ӦТАРӦ — ОЗ КОВ, МӦДАРӦ — КОЛӦ
Быдӧнлы колӧ!
Выльгортын пӧшти тӧвбыд эз вӧв пес школа ни, библиотека ни ломтыны; весиг Исполкомсӧ унаысь ломтывлісны пӧвторъясӧн, палич помъясӧн. Велӧдысьяс велӧдчысьяскӧд дӧбельки кынмалісны. Йӧзыд сэсся шуасьӧны: «Омӧля велӧдӧны, челядь дзик нинӧм оз кужны — лыддьыны ни, гижны ни, пыр ӧти пӧлӧс бобӧ-бобӧ висьталӧны комиӧн». — Коді сэн мыжаыс? Кыдзи эськӧ сэтшӧм кынмигас, тірзигас велӧдан да велӧдчан? Рад эськӧ велӧдан (учительыдлы ӧд аслыс сійӧ жӧ колӧ) — да он вермы, кынман... Пондан гражданалысь пес корны, найӧ пыр паныд шуасьӧны: огӧ пӧ вайӧй, велӧдӧны пӧ омӧля дай комиӧн, нига некутшӧмӧс оз сетны, закон божий лыд вылас абу, сӧмын пӧ спектакасьӧны да йӧктӧны, школасӧ пежалӧны. Читальнясьыс пӧ бурыс миянлы нинӧм абу.
Со найӧ кыдзи видзӧдӧны школа-библиотека-спектак вылад!
Ковмас кӧ налы мыйкӧ лыддьыны, гижны, сёрнитны чукӧртчывлігъясӧн либӧ судъяс вылын — асьныс пыр падмӧмаӧсь, нинӧм оз тӧдны, мый колӧ керны; сы вӧсна весиг эз нин пондыны юралысьясӧ пуксьыны, быдӧн мынтӧдчӧны.
Рочӧн лыддьӧмъяс, висьталӧмъяс оз гӧгӧрвоны. Сэсся асьныс жӧ дурскӧны. Ӧти ногӧн, мед оз ло вайны пес, шуӧны: «Комиӧн велӧдӧм миянлы оз ков», мӧд ногӧн, кор рочӧн оз гӧгӧрвоны, тшӧктӧны: «Вай лыддьы, висьтавлы комиӧн!»
Сэсся челядьястӧ велӧдӧмысь пыр увгӧны, павкӧдчӧны: «Нинӧмла найӧс велӧдны, быдмасны да бать-мамтӧ оз пондыны вердны, видз-мутӧ оз пондыны уджавны». Видзӧдан да, эськӧ велӧдчӧмыс аслыныс зэв жӧ колӧ, зэв завидялӧны мукӧд велӧдчӧмъясыд вылас, шуӧны: «Со ӧд сійӧ, велӧдчӧма да, кутшӧм сюсь, збой, быдтор тӧдӧ, аддзӧ, кужӧ, уна жалӧванньӧ босьтӧ, бур йӧз дінӧ сибалӧ». Шеныд кутас: мукӧдыслӧн челядьыс велӧдчӧны нин карса школаын, да и сэтшӧмыс тшӧтш увгӧ, тшӧтш жӧ пестӧ оз вай школаад. Сэтшӧм мортыс буракӧ ылӧдлӧ йӧзтӧ: ассьыс ныв-писӧ велӧдӧ, мукӧдлӧн мед эз велӧдчыны, мед бать-мам кодьыс лоины бӧбӧсь, ӧлукъяс, либӧ сэтшӧмыс кокньыд мывкыда, олӧ йӧз мывкыдӧн.
Коми йӧз! Унаысь ті норасянныд омӧля велӧдӧмысь школаын. Видзӧдлӧй ас выланыд — абу-ӧ асьныд мыжаӧсь, Выльгортса моз? Велӧдчыны быдӧнлы колӧ!
Выльгортса.
