КОЛӦ ЛӦСЬӦДНЫ АГРОНОМЪЯСӦС

Революция бӧрын коми йӧз босьтчисны ёна видз-му уджавны. Уджалам эськӧ зэв ёна, сӧмын бурсӧ босьтам этша. Война помасьӧм бӧрын ёна кутісны велӧдчыны. Уна велӧдчӧны ыджыд школаясын агрономъясӧ. Найӧ кутасны велӧдны видз-му уджавны наука серти, кутшӧм кӧйдысӧн колӧ кӧдзны, мукӧдтор.

Миян Коми муын сэтшӧм йӧзыд зэв на этша, колӧ эськӧ мед быд вӧлӧсьтын кӧть ӧтик агрономыд вӧлі; надейнӧ найӧ велӧдӧмӧн муыд унджык бурсӧ ваяс.

Эм сэтшӧм агрономыд Прокопьевскӧй вӧлӧсьтын, зэв частӧ кывсьӧ сылӧн бур вӧчӧмъяс: кооперативъяс восьтӧм, вот чинтӧмаӧсь 20% таво кежлӧ выль ногӧн уджалӧм вӧсна, крестьяна пӧ олӧны бурджыка. Вайӧ думыштламӧй! Позьӧ оз быд вӧлӧсьтын видзны агрономтӧ? Ме ногӧн кӧ, позьӧ. Дерт эськӧ, кутасны шуасьны, кыдз нӧ пӧ видзан, кытысь донсӧ мынтан?

Ми видзам быдлаын попӧс, дякӧс, саломщикӧс, прӧскурняӧс. Найӧ бурсӧ крестьяналы нинӧм оз вӧчны.

Пӧрысь йӧзыд, дерт эськӧ, оз на эновтны найӧс, но том йӧзыд оз нин нуждайтчыны наысь. Позяс ӧд сэтысь кыксӧ кымын чинтыны, сы пыдди видзны агрономӧс; сэсся крестьяна асьныс гӧгӧрвоасны — мукӧдсӧ ыстасны.

8−9-ӧд лунъясын март тӧлысьын чукӧртчылісны Россия пасьтаыс агрономъяс сёрнитны, кыдзи водзӧ уджавны. Сэні М. И. Калинин со мый шуис:

— Таво тулысын петасны школаысь агрономъяс. Сӧмын найӧ полӧны, оз пӧ налы сюр уджыс. Сыысь повны немтор, колӧ первой найӧс сетны крестьяналы, мед найӧ гӧгӧрвоасны бурсӧ агрономыслысь, мед эськӧ агрономыс мужиксӧ кыскас ас дінас. Колӧ пӧ наукасӧ паськӧдны ёнджыка. Ӧні омӧля на олӧны агрономъясыс, воас пӧра, найӧ лоӧны зэв колан йӧз.

Тайӧ чукӧртчылӧм йӧз бӧрйисны комитет водзӧ удж нуӧдны.

Коми войтыр! Миянлы ӧд зэв колӧ агрономыд. Думыштлӧй да сёрнитӧй скодъяс вылын та йылысь. Воӧ ӧд кӧдзан-гӧран пӧра.

В. П.