ЛЕНИН

Тайӧ ӧти кывйыс висьталӧ зэв унатор; дзик пыр дум вылад усьӧ сюсь вежӧра морт; пырысь-пыр син водзад сувтӧ Ыджыд Велӧдысь; быттьӧ кылан сылысь гӧлӧссӧ, корӧмсӧ, чуксалӧмсӧ; быттьӧ аддзан сы гӧгӧрысь ставмувывса уджалысь йӧзсӧ: сылы нюжӧдӧмаӧсь кияснысӧ, кевмысьӧны ӧдйӧджык мездыны асьнысӧ озыръяс кипод улысь.

Ленин — ставнас революция, Сӧвет власьт, ставмувывса озыръясӧс путкыльтӧм, му вылӧ коммунизм лӧсьӧдӧм. Со кутшӧм ыджыд миян Ленин!

Талунъя лунӧ 1870-ӧд воын чужліс Владимир Ильич Ленин. Оліс пӧшти ветымын нёль во; комын вит восӧ пуктіс йӧзӧс мездӧм вӧсна. Нэм чӧжыс сійӧ корсьысис туй — петкӧдны сьӧкыд олӧмысь уджалысь йӧзӧс. Шойччывтӧг пыр велӧдіс вермасьны озыръяскӧд. Повтӧм сьӧлӧмнас, ыджыд вежӧрнас, водзмӧстчан мывкыднас Ленин дугдывтӧг чукӧртіс-ӧтувтіс уджалысь йӧзӧс. Сылӧн велӧдӧмыс эз вош, сылӧн уджалӧмыс эз весь ло. Медвойдӧр мездысисны уджалысьяс миян Россияын.

Ленинӧс тӧдӧны быдлаын, став му пасьтаыс. Озыръяс видзӧдісны сы вылӧ лёкӧн, пиньнысӧ курччӧмӧн. Рабочӧйяс, крестьяна, став дзескӧдӧм-увтыртӧм йӧзыс лыддисны Ленинӧс асланыс мездысьӧн, нимыс сылӧн налы вӧлі муса.

Кор кулі Владимир Ильич (таво январ 21-ӧд лунӧ), став уджалысь йӧзыс му вылас бӧрдіс, сэтшӧм жаль налы вӧлі Ленин! Озыръяс, дерт, нимкодясисны сійӧ кулӧм вылӧ.

Кулі Ленин неуна водзджык на, эз вермы виччысьны ассьыс медыджыд удж помасьӧмсӧ — ставмувывса революция лоӧм. Кулі вывті ёна йӧз вӧсна уджалӧмысла — ньӧти жалиттӧг асьсӧ жугӧдіс.

Ачыс кулі. Велӧдӧмыс оз кув! Медсьӧкыд кадыс коли нин бӧрӧ, медыджыд уджсӧ вӧчис ачыс. Ӧні ми огӧ нин вошӧ Ленин туй вылысь. Сылысь заводитӧм уджсӧ нуӧдам водзӧ.

Мый нӧ уджавліс Ленин, мый тшӧктіс сійӧ вӧчны миянлы, кутшӧм заветъяс колис?

Ленин тшӧктіс чорыда-топыда ӧтувтчыны рабочӧйяслы крестьянакӧд: мед пӧ найӧ олісны пыр вокъяс моз, торйӧдчывтӧг.

Ленин тшӧктіс крепыда видзны Коммунист партия, мед эз вӧв сэні некутшӧм ӧтарӧ-мӧдарӧ шатлалӧм.

Ленин тшӧктіс мукӧд пӧлӧс сёрниа йӧзӧс лыддьыны ӧткодьӧн быдӧнкӧд; сетны налы вӧля кыпӧдчыны, велӧдчыны ас кывйӧн, асногса олӧм серти.

Ленин шуліс регыдджык бырӧдны йӧзлысь пемыдлун; мед став йӧзыс вӧліны грамотнӧйӧсь.

Ленин тшӧктіс ӧдйӧнджык нывбабаясӧс сибӧдны Сӧвет уджъяс тшӧтш нуӧдны. Сійӧ шуліс: мед пӧ весиг быд кухарка кужӧ вӧлі удж нуӧдны Сӧветскӧй государствоын.

Зэв ёна Ленин тӧждысьліс крестьяналысь олӧм кокньӧдӧм вӧсна, налысь овмӧссӧ кыпӧдӧм понда.

Медъёна Ленин тшӧктіс тӧждысьны посни челядь понда: сійӧ пыр шуліс, найӧ пӧ лоӧны выль олысьясыс, найӧ пӧ миянлысь заводитӧм уджнымӧс нуасны помӧдзыс. Некор пӧ энӧ вунӧдӧй челядьӧс!

Уна буртор тшӧктіс миянлы вӧчны Ленин!

Куим тӧлысь нин ми уджалім Ленинтӧг. Сійӧ туйысь эгӧ кежӧ, некор огӧ кежӧ! Чорыдджыка на топӧдчим, водзӧ топӧдчам-ӧтувтчам! Ыджыд велӧдысьнымлысь заветъяссӧ некор огӧ вунӧдӧй!