ПӦДДЕЛЬНӦЙ ВӦЛӦСЬТ, КЕРӦССА ОЛӦМ

Важ правительство дырйи на Керӧсса заводитлісны стрӧитны вичко — «вознесенньӧлы», сӧмын войнаяснад кыдзкӧ сувтліс. Ӧні бара кык воӧн стрӧитісны вичко, судзӧдісны попӧс, дякӧс, мӧдісны важ пӧльяс бӧрас енлы юрбитны! Кутшӧм нимкодь аслыныс! Шуӧны: «Ӧні пӧ ми асьным олам!» Вичко нинӧмысь абу гӧль, ставсӧ крестьяна вайӧны, нянь, дӧра, мукӧдтор тырмас. А пескыд мыйта!

Поп рӧдительяс вӧсна тӧждысьӧ.

Воис ыджыд праздник, служба мунӧ, кыдзи шусьӧ «во всю ивановскую!» — Ӧбедня мыйӧн сьывсяс, поп амвон вылӧ штоп петас дай шуас: «Во имя отса и сына. Крестьяна, кыдзи ме видзӧда, ті пондінныд рӧдительясӧс вунӧдны, ваянныд нянь рӧдительяслы зэв кыдйӧсьӧс, тупӧсь пӧжаланныд шаньга кыза. Рӧдительяслы кӧ нянь кӧсъяд пӧжавны, рытнас пызь си пожйӧн колӧ пожнавны, сэсся колӧ йӧлӧн и кӧтны. Няньтӧ сёйигӧн мед пинь костас кыдйыд оз пыр...»

Йӧз кывзӧны, шензьӧны: «Со пӧ миян попыд кутшӧма рӧдительяс пондаыд тӧждысьӧны»...

Ок, ок, ок пемыд, сьӧд йӧзӧй! Дыр-ӧ нӧ ті кутанныд пу додьтӧ куш му кузяыд кыскавныд? Абу ӧмӧй на кад пельпом вывсьыд сьӧкыд изтӧ шыбитны! Видзӧдлӧ гӧгӧр: школаыд тупкысьны кутӧма пес вӧсна, вичко дорыд тырӧма песнас, кыдзи нӧ ті видзӧдад асланыд челядь вылӧ? Чуксала другъясӧс: «Садьмӧй узянінсьыд, петукыд ӧд горӧдіс нин».

В—Н.