ВИЧКО ЙЫЛЫСЬ ЮАЛАМ

Лэдзӧй миянлы вичко босьтны!

30‐ӧд лунӧ март тӧлысьын Поёлын (Визин кар улын) граждана делегатъяс вӧлӧсьтувса съезд вылын шуисны босьтны Ягвывса вичко (Поёлын кык вичко) асланым Сӧвет улӧ. Сэтчӧ восьтыны кутшӧмкӧ мастерскӧй: столярнӧй, слесарнӧй, мукӧд пӧлӧсӧс. Та йылысь юалам ыджыдджык удж нуӧданінъяслысь, мед сетасны Ягвывса вичкосӧ Сӧветлы.

Кулӧм йӧзӧс оз нин сэтчӧ дзебны колян арсянь. Кирпич ӧградасӧ ставсӧ гусявлісны. Нинӧм кӧ ӧні сэтчӧ огӧ восьтӧ, вичкоыс весиг оз коль. Ӧні нин кодсюрӧ вичко пельӧссьыс заводитӧмаӧсь кирпичьяссӧ нуавны. Сійӧ вичкоын служба оз нин мун. Антиминсӧ нин кодкӧ гусялӧма. Сы понда и дугдісны служитныыс.

Важӧн нин колі босьтны; ӧні оз ков ӧткажитны. Виччысям ми та йылысь ӧтвет.

С. И.