КАНЬЛЫ ЫДЖЫД ВИДЗ ВОӦМА

Нывбабаяс вермӧны асьнысӧ дорйыны

Емдін карын март 30 лунӧ 1 участокса Народнӧй суддя ордын вӧлӧма суд. Ӧти нывбаба делегатка перйӧма юксьӧм мужиклысь (Пономарёв) челядьыслы отсӧг. Сылӧн мужикыс юксьӧма сыкӧд, вит челядьӧс эновтӧма, мӧдысь гӧтрасьӧма.

Емдін карас буретш вӧлӧма нывбаба делегаткаяслӧн собранньӧ. Сэсянь став делегаткаыс суд вылӧ петӧмаӧсь дорйыны бабаӧс.

Судитчысь делегатка збоя повтӧг дорйӧ асьсӧ мужик мыжалӧмысь. Пономарёв вӧйпӧ, пинялӧ бабаӧс спектакъяс вылӧ да собранньӧяс вылӧ ветлӧдлӧмысь: «Этшаджык пӧ шӧйт спектакъяс, собранньӧяс вылад, сэки челядьыд и оз кутны тшыгъявны».

Делегатка юрсӧ пыркнитӧмӧн шуис: «Ме делегатка, менӧ бӧрйисны сэтчӧ, ме ог дугды собранньӧяс-спектакъяс вылӧ ветлӧдлӧмысь. Миянлысь и дон оз босьтны спектакъяссьыд».

Сы вылӧ Пономарёв шуӧ: «Мися жӧ, тэ асьтӧ генерал ыдждаӧ пуктан. Эн кӧ эськӧ делегаткаад волы, весиг вӧтнад эн куж мекӧд судитчыныыд».

Делегаткаяс ставныс Пономарёвлы висьтавлісны, индалісны сылысь мыжсӧ.

Сы бӧрын суд шуис — Пономарёвлысь перйыны челядьыслы 180 шайт быд во.

Суд бӧрын лыбис ыджыд зык делегаткаяслӧн нимкодьнысла.

Сы пыдди мужикъясӧс ёна шогӧдіс, скӧрмӧдіс. Медъёна нин налӧн лӧгныс петіс делегаткаяс эльтчӧм вылӧ: «Коли пӧ тіян ыджыдалӧм, нартитчӧм миян вылын». — «Каньлы, тыдалӧ, ыджыд видз воис...»

Нывбаба делегаткаяс нимкодьнысла чукӧрӧн карӧд кытшовтісны, сёрнитігтырйи.