ЛӦСЬӦДЧӦЙ МАЙ 1-Й ЛУН КЕЖЛӦ!

Кык вежон сӧмын нин коли ставмувывса уджалысь йӧзлӧн ыджыд праздник лунӧдз — Май 1-й лунӧдз.

Колӧ водзвыв лӧсьӧдчыны.

Таво Май 1-й лунӧ колӧ ӧтвылысь быд мортлы петавны ывла вылӧ.

Колӧ гораа шуны миянлы:

— Ми тӧждысям мирӧн овны быд государствоса йӧзкӧд!

Миянлысь Сӧвет власьт бура уна озыр государствояс пыдди пуктыны (ӧткодя) кутісны.

Врагъяс миян колисны ӧні Франция, Америка, Япония.

Франция тшӧктӧ Румыниялы мырдӧн кутны Бессарабия. Франция отсалӧ сьӧмӧн и оружйӧӧн Румыниялы да Польшалы Сӧвет Россия вылӧ уськӧдчыны, кыпӧдны война.

Америка Япониякӧд оз лэдзны Китайлы миянкӧд ӧтувтчыны. Япония мырсьӧ миянлысь муяс (Сахалин, асыввыв Сибыр) мырддьыны.

Быдлаын, став му пасьтаыс мунӧ уджалысь йӧзлӧн озыръяскӧд кось. Быдлаын рабочӧйяс тӧждысьӧны лӧсьӧдны Сӧвет власьт, сӧмын на костын эмӧсь на уна йӧз — мунысьяс озырлань. Найӧ мунӧны гӧгӧрвотӧг, кыскӧны найӧс озыр дор сулалысь нырнуӧдысьясыс (вожди).

Май 1-й лунӧ петасны быд му пельӧсын эмбуртӧмъяс (пролетариат). Найӧ гораа шуасны асланыс нартитысьяслы:

— Тіян олӧмлы миян мышку вылын регыд воас пом!

Найӧ чукӧстасны быдлаӧ, мукӧд мувывса ёртъяслы:

— Мувыв эмбуртӧмъяс, ӧтувтчӧй!

Ми тшӧтш налы воча горӧдам сійӧ луннас:

— Мувыв эмбуртӧмъяс, ми тіянкӧд ӧтвылысь!

— Шыблалӧй, бырӧдӧй ассьыныд нартитысьяснытӧ!