АНГЛИЯКӦД СЁРНИ

Ӧні Лондон карын мунӧ сёрни Сӧвет Россиялӧн Англиякӧд. Сэні лоӧ унатор йылысь лӧсьӧдчыны. Англияса озыръяс (банкиръяс) лыддьӧны миянсянь зэв уна уджйӧз. Найӧ весиг кӧсйӧны, медым пӧ Россияысь позьӧ вӧлі кодлы мый окота нуны мукӧд государствоӧ, мед пӧ сэтчӧ Сӧвет власьт нырсӧ эз сюй!.. Дерт, на ногӧн оз ло, ассьыным Республиканымӧс озыръяслы, адгоршъяслы грабитны огӧ на сетӧй!

Сэсся миянсянь корӧны мынтысьны важ сардырся уджйӧзъясысь. Унатор.

Миян правительство Англиясянь воча корӧ мынтысьны. Англия миянлы уронсӧ вӧчис вывті уна!

Кодарыс вермас — огӧ на тӧдӧ. Вӧлі сӧмын на куим заседанньӧ. Прамӧй сёрнитӧмыс воссяс ыджыд лун бӧрын.

Озыръяс падмӧдӧны сёрнитӧм.

Лондонса газетъяс Россияа-Англияа сёрнитӧм йылысь ӧні зэв ёна гижӧны. Унджык газетыс сэні озыръяс ки улын. Дерт, сэсся гижӧмыд на ногӧн мунӧ сэні.

Газетъяс шуӧны: унджык воча корӧмсӧ пӧ Сӧвет власьтлысь пыдди пуктыны оз ков. Англиялы пӧ большевикъяс вӧсна зэв ыджыд убытка лои, «лишнӧй» кык во пӧ лои воюйтны.

Англияса капиталистъяс «лишнӧй кык во» чирсісны, дрӧбитісны Россиялысь овмӧссӧ. Сэсся ӧні шуӧны асьныс: «Англиялы пӧ убытка зэв ыджыд лои». Коді найӧс тшӧктіс миянкӧд воюйтныыс? Эз-ӧ асьныс кӧсйыны Сӧвет власьтӧс ньылыштны?

Ми войдӧр шулім, ӧні шуам налы: ті кӧ лыддянныд миянсянь уджйӧз, мынтӧй жӧ и миянлысь олӧмсӧ чирсӧмысь!