* * *

Тулысыс воис да, шоналім,

Морӧсысь кизьяссӧ разалім.

Ӧтарӧ-мӧдарӧ видзӧдлім,

Нывъясӧс бара на казялім.

Мичанас эськӧ тай мичаӧсь,

Сӧмын тай печласян кывъяӧсь.

Збодернас эськӧ тай збодерӧсь,

Сӧмын тай рудзалӧм сывъяӧсь.

Авъянас эськӧ тай авъяӧсь,

Сӧмын тай дзузгана биаӧсь.

Варовнас эськӧ тай варолӧсь,

Сӧмын тай чорыдджык киаӧсь.

Лӧсьыднас эськӧ тай лӧсьыдӧсь,

Сӧмын тай дженьыдджык вояӧсь.

Сӧстӧмнас эськӧ тай сӧстӧмӧсь,

Сӧмын тай унаджык дояӧсь.

Но ӧд и медся на коланӧсь,

Но ӧд и медся на оланӧсь,

Миянлы медся на донаӧсь,

Миянлы медся на мусаӧсь.