ВЛАДИМИР ИЛЬИЧ ЛЕНИН КРЕСТЬЯНА ЙЫЛЫСЬ
Став мувыв уджалысь йӧзъяслӧн югыд вежӧра, ыджыд сьӧлӧма велӧдысьыс, Владимир Ильич Ленин, крестьянатӧ улӧ эз пуктыв. Векисянь крестьяна вылӧ сылӧн вӧлі ыджыд надея. Тӧдӧ ӧд вӧлі Владимир Ильичыд сюсь вежӧрнас, бур сьӧлӧмнас крестьянаыдлысь сьӧкыд, пемыд, сир курыд олӧмсӧ озыръяс кипод улын.
Важысянь казяліс сійӧ ыджыд вежӧрнас: пабрик-заводын уджалысь войтырлы пӧ (рабочӧйяслы) сӧмын крестьянакӧд ӧтувтчӧмӧн позяс мынтысьны лёк олӧмысь, мездысьны сарлӧн озыръяскӧд кыӧм везъясысь. Сідзи и лои. Крестьяна рабочӧйяскӧд ӧтув путкыльтісны, пӧрӧдісны сямтӧм олӧм, вӧтлісны вир юысьясӧс — озыръясӧс, став эмбурсӧ ас кианыс босьтісны. Асьныс лоины ыджыдӧсь и Сӧвет власьт (бӧрйӧм йӧз) лӧсьӧдісны.
Озыръясыд бурӧн эз сетчыны. Кыпӧдісны уджалысь йӧзкӧд ыджыд кось. Сэки бара жӧ Владимир Ильичыд крестьяна дінӧ чукӧстчис: «Ті пӧ ӧні сӧмын верманныд отсавны. Сетӧй пӧ водзӧсӧн Сӧвет власьтыдлы няньтӧ гӧрд салдаттӧ вердны, ыстӧй пӧ пиянтӧ, сувтӧй ставӧн озырлы воча, пӧдтӧй дзикӧдз дыша-горшъясӧс, небыд, еджыд киа вир юысьясӧс-баринъясӧс».
Крестьяна сетісны нянь, мунісны асьныс; пӧдтісны мир сьылі вылын олысьясӧс — баринъясӧс.
Сы бӧрын Сӧвет удж нуӧдысьяслы, пабрик-заводын уджалысьяслы да, Владимир Ильич шуис: «Ковмас пӧ ыджыд уджйӧзтӧ крестьянаыдлы лӧсьӧдчыны мынтыны. Пабрик-заводъясын дорӧй машинаяс; кокньӧдӧй сьӧкыд уджсӧ крестьянинлысь, сетӧй сылы машинаяс, медым оз ковмы сылы став сьӧкыд уджсӧ ас выннас вӧчны. Югдӧдӧй крестьяналысь пемыд керкаяссӧ сутуга кузя мунан биӧн (электричествоӧн). Восьтӧй налысь вежӧрнысӧ, гижӧй, лэдзӧй нигаяс, газетъяс — быдсикаса войтырлы асланыс кывйӧн». Нӧшта сійӧ налы шуис: «Энӧ пӧ лысьтӧ некор крестьяна вылын ыджыдавны (командуйтны): олӧй накӧд вокъяс моз, отсалӧй налы мый верманныд, кыдз кужанныд — пемыдысь, сьӧкыд олӧмысь петны югыдлань, бурлань!»
Рочьяслы шуис: «Ті пӧ, рочьяс, велалӧмныд сар дырйи мукӧд сикас сёрниа йӧз вылын ыджыдавны. Сылы пӧ ӧні пуктӧй пом. Отсалӧй быдсикаса войтырлы Сӧвет власьтсӧ, школаяссӧ лӧсьӧдны асланыс кывйӧн».
Владимир Ильич шуӧм-тшӧктӧм серти миян нин со, Коми Обласьтад, комиӧ пӧртӧны Сӧвет уджтӧ, коми кывйӧн, гӧгӧрвоана кывйӧн кутас сэсся уджавны миян Сӧвет власьтыд. Комиӧн кутас петны газетыд и. Нигаяс пондасны лэдзны комиӧн. Став уджыс мӧдас мунны комиӧн. Сэки ми, коми войтыр, аддзам бурсӧ и омӧльсӧ. Бурсӧ вӧчны отсалам, омӧльсӧ шеныштам, пазӧдам.
Оз ков вунӧдны миянлы, коми войтырлы, Владимир Ильичӧс — бурӧ велӧдысьӧс, югыдлань, долыд олӧмлань туй индысьнымӧс! Тайӧ туй вылын ӧні некод нин оз сулав, оз вочаав. Сӧмын туй вывсьыс оз ков бокӧ кежны, Владимир Ильич велӧдӧм серти овны, олӧм сы шуӧм серти кыпӧдны, вежӧрнымӧс сы тшӧктӧм серти югдӧдны.
Мед пыр олас югыд вежӧра, ыджыд сьӧлӧма Владимир Ильич велӧдӧм серти коми войтыр! Мед коми войтырлӧн югдас вежӧрныс, ыдждас сьӧлӧмныс Владимир Ильич серти!
Парма морт.
