. Пур вывсьыд ватӧ кӧть век кой. Колӧ мӧд ног озырмӧдчыны. А мукӧддырйи и мудеритыштны абу лишнӧй. Сы вылын муыс сулалӧ: коді кодӧс вермас... Миян асланым компанье котыртсьӧ, да ӧти морт оз тырмы.
ВАСЬКА. Хм... Гашкӧ, и бур делӧ.
ЁКЫШОВ. И тэнӧ шуим примитны шленӧ. Миянлы колӧ не сӧмын сьӧм, но и устав серти колана морт лыд.
ВАСЬКА. Тешкодь тай. А кодъяс нӧ кампаньеас лоӧны?
ЁКЫШОВ. Тэ, ме, Чижов...
ВАСЬКА. Чи-жов?
ЁКЫШОВ. Да. Сытӧг миян первойтӧ нинӧм оз артмы. Морт сійӧ столичнӧй, дошлӧй, сунис кузя ю вомӧн вуджӧдас. А бӧрыннас аддзам. Мӧдам кыйӧдны сэтшӧм кад, кор ваыс ёнджыка гудыртчас, Чижовыд ӧд миянлы абу на рӧдня.
ВАСЬКА (гыжъялӧ балябӧжсӧ). Ог на тӧд, сідзкӧ. Час, думыштлам. Тайӧ делӧ ас юрнад ворсӧм кодь.
Ӧдйӧ локтӧны Сеня да Иван. Вайӧны нефтьӧн тыр ведраяс. Тӧдчӧ тэрмасьӧмаӧсь.
ЁКЫШОВ. Нюжмасян, Сеня. Медся сюсь морт пыдди ыстывлі, а муртса эн торк.
СЕНЯ (лолыс тырӧ). Ачым тӧда. Не кадӧ веськалі. Вои нефть петанінад, а найӧ буретш сэнӧсь — Чижов и тайӧ кык господиныс. Дзонь здук сулалі. Найӧ мунӧм бӧрын нин ведраясӧс тырті. Кык верст гашкӧ тайӧ ордым туй боктіыс котӧрті тайӧн. Уф! Матынӧсь нин.
ВАСЬКА (босьтӧ ведра). Кисьтны?
ЁКЫШОВ. Позьӧ. Мӧдсӧ и. А тэд, Иван, позьӧ гортӧ мунны. Тэ узьтӧм, мудзин. Сӧмын — кыв ни джын, гӧгӧрвоан? Некодлы кыв ни джын.
ИВАН. Кыдзи артмӧдчывлім.
ЁКЫШОВ. Давай, мун, мун. Ковман кӧ мӧдысь — тэысь кындзи некодӧс.
Иван мунӧ.
СЕНЯ. А меным мый керны?
ЁКЫШОВ. Кольччы.
ВАСЬКА. Мед мунӧ жӧ. Эстӧн матын пу тшуп менам эм. Сеня, чӧвт гымга, босьт кузьджык зіб, вылысяньыс комъяссӧ вӧтлы. Пумӧныд сюрас. Сэсся волан, висьталан.
СЕНЯ. Ладнӧ, батьӧ, ветла. (Мунӧ.)
ЁКЫШОВ. Эз ков ыстыны. Мед велӧдчис бур йӧз дінас. Компаньонӧн ӧд лоӧ.
ВАСЬКА. Мый тэ, мый тэ, Тимофей Савич. Кытчӧдз ачым ловъя, ог жӧ велӧд ассьым рӧднӧй пиӧс жульничайтны. Сійӧс ӧд ӧні кутшӧм паньысь паньыштӧдан, сэтшӧмӧн и нэмсӧ мӧдас панясьны. Мый тэ, зон, бур мортӧ.
ЁКЫШОВ. А ачыд?
ВАСЬКА. Ме дубъяссьӧма нин. Мӧд пӧлӧс сир ме пытшкӧ ӧдвакӧ йиджас. Пӧрысь пуыд регыдджык чегас кусыньтчӧм дорсьыд. Ас сӧвестьӧн ола.
ЁКЫШОВ. Сідз, сідз, Василий Петрович... Честнӧйӧн кӧсъян лоны?
ВАСЬКА. Ог тӧд. Думыштла, мися. (Аддзӧ воысьясӧс). Воӧны. Мый колӧ вӧчны?
ЁКЫШОВ. Ставсӧ, мый тшӧктасны. А миян делӧяс йылысь быттьӧ нинӧм он тӧд. Пемӧс моз — кыв ни джын.
Петкӧдчӧны Чижов, Краузе, Гавриков. Краузе накомарника да плащ-палаткаа. Гавриковлӧн шапка улас носӧвӧй чышъян, сійӧ дугдывтӧг мездысьӧ.
ЧИЖОВ. Вот и медбӧръя буровӧй скважина дінӧдз воим, ваше превосходительство. (Гусьӧн.) Сӧмын неприятностьяс вермасны лоны: местаыс спорнӧй. Вензям уважаемӧй Ёкышовкӧд. Ачыс, со, локтӧма.
КРАУЗЕ. Оз сулав сёрниыс. Артмӧдчам.
ЧИЖОВ (гораа.) Кора тӧдмасьны став уезд кодьын почётнӧй гражданин да богач Ёкышов Тимофей Савич, кодлӧн прелестнӧй нылыс, Матрена Тимофеевна, вӧлі шуда аддзысьны тіянкӧд миян берегӧ петӧм мысти первойя воськовъясад!
КРАУЗЕ. Имеита честь тӧдмасьны!.. Министерствоса чиновник Крузе.
ЁКЫШОВ. Милости просим, господин Краузе!
ЧИЖОВ (матыстчӧ столб дінӧ). Скважиналӧн режим оз торъяв мукӧд скважинаясӧн дорысь. Нефть воӧ ачыс. Сӧмын черпайт. (Струбаӧ сюйлӧ бедь.) Верманныд видзӧдлыны, ваше превосходительство.
КРАУЗЕ (Оз матыстчы). Мем ставыс гӧгӧрвоана. Тані збыльысь сы мында озырлун, мый юрӧй менам бергӧдчыны мӧдіс.
ГАВРИКОВ (угодливӧя). Ті, ваше превосходительство, талун сэтшӧма волнуйтчанныд, луныс сэтшӧм жар да лӧддзӧсь, мый абу дивӧ юр висьмӧмлы. (Перйӧ лекарствоӧн склянка.) Тіянлы колӧ юыштны юр веськӧдан капляяс.
КРАУЗЕ. Оз ков, менам дона друг. Тайӧ висьӧмла, мыйӧн, тыдалӧ, ме висьми, лекарствоыс вӧчтӧм. (Вочасӧн пырӧ сёрни, азартӧ.) Сыысь ме веськала сӧмын сэк, кор тайӧ му пытшкысь нефтьыс мӧдас визувтны дзонь юясӧн став мир пасьтаыс, кор ачыс муыс лоас ставнас лэдзӧма морт чепӧль пыр да бӧрйӧма сэтысь став минеральнӧй богатствосӧ, кор тайӧ сузьӧма вӧрыс пӧртсяс чеканитӧм зарни гӧраясӧ. Менам сьӧлӧм бурмас сӧмын сэки, кор татчӧс пӧткаыс и чериыс, кодъясӧс лоӧ кыйӧма аслам собственнӧй му вылысь, мӧдасны руасьны менам пызан вылын, кор ме, государственнӧй удж вылысь мездысьӧм бӧрын, верма пӧртны олӧмӧ ассьым медся ыджыд кӧсйӧмӧс — кыйсьыны тигръяс вылӧ
ГАВРИКОВ. Хм... Прӧститӧй, ваше превосходительство... Тигръяс тані, кажитчӧ, оз овны.
ЧИЖОВ. Корсьӧмӧн татысь ставсӧ позьӧ аддзыны. Руд ошъяс, например, сюрлӧны куим сажень кузьтаӧсь.
КРАУЗЕ. Дзик вернӧ, Прокоп Прокопыч! Позьӧ и ошъяс вылӧ кыйсьыны. Тайӧ ставыс водзӧ лоанторъяс. А ӧні колӧ помавны делӧсӧ.
ГАВРИКОВ (видзӧдлӧ кыз пожӧм вылӧ). О-о! Тайӧ пожӧмыс, тыдалӧ, му пуксьӧм дырсяыс нин. Дерт жӧ тайӧ пожӧмас лоас пасйыны участоклысь номерсӧ.
ЁКЫШОВ (Гавриковлы). Сулавлӧй, сулавлӧй!.. Ме мыйкӧ ог гӧгӧрво. Господин Чижов! Тайӧ нӧ ті кыдз мый?.. Участокыс ӧд менам. А мем кажитчӧ, ті вузаланныд менсьым участокӧс.
КРАУЗЕ (Ёкышовлы). Та йылысь миян сёрни вӧлі нин.
ЧИЖОВ. Пыдди кӧ пуктыны собственностьлысь неприкосновенность, ваше превосходительство, то уважайтана Тимофей Савичлӧн эм право шыӧдчыны... Но сӧмын участокыс кузя, код вылӧ ӧшибкаӧн менам лои буритӧма скважина
КРАУЗЕ. Дона-ӧ сулалӧ участокыс?
ЁКЫШОВ. Сюрс шайттӧг ог сет.
КРАУЗЕ. Донъясьны ог куж. Сюрс шайт ті пӧлучитанныд рытнас жӧ. Бур?
ЁКЫШОВ. Но, ладнӧ... (Аслыс). Окма... Этша ӧд кори, ӧшибитчи.
ЧИЖОВ. Вопрос лоис ладмӧдӧма. Колис сӧмын, кыдз шулӧны, мыськыны сделканымӧс.
КРАУЗЕ. А таысь войдӧр кыськӧ колӧ ва аддзыны.
ЧИЖОВ. Ва? Шогсьыны оз сулав. Сё воськов сайын дзонь ю визувтӧ. (Васькалы.) Эй, тэ... вала лэччыв.
КРАУЗЕ. Нуӧдӧй ачымӧс.
ЁКЫШОВ. Тайӧ бурджык. Миян эн чайник, чай-сакар, и мукӧдтор.
КРАУЗЕ. Тӧлка. Мӧдӧдчамӧй (Ёкышов да Краузе мунӧны.)
ЧИЖОВ (Васькалы). Эй, мужик, бергӧдчыв. Пӧрччы номдӧратӧ. (Васька первойсӧ оз гӧгӧрво — сэтшӧм дивӧ кодьӧн ставыс тайӧ кажитчӧ.) Он ӧмӧй аддзы; дона Пётр Гавриловичӧс ӧвадыс куштӧ. Кутшӧм тэ некультурнӧй!
ГАВРИКОВ (ачыс босьтӧ Васька юрысь номдӧра). Да, да... Меным некутшӧм олӧм абу. Ме регыд весьӧпӧра тайӧ ӧвад вӧсна. (Дыр оз сяммы номдӧраасьны.) А ӧні та пытшкӧ воши... Дай ӧвтӧ тась сэтшӧм мужицкӧй пӧсь дукӧн, мый лолавны оз позь.
ЧИЖОВ (Васькалы). Отсав... Эстшӧм тэ необразованнӧй. (Васька отсалӧ. Гавриков несйылӧ.) Ло здоровӧн, Пётр Гаврилович!..
ГАВРИКОВ. Аттьӧ! Ӧні, кажитчӧ, ставыс пӧрадокын. Позяс тувъявны участоклысь номерсӧ. Медбӧръяыслӧн миян вӧлі дасӧд номер. Тайӧ дас ӧтикӧд. Сідзкӧ, тэкӧд артмӧдчӧм серти, ми тайӧ участоксӧ пасъям менам ним вылӧ нин.
ЧИЖОВ. Артмӧ сідз. Но ме шензя, прӧститӧй веськыда шуӧмысь, тіян нечестность вылӧ... Дерт, мем ӧткодь, кӧть тэныд, кӧть сылы сюрас тайӧ участокыс, а век жӧ ылӧдлыны татшӧм чина мортӧс — оз-ӧ ло босьтӧма вывті ыджыд кывкутӧм ас вылад? (Васькалы.) Мый ещӧ тэд колӧ? Мун, весась тась. (Васька мунӧ.)
ГАВРИКОВ. Ме тӧда, мый кера и кодлы служита. Первой-кӧ, мем тӧдса ваше превосходительстволӧн гырысьджык мыжъяс, да та вӧсна сійӧ ӧдвакӧ мӧдас споруйтны мекӧд восьсӧн. А мӧд-кӧ, мӧдысь татчӧ сійӧ оз и думышт волыны. Гашкӧ нӧ, дас во бӧрын, кор тані вӧрыс нин оз ло. (Тувъялӧ жӧч пластинка) Значит, «Участок № 1 Гавриков и К°».
ЧИЖОВ (шензьӧмӧн). «Гавриков и К°»? Со-о-о мый вӧлӧма! «Гавриков и К°». Мудера, мудера, Пётр Гаврилович. Компанье нимсянь, сідзкӧ, мастрачитанныд. А ме чайті — ті сӧмын покорнӧй слуга его провосходительстволӧн!..
ГАВРИКОВ. Бурджык лоӧ, ог кӧ мӧдӧ петкӧдлыны ӧти-мӧднымӧс мыжтӧм кагаясӧн (Чижовлы сетӧ сьӧм пачка). Тайӧс первойя тӧдмасьӧм могысь. А участокъяссьыд, кодъясӧс мӧдлун ме босьта тіянлысь, сёрни лоас мӧд.
ЧИЖОВ (быттьӧ босьтӧ и оз). Веськыда кӧ шуны, ті мырдӧналанныд менсьым чистӧй совестьӧс. Велавтӧм мем татшӧмторъястӧ вӧчны. Но да, гашкӧ, водзӧ лоана делӧвӧй дружба ради-а. (Босьтӧ сьӧм).
ГАВРИКОВ. Дерт жӧ, дерт жӧ.
ЧИЖОВ. Колӧ мӧдӧдчыны, а то воасны ещӧ.
Петкӧдчӧ Сеня. Киас кутӧ шабурӧ тэчӧм чери. Номдӧра сертиыс Гавриковӧс чайтӧ батьнас.
СЕНЯ. Шабур тыр сюрис чериыд, батьӧ. Ставыс пес кодь ком... (Джӧмдӧ) Но... А кӧні нӧ батьӧыс? (Друг сійӧ заводитӧ гораа серавны Гавриков вылӧ.)
ЧИЖОВ. Тэ мый?
СЕНЯ (серам пырыс). Номдӧраа господин. Ха-ха-ха! (Сералӧмӧн мунӧ юлань.) Номдӧраа господин! Ха-ха-ха!
ГАВРИКОВ. Тайӧ ме вылӧ?.. Хм... Хулиганство. Кутшӧмкӧ аслыссикас том йӧз тані тіян. Тӧрыт сералісны, талун сералӧны.
ЧИЖОВ. Помкаыс дзик ӧти, Пётр Гаврилович: политвысланнӧйлӧн влияние.
ГАВРИКОВ. Код йылысь тӧрыт сёрниыс вӧлі?
ЧИЖОВ. Да. Тайӧ делӧ Ивановлӧн.
ГАВРИКОВ (возмущайтчӧ). Ме тшӧкта его превосходительстволы аски жӧ, талун жӧ, дзик пыр ыстыны тайӧ Ивановсӧ нӧшта ылӧ, йиа саридз дорӧ, еджыд ошъяс дінӧ!.. (Скӧралӧ.) Ме... ме сійӧс... тюленьяс дінӧ!..
Занавес.
ІІ ДЕЙСТВИЕ
Коймӧд картина
Сценаыс первойя картиналӧн. Кадыс сёр ар. Занавес воссьытӧдз кылӧ демонстрациялӧн мунӧм, юргӧ сьылӧм: «Гажаджык, коми йӧз, олӧй». Сэсся воссьӧ занавес. Йӧз разӧдчӧны гортъясас. Сцена вылын кольӧны Сеня да Таня.
СЕНЯ. А помнитан, Таня, кыдзи тэ татчӧ воӧм бӧрад, кор батьыд эз нин вӧв тані, зільлін висьтавны меным революция йылысь?
ТАНЯ. Помнита, Сеня. Сӧмын сэки ме ачым на омӧля гӧгӧрволі, мый сэтшӧм революцияыс. И со сійӧ воис — рабочӧйяслӧн да крестьяналӧн социалистическӧй революция!
Кутчысьӧны ӧта-мӧдыслы киясас.
СЕНЯ (жальпырысь). Но, збыль ӧмӧй ми тэкӧд торъялам?..
ТАНЯ. Эн шу тадзи. Сьӧлӧмӧй потӧ ӧти думсьыс. И мыйла тэ сюрлін менам сьӧкыд туй вылын? Мыйла кодкӧ мӧд эз радейтчы тэ вылӧ ме пыдди? Ой, Сеня, Сеня!..
СЕНЯ. Сідзкӧ, туйӧ мӧдӧдчӧм йылысь ассьыд кыв тэ он веж?
ТАНЯ. Тайӧс тэ юалан витӧдысь нин. Но ачыд думышт. Батьӧс корсьтӧг, сійӧс аддзытӧг меным оз позь.
СЕНЯ. Да, Таня. Тэ прав. Батьтӧ аддзытӧг тэнад сьӧлӧмӧн не овны тыр шудӧн, кӧть и ме дінын лоан. А ме кӧсъя, мед тэ лоин медся шуда мортӧн.
ТАНЯ. Кор тэ тадзи сёрнитан... тӧждысян ме вӧсна, сэки мем овлӧ... медся сьӧкыд... (Топӧдчӧ Сеня морӧс бердӧ.)
СЕНЯ. Но ӧд ми ог пыр кежлӧ торйӧдчӧй. Тэ аддзан батьтӧ. А тулыснас, гожӧмнас — татчӧ. Туй сэки восьса миянӧ воны. Сідз ӧд? (Таня видзӧдӧ Сеня вылӧ.) Тэ пыр кежлӧ воан ме дінӧ. Тэ нинӧм он шыав?
ТАНЯ. Ме пола... тэнӧ воштӧмысь.
Петкӧдчӧ Иван. Сійӧ туй паськӧма, тэрмасьӧ.
ИВАН. Но вот.. Этійӧ, мый нин... Ме тадзи и чайті, мися, ті нинӧм на он тӧдӧй.
СЕНЯ. А мый?
ИВАН. Кывтӧны. Вот мый. Ме тшӧтш кылӧда.
ТАНЯ. Талун?
ИВАН. Дзик пыр, ӧні жӧ. Чижовлы висьталӧмаӧсь, тайӧ вежонын пӧ йи кутас, и сійӧ, этійӧ, мый нин, быттьӧ весьӧпӧрӧм морт... Аддзанныд, туйӧ петӧм вылӧ нин пасьтаси.
СЕНЯ (Танялы). Кольччы.
ТАНЯ. Ог. Менам ставыс дась.
СЕНЯ. Сідзкӧ, тэрмасьны колӧ. Ме отсала. Мӧдӧдчам. (Ӧдйӧ саялӧны.)
ИВАН. (гыжъялӧ балябӧжсӧ аслыс). Хм-да... Нинӧм он вӧч, Семенушко. Торйӧдчыны кад воис.
Тэрмасьӧмӧн локтӧ Анна.
АННА. Таняӧс эн аддзыв?
ИВАН. Мый нӧ эськӧ?
АННА. Кыдзи мый? Пыжӧн кывтӧны. Гашкӧ, медбӧръяысь нин таво. Таняыс кольны вермас.
ИВАН. Ёна и тӧждысян, дзирыдпоз. Думайтан, Сеняыд сэсся тэнӧ... этійӧ, мый нин?..
АННА. Не тэнад чардакӧн вежӧртӧны. Этша на удлін-вердлін велӧднысӧ. (Мунӧ.)
ИВАН. Катша бӧж! Ме бӧрся небось оз вӧтлысь.
Сиктсянь локтӧ Васька. Паныдасьӧ Иванкӧд.
ВАСЬКА. Бур нажӧтка пӧ тіянлы сюрӧма?
ИВАН. Мый сэсся бурыс, Васька дядь...
ВАСЬКА. Унджык коліс кульыштны жуликлысь.
ИВАН. Сідзсӧ ми эськӧ пӧвсыштім жӧ да. Этійӧ, мый нин, лышкыд лоӧма Чижовыд.
ВАСЬКА Талун и мӧдӧдчанныд?
ИВАН. Тэрмасьӧ тай, инас оз ӧшйы.
ВАСЬКА. Тӧлыс, тыдалӧ, не сы серти пӧльтны мӧдіс. Чижовӧс он ылӧд, нырисыс сылӧн бур.
Петкӧдчӧны Чижов, Ёкышов да Матрен. Ставыслӧн киясас чемоданъяс да кӧлуй. Тӧдчӧ: Ёкышов ая-ныла колльӧдӧны Чижовӧс.
ЁКЫШОВ (Иванлы). Тэ мый? Он тӧд — багаж колӧ нуны?
ИВАН. Этійӧ, мый нин... Ті мӧдӧдчинныд нин? А кыдзи нӧ ме? Меным гортӧ на колӧ ветлыны. (Мунӧ)
МАТРЕН. Тыдалӧ, виччысьыштны ковмас. Прокоп Прокопыч!
ЧИЖОВ. О-о! Ме радпырысь!.. Сӧмын мед тіянкӧд а, ӧтув. (Пуктасьӧ).
ЁКЫШОВ (Васькалы). Демонстрация вывсянь?
ВАСЬКА. Да. Сэсянь.
ЁКЫШОВ. Сідз, сідз... Сытӧг оз позь.
ЧИЖОВ (босьтӧ Матренӧс сойӧдыс, мӧдӧдчӧны юлань). Мем тӧд вылӧ усис тэкӧд первойя аддзысьӧм. Эскӧй, Матрена Тимофеевна... (Саялӧны.)
ЁКЫШОВ (Чижовлань). А эсійӧ другыс муссӧ мед ассьыс нёнялас. Таӧдз кӧ эг сет сы сайӧ ассьым нылӧс, ӧні ог нин. Кадыс не сэтшӧм пуксьӧ.
ВАСЬКА. Стӧч шуан, Тимофей Савич, кадыд збыльысь вежсьӧ.
ЁКЬІШОВ (вочасӧн варовмӧ). Бесъясыс мед нэм кежлӧ нуасны став тайӧ Чижовъяссӧ, Краузеяссӧ. Натӧг асьным кужам овнытӧ. Мый ковмас вӧчны, асьным вӧчам.
ВАСЬКА. А мем эськӧ окота тӧдны: кодъяс «асьныдыс» лоад?
ЁКЫШОВ. Коми йӧз, Василий Петрович, коми йӧз. И тэ, и ме, и ставыс.
ВАСЬКА. Ог тӧд, сідзкӧ, ог тӧд. Ме кывлі да, тэ вылӧ быттьӧ шуасьӧны жӧ.
ЁКЫШОВ. Шуасьысьяссӧ ми со кыдзи. (Петкӧдлӧ кык гыж костын той виӧм.). Тані абу Питер либӧ Мӧскуа. Тані миян асланым царствоыс. (Нимкодьысь.) Вӧлисти воис сійӧ дона кадыс, кор олӧмыс гудыртчис тырвыйӧ, кор сэсся позяс лоны прамӧй кӧзяинӧн ас му вылын.
ВАСЬКА. Ог тӧд, мися, ог тӧд... Шуӧны, татшӧмторъяс йывсьыд индӧдъястӧ Ленин сеталӧ. Свободаыс пӧ миянлы, уджалысь йӧзлы, воӧма. А тэ, кыдзи ме гӧгӧрвоа, асланьыд синан. Ме тадзи абу сӧглас.
ЁКЫШОВ. Хм... Думайтан, юасьны мӧдасны тэнсьыд? Мужик тэ, мужик!
ВАСЬКА. И юасьны и эскыны ковмас!
ЁКЫШОВ. Тэ мый шуин?
ВАСЬКА. Мися, ог эскӧ ми тэныд. И ог кӧсйӧ сетны ассьыным шудлун ни озырлун тэнад киясӧ. Веськыда кӧ шуны, Тимофей Савич, тэ вир юысь жӧ. Тэ жуликсьыс жулик. Тэ вылӧ кӧ надейтчыны, ог и тӧдлӧй, кутшӧмкӧ заграничнӧй фирмалы ставнымӧс вузалан. Став эмбурнымӧс лотайтан. Ми кыдзкӧ тівоктӧг нин овмӧдчам, Ленин индӧдъяс серти.
ЁКЫШОВ. Кывтӧ орӧда!.. Аслам киӧн джагӧда! Ловтӧ босьта!
ВАСЬКА. Эн вӧрзьӧд, мися. Выныд менам унджык тэ дорысь. Дай скӧрлунӧй тэ вылӧ уна додь тыр чӧжсьӧма!
Воӧны Таняӧс колльӧдысьяс — Сеня, Иван, Анна да мукӧд ныв-зон. Ёкышов лэдзчысьӧ Васька дінысь. Бӧрынджык локтӧны Чижов да Матрен.
ЁКЫШОВ. Война, сідзкӧ, пансьӧ миян костын?..
ВАСЬКА. Да, миритчыны позьтӧм.
ЁКЫШОВ. Видзӧдлам, коді кодӧс!
ВАСЬКА. Видзӧдлам!..
ЧИЖОВ. Мыйла война? Колӧ бурӧн артмӧдчыны. Ми ставӧн ас йӧз. Дай миянлы со мунны колӧ... Сідз ӧд, Татьяна Николаевна?
ТАНЯ. Мунны колӧ. А бурӧн артмӧдчыны тіянкӧд оз позь.
ЧИЖОВ. Ог вензьы, ог вензьы. Ме дась став вылас. Ме весиг верма тэ пыдди мынтысьны пыжнас кылӧдӧмысь.
ВАСЬКА. Тэнад, господин Чижов, мед сэсся и дукыд тані эз вӧв.
ЧИЖОВ. Нинӧм ог шу, нинӧм. Ме дась дзик пыр мӧдӧдчыны.
ИВАН. Мед бӧжыд оз сибды татчӧ. (Серӧктӧны.) А мый? Абу ӧмӧй сідз?
СЕНЯ. Нолтӧсь, зонъяс, мӧдӧдчамӧй.
ИВАН. Давай, давай, нывъяс, зонъяс, мӧдӧдчамӧй.
Йӧз лэччалӧны вочасӧн. Керкаысь петӧ Марья.
ТАНЯ (матыстчӧ Марья дінӧ). Прӧщай, Марья тьӧтка... Гашкӧ сэсся ог и аддзысьлӧй да.
МАРЬЯ. Кыдзи прӧщай?.. Да тэ ӧмӧй мунан жӧ?
ВАСЬКА. Коді? Таняыс?
ТАНЯ (киасьӧ). Прӧщай и тэ, Васька дядь.
ВАСЬКА Энлы, энлы... (Гӧтырыслы.) Кыдзи нӧ мый тайӧ ті нинӧм эн висьталӧй меным? Аттӧ дивӧ.
МАРЬЯ (меліа). Сэтшӧм немвиччысьтӧг. Да, час кӧть ме тэныд гӧснеч пуктышта — пӧтка яйтор. Мый нин тайӧ. Видзӧдлӧй жӧ. (Пырӧ керкаас.)
ВАСЬКА (Танялы). Эг кывлӧ. Эн дивит. Ми эськӧ мӧд ног колльӧдім, бурджыка. А талун аддзылін, кыдзи колльӧдчам. Батьыдлы кӧть эн висьтав тайӧс.
ТАНЯ (серӧктӧ). А ме буретш тайӧс и висьтала сылы первойӧн, мися, тэнад муса другыд, Кынев Василий Петровичыд, Ёкышовъяслы война объявитіс — немжалиттӧмӧс, миритчытӧмӧс.
ВАСЬКА. Висьтав, Танечка, сідзкӧ, збыльысь висьтав.
ТАНЯ (мӧдӧдчӧ). Лёкӧн эн казьтылӧй.
ВАСЬКА (лэччӧ жӧ). Пыж дінӧдзыс кӧть колльӧда. Сэсся гашкӧ ог и аддзысьлӧ да. (Саялӧны.)
Сцена вылӧ кольӧны Ёкышов да Чижов. Найӧ видзӧдлӧны ӧти-мӧдлаӧ, оз-ӧ кодкӧ кывзы.
ЁКЫШОВ. Труст тэ, Прокоп Прокопыч.
ЧИЖОВ. Но ӧд ачыд аддзан... Ме сӧмын кажитча сэтшӧмӧн.
ЁКЫШОВ. Мунан паськыдінас — висьтав: Ёкышовлы отсӧг колӧ. Ёкышовӧс ӧтнассӧ вермасны венны.
ЧИЖОВ. Ме тэнӧ гӧгӧрвоа.
ЁКЫШОВ (окалӧ Чижовӧс). Надейтчӧй ме вылӧ. Прӧщай!
Чижов мунӧ. Котӧрӧн петӧ Марья, киас тубрас, аддзӧ мышнас сулалысь Ёкышовӧс.
МАРЬЯ. Эз на мунны? (Ёкышов дрӧгнитӧ, бергӧдчӧ) Тьфу! Тайӧ пеж лолыс сэні вӧлӧма. (Саялӧ.)
Ёкышов здук мында видзӧдӧ юлань. Сэсся бергӧдчӧ. Скӧрысла тіралӧ. Чужӧмыс векыштчӧма.
Занавес.
НЁЛЬӦД КАРТИНА
Сцена первойя картиналӧн. Но кольӧма вель дыр кад нин. Жытник местаын кык судта керка, ӧшалӧ вывеска: «Ёльдорса сиктсӧвет». Сиктсӧветысь петӧ Иван — сиктсӧветса секретарь.
ИВАН (видзӧдлӧ Кынев керка вылӧ). Марья тьӧтка! Эй! Марья тьӧтка!
Воссьӧ ӧшинь. Ӧшиньӧд юрсӧ мыччӧ Анна.
АННА. Тайӧ тэ, Иван, сэтшӧмасӧ горзан?.. Мамӧыс абу гортын. Корӧсьла муніс.
ИВАН. Мамыд мем оз и ков. Понимаешь ли, Василий Петровичыд мем колӧ.
АННА. Ме тай гортӧ вои да эз нин вӧв-а. Ог тӧд, кытчӧ муніс.
ИВАН. Сійӧ эськӧ мунліс Чойберд грездӧ аслас делӧясӧн.
АННА. А мый?
ИРАН. Кутшӧмкӧ Иванов звӧнитліс луннас. Василий Петровичтӧ юасис. Рытладорыс пӧ мед гӧсьтӧс виччысяс.
АННА. Воас да видзӧдлам. Дерт, кӧнкӧ, районысь кодкӧ.
ИВАН. А сідзи ӧд и эм, Анна... Тэ важъя бабыд кодь жӧ век тӧлка.
АННА. Час ме тэныд выль фотокарточка Сенялысь петкӧдла. (Здук кежлӧ саялӧ.) Тӧрыт пӧлучиті. (Сетӧ Иванлы) Сӧмын вот таво оз кӧсйы воны каникул вылас. Практикуйтчыны пӧ муна.
ИВАН (мӧвпалӧмӧн). Да-а, Анна... Йӧзыс велӧдчӧны. А ме... веськыда лыа вылӧ пукси дай косьми сэтчӧ. Шуӧны: велӧдчыштін пӧ и тырмас, секретарит пӧ сиктсӧветын, дежурит став ассьыд нэмтӧ писарскӧй должность вылын. А ме, гашкӧ, ыджыдджыктор кӧсъя. Гашкӧ, учёнӧй мортӧдз воштысьны верма? Позянлунъясыд ӧні миян эмӧсь, понимаешь ли.
АННА. Дугды тэ, Иван, ассьыд юртӧ жуглыны. Велӧдчытӧгыд ёнджыка узьсяс. Ме тай вот удж бӧрад сёйышта да мыйӧн вода, быттьӧ изъяла. (Серӧктӧ) Ме ӧд регыд инженер гӧтырӧн лоа. А сэктӧ, ачыд думышт, мыйла ме мӧда мырсьыны ӧнія моз?
ИВАН (кузя шутьӧктӧ). Со-о тэ кытчӧ лыян? Баруняӧ?
Сиктладорсянь локтӧ Кынев Васька. Ки вылас пинджак.
ИРАН. Василий Петрович, кодкӧ звӧнитліс луннас, Ивановӧн шусис, тэнӧ юасис...
ВАСЬКА. Нӧшта мый выльыс?
Тайӧ кадӧ юланьсянь локтӧны Иванов да Таня.
ИВАН (аддзӧ локтысьясӧс). Видзӧдлы.
ВАСЬКА (чуймӧ). Энлы... Да ӧд тайӧ Николай Антонович Иванов!
ИВАН. Дай Таня!
ИВАНОВ (матыстчӧны). Эг на кӧ дзикӧдз вунӧдчы, Василий Петровичӧс аддза!
ВАСЬКА. Кымын во! Мыйта ва визувтіс! Олан-вылан, Николай Антонович! (Киасьӧны) Олан-вылан, Татьяна Николаевна!
ИВАН (киасьӧ Ивановкӧд). Печиков Иван Ильич — сиктсӧветса секретарь!
ТАНЯ (Васькалы). А ме тіянӧс первойсӧ эг и тӧд. Сэтшӧма вежсьӧмныд. (Киасьӧ Иванкӧд) Чолӧм, Иван!..
ИВАН. Иван Ильич — сиктсӧветса секретарь.
ТАНЯ. Пӧсь чолӧм, Иван Ильич!
ВАСЬКА (Ивановлы). Эг виччысь, эг виччысь... Шуӧны, кутшӧмкӧ Иванов пӧ звӧнитӧма. А ме и думыштны ог сяммы. Ӧд пӧраыс мыйдта колис! Олӧмыс кыдзи вежсис!
ИВАНОВ. Кывлі, кывлі, кыдзи тэ тані Ёкышовъяскӧд воюйтӧмыд.
ВАСЬКА. Эн сёрнит. Прамӧя лоис тышкасьны. Мудер вӧлӧма виръюысьыд. Став кулакъяссӧ ас бердас котыртіс, интервентъяскӧд ӧтувтчис. Но, думайтам, колӧ и миянлы, уджалысь йӧзлы, тшӧтш котыртчыны. Медся ыджыд спасибӧыс Ленинлы: ён отсӧг ыстіс.
ИВАНОВ. И вермид?
ВАСЬКА. Ставсӧ! Ӧтитӧг!
ИВАНОВ. Хм... Ӧтитӧг, шуан... М-да... (Друг вежӧ сёрнисӧ) А ми тэ дінӧдз, Василий Петрович, зэв ыджыд могӧн локтім.
ИВАНОВ. Миянлы йӧз колӧ!
ВАСЬКА. Йӧз?
ИВАНОВ (сетӧ документ). Верманныд тӧдмасьны.
ВАСЬКА (лыддьӧм бӧрын). Сідз, сідз... Экспедицияӧн, сідзкӧ, локтанныд миянӧ. Бур делӧ. А мыйла йӧзыс ковмисны?
ИВАНОВ. Видзӧдтӧ: сьӧрысь катӧдам оборудование. Но и сувтім ӧти косьтӧ. Ваыс ляпкыд. А шнягаяс, пыжъяс миян грузитӧма сьӧкыд кӧрта кӧлуйӧн.
ВАСЬКА. Гӧгӧрвоана. Пыравлам. Тӧлкуйтыштам. А тэ, Иван Ильич, десятскӧй дінӧ. Мед йӧзӧс татчӧ чукӧртас.
Васька да Иванов пырӧны. Иван мунӧ сиктӧ. Танялӧн оз пырсьы.
ТАНЯ. Вот и бара ме сійӧ местаясын, кӧні сьӧкыд олӧмӧс менсьым вӧлі кокньӧдӧма челядьдырся радейтчӧмӧн. Кӧнӧсь ӧні найӧ — Сеня, Анна... (Аддзӧ Марья тьӧткалысь воӧмсӧ.) Марья тьӧтка!
Кильчӧ сайсянь петкӧдчӧ Марья. Киас гез, коскас чер.
МАРЬЯ. Коді нин сэні? Ылысьыд ӧд ог и аддзы.
ТАНЯ. Марья Сидоровна, эн тӧд?
МАРЬЯ. Мыйкӧ тай, дитяӧй, тӧдса чужӧмыд, а эг вермы вежӧртны. Гашкӧ, выль учительница? Ӧні ӧд унаӧн найӧ миян сиктын велӧдӧны.
ТАНЯ. Абу учительница, Марья Сидоровна.
МАРЬЯ. Сідз, сідз, дитяӧй... Пыр шойччы. Гашкӧ, туйсянь? (Горӧдӧ ӧшиньӧ.) Анна! Тэ гортын абу нин?
ТАНЯ (аслыс моз). Анна?
МАРЬЯ. Ичмонь миян. Сенялӧн гӧтырыс.
ТАНЯ. Сенялӧн гӧтыр?.. (Кутчысьлӧ морӧсас) Но мыйла друг кутіс сідз типкыны сьӧлӧмӧй?..
Петкӧдчӧ ӧшиньӧд Анна.
АННА. Мамӧ, тэ чуксалін? (Аддзӧ Таняӧс) Коді сійӧ?
ТАНЯ. Анна!..
АННА (нимкодьысь). Видзӧдлӧй!.. Таня!
МАРЬЯ. Кутшӧм Таня? Энлы жӧ, энлы... Абу-ӧ...
АННА (петӧ котӧрӧн). Татьяна Николаевна! (Топыда кутлӧ Таняӧс, тэрыба висьталӧ.) А ми тэнӧ казьтылам, казьтылам... Ме со некымын во нин верӧс сайын. Сеня инженерӧ велӧдчӧ, регыд помалас... (Друг мыйкӧ усьӧ тӧд вылас.) А тэ Таня, кыдзи-мый... Кысянь усин-воин?
ТАНЯ. Гажӧй бырис тіян вӧр-ваысь. Вот и вои. Сідзкӧ, Анна, поздравляйта тэнӧ верӧс сайӧ мунӧмӧн.
АННА. Пасибӧ, Таня.
ТАНЯ. Кӧнкӧ, челядь нин эм?
АННА. Челядьыд?.. Абу на эськӧ да.
ТАНЯ. Бур морт тэд сюрӧма верӧсыд.
АННА. Ӧнӧдз тай бур на вӧлі-а...
ТАНЯ. Но, ми аддзысьлам на.
Таня пырӧ сиктсӧветӧ. Локтӧ Иван. Сы бӧрся йӧз.
ИВАН. Сиктсӧветасӧсь?
АННА. Кодъяс? Али нӧ... Сэнӧсь, буди.
ИВАН. А ті, граждана, понимаешь ли, неуна виччысьыштлӧй тані. Ме тӧдмала, кыдзи-мый делӧясыс да юӧрта тіянлы пырысь-пыр. (Пырӧ сиктсӧветӧ.)
Чукӧръясӧн воалӧны йӧз. Ӧтияс — уджалан паськӧмаӧсь, пажунторъяӧсь, гезъяӧсь; мӧдъяс — ӧтпӧвса паськӧмаӧсь.
ГУДӦКА ТОМ МОРТ. Ме тіянлы шуи, мися, уджалан кӧлуйӧн колӧ воны. Аддзанныд Марья тьӧткасӧ. Биӧ кӧть ваӧ дась.
ДЗОР СТАРИК. Сідзкӧ, зонъяс, кадыс эм на, колӧ ветлыны. Гашкӧ, кӧрт зыр ковмас и?
ИЧМОНЬ. Ставыс ковмас. А тэ, Матрен, йӧзсӧ повзьӧдан. Мыйкӧ тай лысӧм рака моз нин пасьтасьӧмыд.
ДЕТИНКА. Кысь нӧ, шу, Матрена Тимофеевна, батьтӧм пӧрысь нылыдлы. (Серам)
НЫВ. Менам, шу, Матрен, шӧлкӧвӧй да бархатнӧй паськӧмыс гуын сісьмис.
МАТРЕН. Типун тэд кыв йылад... (Ӧтортчӧ Анна дінӧ.)
Йӧз пӧвстын: «Ш-ш... Ланьтыштӧй... Петӧны». Петкӧдчӧны кильчӧ вылӧ Иванов, Васька да Иван.
ВАСЬКА (Иванлы). Тэ нӧ мый? Веськыда удж вылӧ и юӧртін?
ИВАН. Ме, понимаешь ли, сӧмын висьталі десятскӧйлы, мися, экспедициялӧн пыжъясыс косьмӧмаӧсь... Отсӧг ковмас... А найӧ...
ВАНЬКА. Правильнӧ.
ИВАН (ышмыштӧмӧн). А кыдзи нӧ! Юръяс миян ставнымлӧн ас местаынӧсь, понимаешь ли! (Йӧзлань.) Сідз ӧд, ёртъяс?
КОДСЮРӦ. Дерт жӧ! Ставыс гӧгӧрвоана! Ивановӧс тӧдам!
ВАСЬКА. Ёртъяс! Сталин ёрт ыстӧма миян вӧр-ваӧ ыджыд экспедиция Иванов Николай Антонович юрнуӧдӧм улын!
ЙӦЗ. Бур! Вот тайӧ — да! Бур делӧ!
ВАСЬКА. Сетам кыв экспедицияса начальник Иванов ёртлы.
Васька вашкӧдӧ Иванлы. Иван пырӧ сиктсӧветӧ.
ИВАНОВ. Первойя кывсянь ме висьтала тіянлы, ёртъяс, став роч народ нимсянь биа пӧсь чолӧм!
ЙӦЗ (киясӧн клопайтӧны) Чолӧм и сылы, роч народлы! Биа пӧсь чолӧм миянсянь!
ИВАНОВ. Унаысь да унаӧн волісны тайӧ вӧр-ваӧ корсьны озырлун и важ пӧраясӧ. Но волісны найӧ кӧин думъясӧн — быдӧн кӧсйис озырмыны сӧмын ачыс да, та вӧсна тышкасиг, пыр вунӧдлісны татчӧс муяс вылын зумыш да стрӧг кӧзяин йылысь. Тайӧ кӧзяиннас вӧлі ачыс ылі войвылыс. Мудер тун моз сійӧ некодӧс эз кут татчӧ воӧмысь, но найӧ туй вылӧ вольсавліс черӧн сӧтлытӧм пемыд вӧръяс, вуджны позьтӧм паськыд нюръяс да кывтны позьтӧм вӧр юяс. Кӧдзыд да кузь тӧвъяс вӧтлывлісны татчӧ волысь медся зіль учёнӧйяссӧ, гожся еджыд войясӧ ном да геб дӧзмӧдлісны пӧтӧсін корсьысьясӧс, арся шлякышъяс кӧдзӧдлісны медся пӧсь кӧсйӧмъяссӧ медся горш кык кока кӧинъяслысь.
Тайӧ вӧлі важӧн. Мем нинӧмла висьтавны, мый вайис уджалысь йӧзлы Октябрьскӧй революция. Тайӧс ті кыланныд сьӧлӧмъяснад. Та вӧсна ті локтінныд ӧні татчӧ, мед отсавны экспедициялы. Мукӧддырйи, гашкӧ, и сьӧкыд лолас. Но ми, сӧветскӧй йӧз, ёнӧсь не сӧмын ӧтувъя вынӧн, но и ӧткодь думъясӧн. Ми вермам. Босьтчылам жӧ, ёртъяс, ӧтувъя уджӧ! Пӧртам олӧмӧ Сталинлысь индӧдъяссӧ!
ЙӦЗ. Ми сайын оз ло! Отсалам! Мед олас Сталин ёрт!
Петӧны Иван да Таня. Иван ордын поднос. Поднос вылын нянь да сов.
ВАСЬКА (босьтӧ поднос). Дона Николай Антонович! Миян йӧз важысянь нин шулӧ: «Недруг дінӧ петсьӧ шогӧн-сорӧн, а бур морт дінӧ — няньӧн-солӧн. Мед лоас тайӧ нянь-солыс миян костын сэтшӧм йитӧдӧн, коді ваяс йӧзыслы ыджыд шуд да озырлун. Ключьясыд озырлуныдлӧн — миян дружбаын да ӧтувъя уджын! Тэ ученӧй морт. Тэ отсӧгӧн, ӧтув, ми восьталам миян му пытшкысь ставсикас озырлунсӧ! Сувтӧдам найӧс миянлысь советскӧй рӧдинаӧс водзӧ ёнмӧдӧм вылӧ! Тадзи кӧсйӧ миян народ!
ИВАНОВ (босьтӧ нянь-сов) Аттьӧ, ёртъяс, ыджыд эскӧмсьыд! Ми стӧча пӧртам тіянлысь кӧсйӧмъястӧ.
Йӧз нимкодясьӧ, Иван мыйкӧ сёрнитӧ Танякӧд. Матрен вашкӧдӧ Анналы. Найӧ частӧ видзӧдлӧны Таня вылӧ.
ВАСЬКА. Но вот, граждана. Ӧні миян мог — отсавны экспедициялы. Ставӧн-ӧ дасьӧсь?
ЙӦЗ. Дасьӧсь. Кӧть ӧні жӧ. Нуӧдӧй!
ГУДӦКА. Комсомолия! (Гораа гудӧкыштӧ.) Ме бӧрся... Шагом марш! (Ворсӧ комсомольскӧй песня мотив)
Том йӧз бӧрся юлань лэччӧны и мукӧдъяс. Матрен да Анна кольччыштлӧны.
ИВАН. Татьяна Николаевна, тшӧтш мунам. Виччысьышт, ме здук кежлӧ пыравла. (Пырӧ.)
Иванӧс виччысигмоз Таня матыстчӧ кыр йылӧ. Тыдалӧ, казьтылӧ важсӧ, заводитлӧ нургыны «То не ветер...»
АННА (Танялань). Сёрмыштін, нылӧ, сёрмыштін тӧкӧтьӧ ..
МАТРЕН (мудера). Татшӧмъясыд бара оз сёрмыны.
АННА. Эн повзьӧдлы, Матрен.
МАТРЕН. А вот аддзылан, оз кӧ заводитлы мырддьыны Сенятӧ. Ой, мудер тайӧ роч нылыс.
АННА. Мед заводитлас. Ме эськӧ петкӧдла сылы пуж! Рӧдыс менам абу полысь.
МАТРЕН. Вешъям татысь. Аддзылас. Вӧтчам йӧз бӧрсяыс. Мем ӧд ӧні зільӧн колӧ лоны. Ударницаӧдз колӧ воштӧдчыны. Хи-хи-хи! Мӧдӧдчам. (Мунӧны )
Петӧ Иван. Первойсӧ оз аддзы Таняӧс, мичӧдчыштӧ.
ТАНЯ. Позьӧ мӧдӧдчыны, Иван Ильич?
ИВАН. А ми тіянӧс, Татьяна Николаевна, эг этшаысь казьтывлӧй. Ті ӧд сэтшӧм меліӧн да вежӧраӧн миянлы кажитчылінныд.
ТАНЯ. Сійӧ вӧлі важӧн, Иван Ильич.
ИВАН. Но и ӧні абу некутшӧм помка сы вылӧ, мед думайтны мӧд ног.
ТАНЯ (серӧктӧ). Тешкодьӧсь ті лоӧмныд, Иван Ильич!.. Дзикӧдз вежсьӧмныд.
ИВАН. Воздухыс мӧд лоис, понимаешь ли. (Сералӧмӧн саялӧны.)
Занавес.
ІІІ ДЕЙСТВИЕ
Витӧд картина
Ивановлӧн рабочӧй кабинет, керкасӧ сӧмын на стрӧитӧма — оборудуйтӧм, штукатуритӧм. Кӧтшас пельӧсын временнӧй пач. Пызан вылын телефон. Паськыд ӧшинь тӧвся гыӧра. Матрен сюялӧ пачӧ пес. Звӧнитӧ телефон.
МАТРЕН (зільӧ сёрнитны вежливӧя). Кывза тіянӧс. Коді ме? Сотрудница. Да. Ивановлӧн кабинет. Сійӧ. Ӧбедайтны муніс. Ог тӧд... Пӧжалуйста. (Локтӧ пач дінӧ, бара сюялӧ пес. Друг пескысь мыйкӧ аддзӧ). Мый тайӧ? Энлы жӧ... «Участок № 1. Гавриков и К°». (Думайтӧ) Гавриков и К°... (Вежӧртӧ) А-а! Тайӧ ӧд Краузелӧн слугаыс! (Уськӧдчӧ телефон дінӧ. Зільӧ лоны спокойнӧйӧн.) Бухгалтерия меным, пӧжалуйста. Алло. Тайӧ сёрнитӧны Иванов кабинетсянь. Сэні вӧлі ва кыскалысь Стружков. Эм ва? Ыстӧй сійӧс Иванов кабинетӧ. (Пуктӧ телефон, видзӧдӧ пес вылӧ, кутчысьӧ юрас.) Шогӧй менам, шогӧй... Мыйла ме ог весьӧпӧр да вунӧд став важсӧ, мыйла? (Кылӧ кодлыськӧ воӧм. Ӧдзӧсӧ йигӧдчыштӧм). Пырӧй.
Пырӧ Чижов. Сійӧ ӧні ва кыскалысь Стружков. Арлыд и паськӧм, вӧрас и сёрни — ставыс вежсьӧма. Ыджыд тошка.
ЧИЖОВ. Корисны?
МАТРЕН. Да. Ме кори. Ме ӧтнам.
ЧИЖОВ (мӧд гӧлӧсӧн). Эн вермы аддзӧдлыны мӧдлаын?
МАТРЕН (индӧ пес вылӧ). Любуйтчы.
ЧИЖОВ. Мый тайӧ?
МАТРЕН. Важ мирлӧн колясыс. Пачӧ кӧсъя сюйны... (Скӧр шогӧн.) Сотны кӧсъя... Тӧв йылӧ разӧдны... Ох!
ЧИЖОВ (босьтӧ шапкасӧ). Да-а... Ме дырйи тувъявліс. Аслас киясӧн. (Матренлы.) Ме та йылысь тэныд эг на висьтавлы? Дай нинӧмла. Этша ӧмӧй и тэнӧ пӧрйӧдлі «важъя пӧраясас»? Думайтан, ме збыльысь радейтлі тэнӧ, «шӧвк бордъя гулюӧй менам»? Тэ кывзан?
МАТРЕН. Сёрнит. Мем ставыс веськодь.
ЧИЖОВ. Мем мусаджык вӧлі тэнад батьлӧн зарниыс. Ме кӧсйи вузавны тіянӧс став мунад и вӧр-ванад, кабыртны ӧтиысьӧн сы мында сьӧм, мыйта эз вермыв кабыртны му вылас ни ӧти морт, да пышйыны заграницаӧ. Миянӧс некод оз кывзы?
МАТРЕН. Сёрнит, господин Чижов. Некод абу.
ЧИЖОВ. Ӧшибайтчан: ме — гражданин Стружков.
(Телефоннӧй звонок. Кыкнаныс дрӧгмунӧны.)
МАТРЕН. Бурджык мӧдлаын сёрнитны, «гражданин Стружков». Сӧмын эн чайт, мый ме и сэки нин, важъя кадас, тэнӧ лыддьылі ангелӧн. Тэ вӧлін аферистӧн и колин сыӧн. Ме тэнӧ ненавидита!
ЧИЖОВ. Но ме тэысь ог пов. Тэ пытшкын тэӧн веськӧдлӧ сэтшӧм жӧ номыр, кутшӧм веськӧдлӧ и меӧн. (Звӧнитӧ телефон) Но... Кад. Аддзысьлытӧдз. Аттьӧ ставсьыс. (Петӧ.)
МАТРЕН (босьтӧ телефон). Кывза. Ивановыд? Эз на. Мый висьтавны? (Дрӧгнитӧ) Сідз, сідз, лоас висьталӧма. (Пуктӧ телефон, аслыс.) Инженер Кынев? Да-а... А ме сы йылысь и вунӧдлі нин... Семён Васильевич Кынев. (Ӧдйӧ сюялӧ пачӧ пес, ломзьӧдӧ.) Сотчӧй, кайӧй тшынйыв, разалӧй пӧимӧ, важсӧ казьтывлысь свидетельяс.
Пырӧ Иванов, пӧртчӧ полушубоксӧ.
ИВАНОВ. Чолӧм, Матрена.
МАТРЕНА. Чолӧм, Николай Антонович! Да ті энӧ пӧрччысьӧй, кынманныд.
ИВАНОВ. Нинӧм. Ог кынмӧй. Ті со коркӧ йиа ваӧ пыравлінныд дай сэн нинӧм эз ло.
МАТРЕН. Менам ӧд вирыс шоныдджык на. Сэсся и уджыс сэки вӧлі сэтшӧм, нюжмасьны позьтӧм.
ИВАНОВ. Ошка сыысь. Бур боксянь петкӧдлін асьтӧ. (Босьтӧ телефон.)
МАТРЕН. А ме, час, ещӧ пыртышта пессӧ. Збыль, талун кӧдзыд керкаыс. (Петӧ)
ИВАНОВ. Витӧд номера объект. Коді? Вот мый, дона нылӧй: волы ачыд. Лыдпасъястӧ эн вунӧд. (Пуктӧ телефон, зыралӧ кияссӧ.) Да-а... Збыльысь неуна кӧдзыдджык, кын нитшнад стрӧитчӧмыд кӧнтусьӧн вердӧ... Та-а-ак, так-так... (Мыйкӧ думайтӧ, сэсся бара босьтӧ трубка ) Сиктсӧвет, пӧжалуйста, Кыневӧс. Василий Петрович?! Ыджыд поклон, муса другӧ! (Гораа серӧктӧ.) Тӧдін, стӧч сідзи, да-да. Отсӧгла шыася. Зэлӧдіс. А мый, зон, сэсся вӧчан? (Серӧктӧ) Ми, тыдалӧ, кыв джынсянь гӧгӧрвоим ӧта-мӧднымӧс, уна-ӧ колӧ? Кызь вӧв вит лун кежлӧ. Не этшаджык, Аттьӧ. Ме сідзи и тӧді дас витӧс сетан. Вит вӧвсӧ нарошнӧ содті. (Сералӧ) Но, сэсся кутшӧма олан? Сідз, сідз... Коді? Пиыд воис? Первой кыла. Татчӧ важӧн нин петавліс? Сідзкӧ, регыд лоас тані? Зэв рад, зэв рад! Кадръяс миянлы колӧны — во! (Петкӧдлӧ кинас — голяӧдзыс.) Сідз, сідз... Видза колян, Василий Петрович! (Пуктӧ трубка. Пызан йӧрысь перйӧ бумага, лыддьӧ.)
Пырӧ Таня — полушубока, пыжиковӧй пеля шапкаа, киас полевӧй сумка.
ТАНЯ. Бур рыт, папа!
ИВАНОВ. Чолӧм, Таня! (Сетӧ бумага.) Тӧдмась. Оз вунӧд центрыд миянӧс.
ТАНЯ (лыддьӧм бӧрын). Шуӧма дженьыда, но топыда. Миянлы кольӧ сӧмын стрӧитны, стрӧитны, и стрӧитны.
ИВАНОВ. Кокни шунысӧ.
ТАНЯ (ышловзьӧ). Да, папа, кокни шунысӧ.
ИВАНОВ. Нинӧм, нылӧ. Вӧвъяс кӧ аслыным вӧліны, ми ог на ёна ышлолалӧ.
ТАНЯ. Оз-ӧ ещӧ кӧрт туй ков тэныд?
ИВАНОВ. Лоас и кӧрт туй коркӧ... Вайлы татчӧ лыдпасъястӧ. (Таня сетӧ бумагаяс). Аслад объектысь джын йӧзсӧ аски сетан выль удж вылӧ. (Пызан йӧрысь перйӧ карта.)
ТАНЯ. А ме нӧ мыйӧн кольчча?
ИВАНОВ. Мӧд джыннас.
ТАНЯ. Но ӧд...
ИВАНОВ (торкӧ). Лыддьы мӧд пӧв предписаниесӧ. (Таня лыддьӧ) Ӧні татчӧ видзӧдлы. Отсав меным. (Таня копыртчӧ карта вылӧ жӧ) Сизимӧд номера объектлы строительнӧй площадка ме шуи панны татчӧ.
ТАНЯ. Позьӧ. Сӧмын нюр вомӧн лоӧ вуджны.
ИВАНОВ. Кӧкъямысӧд объектлы строительнӧй площадка — татчӧ.
ТАНЯ. Сэні коркӧ вӧвлӧма пӧжар, и став вӧр-пуыс ӧні пӧрӧма. Оз позь матыстчыны.
ИВАНОВ. А ӧкмысӧдсӧ... Дзик выль отрасль... Эскыны кӧ геологъяслы да тӧд вылын кутны сырьёсӧ, дерт, ковмас сӧгласитчыны — татчӧ.
ТАНЯ. Но туйыс, туйыс. Сэтчӧдз сё сайӧ верст лоӧ. Кыйсьысьяслӧн трӧпаяс кындзи нинӧм абу. Сэтчӧ, гашкӧ, вӧралысьлӧн понйыс на эз волы.
ИВАНОВ. А кыдзи тэ ног? (Таня оз шыась) Нинӧм. Став объектъясысь торйӧдам йӧзӧс да заводитам. А сэні и содтӧд йӧз вын воас.
Пырӧ Матрен, пыртӧ пес.
МАТРЕН. А ме и вунӧді висьтавнысӧ, Николай Антонович... Кынев Василий Петровичлӧн пиыс пӧ, Сеняыс гортӧ локтӧма.
Таня тӧдчымӧнъя дрӧгмунӧ. Тайӧс аддзылӧ Матрен.
ИВАНОВ (Танялы). Ме кывлі нин. Сёрнитім Василий Петровичкӧд, и сійӧ висьталіс, мый Семен Васильевич воӧ татчӧ.
ТАНЯ. Татчӧ?
ИВАНОВ (Матреналы). Ковмас кӧ содтыны пестӧ пачад, асьным содтам.
Матрен петӧ.
ТАНЯ. Ставыс, папа? Позьӧ мунны?
ИВАНОВ. Менам ставыс. (Ӧдзӧсӧ стукӧдчӧм.) Сійӧ!.. Да, да! Пырӧй!
Пырӧ Сеня. Сійӧ тулупа, кӧрку пимиа.
СЕНЯ (гажаа). Шуӧны йӧзыс: Иванов пӧ доддясьӧма выльдыны миянлысь вӧр-ванымӧс. Эз тырмы терпенье, мед не аддзӧдлыны сійӧс талун жӧ!
ИВАНОВ. А ме кывлі: воӧма пӧ выль инженер! (кутлӧ.)
СЕНЯ. Да энлы жӧ, Николай Антонович, пӧрччысьны сет.
ИВАНОВ. Давай, давай... Сӧмын вот тувъясыс миян лишнӧйыс абуӧсь на. Муртса позтысям. Чомъясын да палаткаясын олім таӧдз.
СЕНЯ. Вай пельӧсас шыбитам. (Пӧрччӧ тшӧтш пасьсӧ. Аддзӧ Таняӧс.) Николай Антонович!..
ИВАНОВ. Кора тӧдмасьны: менам ныв Татьяна Николаевна.
СЕНЯ. Прӧститӧй, Татьяна Николаевна, мый тіянӧс эг аддзы пырӧм мысьт. (Киасьӧны.)
ТАНЯ Мый ті, мый ті, Семён Васильевич... Тадзисӧ весиг бурджык вӧлі... (Аслыс). Да мый ме сёрнита?
ИВАНОВ. Помнитанныд, Семён Васильевич, кодыр менам Таня воліс тіянӧ первойысь, сэки сійӧ вӧлі дзик на кага кодь. А ӧні, чурки буди, и гӧгрӧсмыштӧма, и...
ТАНЯ (серӧктӧ). И доза нин пӧрысьмӧма.
ИВАНОВ. Ме кӧсйи шуны: и батьыслы ыджыд отсӧг вермӧ сетны. Кӧть мый, а аслад ки улын рӧднӧй ныв, инженер-строитель, абу шутка делӧ.
СЕНЯ. Ме зэв рад! Ме весиг вывті рад! Мӧдам ӧтлаын уджавны, стрӧитны!
ИВАНОВ. Сідз, Семён Васильевич, сідз... висьтась, кыдзи велӧдчин, кыдзи воин. (Пуксялӧны.)
СЕНЯ. Велӧдісны бура. Вайисны татчӧ самолётӧн. А тӧданныд, коді менӧ лэбӧдіс? Да ті сійӧс он тӧдӧй, братан менам, мӧд сиктысь.
ИВАНОВ. Мойдын моз. Талун тӧдтӧм детинка, аски — инженер, лётчик.
ТАНЯ. Найӧс быдтӧны.
СЕНЯ. Не сӧмын быдтӧны, Татьяна Николаевна, но и бордйӧдӧны! Тайӧс колӧ гӧгӧрвоны!
ИВАНОВ. Ставнымлы.
СЕНЯ. Да. Ставнымлы! (Друг сійӧ видзӧдлӧ ӧшинь вылӧ, тыдалӧ, кӧдзыдӧн ыргӧ.)
ТАНЯ. Пасьтӧ оз ков пӧрччыны, Семён Васильевич.
ИВАНОВ. Пач дінас вешъям. Час ме чай тшӧкта пузьӧдны. (Петӧ.)
СЕНЯ. Эг думышт, Татьяна Николаевна, выльысь аддзыны Тіянӧс миян вӧр-ваысь.
ИВАНОВ (пыригмозыс). Семён Васильевич, тіян, буракӧ, ямщик ещӧ эм?
СЕНЯ. Ме и вунӧді сійӧс... (Уськӧдчӧ ӧдзӧсӧ, кодкӧдкӧ зурасьӧ.) Анна, тэ?.. Пыр давай, пыр...
Пырӧ Анна. Кӧрку сӧвика. Сувтӧ порог дорӧ.
Тӧдмасьӧй, менам гӧтыр, Анна Дмитриевна.
ИВАНОВ. Зэв, бур, зэв бур! Пӧрччысьӧй, Анна Дмитриевна, шонтысьӧй.
Но Анна скӧр. Сійӧ лӧгысь видзӧдлывлӧ Таня вылӧ. Нинӧм оз шыав.
СЕНЯ. Дойді ме тэнӧ, Анна? Тэ он шыась. Али мыйкӧ лоис? Вай кӧть первой сӧвиктӧ пӧрччам.
АННА (грубӧя). Эн меліась. Ставсӧ тӧда. Ставсӧ висьталісны...
СЕНЯ. Ог гӧгӧрво, кодъяс мый тэныд висьталісны... Тэ кӧть эськӧ гортын та йылысь, а эн бур йӧз дінас.
АННА. Бурӧсь тай, видзӧдлы... Керка порогтӧ гортсьыд эн удит воськовтны — татчӧ косьыштін-воин. Мися жӧ, тэрмасян... Пӧдругаыдкӧд аддзысьны. Сы вылӧ и образуйтчин? Сы вылӧ и велӧдчин?
СЕНЯ. Анна, садьыд тэнад эм абу?..
АННА (Ивановлань). Бур мортсьыс яндыся... Ме эськӧ петкӧдлі тіянлы, кыкнаныдлы, со этійӧн.
ТАНЯ (воськовтӧ Анналань). Анна!..
АННА (Танялы). Эн матыстчы татчӧ. Грекӧ вӧйтчыссяс. Ог вермы ачымӧс кутны! Эн видзӧд ме вылӧ...
СЕНЯ. Анна, тэ тӧдан, мый вӧчан?
АННА. Эн велӧд... (Скӧрысла бӧрддзӧ.) Пета ме, пета. Заводитчӧ олӧм... пон туйын... гуляйтысь мужиклысь додьсӧ караулитны. А ме виччыси сійӧс... вит во чӧж сы йылысь тӧждыси, думайті... Вот и воис... (Петӧ )
СЕНЯ (шемӧсӧн). Мый сійӧ сёрнитӧ! Мый сійӧ сёрнитӧ!
ИВАНОВ (аслыс). Нинӧм ог гӧгӧрво..
СЕНЯ. Но коді кутшӧмтор удитіс сылы висьтавны? Ме ӧд сӧмын на локта.
ТАНЯ. Матренысь кындзи, тані некод на оз тӧд.
СЕНЯ. Кутшӧм Матрен?
ИВАНОВ. Тіян сиктысь, Ёкышовлон нылыс, пачьяс ломталӧ.
СЕНЯ. Ах-а!.. Водзӧ сэсся гӧгӧрвоана. Матрен — сійӧ Матрен, (заводитӧ пасьтасьны).
ИВАНОВ. Ті нӧ мый — мӧдӧдчанныд нин?..
СЕНЯ. Эн дивитӧй. Асьныд аддзанныд, кыдзи артмис... (Прӧщайтчӧ Ивановкӧд) Кык лун бӧрын локта уджавны. Сэки унатор йылысь сёрнитам. (Матыстчӧ Таня дінӧ.) Татьяна Николаевна... Эн дивитӧй Аннаӧс. (Мӧдӧдчӧ ӧдзӧслань, сэсся сувтовкерӧ.) Да. Ме и вунӧдчи... Николай Антонович, тіян сюрас неыджыд кабинет лӧньджыкинысь.
ИВАНОВ. Кабинет? Лӧньджыкинысь? Да, мый?
СЕНЯ. Видзӧдтӧ... Приборъяс ме вайи сьӧрысь. Зэв чувствительнӧйӧсь.
ИВАНОВ. Бур. Аддзам. Ог кӧ аддзӧ — стрӧитам.
СЕНЯ (нимкодьысь). Ыджыд аттьӧ. Николай Антонович. (Бара киасьӧ.) Татьяна Николаевна, аддзысьтӧдз! (Петӧ)
ИВАНОВ (Видзӧдӧ Таня вылӧ). Мый Тэ шуан та вылӧ, муса нылӧй?..
Занавес
КВАЙТӦД КАРТИНА
Кыневъяслӧн керка пытшкӧс. Стенъяс обоитӧма, ӧшиньяс занавескаӧсь, пызан вылын салфетка, стенын ӧшалӧ телефон. Ӧдзӧсъяс: шуйгавылӧ — кухняӧ петан, веськыдвылӧ — пытшкӧсса жырйӧ пыран. Марья да Анна уберитӧны чай юӧм бӧрын пызан выв. Жырйын кылӧ патефон ворсӧм да гажмӧм йӧзлӧн варовитӧм. Став сертиыс тӧдчӧ — Василий Петрович ордын гӧстьяс. Ывла вылын гожся югыд вой.
МАРЬЯ (велӧдӧ ичмоньсӧ). Оз тай, дитяӧй, быд асылӧ веськыд кок вылад сувтны удайтчы. Быдторйыс гозъя костад овлӧ. Мукӧддырйи и терпитыштны колӧ кужны.
АННА. Тэ, мамӧ, он гӧгӧрво, мыйын делӧыс.
МАРЬЯ. Ме ставсӧ гӧгӧрвоа. Пи-нывлӧн быд ышловзьӧм мам сьӧлӧм пыр прӧйдитӧ (Дивитӧмӧн.) Ӧд корсянь нин тэ татшӧм, велӧдчанінсьыс первойя воан лунсянь.
АННА. Мед колӧкӧ эз повзьӧд менсьым сьӧлӧмӧс первойя луннас жӧ.
МАРЬЯ Тэнӧ, тыдалӧ, Матреныд век суклялӧ, вот мый ме шуа. Мыйла индан ассьыд пельтӧ сійӧ пеж вомлы? Ӧд сӧмын лёктор ветлӧ гусьӧныс.
Жырсянь петкӧдчӧ Иван. Сійӧ бура пасьтасьӧма, гажа кодь.
ИВАН. Стӧч сідзи, понимаешь ли. Лёк слава йылысь сёрни гусьӧн ветлӧ, а бур слава йылысь — вомтырӧн петлӧ... Менӧ ыстісны тэрмӧдлыны тіянӧс.
МАРЬЯ. Час, дитяӧй, час. Миян эштӧ нин.
ИВАН. Пызан вештам бокӧджык, нолтӧсь, Анна, отсышт. Ачыс Печиков Иван Ильич талун кутас йӧктыны! (Вештӧны пызан.)
МАРЬЯ. Тэ ӧмӧй кужан жӧ йӧктыныс?
ИВАН. Мый кӧсъя, сійӧ и кужа. Но, понимаешь ли, Марья тьӧтка, неуна полышта. Вот колӧ талун йӧктыны, а ог лысьт. Тэ гӧгӧрвоан?.. Велавтӧм. А йӧктыны колӧ — во! (Петкӧдлӧ голяӧдзыс.)
МАРЬЯ. Аддза, дитяӧй, ставсӧ аддза. (Гусьӧн моз) Куж кутны ассьыд счастьетӧ. Эн ло мӧмӧтӧн. Мӧд татшӧм мортыс нэмнад оз нин сюр.
ИВАН. Марья тьӧтка, сідзкӧ, буди ещӧ содтыштам.
МАРЬЯ. Гажмӧдансӧ?.. Со ӧд ме кутшӧм, ог и гӧгӧрво. (Кисьтӧ вина )
ИВАН. Кутны ачымӧс кужа, кыдзи колӧ. Коддзытӧдз ог ю. Тадзи тшӧктӧ талунъя луныс, понимаешь ли. Тырмас, тырмас, эн тырыс.
МАРЬЯ. (сетӧ вина). Тайӧс ме нимсянь ю. Ме кӧть нинӧм ог шыав, а менам чужан лунӧй ӧд ӧні жӧ коркӧ.
ИВАН (чуймӧ). Сулав, сідзкӧ. А Василий Петровичыд тӧдӧ?
МАРЬЯ. Кытысь сійӧ тӧдас. Ме ӧд и ачым бурасӧ ог тӧд. Мамӧ тай, покойнича, шуліс, Петыр видзӧ пӧ чужлін-а.
ИВАН. Анна румкаяс тырт. (Жыр ӧдзӧслань.) Ёртъяс! Василий Петрович!
Жырсянь петӧны Иванов, Сеня да Таня. Сьӧраныс патефон, пластинкаяс. Иван пырӧ жырйӧ.
ИВАНОВ (сёрнитӧ Сенякӧд). Ми сідзи и вӧчам. Колӧ тэрмасьны. Дас витӧд объект — миян гордостьным!
СЕНЯ. А Татьяна Николаевна кыдзи думайтӧ дас витӧд объект кузяным?
ТАНЯ (серӧктӧ). Да эновтлӧй ті кӧть ӧти здук кежлӧ ассьыныд объектъястӧ. Ӧд морт сямъясныд тіян вошны мӧдісны.
ИВАНОВ (шуткаӧн моз). Эновтлам, эновтлам. Кутшӧмӧс ворсны тіянлы?
Жырйысь петӧны Иван да Васька.
ИВАН. Энлӧй, понимаешь ли! Важнӧйтор эм юӧртны. А, гашкӧ, ачыд. Василий Петрович, висьталан?
ВАСЬКА. Тэныд скодаджык.
ИВАН. Делӧыс татшӧм, ёртъяс. Ми ыдждӧдлім татчӧс кӧзяинӧс нимлунӧн. Но, вӧлӧмакӧ, и кӧзяйкаыслӧн чужан лун!
ИВАНОВ. Мыйла эг тӧдӧ?
ИВАН. Вот сыын и делӧыс, Николай Антонович! Важыслӧн колясыс миянын чорыда на пукалӧ. Мыйла, шуам, менам мамлысь менам батьӧй весиг нимсӧ вунӧдӧма, кувтӧдзыс «лямпаӧн» сійӧс шуліс? Мыйла, шуам, мӧдлӧн батьыс гӧтырсӧ «эйтэӧн» шуліс? Сідзи вӧвліс важӧн, понимаешь ли. Ми такӧд ӧні абу сӧгласенӧсь. Ми не сӧмын заводъяс, промыселъяс стрӧитысьяс, но и мортлысь правояссӧ дорйысьяс. (Босьтӧ бокал.) Марья Сидоровна! Тэ чужтін да быдтін менсьым другӧс, Семён Васильевичӧс, кодӧн ми ӧні гӧрдитчам ставӧн!
ИВАНОВ. Вернӧ. (Ошкӧмъяс, босьталӧны бокалъяс.)
ИВАН. Сідзкӧ, Марья Сидоровна! Тэнад кузь нэм чӧжӧн лэптамӧй жӧ тэ ним кузя первойя бокал! Бурсиам тэныд, кыдзи шуласны пӧрысь йӧз, кызны да быдмыны, унджык нажӧвитны да миянӧс винаӧн ёнджыка юктавны! (Чокайтчӧны.) Тадз ӧд, Василий Петрович, понимаешь ли?
ВАСЬКА. Тадзи, Иван Ильич! (Марьялы) Но, кӧзяйка!.. Поздравляйта тэнӧ первойя нимлунӧн!
МАРЬЯ (чышкыштӧ нимкодьлун синвасӧ). Тайӧ жӧ Иван... нормӧдіс...
МУКӦДЫС (чокайтчӧны). Поздравляйтам! Сиам овны уна во! (Юӧны!)
МАРЬЯ (гусьӧникӧн моз тувкыштӧ Анналы бокас). Ю да гажаджыкӧн ло!
Иванов заводитӧ патефон. Иван приглашайтӧ Таняӧс йӧктыны. Сеня матыстчӧ Анна дінӧ.
СЕНЯ. Бергалыштам, Анна.
АННА. Мун сэтысь, ме ог куж.
СЕНЯ. Велӧда, сідзкӧ. (Босьтӧ киясӧдыс.) Зэв прӧстӧй вальсыс. Шуйга коксяньыд... Рас... Да эн веськыдсяньыд. Рас, два... Абу сідз. Давай выльысь.
АННА. Менам оз артмы. Ме ӧд абу учёнӧй.
МАРЬЯ (тӧждысьӧ). Мый сэн оз артмыыс том мортлӧн.
СЕНЯ. Видзӧд менам кокъяс вылӧ. Шуйганад рас... Веськыднад — два... рас, два рас, два... Дзуган кокъястӧ. (Дӧзмӧ.) Колӧ жӧ тӧдны шуйгатӧ да веськыдтӧ.
АННА. Абу йӧктӧм йылысь думъясӧй менам.
СЕНЯ. Мый йылысь но?
АННА (индӧ Таня вылӧ). Мыйла сійӧ миян ордын?
СЕНЯ. Садьсяв, Анна. Бур йӧз водзас эн янӧд.
АННА (вешйӧ бокӧ). Оз тай зэв чужӧмыд гӧрдӧд тэнад.
СЕНЯ. Медбӧръяысь висьтала. Он кӧ шыбит юрсьыд йӧйрутӧ, ас вылад норась.
АННА. Дзонь тӧлысьясӧн гортӧ он волы. Срочнӧй уджъяс вылӧ ыстысян... Тӧда, меысь пышъялан. Метӧг лӧсьыдджык... гуляйтныд.
СЕНЯ (скӧрмӧ). Аттьӧ бур кывъясыд вылӧ. (Мунӧ ӧшинь дорӧ, видзӧдӧ ывлаӧ).
МАРЬЯ (пайкучкысьӧ). Мый тэ бара шуин сылы? Виччысь, ичмонь. Збыльысь бырас терпениеыс сылӧн.
Тайӧ кадӧ Иванов да Васька петӧны мӧд жырйӧ. Пластинка помасьӧ. Сеня сійӧс бергӧдӧ, босьтӧ Таняӧс, заводитӧны йӧктыны. Анна букышӧн видзӧдӧ йӧктысьяс вылӧ. Сы дінӧ матыстчӧ Иван корӧ, йӧктыны.
ИВАН. Давай мекӧд. (Анна быттьӧ оз гӧгӧрво. Иван заводитӧ ӧтуртчыны).
АННА (другысь). Сулав. Велӧд... йӧктыны.
ИВАН. Радпырысь. (Гусьӧн моз.) Йӧкты сьӧдас, кыдзи кужан. Прамӧясӧ велӧда мӧдысьджык.
АННА. Ог сетчы ме налы бурӧн, ог сетчы. Мед оз виччысьны. (Йӧктӧны.)
Марья аслыс шензьӧ. Анна збыльысь оз куж йӧктыны, торкалӧ Иванӧс.
ИВАН (дугдӧ йӧктӧмысь). Кухняӧ, Анна... Кык рытӧн велӧда. Давай, давай...
Иван да Анна петӧны кухняӧ. Марья — на бӧрся. Кухнясянь кылӧ йӧктыны велӧдӧм. Сцена вылын Таня да Сеня. Здук мында оз тӧдны, мый шуны.
ТАНЯ. Кыдзи колӧ гӧгӧрвоны тайӧс?..
СЕНЯ. Кыдзи кужанныд...
ТАНЯ. Ті, Семён Васильевич, талун лишнӧйджык гажаӧсь.
СЕНЯ. Да, ме талун код. И вӧлі эськӧ бурджык, нинӧм кӧ эг помнит.
ТАНЯ. Сеня...
СЕНЯ. Эн ӧлӧдӧй менӧ... Ті аддзанныд ставсӧ... Ме шуда сӧмын аслам уджӧн, аслам лабораторияын. Но ме морт, и олӧмлысь мичлунсӧ кӧсъя аддзыны не сӧмын таысь.
Тайӧ кадӧ кухнясянь петкӧдчӧ Анна.
АННА (горӧдӧ). Ок, некрещеннӧйяс! Сёйисны тай олӧмӧс!.. (Уськӧдчӧ лёкысь Танялань).
СЕНЯ. Анна.. Сулав!
АННА. Бугыльяссӧ перъя!
СЕНЯ. Тэ йӧймин?!
АННА. Тэнсьыд первой перъя... Олӧм сёйысь тэ! Менам юр вылӧ...
Ӧдйӧ пырӧны кухняысь и жырйысь.
ВАСЬКА. Мый лоис?
АННА. Лоис тай, батьӧ. Горт помын пиыд мӧдіс гуляйтны.
МАРЬЯ (шензьӧ). О, господьӧй, Анна!..
АННА. Эн дорйысь, мамӧ.. Таӧдзыс тэ вайӧдін. Пыр менӧ ӧлӧдін, пыр шуин, прӧста пӧ шуасян. (Бӧрдӧ.)
Пӧжар йылысь немвиччысьтӧм звӧн. Шемӧс. Уськӧдчӧны ӧшиньяс дінӧ. Звӧнитӧ телефон.
ИВАНОВ (босьтӧ телефоннӧй трубка). Кывза. Иванов. (Дрӧгнитӧ) Дзик пыр пета. Примитӧй став мера. (Пуктӧ телефон) Василий Петрович! Вӧвъяс... Дас витӧд объектын пӧжар. (Пырӧ жырйӧ.)
ВАСЬКА (ӧдзӧсӧ уськӧдчиг). Иван, доддясьны!
ИВАН (петігмозыс). Ме дась!
СЕНЯ. Мамӧ, кӧні менам плащ?
МАРЬЯ (оз тӧд, мый вӧчны). Час, дитяӧй. О, господьӧй!.. Ставыс ӧтпырйӧ.
ТАНЯ (звӧнитӧ). Коммутатор. Дас витӧд объект.
ИВАНОВ (киас Танялӧн пальто). Таня, пасьтась.
СЕНЯ (пасьтасьӧ). Кӧнджык пӧжарыс?
ИВАНОВ. Зэв матын главнӧй корпус дорас.
СЕНЯ (петӧ). Ме мӧдӧдчи.
ИВАНОВ (киасьӧ). Зэв ыджыд аттьӧ, Марья Сидоровна! Анна Димитриевна! Мӧдам виччысьны миянӧ. Эн дивитӧй...
Иванов да Таня петӧны. Марья шӧйтӧ джоджын, аслыс шензьӧ. Анна век на шемӧс сулалӧ джодж шӧрын.
МАРЬЯ. А тэ мый сулалан? Мыйла он отсав мыйӧнкӧ?
АННА (быттьӧ садьмӧ). Ме... Дзик пыр. А кодлы отсала?
МАРЬЯ. Ме нӧ мыйӧн тӧда.
АННА. Сеняыс муніс нин?
Пырӧ Васька. Локтӧ телефон дінӧ.
МАРЬЯ. Мунісны?
ВАСЬКА. Да. (Босьтӧ телефон, звӧнитӧ )
АННА (быттьӧ повзьӧ). А ме тай коли!.. Менӧ тай колисны! Ог сет Сеняӧс. Ог лэдзчысь сы дінысь! (Уськӧдчӧ ӧдзӧсӧ).
МАРЬЯ (петӧ Анна бӧрся). Тэ кытчӧ кышантӧгыс! Войнас? Анна! Анна!
Занавес.
ІV ДЕЙСТВИЕ
Сизимӧд картина
Сцена мӧд картинаын кодь жӧ. Но ёна вежсьӧма: вӧр шочмӧма, ыджыд пожӧмлӧн кольӧма сӧмын мырйыс. Вӧла туй вылӧ петӧ ордым туй. Гожся руд вой. Вӧр сайын тӧдчӧ кусысь пӧжарлӧн югӧрыс. Лӧнь. Друг понӧль сайын мыйкӧ вӧрзьыштӧ. Тайӧ — Анна. Сійӧ ньӧжйӧник кыпӧдчӧ куйланінысь, пуксьӧ, тӧдчӧ — бӧрдӧма.
АННА (кутыштлӧ сьӧлӧм весьтсӧ, жугыля). Со, и небзин тэ, менам коньӧр сьӧлӧмӧй. Ӧні позяс гортӧ мунны. (Иронияӧн.) Пӧжарыс, тыдалӧ, кусны мӧдіс. (Бара уськӧдчӧ му вылӧ, шытӧг бӧрдӧ. Сэсся лэптыштлӧ юрсӧ.) Но мыйла ӧні ме гортас муна? Коді менӧ сэні виччысьӧ? Ак, тэ, Сеня, Сеня... (Друг кывзыштӧ.) Кодъяскӧ воӧны... (Нывбаба гӧлӧс... Гусьӧн моз сёрни...) А гашкӧ... гашкӧ найӧ?.. Менам Сеня пӧдругаыскӧд? О-о! Мед эськӧ найӧ, мед эськӧ найӧ!.. (Мый вылӧ кӧ решайтчӧ, сайӧдчӧ понӧль сайӧ.)
Вӧрсянь виччысьӧмӧн петӧны Чижов да Матрен. Сувтӧны, видзӧдӧны пӧжар вылӧ. Тӧдчӧ — кусӧдчӧмаӧсь.
ЧИЖОВ. М-да... да, да... Вот тадз!.. Но жаль, вывті жаль!..
МАТРЕН. Мунны колӧ. Ме усьтӧдз мудзи дай кольми кусӧдчигас.
ЧИЖОВ. Тэ вывтіджык старайтчин. Вывтіджык тӧкӧтьӧ. Тэ гӧгӧрвоан менӧ? Мера колӧ тӧдны. Дзож вермас артмыны. Мися, гӧгӧрвоан менӧ?
МАТРЕН. Да. Гӧгӧрвоа.
ЧИЖОВ (мӧдӧдчӧ). Аддзысьлытӧдз! Ме ас туйӧд...
МАТРЕН. Мун. Ме мӧдӧдча жӧ.
Чижов мунӧ. Матрен лӧсьӧдӧ юрсьыс чышъянсӧ. Анна петӧ понӧль сайысь.
АННА. Матрен, тэ?
МАТРЕН (повзьӧмысла шыбитӧ чышъянсӧ). Коді сэн?
АННА. Дона пӧдруга!
МАТРЕН (чуймӧ). Анна! Кысянь тэ? Кыдзи веськалін татчӧ?
АННА (шыбитчӧ Матрен вылӧ, бӧрдӧм сорӧн висьталӧ). Вӧлисти овсис менам олӧмӧй...
МАТРЕН. О, да тэ шӧлкӧвӧй платтьӧа! Эн ӧмӧй кусӧдчыны во?
АННА. Тэнад висьталӧмыд збыльмис.
МАТРЕН. Лючки сёрнит. Мый лоис?
АННА. Аслам синъясӧн горт шӧрын аддзылі, кыдзи найӧ сёрнитчисны эновтны менӧ.
МАТРЕН. Нинӧм ог гӧгӧрво.
АННА. Миян Сеня да эсійӧ роч нылыс...
МАТРЕН (гӧгӧрвоӧ). А-а! Со тэ мый йылысь. Но тайӧ мем абу выльтор. Кымынысь тэд висьтавлі... (Мыйкӧ думайтӧ.) Сідзкӧ, горт шӧрӧдзыд воліс?
АННА. Да. Батьыскӧд гӧститісны миянын. И кодыр тӧдлісны пӧжар йывсьыс, ставӧн уськӧдчисны татчӧ вӧлӧн. А ме весьӧпӧрӧм моз — на бӧрся. Со тадзи, вежсьытӧг и быдӧн... Суӧдны кӧсйи. Но дыр котӧртӧмысь сьӧлӧмӧй измис. Уськӧдчи татчӧ му вылас, бӧрдышті, мед личмуныштас морӧсӧй.
МАТРЕН. Он тай вӧлі эскы меным. Найӧ и ӧні на вӧліны ӧтлаынӧсь пӧжар вылас.
АННА. Ойя да ойя!
МАТРЕН. Но, ладнӧ. Тырмас лимзавнытӧ. Киссьӧм ватӧ он курав.
АННА. Мый ме ӧні вӧчны мӧда, мый вӧчны?
МАТРЕН. Ме тӧда, мый колӧ вӧчны. Муыс оз на сулав на вылын. Овсяс и натӧг. Тэ ӧд збыльысь ӧні абу гозпӧв Сеняыдлы. Сійӧс учёнӧйӧн лыддьӧны. А тэ коді? Велӧдчытӧм сиктса нывбаба. Тэкӧд и сёрнитнысӧ ӧні Сеняыдлӧн нинӧмтор йылысь. Сійӧ наука йылысь, а тэ — укват да клюка йылысь. Тэ и ӧбедсӧ сылы он мӧд сяммыны пуны. Вот кутшӧм тіян олӧмныд пуксяс. Ме эськӧ ачым эг мӧд сыкӧд овны, мучитчыны.
АННА. Гашкӧ и сідзи... Но ӧд ме позтӧм кӧкӧн верма лоны.
МАТРЕН. Чӧрту гортыд. (Гусьӧн моз, скӧрысь.) Сэсся ми сэні думыштам, мый вӧчны. Каитчыны мӧдас Сеняыд тэнӧ эновтӧмысь. Таняыс и. Спокой ог мӧдӧ сетны.
АННА. Ог на тӧд.
МАТРЕН (кылӧ йӧзлысь воӧм). Кылӧ кодъяскӧ воӧны. Нинӧм думайтнысӧ... Мунам тась, мед оз аддзывны. Мунам ӧдйӧджык! (Аннаӧс босьтӧ киӧдыс, ӧдйӧ мунӧны.)
Здук мысти ордым туйӧд петкӧдчӧны Таня да Сеня. Найӧ вайӧдӧны Иванӧс. Иванлӧн паськӧмыс сотчӧма, кияссӧ и чужӧмсӧ кӧрталӧма бинтӧн, восьса сӧмын ӧти синмыс. Ставыс мудзӧсь.
СЕНЯ. Но вот и вӧла туй вылынӧсь ми. Регыд воас батьӧ. Кӧсйис пырысь-пыр петны вӧлӧн.
ТАНЯ (Иванлы). Ми сэк кості шойччыштам.
ИВАН (сёрнитӧ сьӧкыда). Да, шойччыштам.
СЕНЯ (вольсалӧ му вылас ассьыс плащсӧ). Со татчӧ. А ме котӧрта бӧр.
ИВАН. Котӧрт. (Лэдзчысьӧ му вылӧ).
ТАНЯ. А тэ, Иван Ильич, шуда на вӧлӧмыд. Ме чайті, дзикӧдз сотчан.
ИВАН. Ме ӧд, понимаешь ли, вевт вылас кайтӧдзыс на... бура видзӧдлі, кодарынӧсь ӧдзӧсъясыс.
ТАНЯ. Вежӧра дай.
ИВАН. Тыдалӧ, важъя тьӧтка рӧдӧ чужсьылӧма.
ТАНЯ (серӧктӧ). И гажа век.
ИВАН. Бур жӧникпу кодлыкӧ. Сӧмын вот... костюмӧй... неуна чишкассьыштіс. (Петкӧдлӧ сырйысьӧм костюмсӧ) Гӧтрасигкежлӧ вурӧдлі.
ТАНЯ. Пӧлинӧ, коді кӧть сьӧлӧм косьтысьыд аслад?
ИВАН (чӧв олыштӧм бӧрын). Татьяна Николаевна, эн юасьӧй талун... та йылысь. Ассьым сьӧлӧмӧс восьтыны сылы, код йылысь ме вӧлі думайта лун и вой, тыдалӧ, ковмас вунӧдны.
ТАНЯ. Мыйла сідз, Иван Ильич?
ИВАН. А вот... думайта. (здук мында чӧв олӧ). А помнитанныд, Татьяна Николаевна, орёлпи йылысь висьттӧ? Сэки ме челядь кодь на вӧлі. Ті сэки босьтінныд менӧ сойбордӧд... Ми пуксим жытник водзӧ...
ТАНЯ. Да, да. Помнита.
ИВАН. Вот и бур, мый помнитанныд. (Чӧв олӧ.)
ТАНЯ. Сэсся мый?
ИВАН. Сэсся?.. Кодыр орёлпиыс... гӧраяс костас усьӧм пыдди... лэбзис, ті шуинныд, сійӧ пӧ веніс ассьыс полӧмсӧ.
ТАНЯ. Бур тіян паметьыд, Иван Ильич.
ИВАН. А кыдзи чайтанныд, Татьяна Николаевна: чужӧмӧй менам... ёна мисьтӧм лоас?
ТАНЯ (повзьыштӧ) Мый ті, мый ті, Иван Ильич!
ИВАН (Таня вылӧ дыр видзӧдӧм бӧрын). Сідзкӧ... ёна... мисьтӧм лоас? (Бергӧдӧ чужӧмсӧ, чӧв олӧ.)
ТАНЯ (нормӧ кодь). Мыйла нӧ сідз сёрнитанныд, Иван Ильич? (Иван чӧв олӧ.) Оз ло мисьтӧм, Иван Ильич.
ИВАН (юрсӧ бергӧдтӧг). Восьса синмӧй... зэв доймӧ, Татьяна Николаевна. Тупкӧй и сійӧс тшӧтш.
ТАНЯ. Гашкӧ, збыльысь лоас бурджык... (Кӧрталӧ, кӧрталӧм бӧрас гусьӧникӧн бӧрдӧ.)
ИВАН. А бӧрдны оз ков. Мем сьӧкыдджык. Бурджык лоас, ми кӧ артыштам, мыйла тадзи лоис? Да. Тайӧ лоӧ бурджык, понимаешь ли. Ті кывзанныд, Татьяна Николаевна?
ТАНЯ. Ме кывза.
ИВАН. Дас витӧд объект — миян гордостьным. Тайӧс ті бурджыка ме дорысь тӧданныд. Видзӧма сійӧс стрӧитӧм вылӧ сы мында вын да кужӧмлун, мый вуджӧдны кӧ ставсӧ тайӧс морт нэм лыд вылӧ, босьтӧ уна сё мортлысь олӧмсӧ. Да лыддьӧй ещӧ, мыйдта вӧлі видзӧма вын наукасӧ да техникасӧ лӧсьӧдӧм вылӧ. И вот лоис пӧжар. Би мӧдіс матыстчыны главнӧй корпус дінас, ӧзйис нин сы дорын сулалысь постройка. Му вывсянь пӧжарникъяслӧн ваыс оз инмы медся коланінас. Биыс ӧні корис либӧ ӧти, куш ӧти морт олӧм, либӧ дзоньнас... главнӧй корпуссӧ. (Чӧв олыштӧ.) А кыдзи ті, Татьяна Николаевна, чайтанныд: думайті ме та йылысь сэки али эг?
ТАНЯ. Ог тӧд, Иван Ильич.
ИВАН. Тӧдӧмысь, эг. Ме сӧмын думайті, уся кӧ пытшкас, мед эськӧ ме киын век вӧлі пӧжарнӧй кишкалӧн помыс. Ме мӧда резны ванас ачымӧс да кусӧдчыны, кытчӧдз вежӧрӧй оз эновт. (Таня ньӧжйӧник кутӧ Иванлысь чужӧмсӧ, дыр кодь видзӧдӧ сы вылӧ да кузя окыштӧ. Иванлы тайӧ виччысьтӧм, шӧйӧвошлӧ.) А бӧрдны оз ков... Со кылӧ, воӧны нин мела.
ТАНЯ (видзӧдлӧ вӧла туйлань). Да. Збыльысь. Ачыс воӧ.
Кылӧ телега вӧлӧн локтӧм. Петкӧдчӧ Васька, аддзӧ Иванӧс, довкйӧдлӧ юрнас.
ВАСЬКА (Танялы). Ас вежӧрас?
ИВАН. Бура и пӧкмелитчи, Василий Петрович, чужан лунтӧ тэнсьыд справитӧм бӧрын.
ВАСЬКА. Шуӧны, абу прӧста. Аттьӧ зэв ыджыдӧс.
ИВАН. Нинӧмысь, Василий Петрович. Тэ эськӧ ме моз жӧ вӧчин.
ВАСЬКА. Пукавнысӧ верман телегаяс?
ИВАН (заводитӧ сьӧкыда чеччыны). Дерт, верма.
ТАНЯ (уськӧдчӧ). Эн ачыд!
ИВАН. Василий Петрович, ми Татьяна Николаевнакӧд... кыкӧн.
ВАСЬКА (телегалань муніг). Регыд самолёт воас. Ачыс Райкомса секретарь звӧнитіс Сыктывкарӧ. Бур врачьяс мӧдасны лечитны. Регыд бурдан.
ИВАН. Ті кыланныд, Татьяна Николаевна?
ТАНЯ. Ме зэв рад. Мӧда виччысьны тэнсьыд бурдӧмтӧ.
ИВАН (сувтовкерӧ). Энӧ дивитӧй менӧ... Кывворӧй, буракӧ, эновтіс Печиковӧс... Энӧ ӧткажитӧй... водзӧстӧ, понимаешь ли. (Окасьӧны. Васька видзӧдӧ да меліа нюмъялӧ)
Занавес.
КӦКЪЯМЫСӦД КАРТИНА
Ивановлӧн кабинет. Сійӧс ӧні бура обставитӧма. Мебель вежсьӧма. Пызан вылын кык телефон, ӧтиыс селекторнӧй. Сцена вылын Иванов ая-ныла.
ТАНЯ. Ме мӧдӧдчи. Мед лоас сідз, кыдзи шуим! Водзӧ кольччыны Сенялы тадзи оз позь. Колӧ найӧс ӧтувтны гӧтырыскӧд.
ИВАНОВ. Эн сёрмы.
ТАНЯ. Бур. А ковмас кӧ водзджык, юӧрт. (Петӧ.)
ИВАНОВ (босьтӧ трубка). Кыневӧс. Но, кыдзи тэнад, Семён Васильевич?.. Да-а... Овлӧ, овлӧ. Тані? Абу некод. Волы. (Пуктӧ трубка. Мыйкӧ думайтыштӧ, пасйышталӧ бумага вылӧ.)
Пырӧ Сеня, киас карандаш, бумага.
СЕНЯ. Талун кутшӧм луныс, Николай Антонович?
ИВАНОВ. Субӧта.
СЕНЯ. Бара нин...
ИВАНОВ. Кымынӧдысь ставсӧ?
СЕНЯ. Кызь квайтӧд опыт. И бара... (Шеныштӧ кинас.)
ИВАНОВ. Шензьыны оз коз. (Декламируйтӧ.)
Быд ыджыдтор, кыдз овлӧ пыр,
Ас пыдди дань — морт олӧм корӧ!
СЕНЯ. А ме эг на и тӧдлы, мый тэ стихъяс лыддьывлан.
ИВАНОВ. Лӧсьыда шуӧма. (Лыддьӧ выль пӧв, расстановкаӧн.) Стӧч шуӧма. И-мен-нӧ: «морт олӧм корӧ». Ставнас, мый эм сы пытшкын.
СЕНЯ. Ог помнит кодлӧн.
ИВАНОВ. Кӧсъян кӧ, тӧдмӧда. Талун сійӧ ачыс татчӧ воас.
СЕНЯ. Поэтыс? Вот и бур... А ӧні, Николай Антонович, (индӧ бумага вылас.) думайта неуна мӧд ног вӧчны. Формулаыс татшӧм.
ИВАНОВ. Ах-а! (Пуксьӧ пызан сайӧ.) Вежӧратор. Но... видзӧдлы та вылӧ. Мый эськӧ лоас, ми кӧ та местаӧ видлам тайӧ составсӧ? (Гижыштӧ.)
СЕНЯ. Думайтан?
ИВАНОВ. Ме, дерт, ог кӧсйы тэд кӧвъявны.
СЕНЯ (босьтӧ бумага). Ыджыд аттьӧ, Николай Антонович. Ыджыд аттьӧ! Думыштла. (Ӧдйӧ заводитӧ петны, сэсся ӧдзӧс дорсянь несмела бергӧдчӧ.) Николай Антонович... ӧти вопрос.
ИВАНОВ (пуктӧ кисӧ Сенялы пельпом вылас). И менам эм ӧти вопрос тэ дінӧдз, Семён Васильевич. Гӧтырыдкӧд аддзысьлан?
СЕНЯ. Тайӧ тэнад вочакыв менам юалӧм вылӧ?
ИВАНОВ. Абу.
СЕНЯ. Гӧгӧрвоа. Тэ кӧсъян шуны: оз-ӧ позь кӧть здук кежлӧ эновтлыны ассьыд лабораториятӧ, корсьны гӧтыртӧ, юасьны сылысь, мыйла сійӧ пышйис ме дінысь, менам бать-мам ордысь.
ИВАНОВ. Да, стӧч тайӧ кӧсйи шуны.
СЕНЯ (петігмозыс). Тэ прав. Но сет меным ещӧ некымын минут, некымын час, а гашкӧ-й — лунъяс, тӧлысьяс. (Сьӧлӧмсянь.) Тэ гӧгӧрвоан менӧ?.. Ог вермы ме эновтны ассьым лаборатория сэтчӧдз, кытчӧдз оз артмы сійӧ, мый ме кӧсъя.
Телефоннӧй звонок. Иванов босьтӧ трубка. Сеня петӧ.
ИВАНОВ. Кывза, диспетчер ёрт! Бур. (Матыстӧ ас дінас микрофон.)
ДИСПЕТЧЕРЛӦН ГӦЛӦС. Войвыв группаса начальник микрофон дорын.
ИВАНОВ. Заводитам. Иванов кывзӧ.
НАЧАЛЬНИКЛӦН ГӦЛӦС. Чолӧм, Николай Антонович!
ИВАНОВ. Чолӧм, Андрей Григорьевич! Докладывайт общӧй лыдпасъяс.
НАЧАЛЬНИКЛӦН ГӦЛӦС. Выполнитӧма вит лунся график: капитальнӧй строительство кузя 89 прӧчент, мувывса уджъяс — 92 прӧчент, туй стрӧитӧм кузя сӧмын 50 прӧчент.
ИВАНОВ. Мыйын помкаыс?
НАЧАЛЬНИКЛӦН ГӦЛӦС. Куим лун чӧж пурга вӧліс, Николай Антонович.
ИВАНОВ. Сэтшӧм водз?
НАЧАЛЬНИКЛӦН ГӦЛӦС. Тані тӧв миян пуксьӧ.
ИВАНОВ. Шогмытӧм, Андрей Григорьевич. Зэв лёк. Лоас думыштлыны. Ставсӧ артыштӧй сэні, места вылас, да аски дас сизимын доложитан подробнӧя. Миян мог босьтны войвыв природасӧ ас киӧ прамӧйджыка. Тырмас сылы ыджыдавны йӧз вылын. Кӧзяеваыс ӧні ми, сӧветскӧй йӧз! Стӧча ме шуа, Андрей Григорьевич?
НАЧАЛЬНИКЛӦН ГӦЛӦС. Стӧча. Николай Антонович.
ИВАНОВ. Некутшӧм уступка! Менам ставыс. Аски тӧлкуйтны прамӧйджыка. Видза колян!
НАЧАЛЬНИКЛӦН ГӦЛӦС. Аскиӧдз, Николай Антонович!
Пырӧ Ивановлӧн личнӧй секретарь.
СЕКРЕТАРЬ. Кынев гозъяыд воисны.
ИВАНОВ. Мед пырӧны.
Ачыс петӧ секретарь бӧрся. Здук мысти: пыртӧ Васька гозъяӧс. Найӧ праздничнӧй паськӧмаӧсь.
ВАСЬКА (Марьялы). Вот сійӧ кӧні олӧ.
ИВАНОВ. Пуксьӧй, шойччӧй. (Индалӧ стулъяс вылӧ.)
МАРЬЯ (видзӧдӧ гӧгӧрпӧв). Вӧчӧма тай, майбыр, тырмӧма вежӧр и мывкыд.
ВАСЬКА. Менам старука сӧмын и шензьӧ.
МАРЬЯ. Да кыдз нӧ он шензьы, старик? Ме ӧд некымын во сайын на вошлі тайӧ местаясас ельдӧг корсигӧн. Черӧн сӧтлытӧм вӧр вӧлі.
ИВАНОВ. А ещӧ некымын во бӧрын, Марья Сидоровна, бара позяс вошны: сы ыджда карыс тані лоас.
МАРЬЯ. Кывзӧй жӧ, кывзӧй!.. Тайӧ, буди, мойдын кодь нин олӧмыс лоис-а? Рытнас водан — нинӧм на абу, а асывнас чеччан — двӧреч сулалӧ. (Иванов да Васька сералӧны.) Дивитӧй кӧть эн сэсся. Велӧдчӧм кывъясӧн сёрнитны ог куж. Ме ӧд со кувны регыд мӧда, а аслам вӧлӧстьысь кындзи некытчӧ на эг волы.
ВАСЬКА. Кувны миянлы водз на.
МАРЬЯ. Тэ, старик, эн шу сідзи. Кувны и колис сӧмын. Пиыд эновтіс, ичмоньыд пышйис гортсьыд.
ВАСЬКА. Мый нин тэ, старука? Пиыд эз жӧ эновт.
Пырӧ секретарь.
СЕКРЕТАРЬ. Кынева Анна локтіс.
ИВАНОВ. Лэдзны.
Секретарь петӧ.
МАРЬЯ. Кутшӧм Анна?
ВАСЬКА. Пырас — аддзан.
ИВАНОВ. Тіян ичмоньыд, Марья Сидоровна. Сійӧ ӧні уджалӧ ӧти заводын, и ме сійӧс кори татчӧ зэв важнӧй делӧӧн.
Пырӧ Анна. Васькаӧс да Марьяӧс оз аддзы.
МАРЬЯ (Васькалы). Збыль тай.
ВАСЬКА. Чӧв ов.
АННА. Висьталісны, срочнӧ пӧ корӧмныд... Пӧжар делӧ кузяыд, кӧнкӧ?
ИВАНОВ. Пуксьы, шойччы.
АННА. Но вот... Котӧрта вӧлі весьӧпӧрӧм морт моз тіян бӧрся. Дас витӧд объектын тыдовтчис нин, пӧжарыс и. А сэсся мыйкӧ сьӧлӧмӧс топӧдны мӧдіс. Час, мися, лолышта, мед личмуныштас сійӧ. Уськӧдчи туй бокас понӧль улӧ. Друг кыла: кодъяскӧ петӧны вӧрсяньыс, сёрнитӧны. Ме и сайӧдчышті. Вӧлӧмакӧ, эсійӧ лёк Матреныс да кутшӧмкӧ дядьӧ. Дядьӧыс торйӧдчис. Ме шыаси Матренлы. А сэсся сыкӧд и муні.
Тайӧ кадӧ ньӧжйӧник воссьӧ ӧдзӧс. Зэв ёна виччысьӧмӧн пырӧ Сеня. Сійӧ киын стекляннӧй колба. Опыт, тыдалӧ, удачнӧй, но процессыс колбаын мунӧ на. Сеня оз лысьт прамӧя лолыштны. Сійӧс оз аддзыны. Оз видзӧдлы прамӧя и Сеня кабинетын пукалысьяс вылӧ, оз кӧсйы йӧз водзын петкӧдлыны Ивановлы ассьыс опытсӧ, кӧсйӧ бӧр петны. Но кылӧ тӧдса гӧлӧс. Видзӧдлӧ пукалысьяс вылӧ. Аддзӧ бать-мамсӧ. Анна сулалӧ сылы мышкӧн. Шемӧсӧн кывзӧ.
ИВАНОВ. И кыдзи тэ гӧгӧрвоин висьтавны та йылысь кытчӧ колӧ?
АННА. Ме первойсӧ эг и вежӧрт. Заводиті нин уджавны. А тайӧ Матреныс мекӧд зэв ёна меліасьӧ, кӧні колӧ и оз ошкӧ менӧ. Ме думайта: «Мыйся бурысь нӧ сійӧ менӧ сэтшӧма радейтӧ?»
СЕНЯ. Анна...
АННА. Думайті вой дай мӧдӧс. Ме кӧть ӧд сёрнитнысӧ абу велалӧма, а думайтнысӧ зэв ёна радейта... Сэсся и пӧжарыд бара тӧд вылӧ усис. Вот и думайта: мися, шливки сёйӧм бӧрын кань джодж шӧрӧд оз ветлы. Прӧста и тайӧяс гусьӧн оз ветлыны.
СЕНЯ (гораа). Анна!..
Ставыс видзӧдлӧны Сенялань.
МАРЬЯ (уськӧдчӧ). Семенушко! Дитяӧй! Эновтін тай миянӧс!
СЕНЯ (колбасӧ лэптӧ вывлань повзьӧмӧн горӧдӧ). Мамӧ, эн матыстчы!.
МАРЬЯ. О, господи!..
ИВАНОВ (уськӧдчӧ Сеня дінӧ, босьтӧ колбасӧ, видзӧдыштӧ сы пытшкӧ, нимкодьысь горӧдӧ.) Ёртъяс! Василий Петрович! Нимкодясь пиыд вӧсна!
ВАСЬКА (Марьялы). Ме тэд шуи...
МАРЬЯ. Мый нин бара сэтшӧмыс?
ИВАНОВ (видзчысьӧмӧн петӧ ӧдзӧсӧд) Ме бӧрся!.. Василий Петрович, Марья Сидоровна! Ме бӧрся!
Куимӧн петӧны. Сеня первойсӧ оз тӧд петны не, сэсся мудзӧм морт моз пуксьӧ улӧс вылӧ. Анна копыртӧ юрсӧ. Здук-мӧд чӧв.
СЕНЯ. Ми, буракӧ, важӧн нин эг аддзысьлӧй тэкӧд. (Анна оз шыась. Сійӧ муртса вермӧ кутны ассьыс чувствояссӧ.) Мыжа тэ водзын, Анна, прӧстит. Кадсӧ жалиті. Срочнӧй удж вӧлі. Эг вермы волыны тэ дінӧ.
АННА. Ме ачым мыжа.
СЕНЯ (сувтӧ, видзӧдӧ Анна вылӧ). Тэ ӧд он нин лӧгав ме вылӧ?..
АННА. Ме важӧн прӧститлі тэнӧ. Кымын вой эг узьлы тэ вӧсна! Но яндзим вӧлі петкӧдчыны тэнад син водзӧ. Ме унатор гӧгӧрвои. И ог кӧсйы овны тэтӧг, Сеня!
СЕНЯ (кутлӧ Аннаӧс). Анна! Мусаӧй! Да тэ-ӧ тайӧ?
АННА. Ме тӧда, тэнад сьӧлӧмыд бур. Тэ отсалан меным воштысьны мортӧдз. Ме кӧсъя лоны тэныд не сӧмын гӧтырӧн, но и удж кузя ёртӧн. Ме унатор тӧдмалі тайӧ кадас. Ме ставсӧ верма! Сенюк!
СЕНЯ. Пасибӧ, Аннуш! Пасибӧ!
Сеня да Анна окасьӧны. Тайӧ кадӧ пырӧны Иван да Таня.
ИВАН (Танялы). Ставыс пӧрадокын, понимаешь ли. Петавлам. (Петӧны.)
АННА. Кодкӧ кылӧ пыравліс?
СЕНЯ. Гашкӧ и пыравліс. (Пуксьӧ.) Тэ висьтась, кыдзи олін-вылін.
Ӧдзӧсӧ стучитӧны. Пырӧны Иванов, Марья, Васька, Иван да Таня. Ставыс кыпыдӧсь.
ИВАНОВ (Сенялы). Но, Семён Васильевич! Радуйтін тэ менсьым пӧрысь сьӧлӧмӧс! (Кутлӧ Сеняӧс.) Опытыд артмӧма!
СЕНЯ. Ыджыд аттьӧ, Николай Антонович, отсӧгсьыд!
ИВАНОВ. А ӧні, Семён Васильевич! Кора тӧдмасьны том поэткӧд. (Индӧ Иван вылӧ.)
АННА (нимкодьысь уськӧдчӧ Марья дінӧ). Дона мамук!
МАРЬЯ. Менам муса ныв! (Кутлӧ.)
СЕНЯ. (шензьыштӧ.) Поэт?..
ИВАН. Николай Антонович, эн янӧд пӧрысь йӧз дырйиыс!
ИВАНОВ (декламируйтӧ).
Быд ыджыдтор, кыдз овлӧ пыр,
Ас пыдди дань — морт олӧм корӧ!
ИВАН. Татьяна Николаевна!.. Понимаешь ли... Оз жӧ позь любовнӧй письмӧяс петкӧдлыны батьлы. Ай-ай-ай!..
ТАНЯ. Но сӧгласитчы мекӧд, Иван Ильич, кодлысь оз лыддьыны поэзиясӧ, сійӧ абу на поэт!
СЕНЯ. Ӧти здук, ёртъяс, ӧти здук!.. Мем кажитчӧ: поэзия петкӧдчӧ не сӧмын стихъясын.
ИВАН (кыпыда). И колӧ шуны: миян пӧвстын медся ыджыд поэтыс — Николай Антонович, кодӧс татчӧ ыстылісны миян партия да Сталин ёрт. Николай Антонович — удж музыкалӧн дирижёр, коді сяммис садьмӧдны дзор нэмъяс чӧж вугралысь вӧр-ванымӧс, кӧні (декламируйтӧ):
Кузь тӧвъяс чӧжӧн, жвучкӧ-койтӧ
Морозкӧд ӧтув лэчыд войтӧв,
А шонді пыдди чизыр войӧ
Сиянье резӧ кӧдзыд биӧн,
Кӧн сёрмӧм тулыс мукӧд воӧ,
Водз аркӧд паныдасьлӧ воча,
Тыш панлӧ югыд гожӧм шӧрын.
Кыдз курыд вина юӧм бӧрын.
Тайӧ кадӧ воссьӧны ӧшиньяслӧн шторъяс и тыдовтчӧ выль промышленнӧй карлӧн вид. Сцена сайын заводитчӧ Сталин йылысь песня.
Но медся ыджыд аттьӧ сылы
(Индӧ Сталин портрет вылӧ.)
Ми сетам талун ставсянь сыысь,
Мый медбур чувствояслысь струна
Ми пытшкысь вӧрзьӧдіс, и уна,
Зэв уна ме кодьыс и ті кодь
Дзик выль пӧв чужим небытьеысь.
Сьылӧм ӧтарӧ гораммӧ. Ставӧн сьылӧны.
ЗАНАВЕС
