ПРОКОПЕЙЛЫ!

Миян Кӧджпомын быд во ӧктывлӧны нянь вичкоӧ (шусьӧ ругаӧн) — Прокопей «святӧйлы». Сійӧ няньсӧ ӧктӧны старӧстаяс, тшӧтш налӧн отсасьысьясыс. Со таво на ӧктісны тӧлысь-мӧд сайын. Чукӧрмис сэтысь пуд кызь саяс. Сӧмын кыкӧн и ӧктісны, бокисянь видзӧдысь (контроль) некутшӧм эз вӧв — кӧть сэсся найӧ кытчӧ воштасны сійӧ няньсӧ. Думнаныс эськӧ сетасны — Прокопей «святӧйлы» да. Ӧктӧм бӧртиыс няньыс вичкоас буракӧ эз на волы. Йӧзсяньыс ӧктісны вичкоӧ, а нинӧм шутӧгыд аслыныс и лоӧ — сёйныыд ӧд колӧ и «мувывса святӧйясыдлы»! — тшыг он ов, тыртныд ассьыд рушкутӧ пыр колӧ, небесаса святӧйыд оз шу: «Няньтӧ вай, меным ӧд чукӧртінныд!..»

Веруйтысь йӧзлы колӧ думыштны‐мӧвпыштны: ӧд быд во чукӧртлӧны тадзи няньсӧ, кытчӧ нӧ пыр вошӧ? Гашкӧ, ӧктӧм бӧртиыс пырысь-пыр Прокопейыс небесаас катӧдӧ?... Вичко ломтад пескӧн — пессӧ ваялӧны видз кӧртым вылӧ. Мукӧд рӧскод вылӧ нӧ сійӧ няньсӧ сетны оз позь?

Енлы веруйтысь йӧз, видзӧдлӧй бурджыка та вылӧ! Кузь киа «святӧйыд» ӧд эм зэв уна!