ВОССИС ЛЫДДЬЫСЯН КЕРКА

Кӧдзвылын, 4-ӧд десятаын, ӧнӧдз на эз вӧв лыддьысян керка. Ӧти чукӧртчылӧм вылын крестьяна шуисны восьтыны сійӧ керкасӧ, бӧрйисны сы вылӧ куим мортӧс. Эз ков ёна тшӧктӧм сійӧ куим морттӧ, пырысьтӧм-пыр босьтчисны удж бердӧ. Тӧдӧны ӧд: ёна колӧ крестьяналы лыддьысян керка. Медалӧм вылӧ да сэтчӧ кӧлуй лӧсьӧдӧм вылӧ сьӧм чукӧртісны вузасян (тӧргӧвӧй) учрежденньӧясысь, Епоысь, Хлебопродуктысь дай мукӧдысь. Газетъяс, журналъяс, плакатъяс ӧні кежлӧ сетӧ Политпросвет да Обком РКП.

Медъёна лыддьысян керка восьтӧм вылын зілис ёрт Никитин.

Март 8-ӧд лунӧ воссис лыддьысян керка, йӧз вӧлі дзик тырыс. Медводз висьталіс ёрт Дерябин «Ӧнія кад СССР» йылысь. Сэсся вӧлі сёрни сійӧ лунся — уджалысь нывбаба праздник йылысь.

Крестьяналы зэв нимкодь лыддьысян керка. «Тані пӧ миянлы позьӧ нин лыддьысьны, сёрнитны, тӧдны унатор», — шуӧны восьтысьяс юалӧм вылӧ. Тшӧктісны висьтавны зэв ыджыд аттьӧ став тӧргӧвӧй учрежденньӧяслы, кодъяс сьӧмӧн отсалісны лӧсьӧдны лыддьысян керка!