КУИМ ВО КОМИ АВТОНОМИЯЛЫ

(Май 5-ӧд лун 1921 волӧн — май 5-ӧд лун 1924 волӧн)

Коми войтырлӧн, коми йӧз пиын уджалысь чукӧръяслӧн оз ков вунӧдны тайӧ лунсӧ: 5-ӧд лун май тӧлысьлысь.

Тайӧ луннас, куим во нин коли, уджалысь коми йӧз ачыс ас вылас лои ыджыд; мунӧ аслас уджалан туйӧд. Партия, том йӧз, нывбаба, велӧдысьяс, уджалысь чукӧръяс — ставныс чорыда дорӧны выль коми олӧм.

Тайӧ жӧ луннас чужліс, 106 во нин сылы, уджалысь йӧзӧс нуӧдысь Карл Маркс, миянӧс велӧдысь.

Быд карын, быд сиктын, грездын колӧ тайӧ лунсӧ паськыда колльӧдны, чорыда, выль ногӧн. Тӧдмавны: мый нин вӧчим, кыдзи-мый вӧчам, кыдзи колӧ бурджыка, ӧдйӧнджыка вӧчны водзӧ! Колӧ сувтӧдны коми спектакльяс, висьтавлыны ставсӧ комиӧн, сьывны комиӧн, мед став уджалысь йӧзыс гӧгӧрвоасны. Сыктывдінкар, дерт, чорыдджыка босьтчас, лунсӧ оз вунӧд.

Тайӧ луныс коми йӧзлӧн — ыджыд лун. Тайӧ луннас чорыда воссис югыд выль туй гаддьӧсь килы, коми уджалысь килы.

Куим воӧн мый сетіс автономия?

Восьтылім, бӧр на кӧсъям восьтыны Сыктывкарӧ ыджыд велӧдчанін — вӧтӧн аддзывтӧмтор. Велӧдчӧ уна сё морт гырысь велӧдчанінъясын. Дорим ассьыным гижӧд чукӧръяс, гижысьясӧс, газетъяс, журналъяс. Велӧдчам асланым коми кыв вылын. Став вын кутӧмсӧ йӧз бердӧ матыстам. Мӧйму вайим вывті уна нянь, таво на бара уна ваям. Уна нянь перйим муысь 1922 воын, чорыда кок йылӧ пондім сувтны.

Артельӧнджык, чукӧрӧн олам, ёнджыка уджалам, гажӧдчам. Тӧварӧн лавкаяс бызгыльтӧны. Уна вӧр, уна ку, пӧтка сетім асланым государстволы, бурдӧдалім важ дойяс. Паськыдджыка, бурджыка ставыс вылӧ видзӧдам, куим вонас ёна нин велалім, пыр на велӧдчам бурджыка овны, ассьыным коми олӧмсӧ дорны водзӧ кежлӧ том йӧзлы.

Мед олас, паськалӧ миян Коми автономия, мед ӧтлаалӧ миянкӧд коми-пермякъясӧс медвойдӧр, тшӧтш став коми сикас йӧзсӧ! Мед содам, сюсьмам вӧр пӧвстын олысь йӧз, кынӧмпӧт вӧсна ёна пессьысь-уджалысь коми йӧз! Мед олас уджалысь йӧзлӧн вынкутӧд миян пиын, Роч муын, став муыс кузя!

Г. П. Ӧ-пи.