КУЧИК КРЕСЛӦ
ВОРСЫСЬЯС:
ЛЕВ ПЕТРОВИЧ МОШКИН — райпромкомбинатса директор, 50 арӧса.
АВЕРЬЯН СИЛЫЧ МОЖЕВЕЛЬНИКОВ — мебельнӧй цехын мастер, 60 арӧса.
ТЕКУСА ИВАНОВНА ЗАВЕРТАЙЛО — райпромкомбинатса главбух, 40 арӧса.
НОННА МАРКОВНА — районын тӧдчана мортлӧн гӧтыр, 40 арӧса.
Директорлӧн кабинет. Удж вылӧ локтӧ Мошкин — ньӧжмыд, асьсӧ вылӧ пуктысь. Аслас местаӧ пуксьӧм мысти чуньяснас делӧвӧя таркӧдыштӧ пызанӧ. Мыйкӧ уськӧдӧ тӧдвылас да нюмъялӧ.
МОШКИН (босьтӧ телефоннӧй трубка). Два пятнадцать меным... Чолӧм, муса друг! Кыдзи овлан? А юрыд оз вись? Аттӧ, сё мокасьт!.. Пӧкмелитчытӧг, сідзкӧ, нинӧм оз артмы. Менам? Менамтӧ мӧд делӧ: тренировкаыс бур! (Гажаа сералӧ.) Да, да... Кывза. Мый шуан? (Вежсьӧ чужӧм вылас.) Кыдзи? Кодыр? Секрет? Тэ, зонмӧ, тайӧс эновт. Кутшӧм сэн вермас лоны секрет, весиг тэныд кӧ тӧдсатор. (Гусьӧнмоз.) Но ӧд буретш тайӧ райисполкомыслы ме вӧчлі аслам комбинат йылысь отчётсӧ дзик на неважӧн. Абу планӧвӧй?.. Со кыдз!.. Мудера, мудера. (Пуктӧ трубкасӧ.) Сі-и-дз!.. Татшӧм немвиччысьтӧм уськӧдчылӧмыс коркӧ шусьыліс «лёгкӧй кавалериялӧн» налётӧн. Кыдз жӧ: эз на вун, эз. Коркӧ и ачым эг ӧтчыд ыстывлы сійӧс кытчӧ сюрӧ. Но, колӧ шуны, ыстыны «кавалериятӧ» мӧдъяс ордӧ ёна бурджык ас ордад виччысьӧмысь. (Скӧрысь сувтӧ.) Оз артмы тайӧ тіян! Мошкинӧс и сьӧкыд артиллерияӧн оз позь суны немвиччысьтӧг. А сёрниыс кӧ мунӧ сы йылысь, мед сійӧс ещӧ на улӧджык лэдзны службаыс кузя, то ме верма висьтавны та вылӧ со мый... (Водзӧ оз висьтав. Сёрнитӧ аслыс.) Да, тэ энлы тадз ерепенитчы. Вермас дзож артмыны... Дерт, министрӧн лоны ме ог шогмы. Весиг ог и кӧсйы лоны министрӧн. Кыланныд тайӧс? Ӧтчыд кӧ эгджык воӧдчы таӧдз, мӧдысь нинӧм нин думайтны. Ме ӧд эг на весьӧпӧр, мед пуксьыны не ас местаӧ. Но и райпромкомбинатса директорысь улынджык ог кӧсйы лоны. Таысь улӧджык лэччӧм дорысь меным бурджык нин кувны. Сідзкӧ, визьӧй менам тырвыйӧ гӧгӧрвоана, да, гӧгӧрвоана! А тіянлы, районнӧй веськӧдлысь дона ёртъяслы, ме пӧжала сэтшӧм отчётнӧй доклад, мый чунь помъястӧ мӧданныд нювны. (Грӧзитӧ чуньнас.) Кодлы-кодлы, а менымтӧ бура тӧдса: ӧд и тіянлы лоӧ отчитывайтчыны гырысьджыкъяс водзын. Менам показательяс — тшӧтш и тіян удж. Менам отчёт — и тіян отчёт! (Ӧдзӧсӧ стучитӧны.) Да. Пырӧй.
Пырӧ Аверьян. Сійӧ рабочӧй фартука, киас чертёж.
АВЕРЬЯН. Бур асыв, Лев Петрович!
МОШКИН. Бур асыв, Аверьян Силыч! Мый тэнад сэтшӧмыс?
АВЕРЬЯН (сетӧ бумага). Выль стуллӧн чертёж. Помнитанныд, коркӧ вайлі нин... Ӧні ещӧ на бурмӧдышті. Зэв ёна окота, Лев Петрович, вӧчны сэтшӧм продукция, коді эськӧ вӧлі кокни и ён, мича и донтӧм.
МОШКИН (видлалӧ чертёж). Сідз, сідз... Ошкантор, Аверьян Силыч, ошкантор. Сідзкӧ, быдмам ми тэкӧд, совершенствуйтчам. Радӧвӧй мастер локтӧ аслас директор дінӧ ас чертёжъясӧн!.. Ыхм... Бур, бур... А вот тайӧ детальыс... Видзӧдлы, тайӧ детальыслы колӧ лоны ёнджыка эстетичнӧйӧн.
АВЕРЬЯН. Мыйӧн, Лев Петрович?
МОШКИН. Эстетичнӧйӧн.
АВЕРЬЯН. Гӧгӧрвоа, сідзкӧ: колӧ вӧчны сэтшӧм продукция, кодӧс эськӧ ньӧбисны тышкасьӧмӧн. А то, ачыд тӧдан, став миян складъяс тырӧмаӧсь вузавтӧм изделиеӧн. (Аддзӧ Мошкинлысь шома чужӧмсӧ.) Дерт, директорлы тыдаланаджык... Но, босьтны кӧ мӧдар боксянь, старукаӧй оз сет овны: пӧльзаыс пӧ тэысь, пӧрысь выжывысь, грӧш дон абу, зарплата пыдди куш авансъяс гортӧ вайлывлан.
МОШКИН. Авансыс ӧд деньга жӧ, Аверьян Силыч.
АВЕРЬЯН. Тӧдӧмысь, деньга, Лев Петрович. Но удждоныд бурджык, пӧлучайтны кӧ сійӧс ас кадӧ.
МОШКИН. А коді мыжа таын, татшӧмӧсь кӧ миян потребительяс?
АВЕРЬЯН. Тайӧ збыль. Зэв ёна видӧны миянлысь комбинатӧс. Ассортиментъяс быд сикасӧс корӧны — телегаяс, додьяс, сийӧс-кӧлуй, мортлы быдлунся коланторъяс. А кытысь ми сійӧс босьтам, ог кӧ вӧчӧ?..
МОШКИН (жальпырысь). Нинӧм он кер, Аверьян Силыч, ми выполняйтам планъяс.
АВЕРЬЯН. «Планъяс»?.. Ми тэкӧд вӧчам прӧчентъяс.
МОШКИН. Тэ мый кӧсъян висьтавны тайӧн?
АВЕРЬЯН. Буретш тайӧ прӧчентъяс вӧсна лоис вӧчны мебель дзик уль вӧрысь. Гашкӧ, эн на вунӧд, ме ещӧ зэв ёна пыкси, кор тэ...
МОШКИН (торкӧ). Вӧлі кӧ тэ местаын ме, эськӧ пыкси ещӧ на ёнджыка.
АВЕРЬЯН (чуймӧ). Тайӧ нин мый ради?
МОШКИН. Ме эськӧ мӧді тэ ног жӧ сёрнитны. Таысь кындзи, тӧдвылад кут менсьым характерӧс.
АВЕРЬЯН. Тэ менӧ воштін тӧлк вылысь. Ог гӧгӧрво.
МОШКИН (гусьӧнмоз). Не кӧ тайӧ прӧчентъясыс, важӧн эськӧ тупкисны миянлысь комбинаттӧ...
АВЕРЬЯН. Да мый тэ сёрнитан, Лев Петрович!.. Кыдз нӧ тадз позьӧ? Дзонь район вылӧ ӧти комбинат, и друг сійӧс тупкыны. Оз, некутшӧм ногӧн тайӧс оз позь лэдзны. (Скӧралӧ.) Да ме, тӧдан кӧ, райисполкомса председатель дінӧдз эськӧ вои! Ставсӧ эськӧ ӧтитӧг висьталі.
МОШКИН. Мый йылысь?
АВЕРЬЯН. Кыдзи мый йылысь? Миян комбинат йылысь. Сылӧн нуждаяс йылысь. Бур йӧзлӧн нуждаяс йылысь.
МОШКИН. Скӧравтӧг, Аверьян Силыч, скӧравтӧг. Тіян эм директор, и сійӧ быд здукӧ вермас висьтавны миян властьлы ставтор йылысь, а медся нин организованнӧйджыка, некутшӧма партизаниттӧг.
АВЕРЬЯН. Партизанъяс йывсьыд — абу сідз. Великӧй Отечественнӧй война дырйи найӧ петкӧдлісны организованностьлысь пример. А сёрнитны кӧ райисполкомса председатель йылысь, ме сійӧс бӧрйылі, ме и чӧвтны верма, оз кӧ мӧд кывзысьны миянӧс, избирательясӧс.
МОШКИН. Тайӧ тэ, зонмӧ, унджык нин босьтан ас вылад. И, сёрнитны кӧ, Аверьян Силыч, збыльысь...
АВЕРЬЯН (торкӧ). Сёрнитны кӧ збыльысь, Лев Петрович, меным дышӧдіс овны аванс вылад. А медся нин, яндзим миян комбинат вӧсна.
МОШКИН. Со кыдзи, вӧлӧм!
АВЕРЬЯН. Босьтам пример вылӧ кучик креслӧтӧ.
МОШКИН. Тайӧ важъятор.
АВЕРЬЯН. Сӧран. Абу важъятор. Медся бур, медся дона кучик кӧлуй видзӧма не колана ногӧн. Мый могысь?
МОШКИН. Ковтӧм юалӧм.
АВЕРЬЯН. Тайӧ экстреннӧй креслӧ вӧсна кольӧм во тэ торкин менсьым отпускӧс. Ме уджалі лун и вой. А креслӧыд ӧнӧдз на вузавтӧм. Мӧд во чӧж мыйта деньга прӧста кутӧ ас пытшкас.
МОШКИН. Кывзы, менам важ другӧй! Мыйла татшӧм скӧр тэ талун?
АВЕРЬЯН. Ме висьталі нин... Некутшӧм тӧлк абу миян уджалӧмысь.
МОШКИН. И тайӧ ставыс?
АВЕРЬЯН. Ставыс. Позьӧ мунны?
МОШКИН. Да. Позьӧ. Энлы. Либӧ, мун...
АВЕРЬЯН (аслыс). Кутшӧм нин могӧн и пыравлі... Вот сісь паметьӧй... (Петӧ.)
МОШКИН. Зэв ӧпаснӧй морт тайӧ меным. Лоас вӧтлыны удж вывсьыс аслас кӧсйӧм серти! (Выльысь видлалӧ чертёж.) Аттӧ, зонмӧ, мый думыштӧма: выль продукция лэдзны! Да ещӧ медым став нёльнан качествоыс: кокни и ён, мича и донтӧм. А кытчӧ прикажитан воштыны важ продукциясӧ? Менам сьылі вылӧ? Аттьӧ велӧдӧмсьыд! Йӧйӧс аддзӧма... Он на дурӧй зэв ёна! Он кӧсйӧ, да ньӧбанныд! Менсьым кындзи ӧд ньӧбнысӧ некытысь. Таын менам кӧзырыс! Вӧтлыны!.. Но, ме кӧ сійӧс вӧтла, сэки сійӧ збыльысь мунас норасьны. Сэтчӧ жӧ сылӧн зарни кияс. Татшӧм киястӧгыд ме, веськыда кӧ шуны, и грӧш доныс ог сулав. А? Мый нӧ меным вӧчны?.. Кыдзи сыысь мынтӧдчывны кӧть сійӧ кад кежлӧ, кытчӧдз оз ло вӧчӧма райисполкомын отчёт? Вермасны сійӧс корны отчёт вылас, и ме пола — солалас меным. Энлы... Аддзи. Курортӧ сійӧс, курорт вылӧ! (Босьтӧ телефоннӧй трубка.) Райпрофсовет меным. Илья Антипович? Чолӧм! Мошкин. Илья Антипович, зэв ыджыдторйӧн тіян дінӧ шыася.
Бӧр пырӧ Аверьян. Нимсӧ кылӧм бӧрын сувтӧ ӧдзӧс дорӧ.
Мебельнӧй цехын менам уджалӧ важ мастер Аверьян Силыч Можевельников — честнӧй морт и бур мастер. Но Аверьян Силычлы колӧ бурджыка шойччыны. Оз-ӧ тіян сюр курортӧ путёвка? Кытчӧ и кутшӧм кадӧ?.. Ме ӧні тайӧс ог на вермы висьтавны, аскӧдыс эг на сёрнит. Оз позь, оз позь старикъяс вӧсна тӧждысьтӧгыс!.. Кисловодскӧ? Зэв лада. Аттьӧ, ыджыд аттьӧ! Тӧдмала — юӧрта.
АВЕРЬЯН. Тайӧ сыысь, мый видчим тэкӧд?
МОШКИН. Тэ тані?.. Эг, эг сыысь. Кӧсъя небзьӧдны кольӧм вося ассьым ӧшибкаӧс. Ме вӧчлі лёка, мый торклі тэнсьыд отпусктӧ.
АВЕРЬЯН. А век жӧ?
МОШКИН. Век жӧ, ме тэнӧ пукта пыдди и донъяла зэв вылӧ. Тэнад критикаын эм мыйтакӧ правда.
АВЕРЬЯН. Сідзкӧ, аттьӧ сыысь, мый эн соссьы да мый тӧждысян ме вӧсна.
МОШКИН. Тэнад ӧні мог: дзик пыр жӧ ветлыны врачьяс дінӧ комиссия вылӧ. Аски петан туйӧ.
АВЕРЬЯН. Татшӧм ӧдйӧ?
МОШКИН. Путёвкаыс оз терпит.
АВЕРЬЯН. Аттӧ, сё мокасьт, кыдз нӧ тайӧ... Сэтшӧм виччысьтӧмтор. Кытысь ме туй вылӧ деньгасӧ аддза.
МОШКИН. Деньга вӧсна эн тӧждысь. Ставсӧ лоас ладмӧдӧма.
АВЕРЬЯН (нимкодьпырысь). Кисловодскӧ! Сӧветскӧй Союзса медся бур курортӧ! Весиг думыштлыны эг сяммыв!.. А друг старухаӧй шуас: пукав гортын. Сійӧ ӧд менам зэв вежӧгтысь!
МОШКИН (шуткаӧн). И тайӧс ми ладмӧдам. Аддзам тэныд заместительӧс, кутшӧмкӧ дӧвечӧс.
АВЕРЬЯН. Но и мудер!.. Он-ӧ асьтӧ кут тӧдвылад?.. Сета бур сӧвет пӧрысь Фамусовлысь, кӧть эськӧ асьсӧ Фамусовсӧ кедзовта сылӧн помещичӧй социальнӧй положение вӧсна: «Нельзя ли для прогулок подальше выбрать закоулок?»
МОШКИН. О, да тэ классика тӧдан!
АВЕРЬЯН. Мыйла нӧ мем не тӧдны! Вит во чӧж дорвыв кывзі литература кузя урокъяс. Первойсӧ... кыдз нин сійӧ... «Горе от умасӧ» велӧдіс менам ыджыд пи, мӧд вонас — Наташа ныв, сэсся Саша, сы бӧрын — Коля, и сӧмын таво помаліс Оля. Ме, кыдз аддзан, неуна тӧдса жӧ средньӧй образованиеыдкӧд!
МОШКИН (лапкӧдыштӧ пельпомас Аверьянлы). Действуйт, старина, действуйт.
АВЕРЬЯН. Тайӧ збыль. Ме лишнӧй дыр мӧді варовитны. (Мӧдӧдчӧ ӧдзӧс дінӧ, сувтӧ.) Мый кузя нӧ ме волі?.. Да, чертёж кузя.
МОШКИН. Сы йылысь эн тӧждысь, Аверьян Силыч. Шойччыны ветлігкостіыд ми тані сійӧс обсудитам, сӧгласуйтам, утвердитам. Став инстанцияясті удитас прӧйдитны.
АВЕРЬЯН. Мед эськӧ воддзамозыд эз жӧ артмы... Мед эз жӧ вош. Тӧдан кӧ, лоны авторӧн, кольны человечестволы аслад конструкцияа кӧть нин прӧстӧй стул, век жӧ бурджык нинӧм не кольӧм дорысь... Сідз, ме мӧдӧдчи. (Петӧ.)
МОШКИН (аслыс). Да, ме вӧчи правильнӧ: не вӧтлыны, а мавтыштны... Вывтіджык ыръянитӧмнад сьӧкыд асьтӧ дорйыны. Торъя нин миян кадӧ. (Ветлӧдлӧ кабинет кузя.) Хм... Сійӧ юалӧ: мый могысь кучик креслӧ? Мый нӧ, вочавидза, колӧкӧ, кытчӧдз некод на эз пыр татчӧ. Татшӧм кучик креслӧсӧ лои вӧчӧма менам тшӧктӧм серти. Тайӧ миян комбинатлӧн номенклатурнӧй продукция. Кутчысьны нинӧм дінӧ. Ставыс сыын, кодлы вӧлі индӧма креслӧсӧ. Кучик креслӧ вӧлі индӧма министерствоса главнӧй ревизорлы! Сідзкӧ, кыдз нӧ позис вӧчны сійӧс главнӧй ревизорлы прӧстӧй материалысь? Но кодыр номенклатурнӧй продукциясӧ лоис вӧчӧма не номенклатурнӧй продукцияысь, сэк ме эг вермы пуктыны сылы номенклатурнӧй дон. Продукция вермис лоны вузалӧма сӧмын себестоимостьысь да та дінӧ ещӧ вель ыджыд скидка вӧчӧмӧн. Кутшӧм основание серти? Некутшӧм основаниетӧг. Сідзи вӧлі колӧ, мед ёнмӧдны позиция начальство водзын. Тайӧ не первойысь. А шуны кӧ мӧд кывъясӧн, Мошкин ёрт? Мыйла нӧ мӧд кывъясӧн, кор и сідз гӧгӧрвоана... Ме ӧмӧй мыжа, тайӧ ревизорыс кӧ сэтшӧма оз радейт асьсӧ. (Тӧдвылас мыйкӧ уськӧдӧ.) Да. Ме вунӧдчи отчётнӧй доклад йывсьыд. (Пуксьӧ пызан сайӧ.)
Пырӧ Текуса Ивановна.
ТЕКУСА. Коринныд, Лев Петрович?
МОШКИН. Да. (Ӧзтӧ папирос.) Пуксьӧй.
ТЕКУСА. Аттьӧ.
МОШКИН (тэрмасьтӧг). Сёрниыс оз ло официальнӧй. Тіянкӧд мӧда сёрнитны кыдзи морткӧд, а ог кыдзи менам главнӧй бухгалтеркӧд. Гӧгӧрвоанныд, кыдзи морткӧд!
ТЕКУСА (меліа нюмъялӧ). А бухгалтерыс кӧ — морт?
МОШКИН. Збыль! Бухгалтерыс кӧ — морт! Тӧлкӧн шуӧма! Тайӧ, Текуса Ивановна, тіян характер серти.
ТЕКУСА. Ме тіян ордын зэв на регыд, Лев Петрович. Мортлӧн характерыд — абу чышъян, ӧти видзӧдлӧмӧн он донйышт.
МОШКИН. Тӧданныд, мый ме шуа: чужан лунсяньыд тіянлы нелямын арӧс, кык тӧлысь да вит лун. Став тайӧ кадсӧ олігчӧж ті ни ӧтиысь эн эновтлӧй миянлысь планетанымӧс — Муӧс.
ТЕКУСА. Ті тайӧс мый ради?
МОШКИН. Миян нэмӧ Му планета эз нин ло сэтшӧм ыджыдӧн, мед не тӧдны сы вылын олысь быд морт йылысь, дерт, кӧсъян кӧ тӧдны... Водзӧ сёрнитны та кузя? (Текуса чӧв олӧ.) Ме бура тӧдлі и тіянлысь верӧстӧ. Ті кӧсъянныд юавны — кодсӧ? Мӧд верӧстӧ. Жебиник морт. Оз сулав жалитны.
ТЕКУСА. Висьталӧй, мый ради тіянӧс татшӧм ёна интересуйтӧ менам семейнӧй положениеыс?
МОШКИН. Ей-бог, ті зэв вежӧра морт. Тіянкӧд кокни ӧти кывйӧ воны.
ТЕКУСА. Ог гӧгӧрво, Лев Петрович.
МОШКИН (сувтӧ). Менам покойнӧй гӧтыр кыдзкӧ ӧтчыд меным шуис: «Тэнад, Лёва, вывтіджык восьса душаыд». Кыдзи думайтанныд ті, Текуса Ивановна, тайӧ бур али лёк?
ТЕКУСА. Кыдзи-й шуны тіянлы... Тайӧ душаыс кӧ дзикӧдз восьса да ещӧ кодлы сюрӧ — тайӧ, ме ногӧн, лёк. Тані колӧ лоны кутшӧмкӧ норма.
МОШКИН. Меным гӧгӧрвоана ӧтитор, тіянкӧд ме верма лоны восьса душаӧн. (Петкӧдлӧ, мый быттьӧкӧ яндысьыштӧ.) Видзӧдтӧ, Текуса Ивановна... Кор мортыс абу на дзикӧдз пӧрысь, но и абу нин том... Да абу, абу тайӧ кывъясыс... Кор морт заводитӧ дуркмыны аслас ӧтка олӧмла... Да мый ме сёрнита?.. Эн дивитӧй, верманныд кӧ... Висьтала веськыда: ме ӧтка морт, и ті ӧтка морт.
ТЕКУСА (сувтӧ). Со тай мыйын вӧлӧма аскост сёрниыс! Ті он сералӧй ме вылын, Лев Петрович?
МОШКИН. Мый ті, Текуса Ивановна, мый ті? Ме, тыдалӧ, прӧста эг сяммы висьтавны кывйӧн, мый вӧлі менам сьӧлӧм вылын. И он кӧ кӧсйӧ та йылысь кывзыны, ог мӧд дӧзмӧдчыны... Эн на мунӧй. Пуксьӧй. Мӧдам сёрнитны мӧдтор йылысь. Миян удж йылысь. Бур?
ТЕКУСА. Бур. Ме кывза. (Бӧр пуксьӧ.)
МОШКИН. Ме ог кӧсйы дзебны тіянысь збыльлунсӧ: миян комбинат сьӧкыда мӧдіс овны деньгаӧн.
ТЕКУСА. Та йылысь ме удиті нин тӧдмавны.
МОШКИН. Вот и бур, Текуса Ивановна.
ТЕКУСА. Нинӧм бурсӧ ог аддзы, Лев Петрович.
МОШКИН. Бур сійӧн, мый гӧгӧрвоана.
ТЕКУСА. Думайтанныд?
МОШКИН. Сёрнитны кӧ медицина кывйӧн, бурдӧдӧмыс вермас лоны правильнӧй диагноз пуктӧм сайын.
ТЕКУСА. Мед, шуам, тадзи.
МОШКИН. Дерт, и руководитель да сылӧн отсасьысьяс писькӧслун сайын. Ог, ме ньӧти ог кӧсйы ошкыны ачымӧс либӧ тіянӧс. Но меным окота казьтыштны тіянӧс рекомендуйтысь йылысь. Сёрнитны кӧ сӧмын миян костын, сійӧ ӧд район пасьта тӧдчана мортлӧн гӧтыр. Весиг вывті тӧдчаналӧн. Зэв бура тӧдӧ тіянӧс да тіянлысь делӧвӧй качествоястӧ. Сійӧ нӧ мый — пӧдруга тіян?
ТЕКУСА. Нонна Марковнакӧд ми ӧтилаын велӧдчывлім том дырйи, ӧтилаын помавлім бухгалтерскӧй курсъяс, коркӧ уджавлім ӧтсяма учреждениеясын. Сэсся сылы сюрис бур верӧс... Да, сійӧ менам матыса пӧдруга вӧвлі...
МОШКИН. Зэв лада, сідзкӧ. Миян мог — оправдайтны сылысь довериесӧ. (Гусьӧнмоз.) Тіянӧс рекомендуйтӧм водзвылын, тӧдӧмысь, сійӧ первой сёрнитчис аслас верӧскӧд.
ТЕКУСА. Да мый ті, Лев Петрович! Сійӧ абу сэтшӧм.
МОШКИН. Эскӧй меным. Оз ставыс гижсьы протоколъясӧ. Оз быдтор кузя вӧчсьывны приказъяс. Гӧгӧрвоан?
ТЕКУСА. Позьӧ чайтны, мый ті он веритӧй меным.
МОШКИН. Мӧдарӧ, ме кӧсъя, мед ті бурджыка гӧгӧрвоинныд менӧ... Сідз. Ме тшӧкта тіянӧс срочнӧ вӧчны меным бухгалтерскӧй отчёт. Та дырйи думыштлӧй, кутшӧмджык ногӧн позяс кокньӧдны миян предприятиелысь финансӧвӧй положениесӧ.
ТЕКУСА. Ладнӧ, Лев Петрович. (Кӧсйӧ мӧдӧдчыны.) Да, ме и вунӧді. Мыйся нӧ тіян сэтшӧм кучик креслӧ? Мыйла сэтшӧм дона?
МОШКИН. И казьтывнысӧ шогыд петӧ... Вӧлі срочнӧй заказ. Кучик кӧлуйсӧ вӧлі видзӧма сылысь дон пӧлучиттӧдз на. Дзикӧдз виччысьтӧг гымыштіс-воис министерствоысь главнӧй ревизор. Арталіс, ӧтувтіс, и артмис повзьӧданатор.
ТЕКУСА. И кодлы лоис таысь кывкутны?
МОШКИН. Ӧні кежлӧ некодлы на.
ТЕКУСА (стрӧгпырысь). Кыдз нӧ сідз «некодлы»? Тані явӧ нелючки. Шевролысь первой сорт видзӧма не сэтчӧ, кытчӧ колӧ. Таысь кындзи, кынтӧма оборотнӧй средстволысь ыджыд сумма.
МОШКИН. Виччысям ньӧбысьӧс.
ТЕКУСА. Ньӧбысьӧс?... Кутшӧм нӧ мӧмӧт, прӧститӧй татшӧм кывъясысь, мӧдас ньӧбны сійӧс татшӧм донсьыс?
МОШКИН (ворсӧдчыштӧмӧн). Но вот, ме век жӧ прав: морт да бухгалтер костын — джуджыд йир!
ТЕКУСА. Эновтӧй нинӧмабусӧ сӧрны.
МОШКИН (вежӧ сёрнитанногсӧ). Со кытчӧ сатшис меным тайӧ креслӧыс. (Петкӧдлӧ горш вылас.) Оз сет бура лолыштны. Янӧдӧ общественность водзын, менам рабочӧйяс водзын.
ТЕКУСА. Лӧньджыка, директор ёрт, лӧньджыка.
МОШКИН. Извинитӧй. Тайӧ сёрнитӧ менам сӧвесть.
ТЕКУСА (небыдджыка). И кыдзи ті кӧсъянныд бурмӧдны сійӧс?
МОШКИН. Кодӧс «сійӧс»?
ТЕКУСА. Тіянлысь сӧвестьтӧ.
МОШКИН. Ах, да... (Виччысьтӧг.) Тіян отсӧгӧн..
ТЕКУСА. Кутшӧмджык ногӧн?
МОШКИН. Бухгалтерскӧй искусство отсӧгӧн.
ТЕКУСА (повзьӧ). Вӧчны подлог?..
МОШКИН. Стӧчмӧдышта: тіян гӧрд чернила, менам гербовӧй печать.
ТЕКУСА. Оз, тайӧ некыдзи оз позь. Ме ог вермы тайӧс вӧчны. Некутшӧм ногӧн ог вермы.
МОШКИН. Мыйысь ті, веськыда кӧ шуны, повзинныд?
ТЕКУСА. Ог, ме ог вермы ылӧдлыны государствоӧс. Ме пыр на уджалі честнӧя и ог кӧсйы лякны ассьым ним.
МОШКИН. Кывзӧй, предприятиеным хозрасчётнӧй. Мыйла тані государствоыс!
ТЕКУСА. Бурджык, чӧвтӧй удж вылысь... Ме ог вермы тадзи. Некутшӧм ногӧн ог вермы.
МОШКИН. Сӧмын, пӧжалуйста, ньӧжйӧджык, эн гораа.
ТЕКУСА. Сідзкӧ, ме пета. (Ӧдйӧ мунӧ.)
МОШКИН (шӧйӧвошӧ). Вот тэныд номер! Быдлаын менӧ сконъялӧны. Кыдзи ме мӧда уджавны татшӧмыскӧд? Кыдзи лӧсьӧда колана отчётсӧ? Тайӧ абу бухгалтер, а сибӧдчыны позьтӧм дзонь крепость!.. Энлы, мый нӧ ме тадзи сулала? Дона быд здук. Шляпкас-висьталас кодлыкӧ, лоас сёр. Оз позь лэдзны татшӧм безобразиесӧ.
Мошкин уськӧдчӧ ӧдзӧсӧ, зурасьӧ Ноннакӧд. Нонналӧн киас редикюль да авоська. Сэні прӧдуктаяс.
НОННА. Ой!.. Мый тайӧ татшӧмыс? (Прӧдуктаыс киссьӧ джоджӧ.)
МОШКИН (шӧйӧвошӧ). Кучик креслӧ!
НОННА. Весьӧпӧрӧмыд!
МОШКИН. Прӧститӧй, Нонна Марковна... Дзикӧдз виччысьтӧг... Эн-ӧ доймӧй? Позяс чукӧртны?.. Ӧти здук... Ме тіянӧс кольла... Ме ӧдйӧ. (Котӧрӧн петӧ.)
НОННА (оз пыр во ас шӧрӧ). Кытчӧ ме сюри?.. Мый тані керсьӧ?.. Кутшӧм сэтшӧм кучик креслӧ?.. Нинӧм ог гӧгӧрво. (Чукӧртӧ прӧдуктасӧ.) Тайӧ вывтіджык нин. Тайӧ прӧста лоны позьтӧмтор. (Ӧдйӧ краситӧ вомдоръяссӧ, пудритчӧ, век больгӧ.) Сэтшӧм авъя мужичӧй и друг... Мый тайӧ татшӧмыс? Кытчӧ сійӧ котӧртіс? Сійӧ дзик не ас кодьыс... Но кӧні нӧ менам пӧдругаӧй? (Мыйкӧ уськӧдӧ тӧдвылас.) О, да энлӧй!.. А мыйкӧ кӧ на костын?.. Татшӧм ӧдйӧ? Оз вермы лоны! Текуса абу сэтшӧм. Но мый ради кучик креслӧыс?
Пырӧ Текуса.
ТЕКУСА. Кӧні Лев Петровичыс?
НОННА. А! Менам дона Тека! Тэ менӧ дзикӧдз вунӧдін. (Окалӧ.) Тэ ме дінысь дзикӧдз торъялін... Мися, чӧвлы, пыравла... Кыдзи тэ олан, кыдзи уджалан?.. Менам верӧс сэтшӧм омӧля сёйӧ, сэтшӧм омӧля сёйӧ... Рынок вылӧ ветлі... А мый Лев Петровичкӧд лоӧма? Сійӧ юртӧм петук кодь. Тіян костын нинӧм сэтшӧмыс эз вӧв?
ТЕКУСА. Сійӧ тэкӧд сёрнитіс?
НОННА. Ми сыкӧд чорыда кодь воча волім... А нолтӧ, нолтӧ... Видзӧдлы меным синъясӧ. Тэ мыйыськӧ сэтшӧма тӧждысян. Меысь эн дзеб. Ме ставсӧ аддза.
ТЕКУСА. Сыкӧд миян вӧлі лӧсьыдтӧм сёрни.
НОННА. Вот юр вундысьыд! Сійӧ нӧ мый, приставайтӧ?
ТЕКУСА. Нонна, мый тэ сӧран. Кыдзи абу яндзим?
НОННА. Со ӧд тэ кутшӧм, век меным пӧперег, век менӧ велӧдан. Бурджык лоӧ, висьтав этайӧ... кучик креслӧ йывсьыд. Мыйын делӧыс?
ТЕКУСА. Кыдз?.. Сійӧ удитіс нин висьтавны кучик креслӧ йылысь?
НОННА. Да.
ТЕКУСА. Сійӧ менӧ тойлалӧ мыж вӧчӧм вылӧ.
НОННА. Мыйысь тайӧ петӧ?
ТЕКУСА. Креслӧ вылас тшӧктӧ вӧчны выль калькуляция. Чинтыны сылысь донсӧ.
НОННА. Мыйла?
ТЕКУСА. Креслӧыс вывті дона, и некод сійӧс оз ньӧб.
НОННА. А добраыс бур?
ТЕКУСА. Весиг вывті бур.
НОННА. Сідзкӧ нӧ, мыйын делӧыс? Колӧ видзӧдлыны. Менам верӧсӧй сы мында уджалӧ. Сійӧ сэтшӧма мудзӧ... Ветлам, пӧдружка, ветлам, видзӧдлам.
ТЕКУСА. Абу лӧсьыд Лев Петровичтӧг. Сійӧ тані кӧзяин.
НОННА. Аддзывлім ми татшӧм кӧзяинъястӧ... Менам верӧсӧй эськӧ кутшӧм авторитет, а гортын быттьӧ шӧвкысь вурӧм. Выдвиниттӧдзыс ме ёнджыка повлі сыысь.
ТЕКУСА. Ме быдӧн шензя, кыдз сійӧ терпитӧ татшӧм катшасӧ?
НОННА. А мый сылы вӧчны? Сійӧ партийнӧй. Мед сӧмын заводитлас вӧтлыны ас дінсьыс либӧ тышкасьны, пыр жӧ райком бюро вылӧ корасны.
ТЕКУСА. Тэ овлы тані. Ме корсьла директорӧс. (Мунӧ.)
НОННА (ӧбидапырысь). Вот ещӧ: «катша». Ме враг али мый аслам верӧслы? Али суитча сылӧн могъясӧ? Сійӧ ачыс аслыс. Ме тожӧ ачым аслым. Быдӧнлӧн аслас мог. Сійӧ деньга нажӧвитӧ. Ме сійӧс верда, лӧсьӧда гортса уют. И тіянлысь креслӧтӧ ньӧба сылысь юасьтӧг. Дерт, туянаджык донысь. Аддзӧма тай: «мыж вылӧ тойлалӧ». А колӧ кӧ тайӧс вӧчны? Мукӧдлы висьтав, а менӧ бухгалтерскӧй делӧяс кузяыд велӧдны оз ков.
Пырӧ Мошкин.
МОШКИН (тӧждысьӧмӧн). Сійӧ тані абу?
НОННА. Кодӧс ті корсянныд?
МОШКИН. Текуса Ивановнаӧс.
НОННА. Вӧлі тані и сӧмын на петіс корсьны директорӧс.
МОШКИН. Мый сійӧ сёрнитіс?
НОННА (мудеритӧмӧн). Норасьӧ тіян вылӧ... Эк, тэ, мужичӧй, мужичӧй! Этатшӧм нывбабаӧс ме тіянлы рекомендуйті, и ті сійӧс ӧбижайтанныд.
МОШКИН. Абу гӧгӧрвоана.
НОННА. Креслӧ йылысь.
МОШКИН (повзьӧ). Удитіс висьтавны?
НОННА. Да. Ме ставсӧ тӧда.
МОШКИН (кевмысьӧмӧн). Нонна Марковна, ме тіянӧс мӧда корны сӧмын ӧтитор йылысь... Ті гӧгӧрвоысь нывбаба. Ті ас вежӧрӧн олысь нывбаба.
НОННА. Аддза, тэ дрӧжжиттӧдзыд полан. Но ог гӧгӧрво — мыйла.
МОШКИН. Дона Нонна Марковна, ме тіянӧс кора сӧмын ӧтитор йылысь: эн висьталӧй верӧсыдлы кучик креслӧ йылысь.
НОННА. А тайӧ нин мый ради? Мый тані лёкыс?
МОШКИН. Некутшӧм ногӧн эн висьталӧй... Тайӧ менам ӧшибка. Эз сідз артмы, кыдз кӧсйи. Гӧгӧрвоӧй.
НОННА. Но ладнӧ, ладнӧ. Ме верма ылӧдлыны верӧсӧс. Мися, босьті универмагысь.
МОШКИН. Энлӧй. Мыйла тані универмагыс?
НОННА. Меным ӧткодь. Ме верма ньӧбны креслӧтӧ веськыда и тіян складысь. Сӧмын ен нога донысь.
МОШКИН (оз дзик, пыр гӧгӧрво). Ті менӧ вианныд... Али кыдзи? Кутшӧм ногӧн тайӧс колӧ гӧгӧрвоны?
НОННА. Пе-ре-каль-ку-ля-ция...
МОШКИН. Пе-ре-каль-ку-ля-ция?..
НОННА. Кутшӧм нӧ ті директор, тіянӧс кӧ оз кывзысьны?
МОШКИН (вежӧртӧ). Ыхм... Сідз, сідз... Ті тайӧс збыльысь?
НОННА. Дзик збыльысь.
МОШКИН. Гӧгӧрвоа... Да, да. Ме гӧгӧрвои нин. А мый вӧчны сыкӧд?
Пырӧ Текуса
НОННА. Да ӧд сійӧ ас морт. Тека, тэ вывтісӧ эн тшӧкӧлдывайт. Лев Петрович — тӧлка руководитель, тӧдӧ, мый колӧ вӧчны. (Кинас гусьӧник петкӧдлӧ, мед Мошкин петас.)
МОШКИН. Кора прӧститны: меным колӧ цехӧ петавлыны. Регыд бӧр локта. (Петӧ.)
НОННА. Тэ, мусаӧй, он гӧгӧрво, кодӧс он кывзысь. Кытысь тэ, тэнад арлыдӧн, мӧдӧс татшӧмсӧ аддзан?
ТЕКУСА. Да мый тэ больган, Нонна? Та йылысь ӧмӧй сёрниыс?
НОННА. А тэ лыддьы, мый та йылысь... Меным вӧлі тӧдчымӧн сьӧкыдджык лоана верӧскӧд. Менам эз вӧв ни бур вӧччан, ни мича стать. Тэ ӧд ачыд тӧдан, тэ дорысь ме ёна бӧб, катша, кыдз тэ шуан. Но ме нинӧмӧн эг лыддьысь и шедӧді, мый кӧсйи. Главнӧйыс сыын, мед не лэдзчысьны. Сатшкысьны сылы пиньяснад и гыжъяснад. Веськыда горшас!.. Ӧні, слава богу, менам ставыс эм. Ставӧн менӧ пыдди пуктӧны. Став син водзын ме почётын... Сійӧ нӧ мый — эз на петкӧдлы ассьыс чувствояссӧ? Эз? Тешкодь...
ТЕКУСА. Да ланьтан он тэ та йылысь?..
НОННА. Вот тэныд и пӧдруга! Ме сылы кӧсъя буртор, а сійӧ ме вылӧ скӧралӧ. Но ладнӧ. Кыдз кӧсъян. Тэнад олӧмӧ ог мӧд суитчыны. Сӧмын тэ, донаӧй, могмӧд и менӧ. Менам верӧс сы мында уджалӧ. Сійӧ сідз ёна мудзӧ... Сылӧн регыд чужан лун... Сӧгласитчы Лев Петровичыдкӧд. Калькулируйт выльпӧв креслӧтӧ. Ме тэнӧ зэв ёна кора. (Текуса чӧв олӧ). Чӧв олан? Сідзкӧ, сӧгласитчин.
Пырӧ Мошкин.
МОШКИН. Эг мешайт?
НОННА. Ставыс пӧрадокын. Сійӧ сӧгласитчис.
МОШКИН. Вот и бур, Нонна Марковна. Верман видзӧдлыны ассьыд креслӧтӧ.
НОННА. Ветлам, Лев Петрович, ветлам.
Мошкин да Нонна мунӧны.
ТЕКУСА (ёна переживайтӧ). Мый мем вӧчны?.. Ни ӧтиысь на эг волы татшӧм пикас... Гашкӧ, Нонна кывъясын эм правда: Лев Петрович тӧдӧ, мый вӧчӧ? Директорлы кыв шутӧг лӧсялӧ тӧждысьны предприятие вӧсна. А ме? Меным ӧмӧй оз лӧсяв!.. Мый нӧ вӧчны, мый вӧчны? Господи, да ӧд ставлы гӧгӧрвоана: кывзыся кӧ, мӧда дзугны финансӧвӧй дисциплина. Лёкджык на таысь: ме мӧда вевттьыны лёкторъяс, пӧтакайтны жульничестволы... Но мыйла нӧ ме думайта, мый тані кутшӧмкӧ жульничайтӧм? Ах, да: «Виччысьтӧг гымыштіс-воис министерствоысь главнӧй ревизор». Дзугӧма кутшӧмкӧ картіяс... Картіяс? Кутшӧм картіяс? Ме, тыдалӧ, прӧста сӧра. И... вывтіджык омӧля тӧждыся ас вӧсна... «менам арлыд дырйи». Да, да. Ме ӧд тожӧ нывбаба. Мекӧд сылӧн сёрниыс эз вӧв думышттӧм. Тайӧ, гашкӧ, менам шудӧй?..
Тэрмасьӧмӧн пырӧ Аверьян.
АВЕРЬЯН. Ме тіянӧс корся, донаӧй. Срочнӧй мог. Курортӧ муна, Кисловодскӧ!
ТЕКУСА. Ме зэв рад, Аверьян Силыч!
АВЕРЬЯН. Меным колӧ деньга. Гашкӧ, аски и мӧдӧдча.
ТЕКУСА. Аски? Мыйла нӧ водзджык эн висьталӧй? Талун кассаын абу деньгаыс.
АВЕРЬЯН (шуткаӧн). Ачым мыжа, Текуса Ивановна: эг гӧгӧрво критикуйтны Лев Петровичӧс водзджык.
ТЕКУСА. Сыысь, мый путёвкатӧ вӧлі оз сет?
АВЕРЬЯН. Ме сійӧс сылысь эг кор. Уджнас омӧля веськӧдлӧмысь пинялышті. А таысь сійӧ меным — путёвка. Да ещӧ срочнӧйӧс!
ТЕКУСА. Со кыдзи вӧлӧм!.. Сылӧн тадзисӧ тшӧкыда овлӧ?
АВЕРЬЯН (не стӧча). Код сійӧс тӧдас.
ТЕКУСА. Ті сыкӧд важысянь тӧдсаӧсь?
АВЕРЬЯН (шуткапырысь). Та йылысь нинӧм и сёрнитны... Сійӧ вӧлі детинкаӧн на, кор ме сійӧс петшӧрӧн пывсьӧдлі.
ТЕКУСА. Збыльысь? Кутшӧм нӧ мыжысь?
АВЕРЬЯН. Менам му вылысь вӧлі анькытш гусявлӧ... Сэсся мӧдіс выдвигайтчыны. Первойсӧ сиктса масштабын, сэсся районнӧйын, видзӧдам — областнӧйын нин, республиканскӧйын. Но, думайтам, наградитіс господьӧй-енмӧй талантӧн миянлысь сиктӧс — воӧдчас миян Лев Петрович кутшӧмкӧ народнӧй комиссарӧдз! Мда-а-а... Зэв вӧлі нимкодь ставнымлы.
ТЕКУСА (ыджыд интересӧн). А кыдзи артмис, мый сійӧ бӧр воис сійӧ местаас, кысянь коркӧ заводитліс восьлавны вывлань?
АВЕРЬЯН (мудера). Ті коркӧ аддзывлінныд тулысын йи кывтӧм?
ТЕКУСА. Унаысь аддзывлі.
АВЕРЬЯН. Сідзкӧ, кывзӧй. Ылькнитіс тувсовъя ва, жугӧдіс йисӧ. Кывтӧны-шумитӧны гырысь йияс, артмӧдалӧны дзонь гӧраяс и аскӧдныс лэптӧны тшӧтш... посньыдик йиторъяс. Ті гӧгӧрвоинныд?
ТЕКУСА. Зэв бура гӧгӧрвои. (Кӧсйӧ мыйкӧ юавны, но яндысьӧ.) Висьталӧй, Аверьян Силыч... Найӧ кыдзи олісны покойнӧй гӧтырыскӧд?
АВЕРЬЯН (шензьӧмӧн). А тайӧ нин мыйла?
ТЕКУСА. Прӧста сідз.
АВЕРЬЯН. Э-э-э! Прӧста сідз нинӧм оз овлы! Кодыр дӧва морт юасьӧ дӧвеч йылысь, пельыд мед вӧлі сюсь!
ТЕКУСА. Аверьян Силыч... (Локтӧ сы дінӧ.) Донаӧй! Висьталӧй. Ме тіянӧс зэв ёна кора. Вывті ёна.
АВЕРЬЯН (мездысьӧ). Да, мый ті, мый ті!.. Та йылысь ті асьныд тӧдмаланныд, кодыр лоанныд сылӧн гӧтырӧн.
ТЕКУСА (воӧ сы вылӧ). Оз артмы. Мӧдінныд кӧ висьтавны, висьталӧй помӧдз. Дзик пыр жӧ. Менам чорыд характер. Ме, тӧданныд кӧ... Ме верма нӧйтны тіянӧс!
АВЕРЬЯН (повзьӧмӧн). Ей-бог, нинӧм ог тӧд. Нинӧм лёксӧ сы йылысь эг висьтав. Ставыс тайӧ сӧмын правда... Энлӧй. Меным некор. Ме тэрмася. Менам зэв этша кадыс. Ме мӧдӧдчи... (Уськӧдчӧ ӧдзӧсӧ, петӧ.)
ТЕКУСА (сералӧ). Но и старик... Гӧгӧрвоа, кыдзи сійӧ пывсьӧдіс Лев Петровичӧс петшӧрӧн... гачтӧм местаясӧдыс... (Дугдӧ сералӧмысь, лоӧ серьёзнӧйӧн). Шутка шуткаӧн, а делӧясыс, тыдалӧ, збыльысь мыйӧнкӧ лёкторйӧн ӧвтӧны. (Арталӧ.) Сетӧ путёвка сыысь, мый сійӧс критикуйтісны. Срочнӧя ковмис бухгалтерскӧй отчёт. Тшӧктӧ выльпӧв калькулируйтны ценностьяс. И ставтор дінас содтӧд, ворсӧдчӧ мекӧд... Мыйла эськӧ ставыс тайӧ ковмис сылы?
Пырӧ Мошкин.
МОШКИН. Нонна Марковналы креслӧ ёна воис сьӧлӧм вылас.
ТЕКУСА. А кӧні ачыс?
МОШКИН. Муніс деньгала.
ТЕКУСА. Кыдзи? Сійӧ кӧсйӧ ньӧбны сійӧс татшӧм ыджыд донысь?
МОШКИН. Тэ ӧмӧй ӧтказывайтчан аслад кӧсйысьӧмысь? (Текуса чӧв олӧ.) Ме, дерт, гӧгӧрвоа тіянӧс, Текуса Ивановна. Тіянлы мыйтакӧ абу лӧсьыд сы вӧсна, мый Нонна тіян пӧдруга, коді, кыдз ме гӧгӧрвоа, зэв радейтӧ тіянӧс. А пӧдругаяслы да вообще ас йӧзлы вӧчны уступкаяс пыр сьӧкыдджык, кӧть эськӧ и сьӧлӧм серти... Тайӧ случаяс жӧ ті босьтӧй тӧдвыланныд ӧти зэв важнӧйтор. Ми кӧсъям вӧчны лӧсьыдтор мортлы, коді зэв уна уджалӧ Рӧдина благо вылӧ, решайтӧ став судьбасӧ дзоньнас районлысь, та лыдын и миян предприятиелысь судьбасӧ. Энӧ думайтӧй, мый, ставыс кӧ тайӧ оформляйтчӧ сылӧн гӧтыр пыр, оз инмы и сылы аслыс.
ТЕКУСА (нарошнӧ вӧчӧм тӧждысьӧмӧн). Ог тӧд, мый и вӧчны меным...
МОШКИН (матыстчӧ Текуса дінӧ). Збыльысь кӧ сёрнитны, тіян вылӧ позьӧ тырвыйӧ надейтчыны.
ТЕКУСА. Мыйысь тайӧ тыдалӧ?
МОШКИН. Ті весиг аслад пӧдругаысь соссьӧмныд тэ дінӧ менам чувствояс йылысь.
ТЕКУСА. Да, мый ті, Лев Петрович... Ті менӧ гӧрдӧдмӧн янӧдінныд.
МОШКИН. Меным тайӧ сьӧлӧм вылӧ воӧ. Пыдди пукта сэтшӧмъясӧс, кодъяс олӧны ас вежӧрӧн. Ме радейта тіянӧс...
ТЕКУСА. Аддзанныд, ме лои нывка кодьӧн... (Воськовтӧ ӧшиньлань. Кост. Сёрнитӧ ывлаӧ видзӧдӧмӧн.) Мыйта колӧ чинтыны?
МОШКИН. Вайӧдӧй нормальнӧй донӧдз. Сыысь кындзи, шыбитӧй сэтысь мыйта кӧсъяд...
ТЕКУСА. Бур. (Ӧдйӧ мӧдӧдчӧ ӧдзӧслань, виччысьтӧг сувтыштӧ.) А кыдзи бухгалтерскӧй отчётнад?
МОШКИН. Вӧчны срочнӧя, кыдзи вӧлі висьталӧма таӧдз.
ТЕКУСА. Кывсьӧ доклад али ревизия?
МОШКИН. Райисполкомын доклад... Веськыда кӧ шуны, ме ог на тӧд стӧча.
ТЕКУСА (бӧр локтӧ Мошкин дінӧ, ас мортлы моз). Тіянлы тайӧ зэв ёна ӧпаснӧ?
МОШКИН. Да. Дзикӧдз виччысьтӧмтор...
ТЕКУСА. Мый «дзикӧдз виччысьтӧмтор»?
МОШКИН. Не ас кадӧ отчётнӧй докладыс. (Гӧгӧрвоӧ, мый ӧшибитчис.) Абу, тайӧ... Тіян преданностьыд.
ТЕКУСА. Ыджыд аттьӧ. Ме мӧдӧдчи. (Мунӧ.)
МОШКИН (нимкодя зыралӧ кияссӧ). Артмис — таысь бурджыкыс оз тӧр! Ӧти лыйӧмӧн куим кӧчӧс кыйи! Ого! Ме, вӧлӧмкӧ, абу на сэтшӧм мӧмӧт, кыдзи йӧзыс чайтӧны! Первой-кӧ, мынтӧдчи креслӧысь. Сійӧ збыльысь синмын бельмо кодь меным вӧлі. Мӧд-кӧ, тайӧ креслӧ отсӧгӧн босьті аслам киясӧ главбухӧс. Ӧні мед заводитлас мыйӧнкӧ дӧсадитны меным. «А креслӧыд!.. — шуа сылы. — Коді пӧдаритіс аслас пӧдругалы креслӧ государство щӧт весьтӧ, муса Текуса Ивановна?» Ах, муса!.. Мусаасьӧм да мукӧдторъяс кузяыд мӧд раз кежлӧ кольлам, гашкӧ, ковмас на ещӧ! И, коймӧд-кӧ, буретш тайӧ креслӧ вылын мӧдас пукавны ачыс значительнӧй лицоыс! И кор меным ковмас висьталыштны сылы мыйкӧ, сійӧ мӧдас кывзыны тайӧс аслас гӧтыр пыр менам креслӧ вылын пукалігмоз!
Пырӧ Аверьян. Сійӧ мыйыськӧ тӧждысьӧ.
Но, кыдзи, Аверьян Силыч? Ставыс пӧрадокын?
АВЕРЬЯН. Абу ставыс, Лев Петрович.
МОШКИН. А мыйын делӧыс?
АВЕРЬЯН. Кыдзи тэд висьтавны...
МОШКИН. Висьтав повтӧг. Ми ӧтнаным.
АВЕРЬЯН. Збыль кӧ шуны... ме тэ вӧсна и пола.
МОШКИН. Ме вӧсна?
АВЕРЬЯН. Тэ... со мый... Эн эскы Текуса Ивановналӧн став кывъяслы.
МОШКИН. Мый ради?
АВЕРЬЯН. Ме ачым ог тӧд, мый ради... Миян сыкӧд вӧлі сёрни.
МОШКИН (чуймӧ). Мый йылысь?
АВЕРЬЯН. Ӧтитор йылысь, мӧдтор йылысь... Сійӧ юасис, важӧн-ӧ ме тӧда тэнӧ. Сэсся сійӧ юаліс, кыдзи тэ олін гӧтырыдкӧд.
МОШКИН. И кыдзи вочавидзин гӧтыркӧд олӧм йылысь?
АВЕРЬЯН. Не стӧча моз. А мукӧдтор кузяыс ставсӧ сідзи, кыдзи вӧлі збыльвылас.
МОШКИН. Мыйысь нӧ, сідзкӧ, тӧждысян?
АВЕРЬЯН. Менӧ сійӧ муртса эз нӧйт. Ставсӧ кӧсйӧ тӧдны тэ йылысь. А ме сылы шуа: «Ті асьныд тӧдмаланныд, кор лоанныд сылӧн гӧтырӧн»... Ӧні ме пола, мый сійӧ мӧдас кутны ме вылӧ лӧг и нарошнӧ оз сет туй вылӧ деньга. Ме эськӧ, Лев Петрович, тшӧкті отсавны, ковмас кӧ.
МОШКИН. Ӧбидаӧ ог сет. Тані кӧзяиннас ӧні кежлӧ ме на. Мун, дасьтысь туйӧ петны.
АВЕРЬЯН (мунігмозыс). Ӧні, дерт, тэ на кӧзяин. Но ме тӧда аслам старуха серти, мый нывбабаясыд вермасны вӧчны дзонь переворот.
МОШКИН (аслыс). «Ставсӧ кӧсйӧ тӧдны» ме йылысь... Тешкодь тайӧ. Мый йылысь сійӧ кӧсйӧ тӧдны збыльвылас? И ставыс-ӧ сідзи, кыдзи меным кажитчӧ? Да, оз сулав сёрнитны! Арталӧ петны ме сайӧ и оз кӧсйы ӧшибитчыны. Нинӧм вежӧрттӧм нывъяслӧн кӧ — радейтчӧм, то дӧваяслӧн — кыдз эськӧ не ӧшибитчыны. Тайӧ ӧд зэв гӧгӧрвоана... Аддзан, и Нонна удитіс локны. Пӧрадок!
Пырӧ Нонна.
НОННА. Локта гусясьысь моз, мед не корны верӧслысь машина, телегаӧн локті.
МОШКИН. Пуксьӧй. Регыд ставыс лоӧ дась.
НОННА (пуксьӧ). Зэв жӧ нин буртор ті меным вӧчанныд. Менам верӧсӧй сы мында уджалӧ. Сылӧн сэтшӧм этша кадыс. Локтас гортӧ... Ме сійӧс вердышта... И мый сӧмын ог лӧсьӧд сёйнысӧ... Сійӧ сёйыштас, аттьӧалас менӧ, и — узьны. И узьӧ, и узьӧ... Ме сылы и шуа: тэ, мусаӧй, зэв нин монотоннӧя асьтӧ кутан. Олӧмыс мед вӧлі унджык, олӧмыс! А сійӧ меным: «Некор меным. Уджыс уна». Корпитӧ, корпитӧ и югыд лунсӧ оз удит аддзывны. Ставсӧ прӧзевайтас. Ставсӧ узяс.
Пырӧны Текуса да Аверьян. Кыкнанныс букышӧсь, сюся видзӧдӧны Мошкин да Нонна вылӧ.
МОШКИН. Мый лоис?..
АВЕРЬЯН (чӧв, локтӧ Мошкин дінӧ). Висьтав, Лев Петрович, курортад тэ сӧстӧм сьӧлӧмсянь менӧ ыстан?
МОШКИН. Мыйла тэ тайӧс юалан?
АВЕРЬЯН. А тэ верман шуны: «Честное слово»?
НОННА. Йӧймин кӧ а? Сійӧ нӧ тэныд пионер али мый? Лев Петрович, слава богу, важӧн партияса член.
АВЕРЬЯН. Та вӧсна и кӧсъя кывны сы вомысь татшӧм кывъяссӧ. Ӧд нинӧм оз вермы лоны вылынджык коммунистлӧн кыв дорысь! Тадзи абу, Лев Петрович?
МОШКИН. Дзик вернӧ...
НОННА. Ме тэнӧ зэв бура гӧгӧрвоа, Можевельников ёрт: тэ кӧсъян прӧверитны Лев Петровичлысь честностьсӧ не вообще, а кыдзи партияса членлысь... Тэ гӧгӧрвоан, мыйӧн тайӧ нырад ӧвтӧ? Тэ гӧгӧрвоан, мый сёрнитан?
АВЕРЬЯН. Давай, давай. Ставсӧ висьтав ӧти сайысь.
МОШКИН. Вай эновтӧй нинӧмабусӧ сӧрны.
НОННА. Кыдзи «нинӧмабу»?.. Тайӧ унджык на нинӧмабусьыс!.. Ме ставнас аддза, мыйӧн сійӧ лолалӧ. Сы пытшкын дзик тыр капитализм сознаниелӧн колясъясыс. Ме тэнӧ петкӧда сӧстӧм ва вылӧ!
МОШКИН (тӧждысьӧмӧн). Нонна Марковна, ме тіянӧс ёна кора...
НОННА. Эн ӧлӧдӧй... Тӧда, мый сёрнита. Татшӧм типъясыд век нин мыйӧнкӧ абу дӧвӧленӧсь. Найӧ, век нин мешайтӧны кӧнкӧ да мыйкӧ.
ТЕКУСА. Нонна, яндысь.
НОННА. Ме? Яндыся?..
АВЕРЬЯН. Тырмылас, гӧлубушка, тырмылас... Ті сы мында нин висьталінныд, мый меным ковмас босьтчывны обороняйтчыны.
МОШКИН. Эн тӧждысьӧй, Аверьян Силыч, ӧбидаӧ ог сет.
АВЕРЬЯН (Мошкинлы). Кодысь ті кӧсъянныд дорйыны менӧ? (Вочасӧн скӧрмӧ.) Кутшӧм мыжысь? Гашкӧ, сыысь, мый гражданскӧй война дырйи киясын ӧружиеӧн дорйи интервентъясысь да быд сикас контрреволюцияысь миянлысь рабоче-крестьянскӧй власть? Индылі пуля улӧ ассьым морӧс, кор ковмыліс спаситны олӧмсӧ миян полкса комиссарлысь? Кӧсъян, петкӧдла рана местаяссӧ?
МОШКИН. Оз ков, оз ков. Та йылысь ме тӧда.
АВЕРЬЯН. Сідзкӧ, он-ӧ висьтав сы йылысь, мыйла татшӧм типсӧ, кыдзи ме, Отечественнӧй войнаӧдз на эз ӧтиысь премируйтлыны бура уджалӧмысь, война кадӧ наградитісны орденӧн да медальӧн, а война бӧрас — Верховнӧй Сӧветлӧн Почётнӧй грамотаӧн?
МОШКИН. Ошка таысь.
АВЕРЬЯН. Сӧранныд, Нонна Марковна! Настоящӧй коммунистъяслӧн честностьын ме некор эг сомневайтчыв. Коммунистическӧй партия — сійӧ миян партия, мед кӧть ме и абу член. Партиялӧн думъясыс — менам думъяс. Сылӧн могъясыс — менам могъяс!
МОШКИН. Тайӧ жӧ ставлы гӧгӧрвоана.
АВЕРЬЯН. Сідзкӧ, кодлы нӧ ме мешайтлі либӧ мешайта? (Индӧ Нонна вылӧ.) Этайӧ, асьсӧ вылӧ пуктысь, йӧйруа мортыслы? Мыйӧн ме сылы мешайта? Висьталӧй!
НОННА. Но вот и скӧрмис... Мый ме сэтшӧмсӧ висьталі? Быдлунся кывъяс. И некутшӧм ме тэныд абу «йӧйруа». Да ещӧ «асьсӧ вылӧ пуктысь». Мыйысь меным вылӧсӧ пуксьыны? Наградаяссӧ ме эг получайтлы.
ТЕКУСА. Ланьт, Нонна. Яндзим тэ вӧсна.
НОННА (лӧгавтӧг). Ланьта, ланьта... Меным некор тіянкӧд вензьынысӧ. Менӧ виччысьӧ вӧла. Ме ог вермы сійӧс дыр кутны.
МОШКИН. Тайӧ збыль. Ми прӧста кад воштам... Текуса Ивановна, делӧыс тіян сайын... (Кост.)
ТЕКУСА. Ті висьталінныд, директор ёрт, мый кучик креслӧ вылӧ вӧлі срочнӧй заказ. Мыйла эз выкупитны тайӧ заказсӧ?
МОШКИН. Ме тіянлы висьтавлі нин.
НОННА (шӧпкӧдӧ Мошкинлы). Эз-ӧ менам верӧсӧй закажитлы?
МОШКИН. Да энлӧй ті...
ТЕКУСА. Ті меным висьталінныд, мый торкис министерствоса главнӧй ревизор. Кыдзи колӧ гӧгӧрвоны тайӧс?
НОННА. О! Главнӧй ревизор?.. Нолтӧ, нолтӧ, висьталӧй, Лев Петрович. Ме ӧд ревизияясад бура гӧгӧрвоа.
МОШКИН (тӧждысьӧмӧн). Кад помавны миянлысь прӧстӧ больгӧмнымӧс.
ТЕКУСА. Менам ещӧ ӧти вопрос эм.
МОШКИН. Тіянлы, Текуса Ивановна, колӧ гӧгӧрвоны, мый бокӧвӧй йӧз дырйи оз став вопросыс решайтсьыв.
НОННА. Господи!.. Да ме ӧмӧй бокӧвӧй морт?..
ТЕКУСА. Висьталӧй, Лев Петрович, кучик креслӧтӧ ті тэрмасянныд инавны сы вӧсна, мый лоӧ райисполкомын тіянлы виччысьтӧм доклад?
МОШКИН (скӧралӧ). Ме тіянлы детинка али мый... отчитывайтчыны ті водзын?
АВЕРЬЯН. А мыйла ми ог тӧдӧ райисполкомас отчёт йывсьыс? Ӧд кольӧм раз та кежлӧ ми гӧтӧвитчим дзонь кык тӧлысь чӧж.
МОШКИН. Тайӧ сӧрӧм. Некутшӧм отчётнӧй доклад йылысь ме эг кывлы ни ог тӧд.
АВЕРЬЯН (локтӧ телефон дорӧ). Ми тайӧс дзик пыр тӧдмалам.
МОШКИН (кӧсйӧ торкны). Тайӧс вӧчны оз ков.
АВЕРЬЯН. Энлӧ, энлӧ... Ас вӧсна ме ачым кывкута... Нылӧй, вайлӧй меным асьсӧ райисполкомса председательӧс. Тайӧ, председатель ёрт? Сёрнитӧ тіян избиратель, Можевельников Аверьян Силыч — райпромкомбинатын мебельнӧй цехысь мастер. Видза оланныд!.. Председатель ёрт, мыйла ми ог тӧдӧй сы йылысь, мый регыд лоас миян комбинат йылысь райисполком заседание вылад доклад? Хм... Мыйла ме тадзи тӧждыся? (Оз тӧд, мый висьтавны.) Кыдз тіянлы висьтавны... Ме, видзӧдтӧ, курортӧ мӧдӧдча... Да, регыд. Весиг аски. Кыдзи ті шуинныд?.. Но, дерт жӧ, дерт жӧ... Зэв эськӧ вӧлі окота лоны райисполком вылас... Ӧти здук, юала... (Бергӧдчӧ Мошкинлань.) Лев Петрович...
МОШКИН. Ме тані абу.
АВЕРЬЯН (трубкаӧ). Директор висьталіс, ме пӧ тані абу. (Бокӧ сёрнитӧ.) Но вот серавны мӧдіс... (Бара кывзӧ.) Мый жӧ?.. Кутшӧм срок кежлӧ путёвкасӧ вежны? Тайӧ тіянлы тыдаланаджык. Бур! Зэв бур! Аттьӧ таысь. Аддзысьлытӧдз!
МОШКИН (оз вермы кутны асьсӧ). Тэ менӧ терпеньеысь петкӧдан.
АВЕРЬЯН (спокойнӧя). Тайӧ, тыдалӧ, заводитчӧмыс на.
НОННА. Нинӧмтор ог гӧгӧрво.
ТЕКУСА (иронияӧн). Лев Петровичыд абу сэтшӧм-татшӧм деляга, мед миянӧс тэкӧд первой ньӧбны, а сэсся висьтавны та йылысь гусьӧникӧн миян пельясӧ.
НОННА (повзьӧмӧн). Кы-ы-ыдз? Ылӧдны менӧ? Сійӧ оз сӧр, Лев Петрович? (Мошкин шӧйӧвошӧ.) Тэ чӧв олан? Тадз оз артмы, висьтав честнӧя. Тэ ӧд коммунист.
АВЕРЬЯН. Вӧвліс коммунистӧн, да ставнас бырис.
НОННА. А-а-а!.. Тэ, сідзкӧ, абу нин коммунист?
МОШКИН. Нонна Марковна...
НОННА. Тэ менӧ эн бӧбйӧдлы. Ме ставсӧ гӧгӧрвои. (Чилзӧ.) Да кыдзи тэ лысьтін мекӧд шутитны? Мый висьталас менам верӧс? (Воӧ Мошкин вылӧ.) Тэ гӧгӧрвоан, мый сӧтвӧритін? А ещӧ важ тӧдса! Тэ гӧгӧрвоан, мыйӧн тайӧ нырад ӧвтӧ?.. Ме тэнӧ ставнас аддза, мыйӧн тэ лолалан. Ме тэнӧ петкӧда сӧстӧм ва вылӧ!..
МОШКИН (скӧрысь). Тырмас йӧйтавнытӧ!..
НОННА (повзьӧ). Но, вот, и тайӧ горзӧ ме вылӧ.
МОШКИН (Аверьянлы). Мый ме вӧчи сэтшӧмсӧ? Али деньга кодлыськӧ лотайті? Али керка аслым пукті комбинат тшӧт весьтӧ?
АВЕРЬЯН. Со мый думыштӧма! Татшӧмтӧ кокньыдджык босьтны пельӧдыс да петкӧдны югыд вылӧ. А вот тэ кодьястӧ и лупа пыр видзӧдӧмӧн сьӧкыд эрдӧдны. Ставыс формаын: и стаж, и партийность, и общественнӧй положение.
МОШКИН (грӧзитӧ Аверьянлы). Ме тэнӧ пыр жӧ кыска кывкутӧмӧ.
АВЕРЬЯН. А ме тэнӧ ӧні жӧ нуӧда райисполкомса председатель дінӧ. И висьтала сылы: мися, Мошкин ёрт ассьыс став вынсӧ и кужӧмлунсӧ видзӧ оз сы вылӧ, мед могмӧдны населениелысь спроссӧ, а рӧскодуйтӧ найӧс сы вылӧ, мед и водзӧ лоны директорӧн.
МОШКИН. Сӧран!
АВЕРЬЯН. Вынсьӧда фактъясӧн. Найӧ менам тырмымӧн: и прӧчентъяс кузя, и кучик креслӧ кузя, и весиг менам чертёж да менам путёвка кузя.
ТЕКУСА. А тайӧ кӧ оз тырмы, ме содта.
НОННА. Бара эг мӧд нинӧм гӧгӧрвоны.
АВЕРЬЯН (Мошкинлы). Ӧні жӧ мӧдӧдчам председатель дінӧ. Тэнад отчётнӧй доклад вӧчтӧдз колӧ мый сюрӧ сӧгласуйтны.
ТЕКУСА. И ми мӧдӧдчам тэнад верӧс дінӧ, Нонна.
НОННА (шӧйӧвошӧ). Тэкӧд, татшӧм ситуация дырйиыс?
ТЕКУСА. И бурджык ситуация оз ков. Мӧдӧдчим, мӧдӧдчим.
НОННА (пыксьӧ). Да энлы... Мем колӧ думыштлыны на... Мый шуас менам верӧс? Сійӧ вермас дзик не ногӧн гӧгӧрвоны...
ТЕКУСА. Ме сылы отсала гӧгӧрвоны ставсӧ сідзи, кыдзи колӧ.
НОННА (бӧрдӧ). И мыйла мем ковмис тайӧ креслӧыс? Мый шуас меным верӧсӧй?..
Текуса да Нонна мунӧны.
АВЕРЬЯН. Ме мӧдӧдчи жӧ. Веськыда райисполкомӧ.
МОШКИН. Виччысьыштлы. Мунны кӧ, бурджык ӧтлаын. (Уськӧдчӧ пасьтасьны.)
АВЕРЬЯН. Тэ менӧ суӧдан. (Мунӧ.)
МОШКИН (видзӧдӧ ас вылас). Да. Ме збыльысь аслам формаын. А ӧвтӧ нырад табакӧн!.. Мый нӧ меным вӧчны? Гашкӧ, ещӧ ӧтчыд признайтны веськыдӧн ме кузя критикасӧ? Но эскасны-ӧ, вот мыйын делӧыс (Шыасьӧ публика дінӧ.) Кыдзи ті чайтанныд, ёртъяс: ещӧ на ӧтчыд эскасны меным али оз нин?
ЗАНАВЕС
