ПОМӦСДІН

(Кулӧмдін карулын)

Видзӧ пырӧм.

Виччысьӧны видзӧ пырӧм. Бабаяс гудралӧны-шуталӧны самӧкур шом. 3-ӧд лунӧ мартын воис Помӧсдінӧ карысь (Кулӧмдінысь) милицияысь начальникыс, т. Васильев — корсявны кутіс самӧкур вӧчӧм, сюрис сылы сӧмын ӧтик морт: йӧзлы кывсис самӧкурысь куталӧм да быдӧн шызисны, коді кыдзи слӧймӧ — дзебӧ, кисьталӧ шомъяссӧ. 5-ӧд лунӧ мартын начальникыд, тшӧтш вӧлӧсьтса милиционеркӧд, мунісны Пожӧгӧ. Лои лӧнь, кутысь некод абу. Йӧзыд абу на шомтӧ кисьталӧмаӧсь, ӧдйӧн пуисны. Воссис праздник — «видзӧ пырӧм» пекничасянь. Юӧны пӧрысь и том, ныв и баба, медся вӧлі гажа Выльгорт сиктын. Пекничасянь сэні заводитчис кось ас костаныс, быттьӧ война: косясьӧны пӧрысь и том, черӧн, пуртӧн, вилаясӧн — шыыс кылӧ 2 верст сайӧ Помӧсдінӧдз! 3 лун чӧж косясисны. Унаӧс ранитісны, ӧти мортӧс — Педӧр Петырӧс — кырлалісны кулан выйӧдз. Пельшӧрӧс новлӧдлӧны ранаяс бурдӧдны, попӧс кыскалӧны дарйӧдавны... Со ӧд кутшӧм «гажа»!..

Кувтӧдзыс юӧма.

Том морт, 19 арӧса, Ӧньӧ Вась Скӧрӧдумысь, март 7-ӧд лунӧ вайӧма Помӧсдінӧ пес — «Хлебопродуктлы.» Бӧр гортас мунігӧн, кӧнкӧ буракӧ, самӧкур юӧма да, туй вылад кынмӧма, кулӧма.

Ёна жӧ нин, буракӧ, мортыдлы самӧкур чадыд пырӧма, позьӧ жӧ нин эськӧ гӧгӧрвоны, мый бурсӧ юӧмыд вайӧ!..

Кыдз гар.