ПӦДДЕЛЬНӦЙЫН

Эжолын

Пӧддельнӧй вӧлӧсьтын эм сикт — Эжов. Татчӧ некод на ветлысь-мунысь служакыд абу волывлӧма. Меным удайтчис вӧчны сэні собранньӧ, волісны морт 30. Висьталӧм бӧрын зэв ёна сёрнитім быдтор йылысь. Ленин кулӧм йылысь некод на абу висьтавлӧма. Зэв Эжовса крестьяна жалитӧны Владимир Ильичӧс.

Сэсся Германияса уджалысь йӧзлы отсалӧм йылысь шуисны: мед Исполком нуӧдас сійӧ уджсӧ кутшӧмкӧ лунӧ быд деревняын.

Коми кыв лӧсьӧдысьясӧс зэв ёна ошкӧны, ыджыд бурсиӧм мӧдӧдӧны. Коми газет радейтӧны.

Сёрнитӧм бӧрын ӧкмыс крестьяна ӧтвылысь тэчсисны «Крестьянскӧй газет» вылӧ, судзӧдны кык газет.

Собранньӧыд эськӧ зэв бура муніс да, сӧмын со школаас челядьыс волывлӧны шоча, оз лэдзны мам-батьыс. Мукӧддырйиыс локтасны, да школаыс кӧдзыд. Ӧні школа йылысь шуисны: быд вӧв вылӧ вайны додь пес — кӧсйысисны вайны аскинас жӧ.

«Безбожник» газет ме вайи Эжолад. Зэв ёна кывзісны, сералісны сійӧс лыддигӧн; зэв пӧ эськӧ лӧсьыдторъяс газетад гижӧны, сӧмын судзӧдныыс сьӧмным абу, сэсся некор лыддьысьныыд дай. Нажӧвитчӧны, шпал вӧчӧны — доныс пӧ ичӧт, ӧдва пӧ кынӧмыд пӧтӧ.

Лаборӧмын.

Сэні кызвыныс «бурсьылысьяс». Газет вылӧ сэні эз гижсьыны, кӧть эськӧ ёна сёрнитім да. Мужикъясыс унджыкыс уджалӧны вӧрын.

Ленинӧс жалитӧны, зэв шогалӧны.

Коми кыв пӧ миянлы колӧ, коминад пӧ ставсӧ гӧгӧрвоам.

А. К.