РУМЫНИЯ ВОЮЙТНЫ ЛӦСЬӦДЧӦ

Неважӧн Румыниялӧн Сӧвет власьткӧд Вена карын вӧлі сёрни, колӧ вӧлі лӧсьӧдчыны Бессарабия йылысь. Бессарабияыс вӧлі войдӧр Россия бердын, сэсся война дырйи, 1918 воын, Румыния мырдӧн босьтіс Бессарабиятӧ ас улас. Франциялӧн правительствоыс, миян вылӧ лӧгалӧм кузя, тшӧтш шуис: Бессарабия сетны Румыниялы. Бессарабияса йӧзыс кӧсйӧны торйӧдчыны Румынияысь, сибӧдчыны Сӧвет Республика бердӧ.

Румыниякӧд сёрнитігӧн ӧні Россия шуис: колӧ юасьны Бессарабияса йӧзыслысь, кыдзи найӧ асьныс окотитасны овны: Румыниякӧд-ӧ, миянкӧд-ӧ, али гашкӧ кӧсъясны асьныс восьтыны автономия.

Та вылӧ Румыния со кыдзи воча шуис: Бессарабия важӧн нин Румыния улын, сы йылысь сёрнитны нинӧм.

Та вӧсна сэсся нинӧм эз и ло, сёрни Вена карын костті помасис.

Ӧні Румыния кыдз мый вермӧ мырсьӧ мырдӧн ас улас кутны Бессарабиятӧ: ниртчӧ мукӧд государствояскӧд, кодъяс Сӧвет власьт вылӧ лӧгалӧны, медым найӧ сы дор сулаласны; содталӧ войскасӧ, ньӧбалӧ оружйӧяс.

Ми асьным огӧ заводитӧй воюйтны Румыниякӧд. Сійӧ кӧ войнатӧ панас, дерт, ми асьнымӧс доръям. Став йӧзыс тӧдӧны, коді мыжа тані, код вылӧ став мыжыс усяс, война кӧ пансяс Румыниякӧд.