КОМИ ОБЛАСЬТСА ИСПОЛНИТЕЛЬНӦЙ КОМИТЕТЛӦН ГОСУДАРСТВО ЭМБУР СТРАХУЙТӦМ ЙЫЛЫСЬ ТШӦКТӦМ

Октябр 6-ӧд лунӧ, 1921 воӧ, декретӧн Народнӧй Комиссаръяслӧн Сӧвет шуис государстволысь (казеннӧй) эмбурӧн, овмӧсӧн кӧртмалӧмӧн вӧдитчысьяслы страхуйтны (собр. Узак. 1921 г. № 69, статья 554) пӧжаръясысь, уна пӧлӧс причча суӧмысь, сідзи жӧ кооперативъяслы, ассьыныс эмбурнысӧ, овмӧснысӧ. Сійӧ декрет серти ӧні Обласьтса Исполнительнӧй Комитет тшӧктӧ (обязательное постановление):

1) Казеннӧй эмбурӧн, овмӧсӧн мыйкӧ дыра кӧртмалӧмӧн вӧдитчысьяс, ӧткӧн-ӧ, ӧтувтчӧмӧн-ӧ артельӧн (артели, товарищества, общества, коммуны), сідзи жӧ кооперативъяс ассьыныс эмбурнысӧ-овмӧснысӧ, абу на кӧ ас костаныс страхуйтӧмаӧсь сентябр 1 лунӧдз 1923 воын, налы быдӧнлы тайӧ гижӧдсӧ йӧзалӧм бӧрас кык недель мысти колӧ гижны ли висьтавны став вӧдитчан эмбур йывсьыс Обласьтса Страхӧвӧй Агентстволы (Усть-Сысольск, Крестьянская ул. 10) либӧ, эм кӧ, матынджык страхӧвӧй агентство районӧ.

2) Сійӧ жӧ срокӧ (п. 1) быд казеннӧй удж нуӧданін, кӧртмалӧмӧн кӧ сетӧма вӧдитчыны эмбурӧн, овмӧсӧн, ӧткалы-ӧ, ӧтувтчӧм йӧзлы-ӧ, колӧ сетны либӧ ыстыны Обстрахӧ гижӧд эмбур йывсьыс, торйӧн урчитӧмӧн:

а) Эмбурлысь-овмӧслысь ним, ин (места).

б) Кӧн, мый сетӧма-кӧртмалӧма, кодлы, дыр-ӧ кежлӧ.

в) Ним мортыслысь, артельыслысь, коді кӧртмалӧма.

3) Водзӧ вылӧ, мӧдысь кежлӧ казна эмбур-овмӧс кӧртмалігӧн, вӧдитчыны сетігӧн, ӧтка мортлы-ӧ, артельлы-ӧ, кыкнанладорыслы — сетысьыслы и босьтысьыслы — колӧ тӧдны, вӧчны тайӧ воддза кык статья серти — кык недель мысти кӧртмалӧм бӧрын страхуйтны.

4) Тайӧ шусьӧ Обязательнӧй неокладнӧй государственнӧй страхованньӧ, вӧчсьӧ медбӧръя лӧсьӧдӧм донъяс (тариф) серти.

Содтӧд: Страхӧвӧй донысь кӧ кӧртмалысьяс государственнӧй учрежденньӧкӧд оз лӧсявны мыйкӧ вӧсна, позьӧ юасьны Госстрах Главнӧй Правленньӧысь (Москва, Кузнецкий мост, 6). Сӧмын сэтысь гижӧд вотӧдз некод оз мездыссьы страхӧвӧйысь.

5) Казеннӧй эмбурӧн, овмӧсӧн вӧдитчысьяс, арендаторъяс, неокладнӧй страхованньӧ мынтысьяc оз вермыны государственнӧй страхуйтысьясӧс кутны, пыкны эмбурсӧ, овмӧссӧ видлалӧмысь, арталӧмысь, гижалӧмысь. Нӧшта на налы тшӧктӧма быд ног отсасьны, уджавны страхованньӧ шуӧм серти.

6) Тайӧ Обисполком тшӧктӧм кывзытӧмысь мыждӧны судтӧг (в администр. порядке): 3 тӧлысь уджӧдӧны Общество уджын либӧ штрапуйтӧны 300 чӧлкӧвӧй зарниӧн. Та кындзи нӧшта пӧжар кӧ лоӧ, кутшӧмкӧ причча кӧ суас страхуйттӧм эмбурсӧ-овмӧссӧ, мыжаяслы лоӧ мынтысьны ассяньыс став вошӧм эмбурсьыс-овмӧссьыс.

Обисполкомса Председатель Сорвачёв.

Секретар Нахлупин.