* * *

Югыд вӧлі, джуджыд вӧлі

Гожся енэжыс.

Ёна сьыліс, гора кыліс

Сэні енмежыс.

Сьыланкывъя, шоныд сывъя

Рытъяс волісны.

Миян зонъяс, миян нывъяс

Сёрӧдз олісны.

Арыс воис, зэра лоис,

Туйным кылаліс.

Садйысь-борйысь кыдз пу корйыс

Кушӧдз гылаліс.

Мича рӧмъяс, баситӧмъяс,

Ӧдйӧ бырисны.

Миян зонъяс, миян нывъяс

Гортӧ пырисны.

Шоныд позйын гозйӧн-гозйӧн

Найӧ кургӧны.

Чужан кывъя сьыланкывъяс

Водзӧ юргӧны.