В. И. ЛЫТКИНӦС ДЗЕБӦМ

Войдӧрлун (середаӧ) Сыктывдінкар колльӧдіс-дзебис В. И. Лыткинӧс.

Агитпроп дорӧ дас ӧти час кежлӧ чукӧртчисны: став карса коммунистъяс, комсомолъяс, красноармеечьяс, милиция, профсоюзъяс, прӧстӧй йӧз.

Михайлов висьталіс, мыйла томӧн кулалӧны чакоткаӧн бура уджалысьясыс. Вывті сьӧлӧмсяньныс, асьнысӧ видзтӧг, лун и вой шойччывтӧг коммунистъяс уджалӧны — тӧждысьӧны бур олӧм лӧсьӧдны. Сэсся оз и тӧдлыны — висьмӧны чакоткаӧн. Владимир Игнатьевич Лыткин сідз жӧ: эз тӧдлы революциясянь шойччӧм, пыр пессис революция понда. Шуан кӧ вӧлі: «Вай, другӧ, шойччышт ичӧтика, лолышт кӧть неуна», — Лыткин сӧмын вӧлі шпыньмунас, — оз вӧлі верит, позьӧ-ӧ шойччыны, кор уджыс вывті на уна.

Бӧрвылас Михайлов корис видзны уджалысьясӧс, кодъяслӧн дзоньвидзалуныс кутӧма чинны, тӧждысьны ёнджыка на вӧсна, сетны налы кокньӧд, шойччӧг.

Дас кык часын гортсӧ петкӧдісны Агитпропысь. Музыкаӧн колльӧдісны сэсся кладбище вылӧ. Йӧз вӧлі зэв уна.

Гу вылын висьталісны кыв-мӧд Лыткин йылысь Потапов, Маегов. На бӧрын Лыткинлӧн батьыс сэсся шуис:

— Меным 63 арӧс. Вӧлі менам куим пи, ставныс кулісны. Мӧвпавлі, мися, кута бурджыка овны, лоӧ Володя меным отсӧг. Эз тай ло сідзи. Ӧні шогысла кӧть тшӧтш такӧд орччӧн гуас вода. Колины менам посньыдик нывъяс да торксьӧм вежӧра гӧтыр. Ог тӧд, кыдзи кутам овны...

Потапов сылы воча шуис:

— Кывзы, старик. Тэныд куимнан питӧ вежас коммунист партия, код вӧсна Володяыд ассьыс олӧмсӧ пуктіс. Обком, тшӧтш карса коммунистъяс тэнӧ оз кольны отсӧгтӧг, эн тӧждысь сы понда!

Похороннӧй марш ворсігтырйи В. И. сэсся гуалісны.

Узь долыда, муса другӧй, ёртӧй!