ЛЕНИН ДЯДЬ

Челядькӧд вуграсьӧм

Ленин зэв радейтліс посни челядьӧс. Горкиын олігас (бурдӧдчигас) пыр вӧлі накӧд ворсӧ. Челядь Ленинӧс вӧлі шуӧны «Ленин дядьӧн».

Ӧтчыд, воддза гожӧмнас, челядь вӧлі вуграсьӧны Тура ю дорын (матын Горкисянь) — сёльгӧны, сералӧны. Эз и тӧдлыны, бӧрсяньныс на дінӧ матыстчис Ленин.

— Здорово, челядь-пиян! — шуис Ленин.

— О, олан-вылан, Ленин дядьӧ! Лок вуграсям!

— Позьӧ... Со, со тэнсьыд сёйӧ! — пельпомӧдыс вӧрзьӧдіс ӧти детинаӧс.

Детина кыскис бура ыджыд сынпиӧс.

— На, колӧкӧ, Ленин дядь, вугрась менам вугырӧн.

Ленин босьтіс вугыр шайт, вугыр самаліс нидзулӧн, чӧвтіс ваӧ, ачыс пуксис эжӧр пӧвстӧ. Зэв сюся, синсӧ читкыртӧмӧн, видзӧдӧ.

— А-а, кодкӧ дэбӧдӧ! — шуӧ Ленин.

Кыскис сынпиӧс, сы бӧрын — мӧдӧс, коймӧдӧс...

Челядь ставныс матыстчисны Ленин дядь дінӧ, ассьыныс вугыръяснысӧ эновтісны.

— Но, сэсся тырмас талун кежлӧ. Бура ёна тіянкӧд окотаӧс тешиті.

— Ленин дядь!.. Менӧ Микул кӧсйӧ ваӧ бруткывны, — норасьӧ ӧтик.

— Оз ков, другъяс, лёкавны мӧда-мӧд выланыд. Колӧ пыр бурӧн овны. Тіянысь лоасны мӧдысь чорыда революция вӧсна вермасьысьяс! Шаня-бура быдмӧй! Прӧщайтлӧ!

Медбӧръясьыс «Ленин дядькӧд» челядь гажӧдчисны таво рӧштво дырйи, «ёлка» вылын: Ленин нарошнӧ дзик челядь вӧсна (аслас челядьыс абу) вӧчліс Горкиас ёлкасӧ.

Быри ӧні челядьлӧн бур «Ленин дядьныс». Сӧмын некор оз вун налӧн бурӧ велӧдӧмыс, пыр кутасны казьтывны «Ленин дядьӧс».

Энӧ вунӧдӧй, челядь!