СЕЛЬСКОКӦЗЯЙСТВЕННӦЙ КУРС

Сыктывдінкарын ӧні мунӧ куим вежонся сельскокӧзяйственнӧй курс. Кывзысьясӧс вӧлі корӧма Сыктывдінгӧгӧрса вӧлӧсьтъясысь, кодъяс окотитасны, — куим мортӧн, сэсся нёль мортӧн быд вӧлӧсьтысь и морт ӧкмыс кымын карысь. Кывзысьяс зэв бура кывзӧны висьталӧмсӧ агрономъяслысь. Став бур висьталӧмсӧ налысь старайтчӧны юраныс сюйны. Дерт, эмӧсь на костын омӧля кывзысьяс, сӧмын торкӧны-мешайтчӧны. Сэтшӧмыслы эськӧ эз и ков локныыс, некод эз мырдӧн кор.

Велӧдысьяс-агрономъяс зэв жӧ бура висьталӧны: унджыкыс комиӧн висьталӧны, старайтчӧны ёнджыка, унджык сюйны кывзысьяслы юраныс, уна ног, уна пӧв ӧтитор йылысь висьталасны, мед быдӧн гӧгӧрвоисны.

Татшӧм велӧдӧмыд агрономъяслӧн крестьяналы-кывзысьяслы ёна буртор сетӧ: кыдзи колӧ муяс, видзьяс уджавны, скӧтъяс видзны, мукӧдтор. Кывзысьяс зэв радӧсь локтӧмысла татшӧм курс вылас, шуӧны: «Нинӧм абу жаль, кӧть тайӧ куим недельсӧ гортын мыйкӧ эськӧ уджалі и буртор».

Татшӧм курсъяссӧ эськӧ миян коми йӧзлы быд вӧлӧсьтӧ колӧ лӧсьӧдлыны, мед эськӧ миян унджык том йӧз, тшӧтш олӧма мужикъяс, нывбабаяс кывзісны. Миян Коми Обласьтын зэв на этша агрономъясыд, некытчӧ оз тырмыны. Сэсся миян крестьяна асьныс оз водзмӧстчыны, оз чукӧстны агрономӧс: «Волӧй пӧ миян вӧлӧсьтӧ велӧдны, кыдзи колӧ выль ногӧн видз-му уджавны!» — Та вӧсна оз тӧждысьны, а поп кӧ абу вӧлӧсьтын, сійӧс судзӧдасны кӧть мӧд муысь, сы вылӧ нинӧм оз жалитны.

Вайӧ жӧ думыштлӧй: поп али агроном бурсӧ сетас? Гижлісны газетӧ (№ 80) агроном йылысь: таво тулысын пӧ петасны школаысь агрономъяс. Позьӧ видлыны корлыны кӧть ӧти тӧлысь кежлӧ вӧлӧсьтӧ агрономӧс, ӧти тӧлысь кежлад вӧлӧсьтыдлы уна рӧскод оз ло, сӧмын ӧтик праздникӧ — ыджыд лун дырйи кӧть — поп-дяклы этшаджык пукты!

Ме надейтча — агрономыд уна буртор сетас и ӧти тӧлысьӧн.

А. Л.