БАРУНЯ

Код нӧ тайӧ васӧ вайӧ,

Вужинь-вежынь катласьӧ?

Код нӧ тайӧ, код нӧ тайӧ

Зонъяс вылӧ чатрасьӧ?

Ӧтчыдысь пӧ барыня,

Мӧдысьсӧ пӧ баруня.

Барыня-баруня,

Кӧті кока барыня.

Код нӧ тайӧ мышку сайӧ

Паськыд пестер домалӧ?

Код нӧ тайӧ, код нӧ тайӧ

Ягсьыс пувсӧ помалӧ?

Ӧтчыдысь пӧ барыня,

Мӧдысьсӧ пӧ баруня.

Барыня-баруня,

Кӧті кока барыня.

Код нӧ тайӧ Ваньӧ сайӧ

Усьӧ-чеччӧ-тэрмасьӧ?

Код нӧ тайӧ, код нӧ тайӧ

Верӧсыскӧд вермасьӧ?

Ӧтчыдысь пӧ барыня,

Мӧдысьсӧ пӧ баруня.

Барыня-баруня,

Кӧті кока барыня.

Код нӧ тайӧ стенмӧ кайӧ,

Горалӧ и юралӧ?

Код нӧ тайӧ, код нӧ тайӧ

Кыз синвасӧ куралӧ?

Ӧтчыдысь пӧ барыня,

Мӧдысьсӧ пӧ баруня.

Барыня-баруня,

Кӧті кока барыня.

Код нӧ тайӧ райӧ кайӧ,

Сира пӧртсӧ ордйӧдӧ?

Код нӧ тайӧ, код нӧ тайӧ

Став олӧмсӧ бордйӧдӧ?

Ӧтчыдысь пӧ барыня,

Мӧдысьсӧ пӧ баруня.

Барыня-баруня,

Кӧті кока барыня.