КЕРӦСЫН ОЛӦМ ВОССЬӦ

Тайӧ во вылын Керӧсса крестьяна (Пӧддельнӧй вӧлӧсьтын) ёна босьтчисны олӧм кыпӧдны. Неважӧн на восьтісны и уджалӧ нин кредитнӧй кооперативнӧй тӧварищество, ӧнӧдз пырӧма сэтчӧ 64 морт. Налӧн ставныслӧн дум — выль ногӧн заводитны кӧзяйство уджавны. Корӧмаӧсь клевер да тимофеевка кӧйдысъяс, 32 плуг, литовкаяс карысь Банкысь. Сэсся артельӧн корӧмаӧсь вӧлӧн вартан машина, тӧлӧдчан машина, идзас шыран машина, нывбабаясӧс кокньӧдны судзӧдӧмаӧсь няръясян-нирасян машинаяс, мукӧдтор. Тавосянь думайтӧны кутчысьны многопольеӧ. Сэсся юын эм общественнӧй мельнича, кык пӧставӧн изӧ. Тайӧ воясӧ сійӧ ёна нин омӧльтчис, ӧні сійӧ мельничасӧ кӧсйӧны босьтны кредитнӧй тӧварищество улӧ да бура ремонтируйтны. Февраль тӧлысьын чукӧртчылім да шуим восьтыны Керӧсын общественнӧй лавка. Шленӧ пырӧма 70 кымын морт. Тайӧ уджъяс йылысь ёна мырсис-уджаліс миян Ыджыд Керӧсса школаын велӧдысьыс. Сійӧс ми ыстылім обществосянь Мӧскуаӧ выставка вылӧ. Сэні сійӧ быдтор аддзылӧма. Унаысь аслас школаас миянлы висьтавліс олӧм лэптӧм йылысь. Сэсся ӧд тӧвариществоыдлы нимтӧ «олӧм лэптӧм» жӧ пуктім.

Школатӧ пондісны жӧ гӧгӧрвоны йӧзыд. Песъяс вайисны рӧштво бӧрад бура уна. Судзӧдӧны газетъяс. Ме думӧн, эз вош миян пунт няньыд, мый ӧктылім экскурсантыдлы.

Тӧлкуйтысь.