ВЫЛЬ КОКНЬӦД КРЕСТЬЯНАЛЫ

Сӧвет власьт пыр тӧждысьӧ, мед эськӧ кыдзкӧ-мыйкӧ крестьяналы кокньыдджык вӧлі овмӧссӧ кыпӧдны. Медся ёна кокньӧдӧ вот мынтӧмысь.

Колян воӧ кӧнсюрӧ (тшӧтш миян Коми Обласьтын) воттӧ перйисны деньгаӧн нин. Тавосянь быдлаын кутасны деньгаӧн босьтны — натураӧн перйӧм оз ло.

Сӧвет власьтыд тӧдӧ: крестьяналы весиг деньганас на воттӧ мынтыны абу зэв кокньыд. Сы вӧсна быд ногыс зільӧ сетны кутшӧмкӧ кокньӧд.

Воддза вояснад миян государство кыкысь деньга удждыліс йӧзыдлысь нянь вылӧ (хлебный заем). Мед крестьяналы вӧлі кокньыдджык вот (сельскохозяйственный налог) мынтыны, государство босьтавліс облигацияясӧн — миян кызвыныс тайӧн и мынтысисны.

Тавосянь нянь вылӧ сэсся государство оз жӧ кут удждысьны. Ставыс пӧрӧ деньгаӧн вӧдитчӧмӧ.

Ӧні Сӧвет власьт лэдзӧ крестьянскӧй заём.

Мый нӧ тайӧ лоӧ?

Тайӧ лоӧ государстволӧн деньга удждӧм крестьяналы кокньӧд вылӧ.

Крестьянскӧй заём лэдзсьӧ кык во да джын кежлӧ (тавося апрель 1 лунсянь декабр 31-ӧд лунӧдз 1926 воӧ), ветымын миллион шайт дон.

Тайӧ заёмыс воана (выигрышный) — став воӧмыс кык миллион шайт дон.

Облигацияясыс (билетъяс) посньыдӧсь: 1 шайта, 3 шайта да 5 шайта, вермас босьтны весиг гӧлиник крестьянин. Позьӧ мӧдлы сетны, позьӧ Сельскокӧзяйственнӧй Банкысь удждысигӧн закладӧ пуктыны куим четверть донсьыс (¾ стоимости).

Медся ыджыд пӧльзаыс (выгода) крестьяналы тайӧ заёмсьыс со кутшӧм: талӧн облигацияыс вузассьӧ 15 прӧчентӧн улӧджык ас донсьыс (ӧти шайта облигация сетасны 85 урысь), вот мынтігӧн босьтасны ас донсьыс (кыдз шусьӧ — «руб на руб»).

Срокыс тырӧм мысти (декабр 31-ӧд лун 1926 во бӧрын) облигацияяссӧ бӧр кутас государство босьтавны (ньӧбавны) ас донсьыс жӧ. Коді вермас сэтчӧдз кутны облигациясӧ — вермас воны (выиграть), сетасны прӧчент, мынтасны тыр дон.

Быдӧнлы колӧ кыдзкӧ-мыйкӧ зільны тайӧ крестьянскӧй заёмас кутчысьны, ньӧбны облигациясӧ, крестьяналы зэв ыджыд пӧльза таысь воас.